ليّت اللِذي خَلق العُيون السُود ... خَلق القُلوب الخَافقات حَديد

البارت السابع

دانه مشت وتركته وابتسم وشرب وهو متلذذ حبًا بالشاهي وحبًا بدانه اللي بدت تنبش خياله وقلبه
لفت دانه وضحكت وهي تشوفه متلذذ بالشاهي مشت وانتهت مناوبتها وقعت خروجها وشالت الكيس اللي فيه اغراضها وفستانها وطلعت من الاسطبل وكان ماهر عند البوابة واقف لف لها وقال : وقعتي ؟
دانه هزت راسها بنعم وقالت : ايه وقعت
ماهر جلس ولفت دانه ع دخول هتان وقال : اهلاً دانه صباح الخير
دانه ابتسمت وقالت : صباح الخير من الخير نفسه
هتان ابتسم وحط يده ع صدره احترام لدانه وقال : الله يسلمك يبنت ملهم
دانه لفت لماهر اللي كانت عيونه متوسعة ومستغرب من فرق التعامل اللي تسويه دانه وقال بهمس سمعته دانه فيه : محكور محكور [ ممتاز بلهجة حايل ]
دانه ضحكت وقالت : وراك طارت بوهتك ؟ [ انه استغرب اللي صار ]
هتان مسك راسه وقال : تكفون لا تهرجون شيء م افهمه خوفي انكم تسبوني
ماهر قام وبان فرق الطول بينه وبين دانه وقال : هاتس سكري البوابة معتس
مشى وهو معصب بس ابتسم وقال بنفسه ( وتعرف لهجتي ؟ اسأل الله الثبات ) اختفى ماهر من انظارهم وشوي وجاء بسيارته السوداء وطرق بواري وطلع هتان وسكرت دانه البوابة وعطت السكيورتي المفتاح وقالت : هتاني بتجي الليلة في فعالية الصغار ؟
هتان لف لها وقال : عيوني لك ابشري بحاول اجي
دانه ودعته ومشت ودقت ع ابوها ولفت اول انتهت من مكالمتها مع ابوها لماهر اللي م تعنى يقولها تبين من يوصلك ومشى اول م ودعت دانه هتان عبست بوجهها وقالت بصوت هامس : وش انتظر منه اصلا ؟
انتظرت خمس دقايق وشوي وجاء ابوها وركبت ورجعت للبيت ..
" فالفندق "
صحت الجود بصعوبة وهي تحس انها متخدرة فتحت عين وحدة وشافت عقاب يصلي الفجر ولفت وشافت الساعة وكانت " ٥:٢٠ " وصار له اربع دقايق مأذن قطبت وقالت بنفسها ( معقولة م نام ؟ ) سحبت نفسها حتى طلعت من الفراش ومشت للحمام وتوضت وغسلت وجهها ومن دلع وكريمات وعناية بوجهها خلصت وفرشت اسنانها ورطبت يدينها بكريم وتعطرت بالمسك وسحبت المبخرة الالكترونية وحطت العود عليها وبخرت شعرها وطفت النور وطلعت وكان عقاب واقف عند الباب وعلى عجلة الجود ضرب وجهها بصدره وصرخت وانفجع عقاب معها وصرخ عليها وهو يقول : وجعااااه ياللي م تستحيييين اعنبوتس حتى فالصبح تصارخييين طييررتي عقللليي !!!
الجود مسكت قلبها اللي تحلف انه بيطلع من جسمها من قوة النبضات ونزلت دموعها وشهقت وقالت : كذ..كذا ابدأ او..اول صباح معك !!!
عقاب توسعت عيونه وقال بحدة : تستهبلين !! انتي اللي صرختي !
الجود بحدة : ولييه توقف عند الباب وش حاجتك !!
عقاب مسح وجهه وشنبه واستغفر ودفها من عند الباب وقال : وانسدت نفسيتي مع ذا الصبح !
سكر الباب بكل قوته والجود تناظر بصدمة مسحت دموعها بقسوة وقالت بصوت عالي : وفيه احد يشوفك وتزيين نفسيته !!
عقاب كان منلخم من كل الاغراض الانثوية اللي ع المغسلة وكانت ذي اول مره بحياته يشوف شيء زي كذا مسك راسه وقال بصوت هامس : هذااا ايشش !!
سحب المبخرة وصار يلفها ويشوفها وضغط الزر بالغلط واشتغلت واحترق عقاب وسحب يده بقوة وطاحت المبخرة وانكسرت وشهق بكل قوته وهو يحس ان روحه انشوت لف لدق الباب وقلق الجود ع اغراضها وهي تقول : عقاااب وش كسسرت !!
عقاب لف لجسمه وهو مفسخ وبس حاط منشفته ع خصره ابتسم وفتح الباب وتوسعت عيونها بصدمة وصرخت وغطت وجهها بيدينها وقالت وهي تحترق من الاحراج : عقااب ؟!!
عقاب ابتسم وتكى ع الباب وقال : عندتس كريم حروق ؟
الجود لفت وعطته ظهرها وقالت : وش كسرت اول شيء !
عقاب بحدة : اقولتس احترقت وتقولين لي وش كسرت !!
الجود مشت وقالت : وش تحسب يهمني ؟
عقاب صفق الباب بينهم بقوة ودخل ونزل منشفته ودخل تحت الدش واخذ شور سريع وطلع ودخل للغرفة وم كانت الجود فيها ابتسم براحة ولبس بسرعة وخلص ودخل للحمام وشال المبخرة وقال بنفسه ( والليل ذي كيف نصلحها ؟ ) قربها من خشمه واستنشق ريحة العود ابتسم وقال بصوت هامس : زيييين تحب العود ؟
ضغط الزر مره ثانية وفاحت ريحة العود وحطه عقاب عند لحيته وتبخر ومرره ع شنبه وشعره وخلص وضغط نفس الزر وضحك وقال : شكلي بسرقه من جود
نزل المبخرة وشاف كم عطر خاص فيها سحب عليها وطلع وهو يقول : حشى كم عطر تستخدم ذي ؟
طلع للصالة وشاف السفرة مليانه اكلات من مختلف الاصناف وجنبها براد شاهي وكاستين ولف نظره لجود وهي طالعة من المطبخ بالفول نزلته فالنص وقالت : وش تنتظرني اناديك ؟ امش افطر
عقاب جلس وقال : م انتظرتتس اصلاً تناديني
الجود سمت بالله وبدأت تفطر وعقاب م رفع عينه لها وكان مركز ع الاكل وخلص وقام وقال : يعطيتس العافية وتسلم يمناتس
الجود ابتسمت بخفاء وقالت : بالعافية
دخل عقاب للغرفة وضبط شماغه وطلع وقال : يالله ؟
الجود كانت تاكل وقالت : حشى بدري !
