ليّت اللِذي خَلق العُيون السُود ... خَلق القُلوب الخَافقات حَديد

البارت السابع عشر

لف واستوقفته ذراعها وهي تتمسك بذراعه وتلفه عليها ، ضحك وقال : غرتي يالميلا ؟
الميلا بحدة وعيونها تحترق : اييه اغاااار !
اسر سحبها من خصرها وشّدها عليه وقال :
لا تغار منهم دامني قربك
‏سمّ وامر من تبي أبعده ؟
-
الميلا ابتسمت بعتب وقالت : رنا
اسر ابعد وجهه بحيِث يشوفها لكن م تركت ذراعه خصرها ، ابتسم وقال : مين رنا ؟
الميلا انفجرت تضحك وتجددت روحه من ضحكها ابتسم بحنية وباس راسها بقوة وهو يستنشق ريحة العود منه ، مشى فيها وجلسوا ومن سوالف كان تسعين بالمية منها تأمل اسر لعيون الميلا وملامحها وهو حّلل شكلها من شامة توسطت خدها تحت عينها اليمين ، غمازاتها اللي انحفرت بوجنتيها ، عيونها السود الوساع ، شعرها الكثيف والاسود ، ابتسم وقاطع سوالفها وقال : جيتي لمستشفى بالشكل ذا ؟
الميلا وهي متحمسة بالسالفة تغيرت ملامحها وقالت : كيف ؟
اسر مسك شعرها بيده وصار يلفّ به وقال وهو ميت حُب : مُغرييييية ! يالميلا مُغرية
طارت عيونها ووردت ملامحها صدت برعب من عيونه اللي تطالع داخل روحها ! قلبها يدق وسحبت شعرها اللي بيده وقالت تغيير الموضوع : اسمع متى بتطلع ؟
اسر ضحك بسخرية وهو قافطها وقال : والله م عندي علم
الميلا قامت وسحبت عبايتها وفز وسحبها له وقال : خير !! ويين وين ؟
الميلا : للبيت ي الآسر !
اسر بحدة : وعساس بخليتس تروحين ؟
الميلا بنفس الحدة تخفي رجفة صوتها : اعنبو غييرك وش عاد تبي ؟!
اسر : م فيه م بتروحين م ابي !
الميلا فزت وباس خده بكل قوتها وارتخت يدينه من خصرها وركضت علطول وطلعت لتركي وهي تعدّل برقعها وقالت : مشينا ؟
تركي ابتسم وقال : مشينا
قام وقال ناصر يطمن الميلا : كلها يومين ويطلع ان شاءالله
الميلا ابتسمت له وقالت : ع خيير
مشت مع تركي وطلعوا ورجع ناصر وشاف اسر زعلان ضحك وهو بديهيًا عرف السبب ..
" فالحّد "
وصلوا بعد ممشى يوم ونص ، نزل عقاب وضيدان وراه دخلوا للمخيم العسكري وبدأ عقاب بكل صرامة يوزع المهام والمواقع ع العساكر بمختلف الهيئات ومختلف الرُتب ، صد اول م خلص ووزع كم عقيد عَ كم كتيّبة ، جلس وقال : ضيدان
ضيدان لف له وقال : سم يطويل العمر ؟
عقاب بحدة : وين ضارب ؟
ضيدان : عند الالغام مع قداح ليه ؟
عقاب : ضروري يخلص قبل ساعة !
ضيدان ضرب تحية لعقاب واستراح بعد امر عقاب له يستريح وطلع ركض يوصل لضارب العلم ، ماهي الا ربع ساعة ودخل ضارب ذُو الوجه المرعب واللئيم صاحب الندبات المخيفة ، والملقَب بصاحب الذراع الايمن لفقده ذراعه اليسار بأحد الالغام ، وكان فقده لذراعه اقوى سبب لعزمّه بدخول تخصص الالغام والقنابل ، ابتسم ضارب ودق تحية لعقاب وقال : سم طال عمرك تآمر بشيء ؟
عقاب قام وضرب تحية لضارب وقال : استري..
ضرب المعسكر كامل تحديدًا غرفة عقاب سلاح خطير يسمى " ار بي جي " نسف فيهم وانفجر فيهم جميعًا ، صرخوا الجنود بالخارج ومثل م علمهم حضرة الفريق عقاب كيف يدافعون دافعوا واهلكوا من كان سبب فالتفجير ، والجنود الاخرين ركضوا داخل الغرف فالمعسكر يسبقهم ضيدان اللي ركض لغرفة عقاب وصرخ بأعلى صوته : طوويييل العمر !!!
الغرفة مُتهالكة واستحالة يعيش حضرة الفريق عقاب ، وسيادة المُهيب ضارب ! طارت عيونه وهو يحاول يشوف اثر ولف ع دخولية مقدام وهو يصرخ فيه : وييين عقاااب !!؟
ضيدان بكل حزن قال : لا حول ولا قوة الا بالله !
انفجع مقدام والتراب والهَدم عدم عليهم الرؤية تماماً ..
