لعنة عشقك بقلم رحمه سيد

الفصل الخامس :-

لعنة عشقك

الفصل الخامس :-

صباح اليوم التالي......

دلفت الخادمة الخاصة بــ "جمانـة" تتنهـد بقوة لتُهيئ نفسها للقادم كما اُمـرت.. !

طرقت باب غرفة "اسيـا" لتسمع صوتها تجيب بصوت هادئ :

-ادخل

دلفت "هالة" بهدوء تؤخر قدم وتقدم الاخرى حتى وصلت امام "اسيا" التي سألتها بجدية :

-ايوة كنتي عاوزة حاجة؟!

اومأت هالة مؤكدة.. وبدأت ترسم الحرج الذي فلق بين حروفها وهي تخبرها :

-انا وبعمل الحمام بتاع حضرتك شوفت بلسم، وانا يعني آآ وشي مقشف اوي ومش معايا اجيب زيه.. فممكن احط منه يا هانم ؟!

ابتسمت "اسيـا" وهي ترد ببساطة :

-خديه انا كدة كدة هروح اعمل شوبينج وهجيب منه تاني

اصطنعت هالة الابتسامة التي اغرقتها بالأمتنان وهي تتجه للخارج باحترام :

-شكرا شكرا اوي يا هانم ربنا يزيدك

أكملت "اسيا" تصفيف خصلاتها وهي تتنهـد بهدوء....

غيـاب آدم في عمله أشعرهـا بفـراغ... نعم لم يستحـوذ عليها كليًا.. لم يطمس جوارحها كافة أدراجه.. ولكنه استوطن جزءًا يُذكـر تخشى تأثيره عليه...!!!

بينما في الاسفل وقفت هالة امام "جمانة" في احد اركان القصـر لتمد لها يدها بالبلسم وهي تقول بصوت خفيض :

-عملت زي ما قولتيلي يا هانم وجبت منها البلسم

ابتسمت "جمانة" بخبث وهي تهمس لها مشددة على كل حرف يخرج منها :

-طب اسمعيني كويس اوي وركزي عشان اللي حاي مهم وممكن ادم بيه يتدخل فيه على طول !

بمجرد أن رن بأذنهـا اسم "ادم" إرتعشت وهي تعود للخلف نافية بعنف :

-لا يا هانم لا.. ده ممكن يقتلني فيها !! ده الشيطان يا هانم هو حد بيقدر يهرب من الشيطان ؟!

رد فعلها كان متوقع جدًا بالنسبة لجمانـة.. فـ آدم اسمه كالحريق... يهابه من يراه او يسمع عنه دون ان يمسه حتى !!!

لذلك نهرتها بحدة تشرح لها :

-اسيا هي اللي هتعمل كل حاجة والخادمين هيكونوا شاهدين انها هي اللي هزقتك ودلقت عليكِ البلسم واتكبرت عليكِ.. وبكدة انتِ هتبقي المظلومة مش الظالمة، وعشان تضمني حقك اكتر اول ما تخلص الليلة دي ممكن تمشي من القصر بدون ما حد يعرف

سألتها هالة بقلق وهي تفكر ؛

-والحرس يا هانم؟؟ دول محدش بيعدي من تحت ايديهم

-هتقوليلهم رايحة اشتري حاجة لجمانة هانم، وانا محذراهم ملهمش دعوة بالخدم بتوعي فمتقلقيش وهديكِ قرشين حلوين تظبطي نفسك بيهم