ليّت اللِذي خَلق العُيون السُود ... خَلق القُلوب الخَافقات حَديد

البارت التاسع

مشى عقاب والجود تناظر بقفى ظهره ابتسمت ودخلت وسكرت الباب وراها ..
" فالسوق "
عقاب مشى رايح للدكان وفتحه بالمفتاح ودخل وطلع ورقة الجود وتوسعت عيونه بصدمة وقال : عسى م نست شيء ذي !
ضحك ودخل واخذ كل شيء مكتوب وحاسبها من راتبه وطلع وسكر الدكان ولف ع صوت اسر وهو يقول : عقيب وشعندك ؟
عقاب رجع الكيس وراه علطول وقال بربكة : جاي اخذ كراتين مويه تعرف نبي الاجر فيهم
اسر : ايه والله صادق بس وين الكراتين ؟
عقاب ابتسم بتوتر وهو بدأ يعرق وقال : شسمه ابي الحمام وزيين انك جيت اخذها معك وحاسب عليها
اسر صغر نظراته وقال : عقيب ورني الكيس وش فيه
عقاب طارت عيونه وقال : هااه ؟
اسر انطلق له يركض وفز عقاب وطاح مع الدرج وفز ع رجوله مره ثانية ودقها سبرنت للبيت واسر يلاحقه ويقول : وربي م تسلم تعاااال
عقاب ابتلش انه وشلون يدخل ع المعزين وهو يركض بكيس واسر وراه وكمل ركض من ورا البيت وطب مع السور وطاح ع يده المصابة وشهق من الالم وقام قبل يجيه اسر ودخل الكيس فغرفتهم وسكر الباب بالمفتاح ولف ع اسر اللي طب مع السور وقال : يحماااار وشذا كله لمن قاعد تركض وتخفي الاغراض
عقاب بحدة وهو متألم من اصبعه قال : يخوي م فيه شيء وشفيك انت !!
اسر تقدم وحط خشمه بخشم عقاب وقال : يعقيب ع الناس كلهم الا اسر اخلص اعترف
عقاب ابتسم وباس خشم اسر وقال : نفدا خشمك صدق ابد والله النتفه طالبتني اغراض وقلت م ابي اقابل احد عشان م اطيح من عينه
اسر ضربه بقوة وقال : اخخخسس والله وبدييييت تطييح والصدق الله يلووم اللي يلومك وحدة من بنات عمي راشد وم تطيح لها ؟
عقاب احترق غيرة وقال يخفيها : تخسى اطيح لها وبعدين انت تمدحها ذلحين ؟!
اسر رفع حاجبة وقال : ايه غرت ؟
عقاب طار برقبته وقال : تستهبل انت !
اسر كان كاتم الضحكة ويبي عقاب يعترف وقال : تغار صح ؟
عقاب بحدة : ايييه اغااار واحتتررقق بعد !
اسر انفجر يضحك وقال بعد م دف عقاب : وخر مني كتمتني انا محد مغرقني الا اختها تبيني امدحها وش ابي بها ؟
عقاب : طلع الميلا من راسك احسن لك قبل يدري ابوي وينتفك
اسر جلس وتكى ع الجدار وقال بكل حُب :
ابيها تكون لي واعيش بها عُمري الجاي
‏ابي لا مرّها العاذِل تقول احبه ويحبني
-
عقاب جلس جنبه وقال : والله انه بيتعبك الحب ذا يخوي اللي من غير سنع البنت ماهي بصوبك !
جاء فلاح بكاسات شاهي وقال : زيين حصلتكم
اسر ناظر فأخوه وقال بحدة : ابي افهم شيء واحد وش السلبية ذي كلها وليه ماهي بصوبي ؟ ماهو انت ماخذ اختها وماهي بنت عمي ؟ وراك شيء انت لاييكون للحين تبي الميلا !
عقاب كح بحرقة وهو كان يشرب شاهي وقال بصراخ : تتسستههببلل اسسر !! شللوون احببهاا واختهاا زوجتتي وملكيي وحلاالي !!
اسر صد بحزن وقال : اندري عنك !
فلاح قطب وقال : وش العلم ؟
عقاب اشر ع اسر وقال : الدبشة ذا طايح ع الميلا ومحد سمى عليه
فلاح : طيب ادري غيره شيء ؟
اسر بحزن شديد قال : ايه الدبشة ذا مصّر ان اللي اسويه غلط ومصّر ان الميلا ماهي بصوبي !!