" فالديرة "
ثامر وهو طالع من دكان جده يترنح ويدندن له اغاني حافظها هو يعرف ان صوته نشاز لكن مع ذلك كان راعي احاسيس ، صقر بضحك : الله الله الله ! وش الاحاسيس الزبالة ذي ؟
ثامر وهو يخفي الضحكة : مُت بغييضك بس
صقر مشى ودخل ثامر تحت ذراعه وقال : مشينا بس
ثامر : بتجي لبيت جدي ؟
صقر : ايه ابوي عنده اصلاً
ثامر ابتسم وقال : ايه ايه حتى جدي راشد موجود
صقر مشى وشافوا الشيبان طالعين من البيت ، تقدموا لهم وقال ثامر : ع وييين يجداني ؟
ابو فلاح : للعزبة
صقر فز اول م تذكر انه ترك سلاحه ومحزمة بمجلس عمه عايض ركض وقال بصوت عالي : يووولدد
دخل للحوش وم كان فيه احد مشى للمجلس وزفر براحة اول م شاف محزمه وسلاحه ، طلعت تركض تبي تشيل القدوع تغيرها وتغسلها متجاهلة من كان فالمجلس لفت ع صوت امها وهي تقول : يالبندري !
البندري بصوت عالي : لبيه يمه ؟
طلع يركض وهو يشّد الحزام عليه وطاحت عيونه عليها بدون شيلة شعرها يلاعب الرياح وهي تحاول بنرفزة تبعده عن وجهها ، رفعت عيونها وشهقت اول م شافت صقر واقف وقالت بصدمة بتشابه الملامح : فلاح !!
صقر ابتسم وقال : اخوه صقيّر
البندري شهقت ورفعت شيلتها عليها وركضت وقالت : وييللي من اخواني صقر صصقرر !
صقر مسح وجهه وشنبه وطلع من الباب وهو م ينكر انه طاح لها صد وقال بنفسه ( بتحب من اول نظرة ! م هقيتك خفيف يالصقر ! ) ركب صندوق ونيت عقاب وفهد يسوقه وثامر بالغمارة معه وهيثم معهم ، ضرب الصندوق وقال بصوته الثقييل : مشييينا
دعس فهد ع البنزين متجهين للعزبة مع باقي الشيبان وتركي وراهم بعد م نزل الميلا عند باب بيت ابو تركي ..
" في بيت ابو فهد "
دخلت البندري وقلبها يدق ولفت ع صوت ضحى العالي وهي تقول : خييير وين المواعين ؟
البندري برعب : برا !
ضحى : بنت !! طيرري جيبيها علامتس ؟
غزيل قامت ومشت مع البندري وقالت : خير وشفيتس ؟
البندري برعب وربكة : شدعوة نسيت بس ولا م فيني شيء
غزيل وهي م تبي تضغط عليها قالت : اشوا امشي اجل
مشوا وخلصوا الاغراض ، مشت اول م سمعت اصواتهم ضحكت وهي تقول : مساعدة ؟
البندري : جودي تعالي
الجود تقدمت وقالت : نوني اشرحي لي تكفين ترا
وقّربت بين اصبعها الابهام والسبابة وقالت : قدّ كذا معرفتي بالعسكرية
البندري ضحكت وقالت : ابد عقاب اذا عنده مهمة احيانًا يطلقونه بدري ويجي بعد اربع ايام واحيانًا يستقعدون له ويجينا بعد شهرين كاملة !
الجود طارت عيونها وقالت : اف خيير توو رجع من شهرين ! يكمل سنة احسن !!
غزيل ضحكت وقالت : هو ترقى عشان كذا
الجود : واو ! وترقى وانا مدري !!!
غزيل انفجرت تضحك زيادة وقالت : نويصر علمني قبل شوي
البندري بصدمة : وش صار عميد ؟
الجود : ايه اظن لأنه عقيد
غزيل وهي تشّيل المواعين : فريق
كحت البندري بصدمة والجود ماهي اقل منها شهقت وقالت : الفريييق عقاااب !!
البندري وعيونها بتطلع من محاجرها قالت بصدمة : اجل معسلامة الشغل مليييون !
الجود ابتسمت وقالت : حبيبي والله متى فضى اصلاً !
غزيل بصوت عالي : واسر بيرجع بعد يومين
زغرطت ضحى وهي ترقص بشعرها ، ضحكت غزيل ودخلت معها وهي تقول : عااااااشت بنت عااايض !!!
ضحى وهي تتمايل : عششتي يبنت عبدالملك !
غزيل ضحكت ودخلت داخل وشافت احلام واقفة ع الباب ، خزتّها بعيونها وقالت : يششيينتس
احلام بحدة : دززي يورعه !
غزيل : الورعه لا تعّود عليتس علمتتس والله ان تضيعين يمينتس من شمالتس !!
دخلوا البنات وهم ميتين حماس ، لكن بينهم كان قلبها يدعي له وهو كل شوي ينقّبض وماهي مرتاحة ابدًا للمهمة ..
