Tuldukuwit

✎ Isuka Bago Isuko

Itagay ang pusong pinapatay,

pinapatay pero pilit binubuhay

sa pag-aasam

na may pag-asa pa

na merong tayo.

Sana, tayo,

ikaw, ako,

pero kung kailan

malapit na ang may tayo,

bigla kang nagmahal ng iba

at ako'y iniwan mo.

Napunta ka sa kanyang piling,

natira ang mga tanong

na hindi ko kayang sagutin,

dahil mahirap sambitin

ang pangalan mo,

sa mga alaalang

aalalahanin ko

at bibitawan,

ibabaon na sa limot.

Mahirap kasing

humingi ng closure,

kung hindi naman

naging tayo.

Isuka bago isuko

ang lungkot ng pusong-lito,

magpapatuloy pa ba

o hihinto na lang sa kanto.

Bakit pa kasi nakilala ka?

Bakit pa kasi nagustuhan ka?

Bakit pa kasi hindi mo agad sinabi,

na yang puso mo pala,

iba na ang nagmamay-ari?

Akala ko pa naman

mamahalin na sana kita.

Nalilito pa sa gagawin,

pero kusa na akong lalayo

kasi walang magiging tayo,

hanggang asa lang ako,

kaya ako ang lulugar sa inyo.

Isusuko kita,

pero hindi ibig sabihin

na wala na

akong nararamdaman.

Dahil hindi agad

magagamot ang sakit

ng pagsuko sa'yo

sa isang pagsuka lang.