انسدح جنبه ورفع السلسال فوقه وكان يتأمله وقال بنفسه ( اذا ذا السلسال بالجمال ذا من صاحبته ؟ ) رجعه بجيبه ونام علطول لاحق عقاب اللي غط بنومته وهم ناوينها نومة ساعة ونص قبل اذان الفجر ..
" فالرياض "
ابو تركي نزل وصار يتثاوب ويتمطط ابتسم بتعب وقال : الحمدلله ع السلامة
ام تركي ابتسمت وقالت : الله يسلمك والحمدلله ع السلامة
الميلا صحت من النوم ودموعها محفورة ع خدودها ابتسمت بضيق وقالت : الله يسلمتس يميمتي والله يسلمك يبه
نزلت بحزن لقصر انصدمت ميلا منه وقالت بنفسها ( شلون ابوي اشترى بيت زي كذا ! يعني خلاص نسى الديرة والعيشة هناك يعني خلاص انتهى كل شيء..) قاطع حديثها مع نفسها صراخ الجود وهي تقول : الله هذذاا بييتنناا ياارب لك الحمد الحمدلله ياااارب يججنن يبه يججنن
ابو تركي ضحك وقال : الحمدلله يبنيتي
الميلا بقهر قالت : خير جود شفيتس انهبلتي !
تركي ضحك ورفع الجود بين يدينه وقال : خلييها تنبسطط
ام تركي بفرحة عظيمة : اي والله الحمدلله انبسطوا قدني هنا قريب وحول اهلي
ابو تركي ابتسم وقرب وباس راس الميلا وقال : معليه يبنتي بنزل كل يومين او ثلاث للديرة ودتس تجين معي ؟
الميلا كانت بتنطق بفرحة طلعت من عيونها لكن اخمدت فرحتها امها وهي تقول بحدة : لاا طبعًا م بتاخذها ولعاد بيرجعون بناتي للديرة الا بالمناسبات واحترام لأهلك ولا معاد لي دخل فالديرة !
ابو تركي انصعق بصدمة وقال : انتي تقولينه صادزه ؟!
ام تركي سحبت الميلا والجود وراها وقالت : ايه ! تبي تروح وتبي من يخاويك تركي ولدك معك !
الميلا بعتب واضح قالت : يمه وش بناتي وولدك وش التفرقة ذي !؟!
ام تركي بعصبية : بسس عاااد لساانتس صاير يلووط اذانتس ادخلي داخل وفكيني !
الميلا صدت بحزن ودموعها اخذت مجراها وركضت داخل البيت ولفت لصوت ابوها من وراها وهو يقول : معليتس يميلا ان شاءالله ان تخاويني وشوفي غرفتتس بالدور الثاني
ركضت الميلا ووصلت لغرفتها وسكرت الباب عليها وانسدحت ع السرير واطلقت العنان لصرخاتها وقالت بصوت هامس : يارب اتزوج عقاااب يااارب يجي وينقذني من جحيم المدن !
" وقالت الميلا كلامها وهي م تدري ان الجحيم بين يدين عقاب اللي هي تتمناه يجي ويسعفها وم تدري انه ماهو الرجل اللي هي تشوفه وتحبه لرجولته وشهامته م اختلفنا عقاب رجال لكن ابدًا م يناسب الميلا ومستحيل يجتمعون "
وصارت تبكي بحرقة حتى م تعبت واستسلمت للنوم ..
" فالديرة "
فز اسر برعب ع ضرب عصا ابوه وصراخه وهو يقول : الصلاااااة لا باااارك الله فيييكم !!
ناصر بنعاس ابتسم وقال : اسوري تكفى افتح الباب قبل يكسره ابوي
اسر استحقره وقام بتعب وفتح الباب وانصقع بعصا ابوه ع كتفه وصرخ في وجهه وهو يقول : م تسمعووون انتوووا
اسر فرك مكان الضربة بهدوء وقال : سم يبه جايين
ابو فهد دخل وكمل صراخ ع عقاب اللي كان غاط بنومته وفز ع صوت ابوه وهو يقول : عقاااااب يالعاااقب الصلااااة !
عقاب تكلم بصوته الثقييل وقال : يبه احلف ؟ م بعد اذن
ابو فهد رمى عصاته وضربت بركبته وفز الم منها وقال بحدة : يبه خلااص اسبقنا وبنلحقك
اسر ركض واخذ عصا ابوه وعطاه وباس راسه وقال : خلاص جعلني قبلك الحين جايين بنتوضى ونجي
ابو فهد بعصبية : الوضوء فالمسجد امشوا !
ناصر : الان جايينك
طلع ابو فهد ودخل اسر ومسك كتف عقاب وقال : لاتروح له وانت معصب ساامع
عقاب ابعد اسر منه وقال : طيب طيب
قام عقاب واسر معه وطلعوا بعد م سبقهم ناصر ووصلوا للمسجد وتوضؤا وصلوا وجلسوا يقرؤون مصاحفهم ووردهم فيه ..