عقاب : خلصي ابي الحق القهوة مع ابوي
الجود : طيب بس انتظر شوي بلبس
عقاب قطب وهو م يعرف يفرق بملابس البيت عن ملابس العزايم وقال : واللي عليتس ذا وشو ؟
الجود توسعت عيونها وقالت : بجامة وش يعني !
عقاب مسح وجهه ومشى وقال : انتظرتس عند الباب
قامت الجود وشالت الصحون وخلصتها ودخلت للغرفة ولبست فستان ناعم كساه اللون العنابي وبرز مفاتنها انتهت من اللبس وطلعت شنطة الميكب وحطت ميكب خفيف وتزينت بالذهب دليل انها عروس وخلصت وتعطرت ودخلت للحمام واخذت المبخرة وشهقت وقالت : عقاااب !!
عقاب فز ومسك قلبه وهو يحسب صار لها شيء ومو حبًا فالجود بس م وده يطيح بشيء فالبداية ودخل للغرفة وقال : علامتس !!
الجود بعصبية : كسسرت مبخررتي !!
عقاب رفع حاجبة وقال : وخيير ان شاءالله ! وبعدين بفهم شيء واحد انتي بتجلسين تصارخين كذا دايم !
الجود طلعت لسانها تحسّره وقالت : انقلع واييه بصارخ مالك دخل
عقاب ابتسم وقال بهمس : وشذا البزر اللي ابتلشت فيها يعقيب
الجود نزلت المبخرة ع الفراش وتقدمت بهدوء وقالت : تعال ابي اشوف يدك
عقاب حط يدينه ورا ظهره ونزل لها وتساوى بطولها وقال : وش تبين فيها م كنتي تقولين وش تحسب يهمني ؟
الجود بقرف : عشان خاطر عمي وعمتي وخواتك مو عشان خاطرك !
عقاب ضحك بسخرية وقال : قولي خايفه علي وفكينا
الجود سحبت يده وقالت : م عندي حب بعد كلام يكسر الخاطر وانت اللي بديتها وقلت لا تحبيني وانا عندي يعقاب عزة نفس !
ونزلت بعيونها ليده وكان الحرق صغير بس كان حرق من الدرجة الثانية شهقت بقوة وقالت : عقااب يدك !!
عقاب سحب يده وقال : م يهم
دخلها بجيب ثوبه وكان طول وقته يناظر بانحناءات جسمها قدامه توسعت عيونه اول م استوعب ع نفسه وصد علطول وهو من الهنوف صار يتقرف من اي انثى وم يدري شلون بيقابل خواته وهو كارهه الجنس اللطيف كامل صد وهو يستغفر ومشى وقال : سرحنا ؟
الجود سحبت عبايتها وقالت : توكلنا ع الله
طلعوا اثنينهم وانصدمت الجود من العفش حقهم وقالت : معاد بنرجع للفندق ؟
عقاب والمسواك حاضن منطوقه قال : لا
الجود بنفسها ( وشذا علطول بيسكن مع اهله امداه يشتاق لهم !؟ بس احسن لي من مقابلة وجهه بشوف البنات ) مشت واستوقفها صوته وهو يقول : انتظري !!
وقفت الجود حتى م شافته مخلص كل اغراضهم ومشى ومشت وسابقها عقاب بخطواته وتقدم ونزلوا مع المصعد وطلعوا للاستقبال وسلم عقاب المفتاح وطلع لسيارته والجود وراه ركبوا ومشى لقدام المدخل ونزل عقاب وساعده الموظف بالاغراض وخلصوا وركب ومشوا لبيت ابو فهد ..
" فالدكان "
اسر فتحه بعد م خلص صلاة الفجر وجلس ع الباب يتأمل بيت عمه راشد اللي اختلى من الصوت والناس بعد م قرروا يمشون بعد زواج عقاب والجود زفر بحزن وقال : اليوم بسجل بالاسطبل اربه يشغلني شوي
دخل الدكان اول م شاف ابو عايدة داخل وقال : يجعلها ترحب ملايين يعمي
ابو عايدة ابتسم وقال وهم يتعكز بعصاته : من يرحب يبقى اسمع اسر عطني خبز بريالين
اسر ابتسم بضيق وهو يدري عن حال واوضاع ابو عايدة الشاقة وعدم توافر المال معه صد بحزن وعطاه الخبز وقال : حسابك مدفوع يعمي والله م تعطيني ريال
ابو عايدة عشان م يحرج نفسه ابتسم وقال : الله يكثر من امثالك والله يوفقك
اسر حاوط وجهه بيدينه وقال : والله يزوجني الميلا
ابو عايدة ابتسم وقال : ميلا بنت راشد ؟
اسر مسك قلبه وقال : اايييه يعمي
ابو عايدة ضحك وقال : امييين يولدي الله يزوج الميلا منك
اسر ركض وباس راسه وقال : اممييينننن
ابو عايدة ضحك وطلع من الدكان ودخل اسر من مصروفة ستة ريال حساب الخبز اللي عطاه لأبو عايدة ومشى ووقف عند المدخل وشاف فلاح ومهند يتمشون فالديرة ارتفع صوته وهو يقول : يفلييييح
فلاح ابتسم وقال : ارررححبب
اسر اشر له يجي ومشى فلاح مع مهند لآسر ووصلوا وسلموا ع بعض وقال اسر : مهند تمسك الدكان بدالي ؟
مهند اشر بأصبعه ع خشمه وقال : ع ذا الخشم يبو عايض
اسر تقدم وباسوا خشوم بعض " سلام الرجال " وتقدم لفلاح ونزلوا مع الدرج ودخل مهند معاكسهم للدكان
فلاح بتوتر : ولد وش العلم ؟
اسر ضربه ع راسه بخفه وقال : يحمار بنروح للاسطبل
فلاح ابتسم وقال : امداك تشتاق للخوصاء ؟
اسر حط يدينه ع وجهه وصرخ بقهر وقال : هو اني اموتك ولا وش اسوي بك !! يالدرج اسطبل الصقلاوية ذاك !!
فلاح استوعب وانفجر يضحك وقال : تم تم بجيب سيارتي ونجي
اسر : لا بنروح ع خيولنا م يبعد عننا شيء ترا
فلاح حط اصبعه ع دقنه وقال : تقولها
اسر مسكه مع كتوفه وقال : امش امش بس
فلاح ناظر ببيت عمه راشد وقال : عمي راشد يقول انه معاد بيجيب اهله
اسر انصعق وقال وهو يخفي اهتمامه بالميلا : تعقب !
