Marmalade [Own Creation]

31

Unicode

သူ့ကျောင်းပိတ်ရက်များကို ပုံမှန်အတိုင်းဖြစ်လာလိမ့်မည်ဟု အားသစ်ထင်ခဲ့သည်။

"အန်ကယ်နဲ့အန်တီက ဘယ်လိုနေလဲ"

"အင်း... သူတို့က သူတစ်နေရာမှာ အသက်ရှင်နေတာက ကောင်းတာပေါ့လို့ပြောကြတယ်"

ခါတိုင်းကျောင်းပိတ်ရက်များကို အိမ်တွင်းအောင်းခြင်းဖြင့် ကျော်ဖြတ်ရသော်လည်း ယခု ကျောင်းပိတ်ရက်တွင် အားသစ် အပြင်ထွက်ဖြစ်၏။

"ဒါလေးနဲ့ပြီးသွားတာကို စိတ်ထဲမှာတစ်မျိုးပဲ သူတို့ကို မပြောဘဲ လုပ်လိုက်တာကို အပြစ်မတင် ကြဘူး"

မိဘများကို သူ့အမြွှာအကြောင်းပြောပြချိန်တွင် ရရှိလာသည့် တုံ့ပြန်မှုနှင့်ပတ်သက်ပြီး အားသစ်စိတ် ထဲတွင် ကျေနပ်မှုမရှိနေခဲ့။ သူ့စိတ်ထဲတွင် မိဘများ၏ တုံ့ပြန်မှုက အလွန်တည်ငြိမ်လွန်းနေပြီး တစ်ဖက်သူကို အရေးမစိုက်ဟု ခံစားနေရသည်။ ထို့ကြောင့် နိုင်းချင်းနှင့်အပြင်ထွက်လာသည့်အချိန်တွင် ခံစားနေရခြင်း များကို ထုတ်ပြောပြဖြစ်ခြင်းဖြစ်သည်။

"သူတို့ကပဲ သူ့ကိုအချိန်အကြာကြီးဆွဲခေါ်ထားခဲ့ကြတာမဟုတ်လား ဒီတိုင်း ဪ ဟုတ်လား ဆိုတာ မျိုးကြီးက သွေးမအေးလွန်းနေဘူးလား"

သူ့ပခုံးပေါ်မှီပြီးပြောနေသည့် အားသစ်ခေါင်းကို နိုင်းချင်းပြန်မှီချသည်။ ဆိုင်ကယ်စီးလာသဖြင့် ပွယောင်းယောင်းဖြစ်နေသည့် ဆံပင်များက ကြောင်မွှေးအိအိပေါ်သို့ ခေါင်းအပ်ထားသည့် ခံစားချက်မျိုးကို ခံစားရစေ၏။

"သူတို့က အဆိုးဆုံးကို တွေးထားပြီးသားလေ... နောက်ပြီး... အစ်ကို့ရှေ့မှာမို့ သူတို့တွေ သန်မာ ချင်ယောင်ဆောင်တာနေမှာပေါ့"

"ဒါပေမဲ့လည်း..."

"လူကြီးတွေက တစ်ခါခါကျရင် ဘာတွေတွေးမှန်းမသိပါဘူး ဒါကြောင့် စိတ်ထဲမထားပါနဲ့ နောက်ပြီး..."

အားသစ်ခေါင်းကို သူ လှည့်နမ်းချိန်တွင် အားသစ်သုံးနေကျ ခေါင်းလျှော်ရည်နံ့ကို နိုင်းချင်းရလိုက်၏။ စိတ်ငြိမ်ပြီး လူအလာနည်းသော ပိတ်ထားသည့် ကစားကွင်းဟောင်းတစ်ခု၊ မြို့ဟောင်းတစ်မြို့လုံးကို မြင်နိုင် သည့် ခုံတန်း၊ အပင်တချို့နှင့် အလေ့ကျပေါက်သော ပန်းပင်တချို့ကရသည့် အမွှေးနံ့နှင့် ငှက်တချို့မြည်သံက သူတို့နှစ်ဦးအတွက် Perfect Date Spot ကို ဖြစ်စေသည်။ နားအေးပါးအေး သူလာနေကျနေရာတစ်ခုကို တစ်ချိန်မှာ တစ်စုံတစ်ယောက်နှင့်အတူ လာဖြစ်လိမ့်မည်ဟု သူ မတွေးဖူးခဲ့။