HE Is My Boy Friend

⁦☄️⁦ بارت 6

روان مرت بفترة كحلة عرفت الاكتئاب واش هو تاع الصح ملي راح ايهاب حست ان حياتها ما عندها حتى معنى ... الذنب  و تأنيب الضمير لي خلاها تحس هاكا مي c'est trop tard
       كان جاز شهر ملي راح ايهاب و واحد ما سمع خبر عليه حتى باباه لي كتافو واصلين ماعرفش وين راح ....هدد السكريتير هكاك و ما نطق بحتى كلمة ...

سكريتير مور ما راح ايهاب استقال و بعد على سي مراد ..
نرجعوا لروان شهر ما خرجتش من دار حبست قرايتها و حياتها ...ماكلة رقاد حتى قسرة و ماتقسرش دار سماطات مقابلة غير تاقة تستنا في ايهاب يدخل في اي دقيقة ...

كي عادة كانت قاعدة في بيتها تسمع دقديق في الباب ما ردتش ...حل الباب و دخل ..
سفيان :" سلام روان ...نقدر ندخل ...
ماردتش ألوغ دخل ..
قعد مقابلها ...و هي ماحبتش تشوف فيه ...
سفيان :" لوقتاش  تقعدي هاكا !؟ هذا شي ماراحش يردوا ...

تعمرو عينيها دموع و شافت فيه ..
روان :" نستهل كتر من هاكا ..لازم نعاقب روحي ..في وقت لي حتاجني فيه بعدت عليه و زدت دخلت في لعب باباه لي كان علابالي مليح بلي ايهاب ميحبووووش و...
سفيان :" شوووت خلاص. ..نتي حبيتي صلاحو صح ؟
روان :" صح
سفيان :" خلاص مالا علاه تعاقبي روحك على حاجة استغلك فيها باباه ؟
روان :" بصح ماكانش لازم ندخلو في لعبوا !!

سفيان:" واش درتي نتي ..نتي قتلتي جلال؟ نتي خططتي تبعديه منا؟ لالا ..

روان :" بصح ..

قاطعها سفيان :" ماكاش بصح لازم تفهمي بلي ماشي نتي السبة حتى و غلطتي ماشي الغلطة تاعك لي دمرااتو والا خلاتو يروح دااكور زعاااف من باباه غمضلو عينيه لدرجة راح ما شافش موراه ...صدقيني لوكان اي واحد كان في بلاصتو يدير نفس الحاجة ...

روان :" ماشي أنا السبة ؟!

سفيان :" بيان سور لالا
تبسمت و دنات ليه عنقااااتو وهو يبس في بلاصتوا حس وجه راه يغلي
جبدت روحها و بدات تمسح في دموعها
روان :" مرسي سفيان ...
دار يدو على شعرها و خربهولها بلعقل . .

سفيان :" جاز شهر و انا رايح جاي تقوليلي مرسي ..نن ماتقبلهااش هاكا برك ...

روان :" واش حاب مالا ؟

سفيان :" ولي لقرايتك ..

روان :" صعيبة ..لافاك هذيك و طريقها وكلاصة تفكرني فيه ...

سفيان :" تهدري عليه تقول مات ...روان سيد حي بعد ليامات و يولي يولي قضية وقت ...دنيا ماتحبس لحتى  واحد يكون واش يكون  .. مهم غدوة نكون نستنا فيك لتحت على 7 انا نلحقك و نردك آخر كلام مانسحقش  اعتراض ....