فلاح : والله اني صادق يعني بيجون من فترة لفترة طويلة وذا كله عشان يجبرون عقاب يودي الجود لهم فالرياض
اسر : بس عقيب م يداني المدن ولا يواطنها !
فلاح : مدري عاد
مشوا للأسطبل حقهم تحت صدمة وحزن اسر ع الميلا ابتسم بضيق وقال بنفسه ( معليه يبو عايض ان شاءالله ان محد حاط عينه عليه اخلص اموري ويتم كل شيء ع خير )..
" في بيت ابو فهد "
وصلت سيارة عقاب ونزل ونزلت الجود وقالت : عقاب
عقاب طل براسه وهو كان عند الشنطة ورا وقال : هلا ؟
الجود : الحين وين غرفتك اللي داخل البيت ؟
عقاب : ايه هي لكن م بننام فيها
الجود قطبت وقالت : وين طيب ؟
عقاب : ابوي فتح القسم اللي ورا البيت يعني غرفتنا بأخر البيت وفالحوش
الجود فهمت وتقدمت له وقالت : تحتاج مساعدة ؟
عقاب : ادخلي داخل بس
الجود استحقرته وقالت : الشرهه م هي عليك علي اجي اقولك تبي مساعدة !
دخلت ودخل عقاب بعدها والاغراض كلها بيده ومشى للحوش ونزل الاغراض وقال بهمس : وشفيتس واقفة ؟
الجود بنفس الهمس : وش انتظرك تدخل
عقاب رفع صوته وقال : ياهل المحل سلاااام عليييكم
ابو فهد وفهد طلعوا من المجلس يرحبون وام فهد وخوات عقاب طالعين من البيت والزغاريط والبخور
ابو فهد والابتسامة شاقه وجهه قال : وشحالكم يعقيب ؟
عقاب : والله ع م يسرك يبه
ام فهد تقدمت وسلمت ع الجود ولف عقاب يبي يشوف كيف تسلم عليها ورغم ان ام فهد م تقرب للجود الا انها باست راسها وقالت : وشحالتس يعمتي ؟
ام فهد بفرحة : بخيييير بعد شوفتتس يبنيتي
عقاب ابتسم وصد عنهم ودخلوا الحريم ودخل عقاب مع ابوه للمجلس وقال : فهيد وين اسر ؟
فهد رفع حاجبة وقال : لعنته مدري عنه
ابو فهد : فالدكان اظن
عقاب ابتسم وقال : اجل خلوني اشوفه وحشني الوسخ
ابو فهد : رح يولدي وشيك ع العزبة معك
عقاب : مع ان العامل عندها لكن ابشر وبشوف البكار ولدت ولا لا
ابو فهد : اييييه والله انك صدقت اجل مرني بجي معك
عقاب اشر بأصبعه ع خشمه وقال : ابشر ع خشمي
طلع عقاب وقابل ناصر وسلم عليه وقال : من اين انت جاي ؟
ناصر ابتسم وقال : شكلك ناسي اني اكبر منك بتحاسبني ؟
عقاب ابتسم وقال : يحبي لك ينويصر
طلع عقاب ناوي يمر بيت عمه راشد وفعلاً مشى له وحصله مسكر زفر بعصبية وقال : امداه يسافر ! حتى م تعنى يجي يشوف بنته
مشى متجاهل ذا كله ووصل للدكان ودخل وانفجع اول م شاف مهند وقال : وش عندك هنا ؟
مهند : اسر وصاني عليه ليه ؟
عقاب : الله يعطيك العافية خلاص بمسك بداله انا
مهند طلع وهو م يحب عقاب كثير وقال : ايه عقاب مبروك عرسك يحبيبي
عقاب ابتسم بكلافة وقال : تسلم
طلع مهند ورفع عقاب جواله ودق ع اسر ووصله صوته مقطع اثر الهواء القوي بحكم انه ع الخوصاء وهي تركض
عقاب : ولد وينك ؟
اسر بصراخ : هاااااه ؟
عقاب بعد الجوال من اذنه بسرعة وقال : الله يفجع العدو !
رجع يقرب الجوال لأذنه وكمل وهو يقول : اااسسرر وييينك
اسر بنفس الصراخ : راااييححييننن للأسسططببللل
عقاب : اايي واححد ؟؟
اسر وقف الخوصاء وقال بهدوء : م تعرفه م تعرفه كلمت ابوي عنه صح انه غسلني لكن ان شاءالله يقبلوني فارس فيه
عقاب بعتب واضح : اخيييرًا صوتك رجع طبيعي فجرت طبلتي !
اسر انفجر يضحك وقال : وش اسوي يخي الخوصاء تراكض
عقاب : طيب اسمع انا رجعت للديرة
اسر فز وقال : لا حول ولا قوة الا بالله مسسرع يخوي !!
عقاب ابتسم وقال : تعرفني م اتحمل بدونها المهم بمسك الدكان بدالك افترض ان ابوي جاء وشاف مهند فيه وربي لايذكيك تحسب بيرحمك ! اقلها كلم نويصر اللي مغير يتسدح ويتبطح ع الكتب يجي يمسكه ويذاكر فيه
اسر : والله انك صادز يعقيب لكن ازين انك مسكته والله
عقاب سمع صوت ابوه فالسوق وقال : خلاص بقفل انتبه لنفسك وارجع بدري ودي نسمر
اسر ابتسم وقال : من عيوني يعيوني انت
عقاب ابتسم وسكر وطلع ع دخول ابوه وقال : عقيب ؟
عقاب : لبيه يبه
ابو فهد صار يلف بعيونه داخل الدكان وقال : وين الاسر ؟
عقاب : طلع يبي يشارك بسباق خيول وفيه فلوس وجوائز زييينه
ابو فهد مسح وجهه ولحيته اللي كساها اللون الابيض وقال بحدة : امش امشش سكر الدكان وخلنا نسري للبكار والحلال
عقاب : ابشر
مشى ابو فهد لبيته وسكر عقاب الدكان ولحق ابوه ..
" عند الحريم "
ضحى بفرحة : يالله انك تحييها
الجود : بنات تكفون بلا رسميات شفيكم !
البندري ضحكت وقالت : انا م قلت شيء
ضحى تعبس وجهها وقالت بعصبية : يفاااردز هذي جزاتي ارحب فيتس يالعوباء !
الجود انفجرت تضحك وقالت : حرام عليتس انا عوباء !
ضحى : اييه نعم
البندري جلست وقالت بهمس : وش صار لتس مع عقاب بعد امس
ضحى بعتب : وش يعني وله وجه يسوي لها شيء يع يبنات طاح من عيني !!
