အကြံကုန်ရင် ရှိသမျှ အကုန်ကြံရတော့မည်။ ဝမ်ရိပေါ် အလျင်အမြန်ပင် မြေကြီးကိုဆုပ်လို့ ကျီးလန်ရဲ့ မျက်နှာအား ပက်ပစ်လိုက်သည်။ ရုတ်တရက်မို့ အငိုက်မိသွားသည့် ကျီးလန်ဟာ ဆဲဆိုကာ မျက်လုံးတို့ကို ပွတ်သပ်ရာတွင် အာရုံစိုက်လိုက်သည်မို့ ရိပေါ်က ရလာသောအခွင့်အရေးအား မြန်ဆန်စွာအသုံးချခဲ့သည်။ ဘရောင်နီ ကိုက်ဆွဲထားသည့် ဒဏ်ရာအား ကန်ချလိုက်သည်မို့ နာကျင်မှုတို့ လှိုင်သွားသည့် ကျီးလန်က မြေပြင်တွင် ဒူးထောက်ရက်ကျသွားခဲ့သည်။
ဝမ်ရိပေါ် အခုချိန်တွင် အမှောင်ထုကို ကြောက်မနေအားပါ။ မြေကြီးပေါ်ကျနေသည့် ဓါတ်မီးမှ အလင်းရောင်ကို ခိုကိုးလို့ ရှောင်ကျန့်အား ထမ်းထားသည့် လူနားထပ်တိုးလို့သွားခဲ့သည်။
" ရှောင်ကျန့်ကို လွှတ်ပေး!!! "
ထိုလူက ရှောင်ကျန့်ကို မြေပြင်ပေါ် မညာမတာပစ်ချခဲ့သည်။ မြေပြင်တွင် အခွေလိုက်ကလေးလဲနေသည့် ရှောင်ကျန့်၏ ပါးပေါ်ထိုလူက ခြေထောက်ဖြင့် ဖိချေနေသည်။
" ခင်ဗျား!!! မယုတ်မာနဲ့!!! အခုချက်ချင်း ခင်ဗျားခြေထောက်ကို ဖယ်လိုက်စမ်း !!! "
ထိုလူက ရီမောကာ ရှောင်ကျန့်ကို ပိုတိုးလို့ နင်းချေလာသည်။ သူ့ဘဝမှာ လူတစ်ယောက်ကို သူ့မျက်စိရှေ့ ညဥ်းပန်းနေသည်ကို မြင်ရတာ ပထမဆုံးမို့ ရင်ထဲမှာ လေဟာနယ်ဖြစ်သွားသလိုပင်။ ထိုသို့ ညဥ်းပန်းခံနေရသူကလည်း ရှောင်ကျန့် ဖြစ်သည်မို့ သူမကြည့်ရက်။ ရှောင်မားမား တန်ဖိုးတကြီး အမြဲအနမ်းပေးနေတဲ့ ပါးပြင်လေးကို တစ်ဖက်လူက ခြေထောက်နဲ့ နင်းနေခြင်းဆိုတဲ့ အဖြစ်က ရိပေါ်ရဲ့ နှလုံးသားကို သဲလူးခံလိုက်ရသလို ကြမ်းရှရှဖြစ်နေစေသည်။
ရိပေါ်ရဲ့ အသားတွေတဆတ်ဆတ်တုန်နေသည့်တိုင် သူနောက်ပြန်လှည့်ပြေးခြင်းမပြုခဲ့ပါဘဲ ရှောင်ကျန့်ကိုကယ်ရမည်ဆိုသော အသိကသာ ကြီးဆိုနေသည်ကြောင့် ရိပေါ် ထိုလူထံသို့ ပြေးဝင်ခဲ့သည်။
ပိုးဖလံလေး မီးလျှံလေးထဲ တိုးဝင်သွားသလိုမျိုး ရိပေါ်တိုးဝင်ခဲ့သည်။ ပိုးဖလံလေးရဲ့ အတောင်လေး မီးလောင်သွားရသလိုဘဲ ရိပေါ်ရဲ့ လည်ပင်းသည်လည်း တစ်ဖက်လူရဲ့ ညစ်ယူခြင်းကို ခံခဲ့ရပေသည်။