فلاح ابتسم بضيق وقال : شكله م يدري
عقاب ابتسم : ولا حوله بعد
اسر لف بعيونه عليهم وقال : ادري بـ وش ؟
فلاح حكى كل شيء صار فالمجلس وقال..
" نرجع بالأحداث شوي "
فالمجلس تقدم فلاح وشاف اسر برا مع ناصر ولف لأبو هزاع اللي كان يكلم ابو تركي ومشى لهم بنية انه ياخذ الشاهي وسمع كل شيء يدور بينهم
ابو هزاع : دامني مريت ع الديرة وقلت اشوفكم والله يرحم ميتكم ويغفر لها ويغمد روحها الجنة
ابو تركي بحزن : امين والله يجزاك خير
ابو هزاع مسك كتف ابو تركي وقال : وانا طالبك محد ياخذ الميلا غير هزاع تووه شباب واكبر منها واعقل وتووه والله ماسكن وظيفته
ابو تركي ابتسم وقال : والله ونعم بهزاع ولد خالتها واقرب لها
ابو هزاع ابتسم براحة وقال : اجل نتكلم فالرياض اذا عودتوا علينا
ابو تركي : خير خير ان شاءالله
كان فلاح مصدوم بشكل مرعب ومشى وضرب بكتف عقاب ومسكه وقال : خير شفييك ؟
فلاح بتوتر : خلف ابو هزاع طلب الميلا من عمي راشد !!!
عقاب توسعت عيونه بصدمة وحزن ع اسر وقال : اسألك بالله !
فلاح : وييميين بالله كييف نقول لآسسر !!
عقاب لبس زبيريته وقال : خلاص بروح الدكان واذا شفته بقوله معليك
مشى عقاب ودخل فلاح وصار يراقب هزاع ونظراته الغير مريحة وابوه معه ..
" نرجع لبطلنا "
اسر طاحت الكاسة من يده وفز للمجلس وهو يحترق وفزوا فلاح وعقاب وراه ومسكوه قبل يدخل وقال عقاب وهو معصب : اسسر اععقلل وش تبي تسووي !!
اسر انفجر عصبية وقال : بككللمم عمميي تحسسبب بخلييها تطيير مني وترووح لغييري وبعديين شفييكم كذا احرر م عنديي ابررد م عندكم عييااال وقفووا معيي احبههاا تكفوون لا تكسسروون ظهرري بميالتي !!
ناصر تقدم يركض وقال : خيير خيير وش السوالف ذي وجنب المجلس طس مني هناك !
اسر بحدة : اننططمم انتت ماللك ششغلل اقللع ع كتتبك وفكنني شررك
عقاب مسك اسر مع كتفه وسحبه بس انفلت اسر منه ومشى وانصفق ع وجهه من ابوه اللي م سمع النقاش لكن م حب رد اسر ع كبيره ناصر وقال بحدة : كذااا تكللمم اخووك الكبيير !
اسر كان بيوقف قلبه وهو يحسب ابوه سمعه لكن تنفس الصعداء اول م عرف السبب وقال : اسف
مشى من جنبه وركض وهو يسمع ابوه يهاوش وراه طلع من بيتهم وركب سيارة فلاح ومسك مكان المفتاح وضحك وقال : فلييح م يجووز عن طبعه
شغل السيارة ومشى واستوقفه فلاح وهو يركض وقف له اسر وقال : نعم اخوي وش تبي ؟
فلاح بحدة : وررع سياررتي !