الجود : حسب تحليلاتي وتحرياتي عقاب من النوع اللي اذا انصدم م يتحرك منه ساكن ويجلس مصنم ليين م يجيه احد ويصفقه ويرجعه للواقع
البندري بهدوء قالت : ايه نفس اللي سواه يوم طاح اسر فالبير قدامه
ضحى فزت وقالت : ايييه والله عقييب كذا جعلني الحفى اخ يبنات !!
الجود ابتسمت وقالت : ايه حسيت والله عشان كذا م قلت له شيء صح كلامي دق فيه وحز بخاطره بس م اني اسفه ع اللي قلته يستاهله انا غير عنكم كلكم
ضحى رفعت حاجبها وقالت : وش قصدتس ؟
البندري ضحكت وقالت : ايه قصدها انه هي لها حياتها مع عقاب واحنا لنا حياتنا معه وشخصية عقاب لازم تختلف فالحياتين
الجود وهي تترشف قهوتها : عليييتس نوور
ضحى : اييه اجل تم بروح اسوي له الحلى اللي يحبه
الجود ابتسمت وقالت : وشهو ؟
ضحى طلعت لسانها وقالت : وش دخلتس ؟
مشت تضحك والجود ترميها بجزمتها ولفت للبندري وقالت : يمه بيتكم هدوء
البندري : غالية عند ابوي واخواني مع امي برا وسحاب نايمة وفهد يجي بدون اهله مع اننا نفقد حصيص
الجود : وامي وابوي وينهم غريب م جاوكم
البندري ضحكت وقالت : بسم الله عليتس امداتس تنسين سبب استعجالنا فعرستس ؟
الجود توسعت عيونها وقالت : سافروا للرياض !!
البندري : اييه
الجود شّدت ع قبضتها مما ادى لجرح يدينها وقالت : اها
البندري : معليتس بيجون بس اتوقع عمي لحاله
الجود بضيق : اف وعقاب مو راضي يعطيني جوالي
البندري ضحكت وقالت : حسي فينا شوي
الجود : شوفي نوني والله لو اني مثلكم من وانا بزر م عندي جوال كان عادي رضيت بس الحين وانا بعمر اربع وعشرين ويسحبه !!
البندري : والله وانتي م قصرتي اخذتي اسوء واحد من اخواني
الجود : عزتي لي كأنه ودي الحين
البندري قامت وقالت : بروح اساعد امي برا فالقعدة
الجود قامت معها وقالت : وانا بروح ارتب شناطي داخل بس تعالي وريني وين غرفتنا
البندري طلعت بالجود من الباب اللي ورا وشافت قسم صغير يدوب يجي صالة وغرفة نوم وحمام وقالت : هذا هو
الجود بحزن واضح ع ملامحها قالت : تمام يعيوني
مشت داخل وطلعت البندري وكان القسم نظيف ومبخر ومعطر ابتسمت وقالت بصوت هامس : فكري بعقلتس الضيق ضيق الانفس يجود ماهو الاماكن وحمدلله وضيح ونوني معي وش ابي اكثر ؟
دخلت للغرفة وفتحت الشباك لأنها حست بكتمة الدخان حق البخور ونزلت شيلتها وفكت شعرها ونكسته ورفعته وربطته وتشمرت وبدت تمسح الدواليب وترتب ملابسها لأن خوات عقاب انتهوا من مهمة ملابسه كانت الجود تغني وهي ورثت الصوت الحلو من اختها جاهلة بغامد اللي واقف وراها ويتأملها من الشباك اللي الجود فتحته ..
" فالرياض تحديدًا بيت ابو تركي "
تركي رجع من الدوام هلكان ودخل البيت بتعب وقال : سلام عليكم يمه غداي اخريه للمغرب بدخل انام
ام تركي : عليك السلام ابشر يتروك
دخل تركي وشاف الميلا تقطع السلطة وقال : وانتي للحين ماخذه دور السنعة الشغالة عندتس خليها تكرف
الميلا بعصبية : يخوي قول خير ولا انطم معاد هو بأصمت انططم وتحسبني رفله بخليها تلمس اكلنا !!
تركي : الله يفشلتس
طلع لغرفته والميلا كارهه العيشة فالمدن وتلعن حظها اللي جابها للمدينة انتهت من السلطة وغطتها وطلعت وتقدمت الشغالة وغسلت باقي المواعين ونزلت الميلا للدور الاول عند امها وقالت : يمه معاد اطيييق العيشة هنا احس اني مكتوومة والله مقددر
ام تركي مسكت راسها وقالت : يالله انك تصبرني ميلا وربي اذا م سديتي حلقتس خلاااص عاد ولا تبين تلحقين حظ اختتس الطايح وتاخذين لتس من عيال عمانتس اللي فالديرة المأساوية !!
الميلا بقلة حيلة قالت : والله حياتي المأساوية
مشت وامها تناديها بس الميلا تجاهلت وطلعت للدور الثاني تحديدًا اتجهت لغرفتها وسحبت جوالها ودقت ع الجود ووصلها نغمة " ان الجوال المطلوب مغلق الرجاء الاتصال في وقتٍ لاحق ... " اكتئبت زيادة وقالت : الله ياخذك يعقاب مسوي لي الخايف والحريص ويسحب جوالها اااه وش اسوي طففشش وتركي الزفت صاير كرييه !!
انسدحت ونامت بعمق وهي تتهرب من واقعها ..
" فالحوش في بيت ابو فهد "
عقاب بهمس : البندري
البندري بنفس الهمس : هاه ؟
عقاب كمل بهمس : وين الجود ؟
البندري بصوت هامس : فالغرفة حقتكم
ضحى من وراهم : وشفيكم تتهامسون
فز عقاب وصرخت البندري ورمى ابوها العصا عليها لكن مد عقاب يده وضربت فيها وبالفعل انكسرت اصبع عقاب الصغير وشهق بألم وسحبها ودخلها بجيبه ومشى متجهة لغرفته والبندري استلمت محاضرة وش طولها ووش عرضها من ابوها وقلعها داخل وهي تبكي وضحى اكلها تأنيب الضمير ولعاد قدرت تجلس اكثر من كذا وهي م تحب القعدة مع ابوها بدون اسر مشت ودخلت داخل وتركوه لحاله برا وبالعكس هالشيء م ضايقه خلاه ينبسط اكثر وانسدح وحط راسه نايم ..