" في بيت ابو فهد "
ام فهد دخلت المطبخ وشهقت وقالت : ووش المواعيين ذي ؟
غالية دخلت ومعها سحاب وقالت : اح وشذا كله ج! خلاص يميمتي اجلسي وانا اخلصها بس اخذي سحايبي معتس
ام فهد : والفطور ؟ ابوتس بيجي بعد شوي
غالية ابتسمت وباست راس امها وقالت : معليه تعرفين غلاتي عند ابوي بكلمه واقول بسوي لكم اطباق جديدة وبيتأخر الفطور شويتين
ام فهد ابتسمت وقالت : اجل تم والله يرضى عليتس يبنيتي بروح اصحي ضحى والبندري وبدق ع فهد يجي هو واهله
غالية : يالله اجل
دخلت غالية المطبخ وتعاكست مع امها اللي طلعت منه وراحت لغرفة البندري وضحى ودقت الباب وشوي وفتحت البندري وقالت بنعاس : هلا يمه
ام فهد ابتسمت وقالت : هلا فيتس يمه اصحي وصحي وضوحه
البندري ابتسمت وباست راس امها وقالت : ابشري
ام فهد مشت رايحة تجهز قعدة الحوش المعتادة مع القهوة والشاهي وريحة البخور وماهي الا دقايق وطلع صوت ضحى وهي تصارخ وتهاوش البنات وكانت اكثر وحدة تحمسهم يشتغلون ويتحركون ويجيبون ويشيلون
ابو فهد دخل بعد الصلاة وقال : صبحهم بالخير
ام فهد ابتسمت وقالت : صبحه بالرضى والنعيم
ابو فهد جلس وقال : قمراء وين الفطور ؟
طلوع ضحى من المطبخ وهي شايلة الصينية قاطع حديثهم وقالت : هنا يبه هنا وين العيال ؟
ابو فهد : عقاب واسر راحوا يفتحون الدكان وناصر شوي ويجي
ام فهد : بدري ع الدكان ورا م خلوه بعد الفطور
ابو فهد بحدة : يدورون الرزق !
ضحى جلست وعلطول جات البندري من وراها وحطت السفرة وبدؤا يوزعون الصحون والخبز وحطوا البيالات ع جنب وقالت ضحى بأبتسامة : انطح فالك يبو فهد
ابو فهد قرب من السفرة ومسك ضحى مع رقبتها وسحبها لحضنه وقال : مسوية بريئة عشان انسى ؟
ضحى ضحكت وقالت : يووه يبه لا تصير كذا عادي تكبر وتاكل غيرها مني ماهو انت جبتني تحملني
ابو فهد توسعت عيونه وضربها ع راسها بخاتم اصبعه وكانت الضربة خفيفة بس توجع وصرخت ضحى بدراما وقالت : اناااا تضرربننييي
ابو فهد بحدة : وويييل امها ذي البنت !
ام فهد ضحكت وقالت : خلاص عاد افطروا وعينوا من الله خير
ناصر دخل وقال : سلام عليكم صباح الخير ع عايلتي السعيدة
البندري قالت بنفسها ( امحق سعادة وين السعادة اللي عجزت اشوفها ولاتحسبون سكوتي ورضاي بالعيشة ذي اني راضية عنها ! )
ضحى ابتسمت وقالت : علييك السلام وصبحك الله بالنور
ابو فهد : وين اخوانك ؟
ناصر : قابلت اسر و..
ولف ناصر ع دخول اسر للبيت وهو يقول : صباح الخير وكمل ناصر وهو يقول : هذا هو اما عقاب فتح الدكان وطلع ع سيارته لدوامه
ابو فهد شّد قبضته ع عصاه وقال بحدة : وانااا كمم مرره اقوولكم لاتخللوون الدكااان فااااتح وم فيييه احد !!
اسر ابتسم بضيق وهو حسب ابوه معصب ع روحه عقاب لدوامه بدون م يفطر بس تذكر انه ابوه اللي يتكلم عنه وقال بهدوء : يبه فلاح فالدكان باخذ لي فطور فصحن وبروح نفطر سوا عند باب الدكان
ابو فهد : اعجل عليه طيب !
اسر قرب وباس راسه امه وقال : صبحتس الله بالخير يالدنيييا
ام فهد حاوطت بيدها المليانة تجاعيد راس ولدها اسر وباسته بحنية وقالت : صبحك ربي بالنور يحبيبي
اسر ابتسم وقال : وضيييحيي
ضحى ضحكت وقالت : خييير
اسر : عطيني الصحن اعجلي
البندري ابتسمت وقربت من اسر وحاوطت رقبته من وراه ولف عليها وقال : اررححبيييي يأخر عنقودنا الزييين
البندري ضحكت وقالت : الله يبقي من يرحب
ضحى ضحكت وقالت : الله فجأة اشتقتوا لبعض ؟ اقول تمسك الصحن ولا وش !
البندري تركت اسر وتقدم واخذ الصحن وقال : يشينتس يوضيحي
وطلع يركض وقابل فهد عند البوابة وقال بحدة : وينك ذالف مع الفجرية ؟
اسر بحقد : للدكان تجي تشتغل بدالي ؟!