" في حايل "
ام ماهر تقدمت ومسكت ماهر ابتسمت له وقالت : ع ديار الحبيبة ؟
ماهر ابتسم : والله لزوم اشوفها اشتقت
ام ماهر ضحكت وقالت : الله يستر عليك يوليدي وسلم لي عليه وقول تجهز كله شهرين وتتم
ماهر اشر بأصبعه ع خشمه وقال : ع ذا الخشم يمه
طلع ولد حايّل وركب سيارته ومشى للديار دانه بنت نجَد ..
" بعد ٥ ساعات ونص "
وصل ماهر للرياض تحديدًا واقف قدام باب بيتها ، ركضت من غرفتها بحماس لدرجة التعثر بآخر درجة ، ضحكت اول م مسكت ذراع ابوها اللي ضحك لها وقال : بشويش يالدانة بشويش !
دانه انفجرت خجل وقالت بفشلة : سم طال عمرك
ركضت وارسلت بوسة فالهوا لأمها اللي ابتسمت وقالت : ودعتتس الله
طلعت للباب ، وقفت واخذت نفس عمييق وفتحت الباب ، ابتسم واستهل وجهه من شوفها وقال : يهلا بصباحٍ بدايته شوفتتس وطرياتس ! يهلا بدانتي
دانه ابتسمت بخجل اول م فتح يدينه لها مشت بهدوء وتعّدته وقالت : تبطّي عظم
ماهر ضحك بسخرية وسحبها مع ذراعها قدامه وقال : عشان الشارع ولا والله م تروحين !
ركبوا السيارة ومشوا ومن مخططات وسوالف عن الزواج اللي تحدد في حايل تحديدًا شهر ذو الحجة ..
" فالمعسكر "
ضيدان وهو يدور اي اثر لعقاب وضارب وشهق اول م تذكر المخبأ اللي مدخله تحت مكتب عقاب ركض بكل قوته ، فتحه وزفر براحة وقال : طويييل العمر ربي يحفظك مكتوب لك عمر ؟
عقاب ابتسم غصب عنه وقال : هدأت الامور ؟
ضيدان مد ذراعه لعقاب وقال : ايه نفداك اطلع
تمسّك عقاب بذراع ضيدان وطلع ، لف لضارب وقال : يسارك !
ضارب بحدة : يميني يطويل العمُر !
وهو قاصد ان م عندي ذراع يُسرى ، ضحك عقاب بسخرية وقال : يمينك ي ضارب والله اني يسارك بعد الله !! شّد حزامك
ضارب طلع مع عقاب وجلسوا والكُل التموا عليهم من تحمد للسلامة وسؤال عن اللي صار ، طلع عقاب لحوش المعسكر وقال بحدة وعيونه تطلع شرار : مسكتوهم ؟
ضارب : طبعًا معك وحوش !
الكل بصوت واحد عالي صَدى فالجبال اللي حولهم قالوا : اييييه نعممم طاااال عمرررك
عقاب ابتسم وجلس ، لف له مقدام وقال : العلم ويش ؟
عقاب : ابد والله سمعنا انطلاقة الصاروخ وبحكم ان شيخنا ضارب
ضارب ابتسم بحدة وقاطع كلام عقاب وقال : معليك زود يطويل العمر !
عقاب بحدة : خلني اكمل !
ضارب دق تحية لعقاب وانصرف بعد امر عقاب له يستريح ، لف لمقدام وقال : وانت !! اشغلتني قم التفت لشغلك
مقدام قام ولف لضيدان وقال : فصل ! طال عمره
ضيدان وهو كاتم الضحكة : ننصرف !؟
عقاب بحدة : اذلفوا !
ضربوا له تحية وطلعوا من عنده ، دخل عقاب وشاف جُثة صاحب الـ " ار بي جي " طايحة متوفي ، سكر خشمه بقرف وقال : شيلوه من عندي !
تجمعوا العساكر وشالوه وطلعوا ، طلع وراهم ابتسم بخفه اول م مر طيف القُبلة اللي صارت بينه وبينها قدامه ، سهم وهو ماشي وقف وقال : الله وش الابتسامة جعلها دايمه ودايم سببها يطويل العمر ؟
عقاب لف بعيونه الحادة لسهم وقال : وين حطيت موقعك ذكرني ؟!
سهم دق تحية واستراح وتقدم بدون امر من عقاب وقال : ابد اشتقت لزولك وجيت اشوفك واطمن عليك الحمدلله ع السلامة وخطااك الشر يبو عايض
عقاب وهو يشوف اسر في سهم ابتسم وقال : لو م انت غالي ع العضيد كان افتكيت فيك الارض !
سهم باس راس عقاب ومشى يركض وهو يقول : يسسعد لي اسر يشيييخ !
عقاب كمل طريقه لغرفته البديلة تحت الجبل ، دخلها وجلس بصعوبة وفتح جاكيته وفك الدرع بحدة وملامحه حمّرت من قوة الالم ، نزع تيشيرته ووقف قدام المراية كان ظهره مشوهة بشظايا اخترقت الدرع بسهولة ! يده كان يواجهة صعوبة فتحريكها توقع انها مكسورة او مصابة لأنه استخدمها درع بشري لوجهه ! مشى وهو يلف جسده بشاش ويعقم جروحه ، وبالمثل كان ضارب يسوي لكنه استعان بخويه قداح اللي يلف له شاش ع جروحه وم كان ضارب متضرر كُثر عقاب اللي تلقى كل شيء من وراه ..