" في غرفة عقاب "
دخل وهو يسمع صوتها تغني مشى واول م دخل طاحت عينه بعين غامد اللي صار له دقايق طويلة يتأمل زوجته حس عقاب بنفس الشعور المميت والحريق اللي تنهش داخله صرخ بأعلى صوته وفزت الجود برعب وغطت اذانيها ومن الخوف غامد ركض واختفى اثره وتحلف عقاب فيه وسكر الشباك بكل قوته وقال بصراخ : الششباااك منن اللي سممح لتتس تفتحييينه !!!
الجود بخوف ودموعها اخذت مجراها : عقاب انكتمت من الدخان والبخور والله م دريت واصلاً لييش صرخت ووش شفت ؟
عقاب تقدم ومسك فكها ورفعها له وقال بحدة : تستهبلييين وبعديين تلعبييين ع مييين لتس ساعة هنناا والزرفتت غاممد يطالعتتس !!
الجود توسعت عيونها وقالت بصوت باكي : اايشش ؟؟ ميين غاامد ذا !!!
عقاب شّد ع مسكته وقال : تستغفليينني انتي !!
الجود بحدة مسكت يدينه وصارت تحاول تسحبها وتبعده عنها وقالت بصراخ : لييه تسحبني الهنوف عشان اقدر استغفلك !!؟
عقاب طارت عيونه ودفها بكل قوته ع حافة السرير وضرب بأسفل ظهرها مما ادى لأنقطاع التنفس شهقت بكل قوتها وطاحت ع ركبها تبكي وتحاول تتنفس مشى لها بعدم رحمة وقال بصراخ : وقسسم بالله اذا تكررت اني لا ادفنتس حية !
تركها وراه وطلع من البيت كامل وهو نسى الم الكسر ونسى كل شيء وهذي اول مره يصير لعقاب كذا تحت ظرف الغيرة ..
" في اسطبل الصقلاوية "
المهرة والسمراء كانوا يتسابقون بخفه ويستعرضون مهاراتهم
ديم تقدمت وقالت : يالسمرراء
مشت لها السمراء واحتضنتها ديم وقالت : دنو اليوم فعاليات الصغار صح ؟
دانه من بعيد قالت : ايه ايه بعد ساعة تقريبًا
ديم ركبت ع السمراء وصارت تتمرن ع قفز الحواجز ودانه بما انها رئيسة الحملة والفعالية كانت تركض وتجهز وتساعد ومشت للبوابات وشافت اسر وفلاح واقفين وعرفتهم علطول وتقدمت وقالت : كيف اساعدكم ؟
اسر تفشل وهو م يعرف يخاطب الجنس اللطيف وترك زمام الامور لفلاح اللي تقدم وقال : انتوا نزلتوا اعلان ناقصكم ست فارسين وان شاءالله اننا لحقنا
دانه قطبت وقالت : مدري والله عن الاعلان لكن انزلوا وتعالوا معي للإدارة
نزلوا عن خيولهم وربطوها ومشوا داخل واشرت لهم دانه وقالت : ذيك هي غرفة الإدارة
فلاح ابتسم لها وقال : يعطيتس العافية
اسر بصوت هامس : مشكورة
دانه ابتسمت وقالت : م سويت شيء وبالتوفيق لكم
مشت وتعاكسوا معها اسر وفلاح اللي اتجهوا للإدارة ودخلوا وسلم عليهم المدير وكلموه عن الاعلان
المدير : ايه نعم باقي مكان لثلاث فارسين وسجلوا بياناتكم وخلاص تقدرون تبدؤون
فلاح ابتسم وقال : سم
اسر بفرحة كبيرة قال : ع خيير ان شاءالله
وقعوا اول م خلصوا تعبئة الاستبيان والسيرة الذاتية لهم اثنينهم واستلمها المدير ووقع وختم وقال : مسيرة عظيمة يفرسان
اسر وفلاح سلموا عليه ودخلوا داخل الاسطبل وقابلوا وائل وقال : اهلين شباب
فلاح : هلا فيك
اسر توسعت عيونه من اللهجة وقال : سعودي انت ؟
وائل ابتسم وقال : لا حضرتك انا سوري
اسر : اييه ونعم ونعم
وائل قطب وقال : الله ينعم عليك ؟
فلاح مسك راسه وقال : لااا يالطيب انت مشكلة لا حافظ ولا فاهم !!
انفجر اسر يضحك وقال : امش امش علمنا وين نبدل
وائل : اييه يلا امشوا ورايا
اسر عض ع اصبعه من القهر وقال : حراام اني مقدر اتحمل يفليح
فلاح : تكفى فكني من المشاكل تكفى
دخلوا وقابلوا هتان وماهر تقدم ماهر وقال : ارحبوا يرجال
اسر : ابقه سلام عليكم
هتان ابتسم وقال : علييكم السلام يالله حيهم عرفونا
فلاح : الله يبقيكم انا فلاح بن سالم بن مساعد
هتان وماهر بصوت واحد قالوا : ونعم
فلاح : معلييكم زووود
وائل بنفسه قال ( اوه هلق بدي افهمها يصير اول م بسمع حدا يقولي ونعم برد عليه وبقول معليك زود ؟ )
اسر : وانا ولد عمه اسر بن عايض بن مساعد
ماهر : والله ونعم
اسر : معليك زود
ماهر : وانا ماهر بن طلال الفيصل
فلاح واسر بصوت واحد : ونعم
ماهر : معليكم زود
هتان : وانا هتان بن سلطان بن جمعان
اسر ابتسم وقال : ونعم وماشاءالله عليك انت وابوك وجدك قوافي الوضع ؟
انفجروا العيال كلهم يضحكون وقال هتان : معليك زود والظاهر والله
اسر : ندخل خيولنا ؟
ماهر : تعال اساعدك
فلاح : اجل ببدل انا واجيكم
اسر : فليح جهز لي ملابس معك
ماهر ابتسم وقال : اسر اخلص
مشى اسر وراه ووصلوا للخيول وقال ماهر : ماشاءالله تبارك الله من ذي له ؟
وكان ماسك الخوصاء ابتسم اسر اول م نفرت منه وركضت للآسر وقال : وضحت ؟
ماهر : ايه بالله بسم الله عليها فرس صح ؟
اسر : شرايك ؟
ماهر فز وركب ع الادهم وقال : ذا وش اسمه ؟
اسر : الادهم وذي الخوصاء
ماهر : ماشاءالله ماشاءالله
دخلوا بالخيول ووقفت دانه بالمهرة حقتها وقالت : عيال من الرجال فيكم اللي بيسابق مهرتي ؟
دانه م كانت تدري عن سرعة الخوصاء الهائلة وانه محد سبقها بالدنيا ذي كلها وقال اسر : لاتتحمسين تكفين
ماهر ابتسم وقال : انت اللي لا تتحمس مهرتها م فيه اسرع منها
اسر ضرب فالخوصاء ووقفت ع خلفيتها وصهلت بأعلى صوتها وتلطم وقال : والله م تسبقني انثى وانا ولد عايض
ماهر بصوت عالي قال : وننعممم والله يبو عايض
اسر تقدم وصف بخط مع دانه اللي ابتسمت وقالت : جهز نفسك للهزيمة يولد عايض
اسر : والله م توصلين سرعة الخوصاء يبنت ال سليمان
دانه فزت برعب وقالت : كيف عرفتني ؟؟
اسر : بطاقتتس
هتان مسك مسدس السباقات وطلق وانطلقت المهرة والخوصاء واثنينهم عليهم والكل يبون يشوفون هل بيقدر اسر يغلب سمعة المهرة بالخوصاء حقته ولا بيبقى اللقب لدانه وكانوا يتنافسون قدام الكل وقدام الصغار وكانت ذي انطلاقة فعالية الصغار في اسطبل الصقلاوية والكل متحمس واللي يقول اشجع البنت واللي يقولون نشجع الولد وبالفعل فازت دانه بكل شرف وبكل قوة ووقفت برجولها ظهر المهرة وقالت : حااااايي يمهرررتي
اسر ابتسم وقال : تستاهلين الطيب ماشاءالله
دانه ابتسمت وقالت : معليه المره الجاية واكيد فرسك ماهي مدربة ولا ماشاءالله واضح انها سريعة
اسر : ان شاءالله
لف بالخوصاء اللي كانت المسافة بينها وبين المهرة سانتيمترات بسيطة وهذا اللي اشعل نار الحماس في قلبها وقلب فارسها الاسر ..
