لم يحن الوقت بعد

الفصل الثالث والعشرون: سأعاقبك

صدمت ليلى كثيرا من هول ما يقوله حمزة، لذلك نظرت إليه لثوان قليلة كي تستوعب ما تفوه به ثم قالت في دهشة ممزوجة ببعض الغضب:

إيه الكلام إللي حضرتك بتقوله ده يا أستاذ حمزة؟ ريم مستحيل تقتل أي حد، صحيح هي مجنونة وبتعمل أي حاجة بتخطر على بالها في أي وقت ومن غير ما تعمل حساب لأي حاجة ولا لأي حد بس هي مستحيل تقتل أي حد بالبساطة دي.

فقال حمزة في عصبية:

لا هي عملت كدة يا مدام ليلى ولو حضرتك مش مصدقاني تقدري تسألي الراجل ده.

ثم أشار إلى ذلك الرجل وقال له في غضب:

يلا تفضل وقول كل إللي حصل.

فقال الرجل في توتر بالغ:

من فترة الست ريم اتصلت بيا وقالت لي أنها عايزاني في مهمة هأكسب من وراها فلوس كتير أوي، فلما سألتها عن نوع المهمة قالت لي هتخبط واحدة بالعربية، فقلت خلاص ما فيش مشكلة طالما هآخد فلوس كتير، وبعدها بعتت لي كل تحركاتها وصورة ليها علشان أعرفها، فاستنيت الوقت المناسب علشان أنفذ ولما جه الوقت نفذت المهمة وقبضت التمن، بس هو ده كل إللي حصل والله يا ست هانم.

نظر حمزة إلى ليلى التي كانت تطالع بصمت وذهول ريم تارة وحمزة تارة أخرى ثم نظرت إلى ريم في النهاية وقالت وهي تتمنى أن يكون ما قيل غير صحيح:

ريم قولي لي الكلام ده مظبوط؟ أنت عملتي كدة فعلا؟

لم تجرؤ ريم على النظر إلى والدتها وبالتالي لم تقل أي شيء، فأعادت ليلى سؤالها مرة أخرى في غضب، وهنا نظرت ريم إلى الجميع وقالت في اندفاع:

أنا ما كنتش أقصد إللي هو بيقول عليها دي أنا كنت أقصد حلا.

في الشركة اشتعل الشجار بين حازم وزياد، وكان الموظف الذي هاتف سامر يحاول بكل الطرق أن يبعدهما عن بعضهما، فكان حازم يريد ذلك ولكن زياد لم يمنحه فرصة للابتعاد، فأخذ يوجه له كلاما سيئا مما جعل حازم رفض فكرة الابتعاد عنه، فأخذ يضربه بقسوة وهو يقول:

أنت عايز مني إييييييييه؟ سيبني في حااااااالي بقى.

فقال زياد في حقد وهو يوجه له لكمة قوية في معدته أسقطته على الأرض:

طول عمرك بتاخد مني كل حاااااااجة من لما كنا صغيرين، أخدت كل حاااااااجة الصحاااااب والاهتمااااام والشغل وكل حاااااااجة كانت المفروض إنها تكون من حقي، فاكر مازن صاحبي إللي قدرت تبعده عني بسبب حاجة ما ليش دخل بيها وبقى صاحبك أنت مع أنه كان أقرب صاحب ليا، فاكر لما كنا بننجح في المدرسة كنت بتطلع الأول علينا مع أن أنا إللي كان لازم أنجح وبتقدير أعلى منك، ده أنت في الشغل حتى أخدت اهتمام سامر وبقى يسلمك كل حاجة وبقيت بتحضر معاه كل الاجتماعات، ولما أخد منك موقف وقرر يتصرف معاك بالشكل إللي أنت تستاهله جاي علشان تسترضيه؟ إيه إللي جااااااابك مش هو رفدك وريحني منك؟