اسر : تخاويني ؟
فلاح : اكيييد عشان م تكسر سيارتي
ركب فلاح واسر يضحك ومشوا لأسطبل الصقلاوية ووصلوا بعد فترة قصيرة ونزل اسر وقال : باخذ الخوصاء وبرجع فيها ارجع للبيت انت
فلاح ركب مكان السواق وقال : يالله انتبه لنفسك
مشى اسر ودخل واخذ الخوصاء واستوقفه ماهر وهو يقول : اهلاً وشعندك بالوقت ذا بتنسحب ؟
اسر : عندنا عزاء وابي اخذ الخوصاء عندي محد يسليني غيرها
ماهر تغيرت ملامحه لجدية وقال : احسن الله عزاكم وابد خذ راحتك
مشى اسر وهو يقول : جزاك الله خير
ركب الخوصاء وضرب وانطلقت الخوصاء تركض بكل سرعتها واسر متلطم وفاتح يدينه ورفع عيونه للبدر فالسماء وابتسم وهو يتذكر اول لقاء بينه وبين الميلا وتأكد انه مر شهر كامل ع اليوم ذاك وصل للاسطبل ودخل وكانت هنا الصدمة كان يسمع صوت طق خلخال دخل بهدوء وكانت واقفة بشكل يجذب بجلابيتها الحمراء وشعرها الاسود الفاتن والشيلة اللي كانت ع راسها حارمة عيونه يطالع تفاصيل وجهها وصوت خلخالها وهي ترجع ورا من المرتجز اللي كل م كانت تبي تلمسه لف يبي يعضها وقالت وهي تضحك : من انت ووين حبيبتي الخوصاء ؟
المرتجز صهل اول م شاف اسر ع الخوصاء داخل اسوار الاسطبل وفزت الميلا ورجعت خطوتين ورا وقالت : عمى شفيه ذا شرس ويين ادهم والخوصاء ؟
تقشعر جسمها اول م صهلت الخوصاء وراها ولفت بكل قوتها وطاحت عينها بعين اسر اللي ابتسم وقال :
انا ادري ان عيونتس السود خدّاعة
بس ليه تكذب لقدار وش داعيها
م ابيتس فالصدر يالميلا مثل غاز ولّاعه
والله م اخون عيونتس لو تخون واني مراعيها
-
الميلا لفت شيلتها ع وجهها وقالت برعب : اسر !
اسر نزل من الخوصاء وتقدم لها ورجعت الميلا بخطواتها وقالت ورعبها زاد : الابيات ذي لي ؟
اسر ابتسم بحب وهو يطالع عيونها السود وقال : وشلون تبيني اكتب لغيرتس وانا ميتن فيتس ؟
الميلا صدمت بالجدار معلنة وصولها لنهاية الطريق وزادت نبضات قلبها وهي تشوف ملامحه وابتسامته البريئة متعالية وجهه صدت وقالت : اسر تكفى لا تقرب اكثر
اسر بحدة : والله م اسوي لتس شيء اعنبوتس انا ابيتس بحلال ربي واخذتس ع سنته ورسوله !
الميلا توسعت عيونها وقالت بصوت عالي : بتجلطني انت ! م ابيك م ابي اتزوج كنت ابي اخوك وكنت احبه بس نصيب وانكتب لأختي ورضيت وسكتت ودفنت حبه تبيني اجيك واحبك وتروح لغيري !
اسر قرب ونزل شماغه ولفه ع يده ومسك يدها وقال : لا تلوين ذراعي فيتس وتقبلين بهزاع تكفين يميالتي وانا والله م اكسرتس واروح لغيرتس انا لتس ولا للموت
الميلا سحبت يدها وقالت : وتعرف بهزاع بعد عز الله كدينا خير الله يوفقك ي اسر لكن م اشوفنا لبعض ويمكنها مجرد مشاعر عابرة عشانك شفتني اكثر من مره
اسر زفر بعصبية وقال : اخو ضحى انا وش اقول وانتي وش تقولين !! انا هويتتس وحبيتتس وانا مالي فالحب وان كانتس م تبيني باخذتس غصبااا
الميلا ضحكت بسخرية وقالت : حلوه ذي غصبا ! زيين زين بنشوف بتصمل علي ولا بتلف مع اقرب مخرج وتخليني بنص الطريق
اسر حط يده ع راسها وقال :
يميالتي انتي والله طريييقي من اوله لأخره
ولاهو بآسرتس اللي يخليتس بنص الطريق
-
الميلا ضربت يده وطيرتها وقالت :صح لسانك يالآسر لكن ماني ميالتك للحب ولا انت بآسر الميلا بحبك وانتهى
مشت وباست الخوصاء وطلعت من الاسطبل واسر يضحك وراها رفع صوته وقال : يييميالة الاااااسر
الميلا ضحكت وقالت بصوتها الانثوي المرتفع وهي تجاريه : لبيييييه يآسسسر الميييلا
اسر بحب طاح ع التراب وقال : يالبيييييه اي والله
رفع نظره للبدر وضحك وكمل وهو يقول : وتجاريني بعد يوييل حالك يالآسسسر !