" فالرياض "
صحت الميلا بقرف من الحر وشعرها متلصق بجسمها قرفت وقامت وهي تقول : الله يقلع ابو الرياض والعيشة فيها
دخلت الحمام واخذت دش سريع وطلعت وكانت بمنشفتها وشافت صور من دانه استغربت وقالت : يقلع حظها لا تكون عند جودي !
فتحت جوالها وشافت صور اسر والخوصاء معه ابتسمت وقالت : خووصااااتي لبى عييونها
وقرت المكتوب وكانت دانه كاتبه :
شوفي اسرتس والخوصاء حقتتس
الميلا م ركزت وكتبت :
الله صدق انتس محظظووظظه !
ولفت ع دخول امها وهي تقول : مييلو اخلصي خالاتتس بيجون !!
الميلا ابتسمت بكلافة وقالت : ابشري
طلعت ام تركي ومشت الميلا للدولاب وطلعت جينز اسود وتوب احمر ولبسته وتكشخت وضبطت شعرها الاسود اللي يلامس نهاية ظهرها وحطت ميكب جريئ نوعًا ما وطلعت وريحة عطرها سابقتها وجلست تحضر مع امها وقالت : يمه بيجون بناتهم ؟
ام تركي : اييه والظاهر انهم كبروا منزمان م شفناهم
الميلا : اييه عاد يارب يجون الريم وريما
ام تركي : بيجون بيجون
الميلا ابتسمت وقالت بنفسها ( اخيييرًا احد صاحي صح انهم يخسون عند وضيحي وغزولتي وتاليني لكن يالله ) مشت وشوي وارتفع صوت الحريم والتراحيب والسلام الحار والدموع سواء فرحة او شوق لأختهم صباح وبناتها وعيالها ع انهم كانوا اغلبهم حاضرين زواج الجود لكن البعض م قدروا يجوون
الريم : ميلا صح ؟
الميلا ابتسمت وقالت : اييه يهلا والله بالريم
الريم بقرف بعدتها قبل تسلم وقالت : وشعندها ورعة الديرة صارت تمون ؟
كلهم من ريما لأخرهم جنى طاحوا يضحكون ع الميلا وجلسوا جنب امهاتهم وسوالفهم كانت اغلبها م فهمتها الميلا اللي فضلت التحضير والتقديم ع السوالف
ام ثمراء : ميلا يبنيتي
الميلا ابتسمت لجدتها وقالت : لبيه يجدة ؟
ام ثمراء : تعالي تعالي جنبي
الميلا تقدمت وجلست جنب جدتها وقالت : امريني
ام ثمراء ابتسمت وقالت : كيف العيشة معتس
لفت الميلا لأمها اللي اعطتها نظرة وسكتت الميلا بحزن وقالت : زيينه نحمد الله ونشكره
ام ثمراء : بس م فيه زي الديرة والله يبنتي لي هنا فوق عشرين سنة وعجزت اتقبل وكل فترة وفترة انزل للديرة لكن ابطيت منها ورجعتوا لي الشعور بعد زواج الجود عسى الله ينور دربها ويوفقها
الميلا ابتسمت وقالت : اميين يارب
قامت الميلا ودخلت للمطبخ وقالت : اااااه بذبحهم والاشكال هيلقيات يقرفووونن !!!!
كانت الميلا تدري ان جدتها تجاملها وبرضى خالاتها اللي م عمرهم عاشوا فالديرة والاسوء بنات خالاتها اللي يمغصون قررت تجلس بالمطبخ وفتحت جوالها ودقت ع دانه وم وصلها رد وقالت : واو يحظي !
رمت جوالها وقالت بنفسها ( اه يجودي وش صار لتس واحنا سرينا فالليل ولا كان عندتس خبر واه يعمري عليتس ) مشت وجلست عشان خاطر امها وصارت تصب قهوة وتتجاهل اي طلب يجيها من بنات خالاتها
ام الريم : ميلا خير ان شاءالله م تسمعين الصبايا ؟
الميلا ضحكت بسخرية وقالت : صبايا ؟ الظاهر اني اكبر منهم ولو اني المضيفة كل وحدة تقوم وتخدم عمرها وبعدين وين عايشين احنا تطوروا تكفون ساكنين بالرياض ع ايش ؟
منيرة انفجرت تضحك وقالت : لا بارك ربي بالكتمان
البنات انصرعوا يضحكون والضحك كان يمغص ويقرف سامعه صدت بقرف وقالت : والله لا تلوميني مقدر اكتم اكثر تقرفون
قامت ومشت وهي تسمع كلام وتحسب جدتها عليها وخالاتها ضحكت وقالت : طلعت شخصيتتس الصدقية يأم ثمراء !؟
ام ثمراء بصراخ : تعالي ياللي م تستحييين ع وجههتس !!!
ريما : تيتا اسحبي عليها
بدؤوا يسولفون وام تركي كارهه الساعة اللي عزمتهم فيها وحلفت انها اخر مره تعزمهم كانت مصدومة من اهلها ومتقرفة منهم ..
