ချစ်မိခဲ့သည်ဆိုရာဝယ် (OR) ချစ်သောမမနီ(Completed)

Extra 1

ချစ်မိခဲ့သည်ဆိုရာဝယ် (or)ချစ်သောမမနီ
Extra-1

အနီရောင်ကော်ဇောနီကြီး၏တစ်ဖက်ထိပ်တွင်ရပ်နေသည့်လူများကြား အမျိုးသမီးလေးနှစ်ဦးမှာထင်းနေတော့သည်။ရှေ့ဆုံးမှ ကလေးငယ်လေးမှာ နီနီရဲရဲနှင်းဆီပွင့်ဖတ်များနှင့်အတူ စံပယ်ပွင့်ကလေးများအား ကြဲချိန် အနောက်မှ မင်္ဂလာဗန်းကိုင် အပျိုချောလေးနှစ်ဦးမှာလျှောက်လှမ်းနေလေသည်။ထိုသူများ၏နောက်တွင် အဖြူရောင် ဝမ်းဆက်ကလေးအားတူညီစွာဝတ်ဆင်ထားသည့်အမျိုးသမီးလေးနှစ်ဦး။တစ်ဦး၏လက်ထဲတွင် နီနီရဲရဲနှင်းဆီစည်းကလေးအားကိုင်ထားလေသည်။ထိုသူနှစ်ဦး၏မျက်နှာထက်ဝယ် အပြုံးရိပ်တို့မှာ ဖြတ်ပြေးကာနေလေသည်။ဒီနေ့ဟာ သူတို့နှစ်ဦး၏အပျော်ရွှင်ရဆုံးနေ့ကလေးဖြစ်ပေမည်။ကောဇောနီခင်းထားရာ လမ်း၏တစ်ဖက်စီတွင် အလှဆင်ထားသည်မှာလည်း အနီရောင်နှင်းဆီများပင်။ခန်းမကျယ်ကြီးထဲတွင် နှင်းဆီရနံ့တို့မှာ သင်းပျံ့နေပြီး သတို့သမီးလေးနှစ်ဦးအား ဆုမွန်များခြွေနေသလိုပင်။သတို့သမီးလေးနှစ်ဦးနောက်တွင် မိဘဆွေမျိုးများမှာလည်းအပြုံးပန်းများဝေကာလျှောက်လှမ်းနေလေသည်။

ဒီလိုနေ့ကလေးကိုရောက်ဖို့ ဝသုန်စောင့်ခဲ့ရသည်မှာငါးနှစ်ကြာလေသည်။လူကြီးတွေမသိဘဲ နှစ်ယောက်တွဲခဲ့ကြသည်မှာ သုံးနှစ်နှင့် မမနီအမေနှင့်မိသားစုမျာအားလက်ခံလာအောင် ကြိုးစားခဲ့ရသည်မှာနှစ်နှစ်ပင်။မမနီမိသားစုပါမက က်ိုယ်ကျင်လည်ရာအသိုင်းအဝိုင်းတွင်ပါ လက်မခံရင်တောင်ပြောဆိုရှုံ့ချခြင်းမပြုကြလေအောင် ဝသုန်တို့ကြိုးစားခဲ့ကြရသည်။ဆရာမတွေဖြစ်ကြပြီးဆိုသည့်ခေါင်းစဥ်အောက်တွင် နှစ်ဦးစလုံးထိုးနှက်ခံခဲ့ရသည်။တစ်ချို့နေ့ရက်တွေမှာတော့ ဆရာမဖြစ်တိုင်း ကိုယ်ချစ်ရသူကိုရွေးချယ်ခွင့်မရှိဘူးလားလို့ခပ်စွာစွာပြန်ပြောတတ်ပေမဲ့ တစ်ချို့နေ့ရက်တွေမှာတော့ အရေးတယူမပြောဖြစ်ခဲ့။တာဝန်ကျရာကျောင်းချင်းမတူတော့ တွေ့ဖြစ်သည်ကနည်းကြလေသည်။ဒီအချိန်တွေထဲ ကြားထဲတွင်မနာလိုသွေးထိုးသူများလည်းရှိခဲ့သည်။ဒါတွေကိုကျော်ဖြတ်နိုင်ခဲ့သည့်အတွက် ဂုဏ်တော့ယူမိပါသည်။