غمض عيونه وهو يسمع صوت خلخالها ليين م اختفى الصوت ولفت الميلا بعيونها وشافت غامد جاي يمشي صوبها سارعت بخطواتها ووصلت للباب وفتحته ودخلت علطول وسكرته وقلبها يدق برعب ابتسمت بخوف وقالت بنفسها ( يارب انه م شافني لا عند اسر ولا اسر عندي ) دخلت للصالة في بيت ام غزيل وكل الحضور سروا والبنات بينامون فالبيت مع غزيل
" فأخر يوم من ايام العزاء "
غزيل سكرت الباب وقالت : باقي احد ؟
ضحى بعصبية : كذا اجلسي درينا انتس سنعة خلاص !
غزيل ضحكت وقالت : يحبي لتس يوضوح
الميلا تقدمت وقالت : الباب يدق ؟
البندري زفرت بملل وقالت : بروح اشوف
الجود كانت عند المراية اللي جنب الباب وقالت : اجلسي انا افتح
تقدمت للباب وقالت : مين ؟
عقاب ابتسم وقال : اييه زين قام حظي وانتي اللي رديتي
الجود فتحت الباب وقالت بهمس : عقاب وش بغيت ؟
عقاب : م ودتس ترجعين للبيت عسى م شر ؟
الجود : ايه بجلس مع غزل ليه تبي شيء ؟
عقاب : ايه امشي معي
الجود توسعت عيونها وقالت بهمس : تستههبلل !
عقاب بحدة : لا م استهبل عجلي هاتي يدتس
مد عقاب يده ولفت الجود للبنات وقالت : عقاب جاء تعالوا سكروا الباب بطلع انا
الميلا فزت وقالت : نعمم ؟ والله م تسرين
مشت ووقفت ورا الباب وقالت : عقاب اذلف اختي وماهي بجاية معك !
عقاب زفر بعصبية وقال : صوتتس اقصريه واختتس زوجتي وكلامي اللي يمشي
الجود بزعل : بس عقاب..
عقاب قاطعها وسحبها مع يدها وارتطمت الجود بصدره العريض ومسك فكها ورفع وجهها لوجهه وقال : م فيه بس اذا قلت كلمة تتنفذ
الجود انسحبت من الميلا ودخلت وسكرت الباب وزلجته وقالت بحدة : دزز يالله العيال ببيت عمي عايض والبنات ببيت عمتي نوره الله يرحمها تعال بكرا فالليل واخذها !!
عقاب ضرب الباب بكل قوته وقال : ويمين بالله اذا م طلعتيها يالميلا اني لا اكفر فيتس !
انفتح الباب وطلعت ضحى وقالت : خير عسى م هنا خلاف ابوي وقال لا اشوف ولا بنت فالبيت عشان العيال من انت عشان تكسر كلمته !
عقاب : بنت مقصده فيها انتوا يبناته وبنات اخوانه م يقصد زوجتي
ضحى بأستهزاء : زوجتي زوجتي ! خلاص عاد حشى لذي الدرجة م تقدر تمسي وتنخمد بدونها !
الجود سدت اذانيها وصرخت بفشلة وقالت : ضضححى يككلبببة !!
عقاب فز وفتح الباب ومسكها وطلعها وهو صاد عشان البنات وقال : كم مره بنعيد الموال والى متى بتجلسين تصارخين !
ضحى بصدمة : يههب يوجهه صادن عنها وعرفها الله يعينتس ويقويتس حبيبتي
دخلت ضحى والجود تضربها ولفت لعقاب وقالت : وانت وش جاك وبعدين مفروض تنبسط السرير بكبره لك ! ويومين بدوني فجأة اشتقت ؟
عقاب رفع حاجبة وقال : احلفي ؟ وعساس اني ارقد عليه ؟
الجود بقلة حيلة قالت : وش تبيني اسوي اترجاك تخليني انام معهم !