" بعد يومين فالمستشفى "
اسر وهو يشيل بقايا اغراضهم لف يساعد ناصر وطلعوا من المستشفى ، ابتسم اول م استنشق هواء ربه بكل فرحة لف ع ناصر وقال : يجعلنا معاد نذوق اللي ذقناه
ناصر ابتسم وقال : امييين يالعضيد امين
مشوا وشافوا صقر وفلاح ينتظرونهم ، ركبوا بعد السلام ولف فلاح عليهم وقال : الوجهة ؟
ناصر : البيت بخاطركم محلٍ ثاني ؟
صقر بسخرية : شف ذا وش يقول البيت ! وش تبي بالبيت خلونا نهيّيييص
اسر بحدة : ارفع علومك وتمرجل ! مشينا للبيت وراي اهل لي ثلاث اشهر م شفتهم
فلاح : ايه ي اسر بس صقّير م يقصد اللي فكرت فيه !
صقر وهو يضحك بسخرية : امش يخوي والله لو اشرح م بيفهم وش انتظر منه وهو طايح له شهرين ؟
اسر شّد ع قبضته وصد يتنفس ، طلع راسه مع الشباك متجاهل صقر ، تذكر عقاب اللي له يومين م رجع بدون محد يدري عنه شيء لف لفلاح وقال : فليييح
فلاح ابتسم وقال : ارحب يبو عايض
اسر : وين عقيب ؟
ناصر بحماس : يوه ليه م سألتني ابشرك يبو عايض ان اخونا ترقى فريق ومسك مهمة فالحّد فييلق يمشون ع كلامه من ثمانين الف جُندي !!
اسر ابتسم وقال : يستاهل كل خير الله يسدد رميه ويرجعه بالسلامة
وصلوا للديرة وضحك اسر اول م شاف بيت ابو تركي وقال : وحشني ذا البيت تصدقون !
فلاح ضحك وقال : وحشك اللي فالبيت اكثر تصدق ؟
طاحوا ناصر وصقر يضحكون عليه ، لف لفلاح وهو يضحك وضربه بحدة وقال : يحيوان !
فلاح وهو ميت ضحك : اني صاادق !
ناصر : تصدقون بديت احس انه ظلم للبنات
صقر : اي بنات ؟
ناصر : اصبر اشرح لك ماهو الحين حنا يالعيال كملنا جامعة وهم ثانوي وجلسوا فالبيت ؟
فلاح بحدة : وش ظلم ؟ البنت محلها بيت ابوها وبعده بيت زوجها !
اسر بسخرية : افووووه ي فليييح وش التفكيير ذا قلب عقاب وربي ! لا م جاهم قبول خواتي ولا كان بدرسهم بفلوسي !
صقر : صدق حتى تالين م جاها قبول ودالين تووها اول سنة جامعة لكن مدري وش نظامها
فلاح : دالين تدرس !؟
صقر بحدة : فلاح اعقل !
فلاح : وشفيه اسأل يخوي !
سكتوا اول م وصلوا لبيت ابو فهد ونزلوا ، ابتسم اسر وقال : ياهل المحل
فزوا اهل ابو فهد كلهم من خواته وامه وزوجات اخوانه واخوه فهد وعيال اخوه واخته الكل بصوت واحد قالوا : ارررحببب
دخل اسر وهو يمشي ببطيء تقدم لأمه وباس راسها بكل حب وقال : تووها ردّت روحي جعلني م افقدتس
ام فهد وسط دموعها قالت : الحمدلله لك يارب ع سلامته وشحالك يولدي ؟
اسر بأبتسامة عريضة : بخييير جعلني فداتس
لف لخواته وقال بصوت عالي : وضيييييحي !!!!
ضحى ضحكت وقالت : اررررحببب يعييييونها
مشت وحضنته بكل فرحة وباست راسه وباس لها راسها ابتسم وكوّر وجهها بين يدينه وقال : وشحالتس ؟ فقدتيني ولا لا اعترفي !
ضحى فزت وباست خشمه وقالت : الا والله فقدتك يحبيبي انت معاد مجنونن فالبيت غيري فقدت تخبّالك وهبّالك معي
اسر حط راسها تحت ذراعه وقال : ايييه اجل ابشري بالخير
البندري انفجرت تضحك وقالت : يوووه يمه عّودوا المجانين
ام فهد وهي تضحك قالت : خليييهم جعلني م افقدهم
تقدم اسر وحضن البندري وقال : بعّض اذنتس ليه تعلمين علينا ؟
البندري ضحكت وقالت : اسف خلاص اتوب
ضحك اسر ومد يده للجود وقال : وشحال زوجة الفريق ؟
الجود فزت ولامست اطراف اصابعه وسحبتها ، سحب يده وحطها ع صدره احتراماً لحَرم اخوه وقال : فقدتتس والله
الجود ابتسمت وقالت : م تفقد غالي واحنا فقدناك والله
اسر ضحك ومشى وقال بصوت عالي : حصصييييييص !!