فهد ضحك بسخرية وقال : ايه ذا مكان اللي يجلس فالبيت ولا يتعنى يتوظف ويسترزق الله
اسر : يشيخ دز امها تراك اربعيني ومدرس بدنية وقريب وتتقاعد
ركض اسر وهو الجم فهد وكان يضحك بصوت عالي ويسمع دعاوي فهد ووجه العصبي وصل للدكان وقال : فلاح تعال الفطور
فلاح قرب وجلس وقال بتعب : اه يالصدااااع
اسر لف له وقال : صداع ؟ سلامتك والله من وش
فلاح كان يفرك راسه بألم وقال : مدري ي اسر مدري
اسر ابتسم وقال : معلييك يرجال كلها تشرب شاهي قمري وبتطيب
فلاح قطب وقال : وش قمرك ؟
اسر رفع حاجبة وقال : امي قمراء يحمار
فلاح ابتسم وقال : اييييه اجل يالله بسم الله
بدؤا يفطرون بهدوء وشوي وطاحت البيالة وانكسرت من يد فلاح اللي وقف اكل بصدمة تحت انظار اسر له وكان يقول : فلااح وش فيييك ؟!
وكان صوت اسر متذبذب وم ينسمع بالنسبة لفلاح اللي تذكر كل شيء صار امس وكيف رجع ع اذان الفجر سكران وسبب لتالين مشكلة قام ركض علطول راجع لبيت ابوه
اسر وقف بصدمة وكان يصارخ وينادي فلاح بس م كان من فلاح اي اجابة جلس بصدمة وكمل فطور وخلص واخذ المكنسة ونظف القزاز المتكسر ع الارض وخلص وجلس ع الباب
ابو بدور : سلامن عليك يالاسر
اسر قام وقال : عليك السلام عمي عبدالرحمن
ابو بدور : وين ابوك ؟
اسر قطب وقال : ليه ؟
ابو بدور : وصلنا علم انه يبي يزوج عقاب
اسر : ايه نعم بيتزوج عقاب
ابو بدور : ايه وابيه يزوجه ببنتي بدور
اسر توسعت عيونه وقال : يعمي بعيد عن الغلط لكن بدور اكبر من عقاب وارملة وعليها ولدين !
ابو بدور بحدة : وخير يطير ! ترا م بينهم الا اربع سنين
اسر ابتسم اول م تذكر ان ابو بدور م يحب يناقش عقاب ودايم يختاف منه وقال : بكيفك وتدل بيتنا ولا ؟
ابو بدور بحدة : ايه ادل
مشى ابو بدور ورجع اسر داخل الدكان ينتظر عقاب يرجع ع الظهرية
" في مجلس ابو فهد "
ابو بدور وهو يشرب فنجاله : والله يعايض بدور بنتي جاهزة اذا تبيها لعقاب
ابو فهد صد واستغفر وقال : والله ونعم لكن ولدي لبنت عمه
ابو بدور انصعق وقال : منن ؟
ابو فهد ضحك بسخرية وقال : من ؟ نسيت اخواني وخواتي
ابو بدور : ايييه لا م نسيت لكن منهي اللي بتأخذ عقاب ع خبري كلهم صغار محدن ع قده
ابو فهد : بيني وبينه انتهى والله يوفق بنتك ويرحم زوجها
ابو بدور نزل فنجاله بعصبية وطلع من المجلس
ابو فهد انصدم من اسلوبه وقال بعصبية : وشذا التعامل ذا تعامل وراعين ولا هو بأسلوب رجال !!
فهد بهدوء : خلاص يبه معليك منه
ابو فهد سحب جواله وهو في قمة غضبه ودق ع اخوه راشد ووصله صوته وهو يقول : اررحب
ابو فهد : الله يبقيك راشد بسألك متى بتنزل الديرة ؟
ابو تركي : ان شاءالله بعد يومين ليه ؟
ابو فهد : مع اهلك اقصد
ابو تركي تذكر سالفة ام تركي وانها حالفة محد يروح معه الا تركي وان كان بتروح هي وبناتها بيروحون بعد شهر من الاستقرار بالرياض قاطع هدوءه صوت اخوه وهو يقول : راشد تسمعني ؟!
ابو تركي ابتسم وقال : ايه بالله اسمعك ولا م بجي مع اهلي هم سالفتهم طويلة ويبي لهم شهر يستقرون هنا
ابو فهد مسح وجهه بعصبية وقال : وشوو له شهر !؟!
ابو تركي شك ان فيه شيء وقال : وشفيك طيب ؟ تبي حاجة منهم
ابو فهد علطول تكلم وقال : ايه نبي وحدة من بناتك لعقاب !
