Author's Note (The Villain Series 1)

Kabanata 2

"NANANAGINIP ba ako, Gon?" Hinawakan ni Logan ang braso ni Gonietta at bahagyang inalog. "Siguro kakasulat ko 'to ng Fantasy kaya hindi na rin kapani-paniwala mga nakikita ko."

"Siguro nga. Kakapuyat ko rin siguro 'to kaya kung ano-ano na rin nakikita ko." Pilit siyang ngumiti habang kinukumbinsi ang sarili na hindi totoo ang nangyari kanina. Na walang umaapoy na libro at mas lalong walang lalaking nakahiga sa sahig ng kaniyang kuwarto ngayon.

Sabay silang tumalikod ni Logan habang siya ay hinila ang kumot at sinaklob sa kanilang dalawa. Pinikit niya ang mga mata at huminga nang malalim. Rinig din niya ang katabi niyang bumubulong ng kung ano-ano, hindi niya maintindihan kung nagdadasal ba ito o kinukumbinsi rin ang sariling wala silang nakitang kakaiba.

"Hoy, Lolo." Siniko niya ito. "Lingunin mo nga kung mayroon pa."

"Ayoko. Ikaw na," naiiyak nitong sabi habang umiiling.

"Sabay na lang tayo."

Nagdalawang-isip naman ito pero ilang minuto ang lumipas, tumango ang lalaki. "Sige."

Tinaas niya ang isa niyang kamay at nagbilang gamit ang mga daliri. Parehas silang nakatutok dalawa sa mga daliri niyang isa-isang tumataas. Nang tumaas ang kaniyang ring finger, sabay nilang winaksi ang kumot at nilingon ang direksyon ng sahig.

"Oh, no. I'm not dreaming." Binagsak ni Logan ang mukha sa unan habang siya naman ay nagitla. Ang isa niyang kamay ay nanatiling nakahawak sa dulo ng kumot.

Nandoon pa rin ang lalaki. Nakahiga ito at hindi gumagalaw.

Napahilamos siya sa kaniyang mukha bago naglakas-loob na tumayo sa kama. Nanginginig pa ang kaniyang tuhod pero pinili niyang maglakad at lumapit sa lalaki. Hindi niya binitawan ang kumot dahil baka sakaling bigla itong bumangon, masasampal niya kaagad ito ng kumot.

Dahan-dahan, sinilip niya ang kabuohan nito. Katabi nito ang libro kung saan nanggaling ang lalaki. Hindi niya magawang makita ang mukha nito dahil sa nakatakip na itim na veil. Kumunot ang kaniyang noo dahil sa suot nitong itim na roba ngunit may corset na nakapaligid sa bandang tiyan.

Bakit ang pamilyar ng kasuotan ng lalaki sa kaniya?

The villain with a corset?

Kaagad naman siyang napailing. That was impossible. How could a fictional character be in this place? Baka cosplayer itong nasa harapan niya.

Napunta ang kaniyang tingin sa buhok nito. Lumampas ang haba nito sa veil. Nang makita ang kulay puti na dulo ng buhok nitong matuwid, doon niya napagtantong isa nga itong cosplayer.

"Logan, tignan mo, dali. Cosplayer yata 'to ni Adamas. Kuhang-kuha iyong outfit pati buhok," saad niya. Tugmang-tugma ang deskripsiyon nito sa libro.

"Huh?"

"Bilisan mo dali!" sigaw niya at lumuhod. Hindi niya maaninag ang mukha ng lalaki dahil sa veil na nakatakip. Hinawakan niya ang dulo ng black veil at aalisin na sana ngunit isang kamay ang mabilis na hinawakan ang kaniyang pulso.

"Ah!" Napasigaw siya at malakas na winaksi ang kamay para mabitiwan siya ng lalaki.

Dali-dali siyang napaatras nang dahan-dahang bumangon ang kaninang walang malay na katawan.

"S-sino ka?" nauutal niyang tanong.

But the man paid no attention to her. Kinapa nito ang black veil sa ulo pati ang buo nitong katawan.

"Huh? I'm still in one piece," saad nito habang kinakapa pa rin ang sarili. "Tapos na ba ang restart? Hey! System, talk to me!"

Gonietta tilted her head while looking at the man. Para itong may kausap subalit wala naman siyang makitang kasama nito.