حصة ضحكت وقالت : اسسسييييير !
ابتسم وحضنها وحضن سديم وسحاب معها وقال : وشحالكم يدنيت عمكم وخالكم ؟
سديم : بخيير
سحاب بحدة : بخير يخالي لحالي يويلك تصير خال لأحد ثاني !
ضحى طارت عيونها بصدمة وقالت : ولمها ذي الورعة ابشرتس ان بناتي بيصير اسر خالهم !
البندري وهي ميتة ضحك : وبناتي بعد
غالية : خيير يبنات !
ضحى بحدة : يراسي انا مدري احصلها من الام ولا بنتها !
اسر وهو شايل سحاب ويطيرها فالسماء قال : ايييه خال سحّابي لحالها !
مشى بعد م نزلها وهو يضحك اول م رمتّ ضحى فنجالها عليه وهي تقول : تخلخلت عظااامك الا نعم !
ابو فهد بحدة : وضييح !
ضحى جلست وهي تضحك ، مشى ومد يده لغزيل وقال : وشحالتس يبنت العمة ؟
غزيل ابتسمت وصافحته بكامل يدها وقالت : بخيير يخوي بخيير وحمدلله ع سلامتك
اسر سحب يده وحطها ع صدره احترام لها وقال : جعله دوم والله يسلمتس
مشى وقال بهمس وهو يغمز لضحى : يوووه الجنية عّودت !!
ضحى انفجرت تضحك وقالت : اييييه
سلم اسر ع احلام وقال : ويين البطن ي حليييم ؟
احلام بربكة : وشدخلك بعد !
اسر : قافطينتس من اول انا ووضيحي
مشى وجلس جنب ابوه بعد م سلم ع فهد ، مشى وضرب اسر ع راسه وقال بحدة : وانا !
اسر : ثامر ؟ دز بس
ثامر حاوط رقبته من وراه وقال : افاااا ي عم هذا وانا اكبر سبب في زواجك !
اسر انفجر يضحك وقال : ويمين بالله انه بيذلني ذّله كلاب !
ثامر ابتسم وقال : اييه زين انك عارف يالكلب
فز ثامر اول م لف اسر عليه وهو يرميه بالحصى اللي فالحوش وهو يضحك ، لف اسر وقال : اييه علومكم ؟ ووش جديدكم
ام فهد : والله ع م يسرك وانت ؟
اسر : يعساه دوم وانا..
قاطعه دخول تركي والميلا وام تركي فز وقال : يهلاااااا باللي لها خافقي يهّلي !
ابو فهد بحدة : صبي !! اثقل ولعنه !!
الميلا ضحكت بخجل ومشت له ، فتح يدينه لها وتوسطت حضنه قدامهم ، قفل عليها بكلتا يديه وقال : احببب الحضُن ذا واعشق راعيه
الميلا حاوطته بهدوء وقالت : يجعلني م افقدك
هي مو متوقعة الا متأكدة انها طاحت لآسر وبقوة بعد م صار زوجها ، عشقت تفاصيله البسيطة المُهلكة بالنسبة لها ، هامت بطريقة سوالفه وضحكه ونكاته وشعّره وتغزله فيها ، تركها وقال : هلا بتركي
سلم تركي عليه وقال : وشحالك ؟
اسر : بخييير والله وانت ؟
تركي : ع م يسرك وقررت اعرس بعد
اسر ابتسم وقال : ماشاءالله ع البركة من تعيسة الحظ ؟
تركي ضربه بخفه وقال : يحيييوان م تتعدل انت
اسر تقدم وباس راس ام تركي وقال مقاطع سالفة تركي : وشحال ام الزييين ؟
ام تركي بابتسامة عريضة وهي استبشرت بعد شوفته وهو بخيير : نسلم علييك
اسر : الله يسلمتس استريحي
مشت ام تركي وجلست بين ام فهد وغالية ، لف لتركي وقال : اييه كمل
تركي : ابد بنت خالتي ريما
اسر : والله مدري منهي لكن الله يوفقك يحبيبي
تركي ابتسم وقال : امين
< الحديث اللي دار بين ام تركي وتركي >
تركي وهو تنرفز من كثر م يشوف تالين ولا تكلم حّس انه اذا شافها مره ثانية م بيقدر يحكم شعوره وبينفجر عليها وبيأذيها وبيأذي عمره ، لف لأمه وقال : ابي اعرس
ام تركي بصدمة : بسم الله الرحمن الرحيم ! صل على النبي يولدي
تركي : اللهم صل وسلم عليه بسرعة بتزوجيني ولا اكلم ابوي ونروح نخطب !
ام تركي ضحكت وقالت : زييين جيتني ابد ريما بنت خالتك مريم جاهزة لك !
تركي قطب وهذا م كان اللي بباله ابدًا ، لكن ابتسم وقال : اف ريما النتفه ذيك كم عمرها بالله ؟
ام تركي : خمسة وعشرين
تركي ضحك وقال : حلو ثمان سنين بيننا قلبنا جودي وعقابها
ام تركي : وشعليك كنت بختار الريم لكن انخطبت
تركي : اف ماشاءالله الحين وضح لي ان البنات ينخطبون بسرعة
ام تركي ضحكت وقالت : نتمم ؟
تركي : لا
ام تركي تغيرت ملامحها وقالت : افا ليه !