عقاب مسك فكها ولف وجهها ع غامد اللي يدور فالحاره وقال : تبيني اخليتس عندهم وذا السلوقي يتمشى ؟
الجود قربت ومسكت طرف ثوبه من عند ذراعه وقالت : يمه وش يسوي ذا ومنهو اصلاً ؟
عقاب ابتسم ولف يده ورا راسها ومشى وقال : غامد والله م يجيتس وانتي معي
الجود شّدت ع ذراعه وقالت : والبنات ؟
عقاب كان يدري انه غامد مهو بصوب البنات لكن استخدمه كعذر عشان يطلعها معه ضحك وقال : معليهم خلاف ان شاءالله ووضيحي معهم
الجود ابتسمت وقالت : ايه عقيب
عقاب : سرى الليل
الجود ضحكت وقالت : جبت اغراضي ؟
عقاب : ايه وصار لي فلم هندي كله من تحت راستس انتي وعفشتس يالقزمة
الجود طارت عيونها وهي تذكرت اللقب ذا ايام المدرسة والتنمر اللي جاها دفته بعنف وقالت : لعاد اسمك تقولي الاسم ذا !
مشت وعقاب يشوفها قدامه ومهتم لخطواتها اللي تخطيها اسرع بخطواته وقال : علامتس يالقزمة تحسستي ؟
الجود لفت له وعيونها تغورقت بدموعها وقالت بصوت مهزوز : مررره م يضحك !
عقاب قرب وقال بصدمة : افااااا تبكييين !؟
الجود رفعت طرف جلابيتها وركضت للبيت وفز عقاب وراها ودخل بعدها وسكر البوابة ومشى يلحقها ووصل ورا البيت وسحبها له وقال : خير خير ليه الدموع ؟
الجود رفعت عينها لعيونه وقالت : وش يهمك !
عقاب بحدة : جود انطقي ليه تبكين عشان قزمة يالدلوعة ! وبعدين لا تناقشيني وتقولين ماهي دموع تماسيح
الجود بصوت باكي قالت : شف والله م اسامحك اذا قلتها لي مره ثانيه !
عقاب ابتسم وقال بعناد : يالقزمة
الجود سحبت يدها منه ومشت للغرفة وفتحت الباب وتقدم عقاب وفتحه بالمفتاح وقال : يالقزمة لا تبكين بقي دموع لثاني ايام العزاء
الجود دخلت وشهقت بحرقة وطاحت دموعها ومشت وجلست بالكنب بأخر الغرفة وسحبت كتابها وفتحه وصارت تقرأ تبي تغير نفسيتها بس سأت اكثر من مواصفات البطل اللي كانت تشوف عقاب فيه اما عند عقاب دخل للحمام وغسل وجهه ويدينه وطلع ولبس ثوبه الاسود وسحب شماغه وحطه ع كتفه وتقدم لها وتساوى بطولها وقال : جود ضقتي مني ؟
الجود ببرود ودموعها ع خدها : ولك وجه تسأل ليتك م جيت وليتني م شفتك فالليلة ذي كنت مبسوطة مع البنات
عقاب ابتسم وقرب وتلامس خشمه بخشمها وقال : حطي عيونتس بعيوني
ارتخت الجود وطاح الكتاب بحضنها ورفعت عيونها له وكمل وهو يقول : والله لا ازعل الدنيا مراضاة لتس ولاتزعل عيونتس علي
وسحب الكيس حقها وحطه بحضنها وقال : وهذي اغراضتس ويويلتس عاد تزعلين ع عقاب يالنتفه
الجود ابتسمت بخجل وقالت : عقاب
عقاب لف قبل يطلع وقال : سمي ؟
الجود : سم الله عدوينك شكرًا وانتبه لنفسك
عقاب : م بيننا الشكر يبنت الحلال ومعليتس موجود فالمجلس بس عشان ثوبي توسخ غيرته
الجود قامت واتجهت له وقالت : يعني بتخليني هنا لحالي ليه خذيتني
عقاب ابتسم بخبث وقال : بخاطرتس اجلس والله ماهو في صالحتس
الجود قطبت وقالت : وش تقصد ؟ وايه بخاطري تجلس ولا والله لا اروح للبنات واسحب ع اللي خلفوك
عقاب سكر الباب ودخل وحط يده ورا خصرها وشّدها عليه وقال بصوته الرخّيم : علمتتس وقلت ماهو في صالحتس
الجود طارت عيونها وقالت : ووش بتسوووي !!
عقاب نزل براسه ع كتفها واستنشق عطرها وهو حاضنها وقال : خليتس كذا لا تتحركين
الجود احترت وزادت نبضاتها وهي تشوفه بعرضه وطوله نازل عليها ارتبكت وقالت : عقا..