ابو تركي حس انه انصفق ع وجهه وقال بصدمة : ايشش ؟؟
ابو فهد : العلم سلامتك وانا اخوك الكبير وطلبت احد بناتك لولدي عقاب وشفني بديتك ع سالم
ابو تركي : بس يعايض البنات مالهم نية بالزواج الحين
ابو فهد : والله معاد يجمعنا شيء ان م حصل ذا الزواج
ابو تركي بصدمة : لا لا يعايض استهد بالله يخوي وابشر اكلمهم وارد لك خبر
ابو فهد : معك شهر يراشد
سكر بدون م يسمع رده ولف لصوت ولده فهد وهو يقول : احد بناته ؟!! وانتوا م قررتوا ع الميلا
ابو فهد : ميلا حركاتها م جازت لي واشوف ان جود اركد منها واعقل وم بينها وبين عقاب الا سبع سنين وان م حصل نصيب بين عقاب والميلا خذينا له الجود وكل بنات اخوي فيهم البركة وصالحيين
فهد انصدم وقال : ويبه تتوقع عمي بيعطيك جود لعقاب ! وبينهم ٩ سنوات !!
ابو فهد : لا تحسب اعمارهم هي اربع وعشرين وهو اثنين وثلاثين ولو نحسب السنين اللي بين الرقمين طلعت سبع سنين
فهد ضحك بسخرية وقال : معليش يبه بس منت بصاحي
ابو فهد انسدح وغطى وجهه بشماغه وقال : اطلع بس مني
طلع فهد وهو مصدع من سالفة ابوه واصراره ع زواج عقاب وقرر انه يتحرى ويعرف وش السبب من بدايته للحين ..
" فالرياض "
سكر ابو تركي وقام علطول يبي يتكلم مع ام تركي ويقولها كل شيء ووصل للصالة وقال : صباح
ام تركي لفت بهدوء وقالت : لبيه سم ؟
ابو تركي جلس وملامح الصدمة اعتلت ملامحه مما ادى لخوف ام تركي وسؤالها له وهي تقول : راشد فيك شيء ؟
ابو تركي بهمس مسموع : عقاب..عايض..الزواج
ام تركي : اييه طيب وشفيه عقاب بيعرس ؟ خطب شيء ؟
ابو تركي : ايه خطبوا
ام تركي ابتسمت براحة وقالت : ماشاءالله من ؟
ابو تركي : بناتي !
كان رده كافي بأنه يصيب ام تركي بصدمة طول عمرها وهي اللي م كانت تطيق عايض وعيال عايض ابتسمت بصدمة وقالت : مستحيل !
ابو تركي : معنا شهر واحد وبيقطع عايض علاقته فيني وانا م اقوى عايض وتعرفين يصباح لو يخيروني بحياتي وعايض اخترت عايض لأنه سبب حياتي وسندي فالدنيا تكفين لاتكونين بيني وبينه
ام تركي مسكت يدينه بحنية وقالت : اسألك بالله انك تقولها صادق !
ابو تركي شّد عليها وقال : اي والله صادق
ام تركي كانت بحالة يرثى لها م تدري كيف بتزوج احد بناتها لأحد عيال عايض اللي لطالما كانت تكرههم وكيف بوقف ضد زوجها اللي يعشق اخوه وبينهم سنين ومواقف صعبة وقف عايض قدام الكل عشان اخوه اخذت نفس عميق وقالت : حمدلله ع كل حال وعقاب رجال من ظهر رجال واستأمن بناتي عنده
ابو تركي ابتسم براحة وقال : الحمدلله اي والله رجال خلاص اجل خير البر عاجلة بنروح لهم بعد يومين عشان..
قاطعته ام تركي وهي تقول : وش يومين تستهبل ؟! احمد ربك اني وافقت واسمع يعطوننا شهر كامل نتجهز فيه وبعدها يصير خير ومن طلبوا ؟
ابو تركي : والله قالي يبي وحدة من بناتي لولده عقاب
ام تركي : الميلا اكيد
ابو تركي ابتسم وقال : خلاص لاتكلمينهم الحين دام قلتي شهر خليتس ساكته والموضوع يكون بينتس وبيني
ام تركي هزت راسها بنعم وقالت : ابشر طال عمرك
ابو تركي : تبشرين بالجنة
قام ابو تركي ودق علطول ع ابو فهد ووصله صوته وهو يقول : هلا راشد ؟
ابو تركي : اسمع عايض خلاص موافقين لكن يبي لنا شهر نتجهز ونجيكم تم ؟
ابو فهد : تم وهذا العشم فيك يخوي
ابو تركي حس انه طار فالسماء بعد كلمته وقال : جعلني والله م اعدمك
سكر ابو فهد وشاف الساعة وكانت تشير لـ ١٢ الظهر وهذا دليل ان دوام عقاب خلص ابتسم وجلس ينتظره
" فالدكان "
عقاب دخل وقال : مسهم بالخييير سلام عليكم
اسر ابتسم وقال : هلا اخوي مساك الله بالنور وش اقدر اساعدك فيه ؟
عقاب ضحك وقال : ماشاءالله شفيك صاير محترم ؟
اسر : اه يعقاب تعال اسعفني وامسك المحل تععببت
عقاب : طيب بتروش وانزل بدلتي واجي امسك بدالك
اسر : يالله دز
عقاب غمز له وقال : دقاااايق يبو عايض
طلع عقاب راجع لبيتهم ع سيارته واستوقفه غامد اللي وقف قدامه صرخ عقاب عليه وقال : وووللدد سلااااماااتت !!
