ချစ်မိခဲ့သည်ဆိုရာဝယ် (OR) ချစ်သောမမနီ(Completed)

Part {23} ဇာတ်သိမ်းပိုင်း

ချစ်မိခဲ့သည်ဆိုရာဝယ် (or)ချစ်သောမမနီ
ဇာတ်သိမ်းပိုင်း

ပုလဲလုံးဖြူဖြူကလေးများစီတန်းထားသည့်အနီရောင်လည်ပိတ်ရင်ဖုံးလက်တိုကလေးအားအနီရောင်ချည်ထည်လုံချည်ကလေးဖြင့်တွဲဝတ်ထားပြီး လက်ထဲတွင် နှင်းဆီနီနီပန်းစည်းအားကိုင်ထားသည့် ဝသုန့်ထံတွင် အိမ်ထဲရှိလူများ၏အကြည့်တို့မှာဆိုက်ရောက်နေတော့သည်။တွေးထင်မထားလို့ထင်ရဲ့ မမနီမျက်ဝန်းတို့မှာ ဝိုင်းစက်ကာ အံ့သြဟန်ဖြစ်နေလေသည်။ဒီတစ်ကြိမ်မှာတော့ မမနီဟာ သူ့ခံစားချက်တွေကို မဖုံးကွယ်နိုင်တော့။အကုန်လုံးထဲတွင်မမနီအမေရဲ့အကြည့်တို့မှာ ဝသုန့်ထံစူးစူးရဲရဲပင်။ငြိမ်သက်မှင်သက်နေသည့်လူများကြားထဲ ဧပရယ်ဟာဝသုန့်အနားရောက်လာလေသည်။ထိုအခါမှ မမနီအမေထံသို့ရောက်နေသည့်အကြည့်တို့အားနေရာလွှဲလိုက်မိသည်။ဝသုန်နှင့်မမနီအား ဒီအခြေအနေရောက်အောင်လုပ်ခဲ့တဲ့သူမလို့ ပြုံးမပြနိုင်ခဲ့ပေ။မမနီဟာ ထိုနှောင်ကြိုးတွေကြောင့်ဝသုန့်အား စွန့်ခွာထားခဲ့သည်မှန်းသိရတော့ နာကျင်ရသည်။မမနီအား ဖိအားပေးခဲ့သည့် ထိုလူများအားလည်း နာကျည်းရသည်။
"နွေ.."
"နွေ့အမျိုးသမီးငယ်လေး သိပ်လှတယ် အဲ့တာကြောင့်ပဲ အဆုံးရှုံးမခံနိုင်တာ"
နားနားကပ်ကာပြောလိုက်သည့်စကားတို့ကြောင့်ကာလာမခြယ်ထားသည့်မမနီပါးမို့မို့မှာ ပန်းရောင်သမ်းသွားရသည်။တစ်ဖက်သို့မျက်နှာချက်ချင်းလွှဲကာ နေရခက်နေပုံမှာ အသည်းယားစရာ။
"နီနီ တပည့်လေးလား ချစ်စရာလေးပဲနော်"
ဝသုန့်နားအားလာရပ်ရင်းပြောလိုက်သူမှာ မမနီရဲ့မတော်ရသေးတဲ့ယောက္ခမပင်။အပြုံးပန်းတွေဝေနေပုံမှာ တကယ့်ကိုပျော်ရွှင်နေပုံပင်။တကယ်ဆို ဒီနေရာက မေမေဖြစ်သင့်တာမလား။ဝသုန့်မေမေဖြစ်သင့်တာလေ။မမနီနဲ့ဝသုန့်ကိုပြုံးပြီးကြည့်နေမဲ့သူကမေမေဖြစ်နေရမှာ။အခုတော့ အခုတော့လေ။
"အားတော့နာပေမဲ့ ကျွန်မစကားတစ်ခွန်းနှစ်ခွန်းလောက်ပြောချင်မိတယ် ပြေမလားအန်တီ"
"ပြောလေ သမီးရဲ့ နီနီတပည့်လေးဆိုတော့ နီနီ့အတွက် ဂုဏ်ပြုစကားပြောပေးမယ်ပေါ့ ချစ်စရာကွယ်"
အသက်မပါသည့် မဲ့ပြုံးတစ်ချက်အား ဆင်မြန်းရင်း မမနီအမေထံအကြည့်တို့ရောက်မိသည်။လူကဲခတ်မညံ့သူမလို့ဘယ်လောက်စိတ်လှုပ်ရှားနေလဲအသိသာပင်။မမနီအမေတင်မဟုတ် မမနီအစ်မနှင့်မောင်လေးပါပါသေးသည်။မမနီကို ရုန်းမထွက်နိုင်အောင် ဖိအားပေးခဲ့တဲ့သူတွေ။တစ်ဖက်လူရဲ့ခံစားချက်ကိုမကြည့်ပါဘဲ အတင်းတွေ စေ့စပ်ပွဲအားလုပ်ခဲ့တဲ့သူတွေ။မမနီနှင့်ပတ်သက်သူမလို့သာ မဟုတ်ရင်တော့လေ ဝုန်းဒိုင်းကြဲကာ မေးပစ်ချင်မိရဲ့။ဘာလို့များ သဘောမတူနိုင်ရသလဲ။ဘာလို့များမမနီကိုဖိအားပေးရသလဲဆိုပြီးမေးပစ်ချင်မိလေသည်။
"ဒီကလူကြီးမင်းတွေကို အားနာပေမဲ့ မပြောမဖြစ်လို့ပြောပါရစေ။ဒေါ်ပန်းမွှေ့နီနီက ဒီက ဦးဝေနိုင်နဲ့စေ့စပ်ဖို့ ဘယ်လိုမှမဖြစ်နိုင်ပါဘူးရှင်"
အိမ်ထဲဝယ် အံ့သြသံတို့မှာ ဟင်ခနဲ ဟာခနဲပင်။မထင်မှတ်ထားသည်မလို့ထင်ရဲ့ မမနီဟာလည်းအံ့သြသွားလေသည်။
"နွေ့.."
"နွေပြောလို့မပြီးသေးဘူး မမနီ"
"ဒီကမိန်းကလေးနဲ့ ဘယ်လိုပတ်သက်တာမလို့ ဒီလိုပြောရတာလဲ"
"ကျွန်မက ဒေါ်ပန်းမွှေ့နီနီရဲ့ချစ်သူပါ။ကျွန်မနဲ့ မမနီ လက်တွဲခဲ့တာ သုံးနှစ်နီးပါးရှိခဲ့ပါပြီ။အဲ့အတွက်မမနီရဲ့သက်ဆိုင်သူတစ်ယောက်အနေနဲ့ ကျွန်မလုံးဝဒီစေ့စပ်ပွဲကိုခွင့်မပြုနိုင်ပါဘူး"