تركي : بطبيعة الحال م بروح للرياض وانا م اعرف شكلها !
ام تركي بشّك : فيه احد ببالك ؟
تركي هز راسه بنعم وكمل وهو يقول : وريني ريما
ام تركي بكل برود وخبث وعدم امانه لأمانات بنات خواتها فتحت جوالها وطلعت اكثر صورة مغُرية لريما بأحد الاعياد تحديدًا العيد الماضي ، كانت تاركه شعرها ع اكتافها ، لابسة احمر ماسك بجسمها مسّك ، فاتنة بالروج الاحمر وضحكتها الجميلة ، غمازاتها المُذهلة ، فتحة صغيرة بفخذها ، ابتسم وهو رغبته تغيرت علطول وقال : تم
ام تركي ضحكت بخبث وقالت : اجل تم نروح جمعة وسبت ذي
تركي : ازهلي
" نرجع لحاضرنا "
تركي جلس جنب اسر وناصر ولف بعيونه اول م دخلت تالين ودالين معها وام تالين وصقر وهيثم وابو فلاح وفلاح اخر واحد وهو اللي سكر الباب وراه ، دارت بمُقلتيها وطاحت عينها بعين تركي طول بالنظر وصدت عنه عكسه اللي كمل يتأملها ، جلسوا ومن تحمد لسلامة اسر وسوالف تكلم تركي وهو قبل يتمم ع ريما يبي يشوف شعور تالين تجاهه : ابشركم اني قررت اعرس
ام تركي كملت وهي مبتسمة : اييه خذينا بنت اختي مريم
ام فهد بأبتسامة : ماشاءالله الريم ؟
تركي : لا الصغيرة ريما
الجود بصدمة : ترركي !!
الميلا : شفتي الكلب !
تركي ابتسم وقال : وشفيكم ؟
الجود : وم حصلت الا القشرا ريما !؟
تالين بسخرية تخّفي غيرتها بدون اي سبب : الاقشر م يياخذ الا القشرا !
تركي ابتسم وقال : وشدخلتس الحين ؟
تالين صدت وقالت : اكلم جودي انت اللي وشدخلك بيننا ؟
تركي ابتسم وهو كّسر لعينها قال : عمي سالم
ابو فلاح ابتسم وقال : ارحب
تركي : م ودك تزوجني من عندك انت القريب قبل خالتي ؟
ابو فلاح : والله ونعم الرجل لكن الشور شور البنات
ام تالين عطته ع بلاطه وقالت : م عندنا لك بنات !
تركي لف لها وقال : وليه ان شاءالله ؟
ام تركي بحدة : عساس ولدي ميتن ع بناتتس !
تالين ضحكت وقالت : يمكن م ندري
الميلا ضحكت بسخرية وقالت : خلاص عاد انت م قلت ريما تمم عليها وتستاهل !
ضحى بصداع : صدعتوا فيني وش العلم ؟
الجود بهمس : تركي ميت عند تالين لكن مدري وش صار وتالين تحترق الحين وتركي مبسوط ع غيرتها
ضحى والبندري وغزيل بصوت واحد قالوا : اهاااا
الجود ضحكت وقالت : يب
لفوا كلهم اول م قامت تالين ومشت وقالت : انا رافضة
دالين علطول بخوف انهم يلفون عليها قالت : وانا بعد تركي كبير علي !
تركي ضحك وقال : اجل ريما وربنا كريم دام الزين رافض
تالين غسلت يدينها بالمغسلة اللي باخر الحوش وهي تسمعه وتحترق رفعت صوتها وقالت : م بوافق وانت ناوي ع غيري
هي قالتها بثقة اول م تأكد ان ابوها وعمانها طلعوا للمجلس ، وعرفت برضو انه م قال الزين الا وهو واثق ان محد بيسمعه ، مشت راجعه لهم ولفت له اول م قال : لاتلعبين بالنار ي تالين !
فلاح بحدة : تستهبل !؟
تركي بحدة : فلييح سد نحرك !
قام تركي ومشى لها وقال بهمس م يسمعه الا تالين ونفسه : تبيني !؟
تالين بغرور : لا !
تركي : كلميني بقلبتس !
تالين بحدة : لا !
تركي ابتسم ع جنب وقال : تمام
صد عنها وجلس ، اسر ابتسم وقال : وش الافلام ذي وانا توو صحيت لا يكون باقي فالغيبوبة !
الميلا انفجرت تضحك وقالت : لا حبيبي صاحي ابشرك
صقر وهيثم صرخوا وقالوا : اوووووه حبييبببيي !!
