رووف- بدلت وزينت رحت للحلاق. كتله ضبطني سلمت روحي مغمض. فتحت عيني لكيتني غير شي سواه حفر مثل ماتحبه هي اباوعله يشسوره بشعري ويحبه ليوره. بين الشكار بي خلاله جل بحياتي ممسويها. تحديد سكسوكه ورجعت للبيتي سبحت لبست قميصي الجابته رفيف جان لونه كحلي واطرافه صماكي تخبل عليه فرات وكعلي دخيل دم يريدني انطيهيا لو ما رفيف جايبتله واحد ميفك ياخه طلعت لبيت عمي دكيت الباب عمي بالحديقه ديرش الزرع
ها عمي الله يساعدك
هاااا رووف الحمد عالسلامه افتح الباب وفوت تعال ولك مشتاقيلك
طبيت سلمت عليه يباوعلي يبتسم بمكر ضرب على كتفي يضحك
طالع جديد يول
ههه والله سوالف فرات بعد
هاا وصرنا ناخذ حجايه بعد
ههههه احجي واباوع لباب المطبخ. روحي محتركه شوق
شونها عينك عمي
الحمد لله عمي. متندم لان ممسويها قبل
هاي هي الحمد لله كلشي بوكته حلو
اكعد اكعد نشرب كهوه
ها اي. اي اي. ماشي جريت البنطرون وكعدت وبالي كله جوه باوعلي كال
اي رفيف شونها رجلها
بخير الحمد لله تدري بيها سباعيه
الحمد لله
اا عمي شونهم البنات مرت عمي رويده شخبارها
والله رويده الحمد لله زينه بس بعدها رافضتنا تحب تسوي كلشي لنفسها بيدها البارحه وديناها طبيب كال الحمد لله بتحسن والعلاج قلله بس كلام ماكو من كلت للدكتور شوكت كال احتمال هي متريد تحجي بعد
بقيت صافن شون يعني
كال الجهاز الصواي سليم عدها بس مثل العده صارت رد فعل ميريد يحجي
فعلا بالبدايه كانت تكول ماما. هي وراها راح الصوت تماما باوعت مستغرب عمي يحجي ور نفس وينصي ويرجع يرفع راسه جابت هدوره الكهوه بستها من راسها تباوعلي وتبتسم
طالع تسبه سليم
هههه هو هم مثل اخويه
ها صاير تحشش
ههههه مكابل فرات سبوع. شترديني
اي خرب يومك فرات فلم
هههه احجي واباوع عالمطبخ راحت وكمل عمي
عمي زين الحاله تكررت
اي البارحه صارت عدها وفكت كامت متحجي من تجيها بس احنا من تنضرب رجلها بقوه بالتاج نسمع ونركض عليها واني بس اطب تدفعني. متريدني حاولت اعتذر منها طبيت حجيت وياها وحدنا متتقبلني لو تخلي ايدها على اذنها لو تبجي بقوه واني اخاف اضغط عليها والدمتور مانع هالشي