قاطع كلامها يده اللي انحطت ع منطوقها وقال بهمس : تعبان م نمت لي يومين خليني ارتاح معتس شوي وتحسبيني جبتتس عشان اخرب عليتس لا واللذي نفسي بيده اني تعبت من الكرف ومقابل الرجال والمعزيين اقطعي الصوت شوي بس وامشي معي
مشى عقاب والجود ترجع بخطواتها وهي مصدومة وترجف وقالت : عق..عقااب وش بتس..بتسووي ؟
طاحت الجود ع السرير وعقاب واقف ع راسها وقال : بتخليني ارتاح وانام ساعتين قبل يجون المعزيين مره ثانية ؟
الجود اشرت بيدها ع الارض وقالت : فراشك
عقاب مسح وجهه وشنبه واستغفر وقال بنفسه ( تستاهل انت اللي عودتها ع كذا ) زفر بملل وقال : طيب
مشى وفتح الباب وسكره عليها وسحب بوكيت دخانه وطلع سيجارته وحطها بين شفايفه وشغلها وقال بنفسه ( عقيب وش جاك عليها ؟ اعقل وفكني من الحركات ذي ) سحب كمية كبيرة من الدخان وابعده وطفاه برجوله وزفره بحرقة ومشى للمجلس وشاف ناصر يكلم ابوه قرب منهم وقال : وش السالفة صاحيين قبل اذان الفجر
ابو فهد مد الوصية لعقاب وقال : الان تقرأها لي ولا والله م يحصلكم طيب
عقاب ناظر بآسر وناصر وقال : وشهي ذي ؟
ابو فهد بحدة : حصلتها في جيب ناصر وهو منخمد وسحبتها وعطيتها الرخمة اسر ولا قرأها لي والحين دورك
عقاب فتحها وانصدم من المكتوب وقال : هاه !
ابو فهد ضربه بقوة ع كتفه وقال بحدة : اقررررأ !!
عقاب : يبه مقدر !
فهد طلع من المجلس وقال : وش العلم !
اسر زفر بعصبية وقال بهمس لناصر : جاك استاذ البدنية والله ان يهل المسبحة ويكب العشاء
ناصر كتم ضحكته وضرب اسر وقال : اص تبيني اضحك وانجلد يكلب !
اسر : الله اكبر محد قالك اضحك
فهد تقدم وقال : وش السالفة
ابو فهد بحدة لفهد بعد م غسل شراع عقاب : اقرأ الورقة وانتوا والله م تسلمون يوميًا من ابتداءًا من اليوم كرف عقاب فالعزبة ولا اشوف وجهك الا ع المغيب واسر فالدكان وم تجيني الا الساعة ١٢ الليل وناصر مع الضيوف لين يسرون سامعييين !
ناصر وعقاب واسر بصوت واحد قالوا : سم
فهد سحب الورقة وقرأها في نفسه وقال : اوووح !!
ابو فهد : لعنة الله عليكم من عوال اقرأ يحييووان
فهد : عمتي نوره الله يرحمها وصيتها لكم انكم تزوجون غزيل لناصر
ابو فهد توسعت عيونه بصدمة وقال : بس ؟!
فهد : ايه يبه بس
ابو فهد : اليوم اخر يوم عزاء بنخلص ونملك لهم
ناصر كح بقوة وقال : هااااااه !!!
ابو فهد بعصبية : اصه !
اسر : يبه مسرع البنت مستحيل تقبل عشانها فاقده امها خلها بعدها بشهر
عقاب تدخل وقال : واسر صادز مستحيل توافق وبتحسب اننا مبتلشين فيها ونبي نفتك من الوصية بسرعة
ابو فهد بحدة : طيب طيب انطموا بعد شهر خلاص
ناصر زفر براحة وقال بهمس : اف حمدلله
عقاب مسح ع كتفه وقال : اخ انخلع كتفي
اسر : عقاب وش صار ع وظيفتي ؟
عقاب بملل : يخوي تراك ازعجت امي انتظر
اسر : ولممهاا كم ليي انتظظر ! بسرعة الزفت ذا بيخطب وعمي بيبديه علي عشان وظيفته !