غامد فز من هيبة صوت عقاب وقال : عقااب روعتني !
عقاب مسح وجهه وشنبه وقال : استغفرك ي ربي واتوب اليك بغيت شيء !؟
غامد : م بغينا شيء انت وسيارتك ذي
عقاب بحدة : احلف !
غامد : اسمع بس ابوي عازمكم ع العشاء الليلة
عقاب طلع يده من الشباك وتكى ع الباب وقال : وش المناسبة ؟
غامد : رجعت الهنوف
انصعق عقاب وتذكر كل شيء صار بينه وبين الهنوف وكيف كانت تحبه وكيف م اعطاها عقاب اللي تبيه وتركها بدون اي رد لحبها له ومن بعدها اختفت الهنوف من الديرة وقررت ترجع بعد ٣ سنين وقاطع عليه صوت غامد وهو يقول : لاتنسى تعلم عمي !
عقاب اشر له بمعنى " معليك " ومشى بسيارته ووقف قدام بيتهم ونزل ودخل البيت وشاف ابوه قاعد فالحوش وضحى عنده تقهويه ابتسم وقال : سلام عليكم
ابو فهد لف ع صوت عقاب وقال : وعليك السلام يولدي
ضحى : عليكم السلام
عقاب لف لثامر اللي جاه وقال : هلاااا بالحب
ثامر ابتسم وحضن عقاب وقال : وشحالك يعمي ؟
عقاب : والله بخير نحمد الله ونشكره وانت يثمور
ثامر : والله بخير
عقاب بهمس : وين ابوك الكريه ؟
ثامر ضحك وقال : اووه عاد حدك كل شي الا الوالد القائد
عقاب ضربه بخفه وقال : اعجل وينه ؟
ثامر : مدري فالحمام ولا عند جدتي داخل
عقاب ابتسم وقال : ووين حصه وسديم ؟
ثامر : عند عمة البندري
عقاب : وامك ؟
ثامر : يوه يعم مكثر اسألتك اخلص وش بغيت
عقاب ضربه وثقل يده المرة ذي وقال : اعنبوك ابي ادخل غرفتي اغيير !
ثامر مسح مكان الضربة وقال : اوح يثقل يدك خلاص رح
عقاب ابتسم تسليك ومشى ووصل للباب وقال : يووولدد طررييق
غالية فزت وقالت : لا اصبر احلام تتغطى
عقاب صد بكرهه وقال : اخلصوا علي
غالية لفت لأحلام وقالت : تغطي خلصي
احلام بكرهه قالت : الله اكبر وش يبي ذا اصلاً يدخل
غالية توسعت عيونها وقالت : اعنبوتس بيته !
عقاب دخل وهو منزل البريهه ع عينه اليمين بمعنى انه مو مهتم ودخل عرفته ع صراخ احلام وصدمة غالية باللي تشوفه وتسمعه
عقاب سكر باب غرفته وزفر بقرف وقال : يجعلها العلة !!
دخل حمام غرفته واخذ دش سريع وطلع ولبس ثوبه وشماغه وركض طالع وكالعادة رفع صوته وقال : يوولدد
وكمل ركض وهو متلطم وم يشوف من جنبيه وبس عيونه قدام طلع من باب البيت للحوش وضرب في فهد وتجاهله وكمل بس استوقفه صوت ابوه وهو يقول : عقاب ورا م تسلم ع اخوك !
عقاب لف وابتسم لفهد بكلافة وقال : العهد قريب يبو ثامر ( يعني انه توو شافه )
وطلع ركض لآسر اللي بيذبح عقاب ع التأخير ذا ووصل بعد دقيقة من الركض وشاف اسر يهوجس ولا هو مع العالم ابتسم وصرخ علطول وطار اسر وضرب عقاب ع رقبته وقال بخوف : وجعاااه يعقيييب الزفت !!
اما عقاب طاح يضحك وقال : وش عنده الشيخ اسر يهوجس
ونزل بعينه ليد اسر اللي دخلت السلسال في جيبه وقال بحماس : اوووههوو يخوووي شكلك حبيييت !!
