مواعيد التنزيل يوم بعد يوم‼🔥❤
#القوارير_🛡
🌼الحلقة الاولى 🌼
في سنة2014
___________
زينة كانت مقعمزة في دارها علي السرير وشادة بنتها في غمرها وتسمع في صوت الاغاني اللي مخلي الحوش يهز من قوتهم
الماس :ماما نبي شيشة
زينة :نعطيك كيكة ؟
الماس : لا مامبيس نبي شيشة🥺
الماس :يابنتي الشيشة برا وبرا في غولة مانقدرش نطلع انتي ممي توا كيكة وبعدين نعطيك شيشة باهي
الماس :باهي قولي لي بابا جيبها
زينة:باابا مش فاضي حبيبتي عنده راجل
الماس بدت تبكي :لا لا اني نبي شيشة توا توا
زينة:استغفر الله ياربي حتى اني حمارة كيف ننساهاا خلاص يا ماما اسكتي وتو نطلع انجيبها وانجي باهي نني هني انتي هي
حطت بنتها ع السرير ولبسة عباية ووشاح وطلعت حطت راسها لوطة وخطمت بسرعة خشت للكوجينة خدت شيشة بنتها والحليب والكتل متع المية دارتهم في صفرة وجت بتطلع لقت واحد واقف قدامها انخلعت
الراجل :والله وطلع الحمار خيري عنده مرا حلوا زيك ومش طالع عليه
زينة ترعش :حول بالله عليك وخليني نطلع
الراجل ابتسم ووسعلها الطريق :تفضلي يا عسل
زينة طلعت تجري وخشت للدار وصكرت الباب بلمفتاح
حطت الصفرة وراها ومشت تجري دفت الشكماجة علي الباب
الماس:ماما شيشة
زينة تبكي :باهي يا ماما باهي
حولت العباية ودارت لي بنتها شيشة وعطتهالها وقعمزت ع السرير جنبها وتبكي
شوية وبدت تسمع ف الباب يطقطق
خافت وناضت تجري وقفت جنب الباب :م مني 😥
الراجل :افتحي افتحي اني خيري
زينة عرفاته مش صوته :مش حنفتح ولوسمحت خليني ف حالي تربح
الراجل :قتلك افتحي خير مانكسر الباب
زينة تلفتت بخوف وبدت تجبد في الكمادينوات وتحط فيهم قدام الشكماجة اللي ع الباب
الراجل قعد يقربع ف الباب وبعدين يأس ومشي
قعدت زينة لا قريب ادان الفجر وهي مقعمزة جنب الباب وخايفة حد يهده عليها
شوية وتصكرو الاغاني عرفتهم بيرقدو طلعت ساكو حطت فيه شوية حوايج ليها ولي بنتها وحطتلها حليبها ومرضعتها وشمالاتها ومشت غيرت لي بنتها حوايجها
وتلفتت جيهت الدولاب فتحت اخر فردة من جيهة اليسار وقعدة تقلب ف الحوايج طلعت قفطان مطبق فتحاته طاحو منه زوز حدايد دهب وخاتم خدتهم وطلعت جواز سفرها وورق بنتها دستهم ومشت قعمزت جنب بنتها ع السرير وتراجي اتجي الساعة ثمانية باش تطلع
_____________
ف مكان تاني
براء كانت راقدة ع السرير سمعت صوت رصاص فتحت عيونها وتنهدت بي ملل
براء:ياربي امتى بنرتاح اني من ام بي سي اكشن اللي عايشة فيها بس نفخ نفخ وحطت المخدة فوق راسها وغمت روحها
طقطق باب الدار
براء :انشاء الله انموت ونرتااح ياربي .. منيييييي ؟
الشغالة:مدام مدير كبير قال تعالي توا فورا
براء:ويلحقني الحيوان هدا يارب
ناضت دفت الغطاء وقفت خشت للحمام وساوت شعرها وطلعت
نزلت من الدروج تشبح ف الدنيا معبيا رجالة لوطة شبحوها نازلة طلعو
عمار شبحلها:صباح الخير
براء شقلبت عيونها :صباح النور
عمار:مش قتلك معش تنزلي هكي اني ولا
براء :حوشي وبتغملي قلبي اني نلبس زي مايعجبني وننزل كيف مايعجبني
عمار جبدها من ايدها:باهي اهدا يا وحش صبح
براء:باهي خيرك منوضني توا شن تبي
عمار مسحلها علي خدها :عندك مهمة يا عمري
براء دفتله ايده :اكيد لا
عمار:مافيش غيرك يقدر ايديرها بتوصلي شوية بضاعة لي حوش واحد حلوف رقد ونسي ان عنده خدمة
براء:مية مرا قتلك معش نبي انوصل شي فكني منها خدمتكم متع العفن
عمار:يعني ماتبيش تسمعي الكلام
براء:وشن بيصير لو مسمعتش
عمار :انتي عارفة كويس شن بيصير ولا انفكرك تاني في خوك الحلو
براء غمضت عيونها :حيجي يوم وحتندم علي كل شي درته معاي
عمار ضحك:بري وتي روحك بسرعة قاعدة الساعة سبعة كيف جت البضاعة لازم توصل لي مولاها الساعة تسعة يعني ماوصلتي انتي ف الحمار خيري لين جت الثمانية
براء مشت وماردتش عليه ركبت فوق لبسة عباية ووشاح ونزلت
عمار :اطلعي تو بسام يعطيك العنوان وردي بالك كويس ف الطريق
براء :عارفاته الموشح هدا وحافضاته
عمار قرب باسها من خدها وعطاها مسدس :ردي بالك علي روحك
براء خداته وضحكت بهزوة :علي اساس هاماتك روحي ومشت طلعت
عمار تلفت وهوا يضحك :جيبو الفطووور