عقاب : عساه خطب وانا وش لي !؟
ناصر وهو كاتم الضحك قال : خير عقاب كذا تخليه بعد كل شيء
اسر بعتب واضح : خلاص الله لا يشكر فضلك ولا يعطيك العافية فوق تعبك انا بقدم بدونك
عقاب انفجر يضحك ومد له استبيان قبوله فالعسكرية برتبة نقيب وقال : مبروك يبو عايض
ناصر ضحك وقال : هطف
اسر فز وحضنهم كلهم وقال : يعساااااااني م انحرررم منككم
عقاب وناصر حاوطوه وقالوا : ولا منك
ناصر : وبمناسبة المناسبة السعيدة
قاطعه عقاب وهو يقول : غدينا بين المناسبات اعجل وشفيك ؟
اسر ضحك وكمل ناصر وقال : توظفت في مستشفى بنص الرياض دكتور طب اسرة
عقاب ابتسم وقال : ماشاءالله تبارك الرحمن ع البركة يحبيبي والعروسة جاهزة ماشاءالله الله يوفقك يارب
اسر ابتسم وقال : مبروك مبروك يحبيبي
ناصر : الله يبارك فيكم وعقبالكم
مشوا العيال بعد م سمعوا اذان الفجر وعقاب معاد يشوف شيء من الارهاق والتعب ..
" في بيت ام غزيل "
صحت الميلا والمعزين كلهم فالصالة ومسكتها وحدة وقالت : بسم الله عليتس صح النوم
الميلا غطت وجهها وقامت ومشت للغرفة ودخلت وقالت : وشفيهم ذول اف
غزيل ضحكت وقالت : وش تبيني اسوي اطردهم قدهو اخر يوم
الميلا ابتسمت وقالت : صباح الخيير دامني صحيت وشفتتس يغزلي
غزيل ابتسمت وقالت : يالله لا تحرمني ياربي
الميلا : ولا منتس يعيونها اسمعي وين البنات
غزيل : م لاحظتي شيء فالبيت ؟
الميلا لفت بعيونها وكان البيت كله فاضي شهقت بقوة وقالت : ويين اغراضتس ؟
غزيل ابتسمت وقالت : بروح اسكن مع خالي عايض
الميلا بفرحة : الله !! يعني بتسكنين مع البنات الا وينهم ؟
غزيل : ايه بسكن معهم وبرا يساعدون العيال في العفش
الميلا : ايه خليني اروح اشوفهم
دخلت الميلا للحمام واخذت دش سريع وطلعت ولبست جلابية كحلية وجففت شعرها وجدلته وحطت شيلتها عليها ولبست برقعها تغطي وجهها وبرزت عيونها السود اللي زينتها بالكحل الاسود وزادت جمالها وسعتها تعطرت وطلعت وشافت الجود واقفه جنب عقاب اللي متشمر وشكله وحشي عكسها اللي كانت زي الملاك جنبه ابتسمت الميلا وقالت بنفسها ( والله انهم لايقين لبعضهم يعساهم كذا دايم واحسن ) مشت وقالت : بنات مساعدة شيء ؟
اسر لف بقوته لصوتها وابتسم وقال : احس اني فقدت توازني
فلاح شال المركى وطيره ع وجه اسر وقال : وشرايك رجع توازنك ؟ اعجلل
عقاب ارتفع صوته المهيب وهو يقول : حححيي عيييينك يفليييح
فلاح ابتسم وقال : حييي نباااااك يالعقاااب
الجود لفت لعقاب وقالت : حذيانك البسها بزر انت بجلس الاحق وراك ؟
عقاب لف لها وحط يده فوق عيونه من الشمس وقال : لبيه ؟
الجود توسعت عيونها وقالت بخجل وبأبتسامة : لبيت حاج يعقيب والبس حذيانك
عقاب ضحك وقال : يعيااال يلعن الغباء رجولي تحرقني طلع عشاني ماعلي حذيان وامشي ع الرمضا ذي من صباح ربي
اسر : تستاهل المهم خلصنا ناصر حرررك
ناصر دعس البنزين وطار اسر وطاح ع التراب وانفجر فلاح يضحك وفز عقاب له ووقفه وقال : انت طيب ؟
اسر بألم ارتفع صوته وهو يقول : نوويصر حرام حرم الدم اني م اسلمك !!!