رجع اسر يجلس وقال : لا يخوووي وشدخل احب بس شغلني ذا السلسال والواضح انه غالي ع الشخص اللي ضيعه
عقاب ابتسم وقال : م قريت عليه اسم شيء ؟
اسر توو تجي الفكرة بباله وقال بهدوء : لا م عليه اسم
عقاب : طيب جاك زباين اليوم ؟
اسر رفع حاجبة وقال : تستهبل بقالة اكيد بيجون
عقاب ابتسم وقال : اييييه زيين زين
اسر : وش صار انقبلت فالعسكرية ؟
عقاب : انتظر يخوي قاعد احاول اسجلك ملازم اول علطول
اسر ابتسم وقال : يزينك يعقاب عساني م اتبدل فيك
عقاب خبط ع كتفه بخفه وقال : ابشر والله بعزك
اسر قام بتعب وقال : بروح اقيل تعبان والله
عقاب : خلاص ابشر روح ارتاح ومعليك
اسر ابتسم وطلع ركض وهو عاض ع طرف ثوبه ووصل للبيت وعلطول دخل وقال : سلام عليكم
وركض للمقلط تحت انظارهم وصراخ ابوه عليه سكر باب المقلط عليه وشغل المكيف وانسدح وسحب السلسال ورفع القلادة المسكرة وفتحها بكل قوته لأنها مسكرة بأحكام وقرأ اسمها بكل وضوح " الميلا " انصعق اسر من اسمها وهو كان يتوقع كل الناس الا الميلا مسك قلبه اللي كان يدق بقوة واستجمع نفسه وقال بصوت هامس : الميلا !
اقشعر جسمه من نطق اسمها وكان بحالة صدمة وعدل جلسته وقال : وشلون يعني الميلا فارسة وجات عند الخوصاء ! وش اللي قاعد يصير !! والحين عقاب بيخطبها وبتصير زوجته لازم انسى كل الافكار اللي اقحمت نفسي فيها وابدا من جديد لأن الواضح البنت ماهي حولي حتى
انسدح وحط سلسالها في جيبه بعجلة منه ونام علطول وطاح السلسال جنبه ..
" فالرياض "
دخلت الميلا غرفة الجود وقالت : والحين كل وحدة لها غرفتها
الجود : اف ميلا خلاص تعودي شفيتس !
الميلا جلست ع سرير الجود وقالت : وقسم يجودي اني عجزت اتقبل لنا يومين واحس صارت شهرين وعامين انا بنت كبر فالديرة وابي اموت فالديرة شلون افهمتس بعد !
الجود مسكت راسها وقالت : يارب انتس تستهبلين شلون حبيتي الديرة لذي الدرجة لايكوون باقي تفكرين بعقاب !
الميلا عدلت جلستها وقالت : شوفي حبي لعقاب عشانه رجال وعشاني اشوف كيف الكل معتمد عليه ولأني انا وانتي بنتين واعمارنا مقاربة لأعمار عقاب واخوه الصغير حسيت كذا فهمتي ؟
الجود تكت ع المكتب حقها وقالت : قصدتس اسر بأخوه الصغير ؟
الميلا بحقد : ايه هو
الجود ضحكت وقالت : لا عاد لايكون للحين تكرهينه عشان عنده فرس وانتي لا !؟
الميلا بحدة : ايييه احسن ينقلع اصلاً م يستحق الخوصاء ولا يستاهلها فرس ابيض بعد !!
الجود : طيب شلون تقبلتي عقاب وهو من يوم ولد ورجله برجل اسر !
الميلا : تقبلته ع قولتتس م حبيته ولا طرت فيه لكن اتمنى اتزوجه اذا بعيش فالديرة
الجود مسكت يدها وقالت : لا يغبية يويلتس تعرسين بواحد من عيال عمي عايض !
الميلا : شدعوة ؟ بجلس عند وضوح فديتها
الجود : ع اني احب ضحى الا ان البندري اقرب لي منها
الميلا : اكيد حبيبي الكبار مع بعض وانتوا يالوراعين مع بعض
الجود ضحكت وقالت : اسمعي تكفين انا بديت ادرس هندسة وبكمل جامعتي و..
قاطعتها الميلا وهي تقول : جامعة وانتي بتدخلين ٢٥ ؟!
الجود : اف ميلو خلاص تكفين ايه ابي اكمل ماجستير هندسة عشان تكون شهادتي قوية واتوظف علطول
الميلا توسعت عيونها وقالت : طييييب وشقلناا !
الجود : يعني لعاد تجيبين طاري الديرة لأبوي اتمنى انه ينسى وانتي تنسين خلاص خلونا نعيش هنا ونكمل بحياة نستحقها
الميلا بحزن : اه يجودي وش اقول ووش اخلي عشان اوصف لتس حبي وشعوري لديارنا
الجود حضنتها وقالت : معليتس بتنسين والله بتنسين اذا م صار شيء يعني ورجعنا لها
الميلا نزلت دموعها بحرقة وقالت بصوتها المهزوز : يااارب يصير شيء بسلامتهم وسلامتنا
الجود بعدت وشافت دموع الميلا وضحكت وقالت : امين بسلامة الجميع عشان دموعتس يالوسخة
الميلا مسحت دموعها وقامت وطلعت برا الغرفة ونزلت للصالة عند ابوها وقالت : مساء الخير يبه
ابو تركي لف وابتسم لها وقال : مساتس الله بالنور يبنيتي
الميلا : اييه بتنزل الديرة بكرا ؟
ابو تركي ابتسم بضيق وقال : لا يميمي م بنزل الا بعد شهر وانتوا معي
الميلا قطبت وقالت : لييه عسى م شر ؟! كلهم طيبين
ابو تركي ابتسم وقال : اييه بخيير معليهم
الميلا زفرت بملل وقالت : طيبب ؟ اذا م فيهم شيء ليه نروح لهم بعد شهر انا يالله صبرت يومين
ابو تركي ضحك وقال : يوم ونص يميمي
الميلا : اللي هو
ابو تركي بملل : بس عاد قومي وروحي خلصي مع امتس وزهبوا الغداء قدني جويع والله
الميلا قامت بهدوء وراحت تساعد امها فالغداء وتجهيزه وفعلاً خلصوا وحضروه وتجمعوا كلهم بدون تركي اللي مداوم ع الصحن وتغدوا وانتهوا وانتشروا وكل واحد راح يشوف له شغلة ..
