Feng Yin Tian Xia မြန်မာဘာသာပြန် စဆုံး

အပိုင်း (၄၉) ဖြစ်နိုင်ရင် ကိုယ်ပဲခံစားပေးလိုက်ချင်တယ်

အပိုင်း (၄၉) ဖြစ်နိုင်ရင် ကိုယ်ပဲခံစားပေးလိုက်ချင်တယ်

ဒီအစီအစဉ်ကို လွန်ခဲ့တဲ့နှစ်ပေါင်းများစွာတည်းက သူ ရေးဆွဲပြင်ဆင်ထားတာဖြစ်လောက်တယ်။ ကိုယ်လုပ်တော်ယဲ့ဆီကနေ သူ ဒီလက်ကောက်လက်ခံရရှိခဲ့တဲ့ လွန်ခဲ့တဲ့၂နှစ်တည်းက ပြင်ဆင်ထားတာဖြစ်နိုင်တယ်။ သူ့ရဲ့အကြံအစည်အောင်မြင်ဖို့အတွက် သူမ အဆိပ်မိဖို့လိုအပ်တယ်။

သို့့သော် အကယ်၍များ သူမသာ မြောက်ပိုင်းမြို့တော်မှာ ပေါ်မလာခဲ့ဘူးဆိုရင် သူ့ရဲ့အသုံးချခံရွှေ့ကွက်ဖြစ်မည့်သူက ဘယ်သူများဖြစ်လိမ့်မလဲ? သူမ တကယ်ပဲသိချင်မိသွား၏၊ သူမက ဘယ်သူ့ရဲ့အစားထိုးဖြစ်ခဲ့တာလဲ?

"ရှင်ဘာလို့ ကျွန်မကိုရွေးခဲ့တာလဲ? ကျွန်မမှာ မိသားစု၊ နောက်ခံအင်အားတစ်ခုမှ မရှိလို့များလား? ဒါမှမဟုတ် ရှင် တစ်ချက်လေးမှပြန်မစဉ်းစားဘဲ ကျွန်မကိုအသုံးချခဲ့တာက ရှင့်ကိုကူညီပေးမယ်လို့ပြောထားတဲ့ ကျွန်မရဲ့ကတိစကားကြောင့်လား?" နာကျည်းမှုအစရှိသည်တို့ မပါဝင်သောဖျော့တော့တဲ့အသံဖြင့် ဟွားကျူ့ယွီ ဖြည်းညှင်းစွာမေးလိုက်တယ်။ လွန်ခဲ့တဲ့ရက်သတ္တပတ်တွေမှာ သူမ အများကြီးတွေ့ကြုံခံစားခဲ့ရတာမို့ တစ်ခြားသူတွေ သူမကို အထင်သေးစွာဆက်ဆံကြတာကို ကျင့်သားရနေပါပြီ။ လွန်ခဲ့တဲ့၂ရက်လုံးလုံး ရှောင်ယင် သူမကို မမျှော်မှန်းနိုင်စွာ ကောင်းကောင်းမွန်မွန်ဆက်ဆံလာတဲ့အချိန်မှာ သူမ ကျင့်သားမရနိုင်ဖြစ်နေတော့သည်။

သူ့ရဲ့ရင်ခွင်ထဲမှာ သူမကိုထွေးပွေ့ထားရင်း ရှောင်ယင် ဆက်လက်လျှောက်လှမ်းနေ၍ သူမ ပိုပြီးသက်တောင့်သက်သာဖြစ်အောင် သူ့ရဲ့ထွေးပွေ့မှုကို အနည်းငယ်လျော့ချပစ်လိုက်တယ်။

"ငါ မင်းကိုခံစားရအောင် လုပ်မိသွားပြီ" ရှောင်ယင် ခေါင်းလေးငုံ့ပြီးဆိုလာ၏၊ ထို့နောက် အသာအယာ သက်ပြင်းချလေသည်။ "မင်းမှာ မိသားစုမရှိလို့၊ ဒါမှမဟုတ် ငါ့ကိုပေးထားတဲ့မင်းရဲ့ကတိစကားကြောင့် ငါ မင်းကို ရွေးချယ်ခဲ့တာမဟုတ်ဘူး၊ ဒီတစ်ခေါက် ငါ့မှာ တကယ်ပဲရွေးချယ်စရာမရှိတော့ဘူး၊ ငါ မင်းကို အမှန်တကယ်ချစ်မြတ်နိုးနေတယ်လို့ ဖခမည်းတော်ယုံကြည်သွားအောင် မင်းလိုမိန်းကလေးမျိုးတစ်ယောက်ကသာ လုပ်ဆောင်နိုင်စွမ်းရှိမှာ၊ အဲ့ဒီနေရာမှာ တစ်ခြားသူတစ်ယောက်ဆိုရင် ဒီအစီအစဉ် အောင်မြင်မှာမဟုတ်ဘူး"