Tuldukuwit

✎ Ma-Boteng Usapan

[Torpe vs. Fckboy. POV ni Torpe. Nalasing kaya ang lalim ng hugot.]

Tol,

hindi ko kayang

makipagkompetensya,

sa kung ano mang depinisyon

ng pag-ibig na nais

niya mahanap.

O kahit pilit itugma

ang pangalan ko,

sa kung sino man

ang ititibok

ng kanyang puso.

Simple lang kasi akong tao.

Walang braces,

na kumikinang kapag ngingiti

at masasabi niyang

"Knight in shining armor".

Walang eyeglasses,

kasi klarong-klaro ko,

kabisado ko na

ang bawat anggulo

ng kanyang mukha,

ang tamis ng kanyang mga tawa

habang magkausap kayong dalawa.

Simple lang kasi ako.

Simple lang ako

pero hindi gagawa ng gago.

Ang alam ko lang,

para akong nakaubos

ng tatlong Kopiko 78o

sa lakas ng kabog ng dibdib

sa tuwing napapadaan siya,

hindi nga ako makalapit,

laging dinadaga.

Kasi itong espayong

aming ginagalawan

ay sobrang lawak,

na kahit man lang mahawakan

ang kanyang kamay

ay imposible.

Tanggap ko.

Pero tol,

hindi sapat na dahilan

ang "Maganda kasi siya,

tapos ganda pa ng katawan."

para sabihin mong

in-love ka na,

kasi hindi tumitibok ang mata.

Kasi tol,

kung gusto mo

lang pala siyang makama,

ako tol,

gusto ko kasi siyang

ma-ka-sa-ma.

Kaso, nauna ka na!

Ang galing mo kasing dumiskarte,

habang ako,

nakaw-tingin lang sa malayo,

natotorpe,

natatakot ma-"wrong move".

Pero kahit sabihin pa nilang

"Hanap ka na lang ng iba,

marami namang isda sa dagat."

Oo.

Alam ko.

Alam kong marami pa,

pero siya,

siya kasi nag-iisa lang.

Siya yung isda

na hindi ko gustong makuha

dahil nabingwit ko lang,

yung kumbaga,

naligaw lang sa pain.

Huhulihin ko siya,

lalanguyin,

hanggang umabot

sa hindi ko na maarok

na parte ng kanyang mundo,

mahuli ko lang.

Dahil nag-iisa lang siya.

Nag-iisa lang.

Huwag mong saktan.

Hindi naman sa sinasabi ko

na hindi mo

talaga siya binibigyan ng halaga,

ang sa akin lang naman,

kapag dumating ang panahon

na paiiyakin mo siya,

sisiguraduhin ko

ako ang unang lalaking

mabibigay ng panyo

sa kanya.