" بعد ثلاث اسابيع بدون اي احداث مهمة تحديدًا الديرة "
ابو فهد بحدة : جهزوا القهاوي والشاهي والعود والبخور ابي كل شيء في محله سامعييين !
البندري وضحى وغالية واحلام وحصة وسديم ردوا بوقت واحد وقالوا : سم
ابو فهد : يالله يالله قوم تعاونوا م ذلوا !
ام فهد : اجل الحق صلاة العصر وشوف العيال معك وخل اسر يجي من عند الاسطبل طول معاد رجع
ابو فهد طلع بدون م يعطي ام فهد اي رد وقفل البوابة وراه ومشى للمسجد وشاف كل عيال الحارة واغلب اقاربهم وعزم الكل ع عشاء رجوع اخوه راشد للديرة ولف وشاف عقاب ينشف لحيته وشنبه وهو طالع من الحمامات متوضئ ومستعد للصلاة وقال : يبه امش نصلي
ابو فهد : عقاب الليلة الساعة عشر لاتنسى
عقاب تذكر انهم بيخطبون اليوم وهو تعود ع الراحة فالثلاث اسابيع الماضية بحكم ان ابوه معاد كلمه بالموضوع نهائيًا وزفر بقرف وقال : خير ان شاءالله خير
دخلوا يصلون وطلع ابو فهد مع ابو بدور وهم يسولفون
ابو بدور : الليلة عشاءكم انت وسالم لراشد ؟
ابو فلاح من وراهم : ايه نعم حياكم الله جميع
ابو فهد : يالله يسويلم مشينا
ابو فلاح مسك ذراع اخوه الكبير ومشوا لبيت ابو فهد
ناصر : يعني بتخطب ؟
عقاب : ايه لو انك رجال وكفو كان خطبت واشغلت ابوي مني !
ناصر ابتسم وقال : انا لازم اتوظف عشان اسس حياتي واكون نفسي
عقاب بسخرية : امحق تأسيس اخرتها بيجيك جنون العظمة نفس تركي وتصير حتى السلام عليكم ترد عليه بأنا الدكتور ناصر بن عايض بن مساعد ال*********
ناصر انفجر يضحك وقال : الله يقطعك يعقيب
عقاب بصوت هامس : شوهتوا اسمي وفخامته !
مشى للبيت وناصر وراه وهم بنص المسافة قال عقاب : ولد وين اسر الدبشة من الفجر م شفته
ناصر : ووين فلاح بعد ؟
عقاب شاف مهند خوي فلاح يمشي وقال : مهنند
مهند لف ع صوت عقاب اللي يجذب من كثر خشونته وهيبته وقال : ارحب
عقاب ابتسم وقال : الله يبقيييك وين فلاح ؟
مهند : فالاسطبل هو واسر ليه ؟
عقاب : سرى ليلنا وهم فالاسطبل متأكد انت ؟
مهند هز راسه بنعم وقال : اييه نعم متأكد ونص بعد ويدربون الادهم والخوصاء بعد
عقاب : اجل الشكوى لله شكرًا يحبيبي
مهند : م بيننا يالعقاب
مشى مهند ولف عقاب لناصر اللي اختفى وعرف انه وصل البيت مشى وراه ودخل البيت وشاف اغلب الرجال وصلوا والمجلس بدأ يمتلي تقدم واخذ الدلة وبدأ يلف بالقهوة واشر لثامر يساعده وعلطول فهم وقام معه يصب من الجهة الثانية وماهي الا نص ساعة وصار بيت ابو فهد يعج بالرجال والحريم من الجهة الثانية
" عند الحريم "
ضحى بتعب رجعت ظهرها وطق وقالت : اااه ظهرري وعقاب صدق صار عقاب لنا كل ثانية وهو جاي ويقول جددوا القهوة حشى وش عندهم تسريب ذول !!
البندري انفجرت تضحك وقالت : اص الله يقلعتس لحد يسمع
ضحى : بالطقاااااق وستيين داهيية بعد تحسبين هممنيي
البندري : ييوه خلاص تكفين
ضحى بحلطمة : م يجلطني الا عقاب مسوي في امها الرجال والكريم والسنافي ازعج ام امي اشغلني الله يشغل العدو في نفسه !! ذي سابع دلة اسويها سلامات وين عايشين
البندري تحولت ملامحها لخوف اول م شافت عقاب واقف عند الباب ويسمع ضحى وعيونه تطلع شرار وضاغط ع الدلة وعروق يده بارزة ولفت بسرعة للضحى وقالت بهمس : عقاااب وراتس !!