" في اسطبل الصقلاوية "
كرموا الفائزة من الاطفال وكانت سمّية دانه ودانه اللي كرمتها وقالت : يحبيبتي انتي ان شاءالله تصيرين احسن مني بعد
دانه الصغيرة ابتسمت وقالت : ان شاءالله
عطتها دانه هداياها والميدالية الذهبية ومشت دانه الصغيرة ع الميدان كامل بالمُهر حقها
دانه بفرحة : حتى سميتي تفوز عليكم
ماهر ابتسم وقال : يحلوها من سمّية
دانه فزت برعب وقالت : خرشتني !!
مشت وتجاهلت صوت ضحكته اللي دوت بقلبها وركبت المهرة وصارت تركض فيها وهي تضحك ووقفت اول م سمعت صوت ديم وهي تقول : والحين بنبدأ بسباق مع الفارسين والفارسات والكل مع بعضهم البنات ضد بعض بالمضمار الاول والعيال ضد بعض بالمضمار الثاني
وتقدموا كلهم واسر وفلاح طايرين من الفرحة وهم يشوفون الخيول والفروس ابتسم اسر وقال : نوريهم قوتنا ؟
فلاح : ايه يولد غريب م فازت الخوصاء ؟
اسر : انا اللي سحبت اللجام واخرتها
فلاح بحدة : ليييه !!
اسر : عشاني م ابي اتسابق واتعبها ع الفاضي الحين بنفوز صح
فلاح ابتسم وقال : عاد هي ثلاث مراكز ركز ع الثلاث الاولى
اسر ابتسم بتحدي وقال : قصدك الاول ؟ ابشر ابشر
سمعوا طلق المسدس وانطلق السباق سواء عند البنات او العيال وبعد ربع ساعة وصلوا لخط النهاية وكانت المراكز كالتالي :
[ العيال ]
١- اسر بن عايض بن مساعد
٢- ماهر بن طلال الفيصل
٣- فلاح بن سالم بن مساعد
[ البنات ]
١- دانه بنت ملهم ال سليمان
٢- حلا بنت راضي ال ياسر
٣- روز بنت احمد بن حسين
-
المدير تقدم وصار يبارك ويسلم الجوائز وقال : والحين دور سباق تحديد من الافضل بين اسر وبين دانه
دانه ابتسمت بثقة وقالت : م يحتاج صح ؟
اسر ابتسم ع جنب وقال : ليه خايفة تخسرين قدامهم بعد فوزين متتالية ؟
دانه : اجل استعد للهزيمة
مشت وركبت المهرة وتقدمت فيها لخط البداية واسر بالمثل وماهر كان ع احر من الجمر وهو يشوف اصابة المهرة اللي دانه من اصرارها ع السباق غفلت عن مهرتها وفعلاً فات الاوان وانطلقت الرصاصة معلنة بداية السباق وبعدها بأربعة عشر دقيقة واسر ودانه يشوفون خط النهاية قدامهم وبسرعتهم الجنونية اطلق ماهر اللطيم ووقف قدام المهرة وسحبت دانه اللجام بكل قوتها وهي ترجف رعب وصدمت المهرة باللطيم وطارت دانه من ورا السور مصابة وفاز اسر بالسباق وهو م كان يطالع ولا انتبه للي صار وفزوا الكل لدانه وحلا وديم يركضون ومنهارين ووصلوا لها وكانت واقفه ع رجولها وقالت : انا بخيير مهرتي وين ؟ وخييل ميين اللي طلع قدامي !!!
ديم تقدمت واول م مسكت يد دانه طاحت واختل توزانها واغمى عليها
حلا برعب : حسيييت نزلييها لا تحركينها يمكن فيها كسور
تقدموا ونزلوا دانه ومددوها ع الارض براحة وشوي ووصلوا الطاقم الطبي ركض وشالوها والطاقم الطبي الخاص بالخيول كانوا عند المهرة اللي طاحت وزادت اصابتها وصارت ممنوعة من السباقات لأجل غير مسمى وانتهت الليلة ذي برعب كبير من جميع الاطراف خصوصًا ماهر اللي مسك اللطيم وطلع فيه لغرفته وقفل عليه وطلع برا اسوار الاسطبل وحصل اسر وفلاح واقفين ينتظرون عقاب يجيهم
ماهر : اسر مبروك ميدالية ذهبية وكأس من اول دخولية لك والله م انت بهين !
اسر ابتسم وقال : الله يبارك فيك وعقبالك
ماهر : عندي خيير والله
اسر بربكة : سلامتها بنت ال سليمان فيها شيء ؟
ماهر : مدري بس اللطيم هو اللي وقفها
فلاح : ومنهو ذا اللطيم ؟
ماهر ابتسم بضيق وقال : الخيل حقي
اسر توسعت عيونه وقال : انت ورا ذا كله !؟
ماهر : ايه بس م كانت نيتي كذا المهرة مصابة وبتطيح بدانه وتكسر ظهرها لأن الخيل اذا معاد تحمل بيرمي صاحبة بأبشع طريقة وخفت يصير لدانتي كذا
اسر وفلاح ناظروا ببعض وقالوا : دانتك ؟
ماهر توسعت عيونه وحمرت خدوده وقال : هاه !؟
انقذ ماهر سيارة عقاب ونزوله منها وتقدم وقال : يالحمير مخلين المرتجز لحاله ؟
ماهر ابتسم وقال : يالله عيال استأذنكم
مشى يركض وركبوا اسر وفلاح وعقاب وبدأت السوالف
اسر : ايييه خليناه يخي وشذا ثقيل وكبير يخوف
عقاب ابتسم وقال : مثلي
فلاح : عقاب اصبعك وشفيها ؟
عقاب : رحت للمستشفى وطلع فيها كسر وجبروها وحمدلله
اسر : همم خلني اخمن السبب ابوي واو وش الذكاء الهائل اللي عندك ي اسر
عقاب انفجر يضحك وفلاح اسوء منه ابتسم اسر وكمل وهو يقول : اني صادز شوي بيكسر رقبتي وبيقول عشان تصير رجال وانا ميت
فلاح كح وقال : الله يقلعك ي اسر
عقاب ابتسم وتبدلت ملامحه لجدية وقال : عاد ابوي يمون ع رقبتك وم تقدر تقوله شيء
اسر : صادز
مشوا متجهين للديرة والسوالف والضحك م وقفت الا عند بيت ابو فلاح اللي فتح وقال : عيال اقلطوا
عقاب بصوته الرخّيم : اكرمك الله يعم ابوي ينتظرنا
ابو فلاح ابتسم بخبث وقال : ابوك ولا زوجتك ؟
عقاب طارت عيونه بفشلة واسر انهار يضحك وقال : جوووي يعمي سالم والرب جوووي
ابو فلاح ضحك وقال : ودعناكم الله
دخل هو وفلاح ومشى فلاح لغرفته اللي خارج البيت وبنهاية الحوش وابو فلاح دخل بيته وسكر عليه
فلاح لف وشاف تالين مبتسمة ضحك وقال بفرحة : ارحبي يدهر قلبي ورجعانه
تالين حضنته بحب وقالت : تبقى يعيون اختك
صقر طلع من الحمام وقال : وانا مالي رب
فلاح : يقلع ابو الوناسة اررحبوا فذمتي
صقر ابتسم وقال : الله يبقي من يرحب
فلاح : شرايكم نطلع فوق سطح غرفتي ونشب الضو وقعدة ع مستوى ؟
صقر بحماس : تم والله انه تم
تالين : خلاص انا بدخل اجهز لنا اكل واجيكم
صقر وفلاح بنفس الوقت قالوا : يالله
طلعت وطلعوا وراها وتسلقوا السلم ووصلوا وفرشوا فرشتهم وجابوا المنقل والحطب وشبوا النار وشوي وطلعت تالين بهدوء وحطت الاكل ع الارض وقالت : عيال كيف اجيبها ؟
وفزت ع صراخ امها وهي تقول : يبننت الكللبب انتتيي وياااه ووشش مجلسسكم معع السكيير ذا !!