اسر بحدة : اييه حبيبها وش حاشرك انت وياه ؟
صقر ابتسم ولف بعيونه وهو من جلس كان يتأمل البندري اللي ع عوايدها تلعب بالحصى وتتجاهل كل من فالجلسة ، كان يتأمل تحركاتها متجاهل الاكشن بين تركي وتالين ، رفعت عيونها من تأكدت بالسهّام اللي اخترقت عيونها ، التقت عيونهم ارتسمت ابتسامة خفيفة ع ثغره عكسها اللي صدت برعب علطول صد معها وهو اكد لها انه يطالعها ، الجود قامت وقالت : عيال احد جاه خبر من عقاب ؟
الكل ردوا بالنفّي وقال اسر : تبين ادق عليه وتكلمينه ؟
الجود ابتسمت وقالت : ايييه الله يخليك
اسر اشر بأصبعه ع خشمه وقال : ع ذا الخشم يبنت العم
دق ع عقاب ، وبالجهة الثانية كان يصّوب ع الرماية بكل شراسه وعدوانية ويطيحها واحد ورا الثاني ، لف لصوت ضيدان ونزع السماعات الواقية من ع اذانيه وقال : خير ؟
ضيدان مد جوال عقاب وقال : ازعج راسي عّيا يسكت !
عقاب سحبه وشاف اسم " اسيير العضّيد " ابتسم وحط سلاحه ع كتفه ومشى داخل الغرفة ورد وقال : ارحب
اسر ابتسم وقال : البقى ي مرحب
عقاب : بشرني عنك ؟
اسر بعتب واضح : زعلااااااان بالحييييل
عقاب : تبشر بالرضاوة
اسر : ساعات وانا جاي اجل ؟ لك ثلاث ايام !
عقاب : والمتعارف عليه ان نويصر م بيسكت وبيعلمك
اسر : لا بالله سكت توو دريت اليوم
عقاب بسخرية : والله يبن عايض لو يهمك سألت !
اسر : امسك امسك
عقاب : لا غلطان ماني صوبك عشان امسك !
مد الجوال للجود ومشت ركض ودخلت الغرفة حقتها هي وعقاب وهي تسمعه يكرر : الوه ؟ تسمعني ؟
الجود رفعت السماعة ع اذنها وقالت : ايه اسمعك
عقاب : الجود !؟
الجود ابتسمت وقالت : عيونها ؟
عقاب ابتسم بخفه وقال : وشعلومتس ؟
الجود : ننتظرك
عقاب : ماهو بصالحتس والله
الجود ببراءة : ليه ؟
عقاب بخبث : طالبين القرب يبنت العم
الجود : وش تقول انت ؟!
عقاب ضحك بخفه وقال : ابشرتس اني بخير تبين شيء ثاني ؟
الجود : اييه امانه علمني وش صار معك قلبي له يومين يوجعني ومتى بترجع
عقاب : تشوشين ع راسي الحين !
الجود بعتب واضح : وحضرة الفريق يتمنى محد يشغله حتى عن امور زوجته ؟!
عقاب : والله بخير صار تفجير فالمنطقة وتحديدًا غرفتي ونجوت بأعجوبة وحييّ ارزق وبالنسبة لرجوعي خليها مفاجأة لأني للحين مدري
الجود بخوف : الحمدلله ع سلامتك انتبه لنفسك اذا مو عشاني عشانك تكفى يعقاااب !
عقاب : وليته عشانتس
ابتسمت وقالت : وين جوالي خلني ادق عليك كل م اشتقت
عقاب بحدة : كذا كدينا خير صدق ! جوالتس معي وانسي منه طول م انتي ع ذمتي انتهى !
الجود زفرت بعصبية وقالت : اف طيب يالثلاثيني !
عقاب : طيب يالنتفه العشرينية
سكر عقاب وصدت وابتسمت بخفه ومشت للحوش وقالت : اسر شكرًا
شهقت غزيل وقالت : الحقييييييرة !!
ناصر فز وقال : بنت !
غزيل بحدة : وشكرًا لي وييينها !
ناصر بحدة : غزل !
غزيل لفت له وقالت : يجعلك الحّية الوالد وش تبي !!؟
انفجروا العيال والبنات يضحكون عليها ، قام لها ومسكها مع ذراعها وطلع فيها للبيت متجاهلهم وراه ، اسر بصوت عالي وبخبث : ارفق بها يبن عايض !
ضحى انفجرت تضحك وقالت بخبث : ايييه ع هوونك بشويش لا تشّد
غزيل حمّرت وجنتيها وقالت بحدة : يجعلني الحق امي ان اسلمتتس ي وضيييح !
ناصر سحبها للغرفة وسكر الباب وراه وقال : خيير والصوت !
غزيل بحدة : منن انتتت !!
ناصر سحبها مع خصرها وشّدها عليه وقال بصوته الحاد بعصبية : زوجتس !!!
غزيل ويدينها استقرت ع صدره زفرت بعصبية وصارت تحاول تبعده ، شّدها عليه اكثر واكثر وقال : عيونتس بعيوني !
رفعت عينها له وقالت : ابعد !
ناصر : بنبعد كل مره ؟ خلاص عاد اتركي نفستس لي !
غزيل بحدة : تخسى ! م تنترك بنت عبدالملك !
ناصر حط خشمه ع خشمها وقال : م تنترك اي والله م تنترك
غزيل تجمعت دموعها بحرقة وقالت : لو اترك نفسي لك م يجمعني بعدين لو صار لك شيء !