ضحى لفت له وشافت شكله وادركت انه معصب وشوي وينفجر صحيح ان عقل ضحى طار بعد منظر عقاب لكن م كانت توضح له انها خايفة منه بالعكس كملت وهي تقول بسخرية : وانا اخت فهد تبي دلة جديدة !؟!
عقاب دخل وقال بصوته الرخّيم : والتبن فيتس وفيه والبندري تعالي وجددي الدلة
ضحى ضحكت وقالت : افا يعقيب زعلت !
عقاب بحدة لف عليها وقال : وضييحيي انكتم وسد حلقك احسن لك !!
ضحى تقدمت وجددت له الدلة وقالت : سررر امها ولا م تزعل مني وانا اخت عقاب
عقاب ابتسم بكلافة وقال : والنعم فأخوتس عقاب
ضحى بطقطقة : افوووه يالنرجسي يع يشينك
طلع عقاب ركض للمجلس واخذت ضحى نفس عميق وقالت : اه يارب الحمدلله م زعل
البندري : اي والله الحمدلله
فجأة طلع صوت الرجال والترحيب والصراخ كان صوتهم مزعج وعالي
البندري : شكل عمي راشد وصل
ضحى : ودي اشوف لكن اعرف عقاب وعيونه زرقاء اليمامة بيصيدني وانا توو رافعة ضغطه وبيدفني حية
البندري : طيب مشينا فمجلس الحريم نساعد امي وغالية
طلعوا من المطبخ وقالت ضحى بنفسها ( غريب وين اسر للحين م دخل وطقطق وسولف وعلمني بكل شيء ! ) دخلت مع البندري للمجلس وشوي وارتفع صوت ام تركي وهي ترد ع الترحيب وتقول : الله يبقيكم جميع استريحوا
دخلت ودخلوا الجود والميلا وراها وكانت كل منهم ملامحها تعكس ملامح الثانية ففي طرف الجود الحزن طغى عليها وعند الميلا كانت طايرة من الفرحة وتسلم بكل حب ووصلت لضحى وقالت بصراخ : ووضوووح
ضحى ضحكت بحب وقالت : اررححبيي
الميلا حضنتها بكل حب وقالت : اخ وحشتيني يمعفنه
ضحى : والله اكثر
وتركت ضحى وحضنت البندري وقالت : هلا بنوني وحشتيني
البندري حاوطت الميلا بحب وقالت : م يوحشتس غالي
الجود سلمت سلام بارد ع ضحى بس اول م وصلت للبندري حضنتها بحنية وقالت : انتي اماني وسعادتي بالمكان ذا
البندري حاوطت الجود وقالت : للحين م حبيتي الديرة حرام عليتس اقلها حبيها عشاني !
الجود ضربت راسها بخفه وقالت : يالدبشة وشني اقول !
قاطع حديث الحريم اسر اللي ارتفع صوته وهو يقول : يوولدد طررييقق
ام فهد لفت نظرها لضحى واشرت لها تقوم له وقامت ضحى اصلاً من قبل تشوف اشارة امها ووصلت للباب وقالت : هلا اسر وينك من اليوم ؟
اسر ابتسم وقال : اشتقتي لي لذي الدرجة ؟
ضحى سدت خشمها وقالت : ااف وش الريحة ذي !!
اسر ضحك وقال : غسلت الخوصاء والحين جاء دوري شوفي لي طريق ادخل
ضحى بقرف : الله يمغصك امش معي بدخلك غرفة ناصر تروش فيها واجيب لك ثيابك
اسر هز راسه بنعم ودخل غرفة ناصر يتروش فيها وماهي الا دقايق وطلع وشاف ثوبه الاسود وحزامه ومسدسه جنبه ابتسم ولبس وخلص وشّد حزامه وتبخر وتعطر وطلع من الباب ولف براسه وقال : يووولددد يوضيييحي
ضحى غطت وجهها بيدينها وقالت بفشلة : اخ يكرهي لك
الميلا ضحكت وقالت : من ذا ناصر ؟
ضحى ضحكت بتسليك وقالت : ناصر العاقل شبهتيه بآسر !
الميلا توسعت عيونها وقالت : اووه اسر !
ضحى مشت بدون اي رد وراحت لآسر وطلعت له جزمته ولبسها وطلع علطول اما عند الميلا فدخلت براسها فكرة جهنمية ..
:::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد جميل خفيف لطيف استمتعوا فيه واسفه ع الوقت المتأخر بس اجازة وتوو رجعت من سفر تحمدوا لي بالسلامة قبل اكنسلكم احبكم جدًا ❤️❤️🤣 )
أنت تقرأ
ليّت اللِذي خَلق العُيون السُود ... خَلق القُلوب الخَافقات حَديد
Fantasyروايتي الثانية مُكتملة ✍🏻 ~ كُتبت بواسطة : الجُّود بِنت آل مطّلق 🌟 ~