تالين غطت اذانيها وهي تكره تسمع اي احد يسيء لفلاح وهي تعرف حقيقته وقلبه الابيض
صقر بحدة : صوتتس لا يطلع يمه وانا رجال وادرى بمصلحتي ادخلي داخل والعني ابليس اللي راكبتس
فلاح : روحوا لها وفكوني
صقر لف وقال : ويمين بالله م ادخل بعد ذا التعب !!
نزل صقر وشال الصينية وهو يسمع صراخ امه اللي تقدمت وسحبت تالين مع شعرها ودخلتها داخل وسكرت الباب وهي تقول : مثل م رفضت تجي نام عنده مثل الكلاب !
فلاح بحزن : اه م يطاوعني قلبي احط لقمة بحلقي وتاليني م هي معنا
صقر ابتسم وقال : واللي وراك منهي ؟
تالين دخلت غرفتها وطلعت من الشباك ونزلت مع السلم اللي ورا البيت وجات تركض وقالت : يحبيبي يفليح جعلني م اتبدل فييك
فلاح بفرحة : اجل سموا بالله وخلوني اقولكم وش صار لي اليوم
ابتسموا واثنينهم سموا وصاروا يسمعون سوالف اخوهم الكبير وفرحته بالفوز وتعزيزهم له كان اجمل من الليلة كاملة بالنسبة لفلاح ..
" في بيت ابو فهد "
نزلوا عقاب واسر واسر ماسك عقاب طقطقة وعقاب يتصدد ويسوي انه م يسمعه
اسر بضحك : يالله نشوف زوجتك تنتظرك ولا لا ؟
عقاب وهو يحترق خجل قال : اسر بس !
اسر فك لطمة عقاب وانفجر يضحك وقال : اول مره اشوفك محمر يحلوك يعقيب اححببكك والله
عقاب رفسه وقال : هاا سد حلقك !!
مسك عقاب الباب وكان مسكر ضرب راسه بخفه وقال : هيا القم ابوي مسكر الباب
اسر ابتسم وقال : الجدار اللي عند غرفتك الحالية نازل شوي بيمدينا نطب
عقاب رفع ثوبه وركض وهو يقول : اول واحد يدخل هو عم الثاني
اسر ركض وهو يقول : تخسي تصير عمي !!
طبوا اثنينهم بنفس الوقت وطاحوا يضحكون وقال اسر : اسمع رحتوا للعزبة ؟
عقاب : ايه والله وولدت وحدة من البكار ورحت للمرتجز ولاعبته شوي وعطيته زادن ياكله وجيتكم انت وفليح
اسر ابتسم وقال : يالله توصي ؟
عقاب هز راسه بنفي وكمل اسر وهو يقول : تمس ع خير
عقاب : من اهل الخير يحبيبي
مشى اسر ودخل مع باب المطبخ الخارجي وعقاب مشى لغرفته وفتح الباب ودخل وقال : سلام عليكم
الجود سكرت كتابها وقالت بعتب واضح : فلا حيا ولا قرب دارك !
عقاب دخل وهو يحك راسه وقال : بسم الله وشفيتس !
الجود رمت الكتاب وضرب في راسه وقالت بحدة : وتسأل بعد وتحسب بسكت لك اطلع برا لا اصيح في عمي !
عقاب مسك راسه بألم وقال : ورعة ! ويمين بالله اذا م هجدتي لا امسكتس !
الجود بكل قوة وهي ترجف من الداخل : بتتطلع ولا كيييف
عقاب صد وقال : لا خلاص بطلع لا حول ولا قوة الا بالله انهبلت البنت الله يعوضني
طلع وشافت الجود الجبيرة اللي ممتدة من اصبعه الصغير لبداية كفه وقالت : تعال تعال !
طل عقاب براسه وقال : هاه ؟
الجود وهي تحاول تخفي اهتمامها قالت : هذا وشهو اللي بيدك ؟
عقاب رفع يده وقال : ذا ؟
وانصعق من الالم ونزلها بسرعة وقال : اقلع ابو الحالة نسييت اني مفروض م احركها !!
الجود تقدمت وقالت : خلاص بسامحك نام داخل بس فالصالة لا اشوفك توطوط عندي !
عقاب ابتسم وتبدلت ملامحه لجدية علطول وقال : ايه خير ان شاءالله
مشى وطلع برا القسم كله والجود مصدومة وقالت : اف الحين عمي الله يهديه شوي ويذبحهم وبيقول اعرف بمصلحتهم ااه وذا زعول بس بكيفه
مشت وانسدحت واجبرت نفسها تنام وفعلاً غطت بنومها وعقاب ابتسم اول م اختفى حسها ودخل بهدوء ومشى وسكر الباب وفرش فراشه فالارض ودخل فيه ونام علطول ..
:::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد وطويييل ويجنن وحشتوني مرره لكن الظروف والنفسيات بعد الاختبارات بس ابشركم خلصت كل شيء ومره تحسنت 🥹 ، دعواتكم لصاحبتي حنين بالرحمة ❤️ ، عطوني رايكم بكل شي حرفيًا كل شيء اشوفكم ع خييير ببارت جديد 😢 )