ناصر ابتسم وقال : وش بيصير مثلاً !؟
غزيل ودموعها تمردت واخذت مجراها : بتروح مثل امي وابوي
ناصر حضنها بكل قوته وقال : ان قالها الله اوعدتس م اخليتس م حيّيت وانتس بوجهي وشنبي من جور الايام
غزيل حاوطته وقالت : الله لا يحرمني منك
ناصر ابتسم وقال : اهدا وهونيها ع عمرتس لا تبكين العيون اللي م انخلقت للدموع !
غزيل بضحك : راحت هيبتي
ناصر بحدة : وتختفي بعد ! قدام رجال طلع من ظهر عايض !
غزيل باست راسه وقالت : يطلب والبي له ولد الخال
ناصر ابتسم وباس خدها وطرف من مبسمها وقال : يجعله فدا الرمضاء اللي تمشين عليها
ابتسمت بخجل وهي قررت تترك نفسها لزوجها ورفيق دربها حتى لو م كان زواجهم عن حب !
" عند العيال والبنات فالحوش "
الميلا بخجل من جراءة اسر وضحى معه لفت للجود اللي قالت لها : اسمعي
الميلا ابتسمت وقالت : عيوني ؟
الجود : كلمت عقاب واحيانًا يقولي اشياء م افهمها
الميلا : مثل ؟
الجود قربت وهمست وقالت : اول م جاء من المستشفى قال جهزي نفستس زوجتس جاي والحين قلت له متى بتجي قال ماهو بصالحتس
الميلا وهي بدت تستوعب صّفر وجهها وقالت : ايه وش قال ؟
الجود كملت وهي تقول : قلت ليه قال طالبين القرب يبنت العم
شهقت الميلا بصدمة وقالت بدون وعي : ووقح !!!
اسر فز وقال : منهو اعنبوتس !!؟
الجود بفشلة قبصت الميلا وقالت : هاه ! لا لا محد
اسر بحدة : ميلا !
الميلا صدت وهي بتموت خجل وقالت : ملعون وجريىء !!
الجود بتوتر : طيب ! اسر بعد قبل شوي وش يقصد !؟
الميلا غطت وجهها بيدينها وقالت : اااه يمه جريئين كلهم !
الجود حمّرت وقالت : ميلو وش يعني !!
الميلا سحبتها وقالت بهمس في اذنها : عقاب يقصد الوصل وافهميها !
الجود كحت بصدمة وقالت : هاااه !
تركي بحدة : بنات مصخّت السالفة اصواتكم !؟
الجود بفشلة وهي تحترق خجل : اسفين
الميلا لفت ع صوت غزيل وهي تقول : بنات تعالوا نسولف
ومشوا كلهم ع خروج ناصر من البيت ، ضحى يخبث ضحكت وقالت : زيين ماتروش
اسر انفجر يضحك وقال : الله يقلعتس يوضيحي
ناصر بخبث : تبي لها من يهجدها
ضحى انفجرت تضحك وقالت : تعقب وانا اخت فهد !
فهد ابتسم وقال : ونعم !!
اسر ابتسم وجلسوا العيال يسولفون وقلب اسر فالسماء طاير وهو يشوف اهله صح فاقد عقاب بالحيل لكن حيل الله اقوى ..
" عند البنات "
طلعت دالين مع البندري وهي تقول : وين الزبالة ؟
البندري : ورا بيتنا اخواني يطلعونها لكن امشي انا وانتي نروح
دالين بتوتر : خوفي يجينا احد !
البندري : ارجعي طيب
دالين بدون اي تردد رجعت ، زفرت البندري بملل ومشت وطلعت من الباب الخلفي ، فز صقر وهو كان يدخن وقال بحدة : ع ويين ؟
البندري شهقت برعب ورجعت لثمتها ع وجهها وقالت : خييير وشدخلك !!
صقر بحدة : انا سألت وين بتروحين ؟
البندري رفعت كيس الزبالة وقالت بقرف : تشوفها ولا متعود عليها ؟
صقر ابتسم وقال : لا واللسان يبي له قص ؟ اخوانتس يدرون انتس طالعه ؟!
اسر من وراهم قال : ايه ندري وانا جاي معها !
صقر حط السيجارة بين شفايفه وسحب وزفره وقال : اجل تحت تصرفك يولد العم
مشى ولفت البندري وقالت بخوف : اسر اصبر..
قاطعها وهو ماسك نحرها وقال بحدة وهو يحترق غيرة ع خواته : م امداتس تناديييني انا وناصر !! اقلها ثامر عندتس
البندري برعب : ابش..ابشر !
سحب الكيس من يدها وركضت داخل رماه ورا البيت بالحاوية ورجع وهو يزفر نيران ملتهبة ....
:::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
(ارحبوا يحباااااني رجعنا ببارت جديد لذيييذ ، بنقطع فترة عشان الاختبارات والله يوفقنا جميع ، بارتنا يعتبر قصير لكن يمشي الحال استمتعوا ولا تنسون النجمة نسيتكم ! )