عقاب ابتسم وقال : لا لا طيب طيب
اسر دف عقاب وقال : وخر انت بعد
الميلا ابتسمت وقالت : اسر
اسر لف لها وقال بهمس وهو مغطي جوانب منطوقه بيدينه : لبييييه
الميلا دققت بعيونها وفهمت وضحكت وقالت : جوالك طاح
رفع اسر جواله من الارض ومشى وهو رافع طرف ثوبه وعقاب جنبه تقدمت الميلا عند الجود وقالت : هم نفس الطول صح ؟
الجود ركزت وقالت : لا عقيب اطول بشوي واعرض
الميلا : اذا جينا للطول والعرض كلهم عندهم خير لكن عقاب اوفر شوي
الجود ارتفع صوتها وهي تقول : ترروك
تركي لف لها وقال : يعييونه يجودي لبيه
الجود ابتسمت واشرت له يجي وجاء وحضن الميلا والجود وقال : يبناتي ادخلوا من الشمس لاتوجعكم !
الميلا ابتسمت وقالت : م توجع الا الدلوع وانا ولدت فالشمس وبموت تحتها
الجود توسعت عيونها وقالت : عسى م شر شفيها ذي
تركي ابتسم ولف وشاف تالين تبتسم ابتسم لها وقال : وانتي بعد ادخلي من الشمس
ودف خواته لها وقال وهو يلاحقهم : يالله يالله من اكلم انا ؟
تالين انصدمت واشرت بيدها ع نفسها وقالت : تقصدني ؟
تركي لف وقال : لا
مشى ولفت تالين وكان يقصد امهم اللي توو وصلت امس عشان العزاء ودخل اهله ومشى وتالين واقفة مصنمة من الفشلة ودخلت وقالت : ييع ييع اكرههنيي
الميلا وضحى انفجروا يضحكون عليها وقالت ضحى : يويلي ي تاليني
تالين بحدة : سدي نحرتس !
مشت وهي معصبة والبنات ماسكينها طقطقة ..
" في اسطبل الصقلاوية "
كانوا الفارسين يتدربون تحت اوامر من دانه اللي كانت تشرف ع العيال وماهر معها يشرف ع البنات عشان العدل وعدم التساهل بحكم ان دانه مستحيل تتساهل مع العيال والعكس عند ماهر خلصوا تدريب والكل صفق يحييون بعضهم رفعت دانه جوالها وردت ع الميلا ووصلها صوت الجود وهي تقول : داااانتتييي
دانه شهقت بفرحة وقالت : جووووديي !!
الجود ضحكت وقالت : اخباااارتس وحشتييننيي ؟
دانه : بخييير جعلك بخيير وانتي ؟
الجود : نحمد الله ونشكره
دانه : كيفتس مع عقاب ؟
الجود : معليه احس بدينا نعرف لبعضنا لكن م فيه مشاعر الا احترام وخوف بس
دانه : احسن لتس ولا من ينتظر حب من شخص مثل عقاب
الجود : صادزة والله المهم معليتس مني انتي كيفتس والحمدلله ع سلامتتس علمتني ميلو قبل شوي وتوجب علي ادق والله
دانه ابتسمت وقالت : ايييه لا معليتس خلاص قدني طيبة واسمعي الحين اذا احد جاب لتس ورد وبعدها زعل عشانتس رميتيه وش يعني ؟
الجود ابتسمت وقالت : الله نفس المسلسلات وش يعني اكيد يحبتس !
دانه توسعت عيونها وقالت بهمس وهي تناظر بنظرات ماهر : يعني ماهر يحبني ؟
الجود صرخت وقالت : اايششش منن ماااهرر وشذذاا الاسسم لاييكوون خخخكررريي !
دانه انفجرت تضحك وقالت : ارجل من عقابتس
الجود احترقت فجأة وقالت بحدة : انقلعيي يوسخة انا اوريتس كل شيء الا عقاابي !
سكرت بدون م تسمع ردها وقالت وهي تغني :
ماا عاااش من يغلللط ع سسييد الاحباااب
م اسممح لأحدد يخطططي ع نوور عييننيي
-
البندري دخلت وهي تضحك وقالت : اف اف من نور عينتس ؟
الجود غمزت لها وهي تقول : اخوتس من يعني ؟
البندري صرخت وقالت : ععششناااا
الجود ضحكت وسلمت الميلا جوالها وقالت : لا تردين ع دانه سمعتي ؟
الميلا رجعت جوالها بجيب جلابيتها وقالت : ايه وضيح كملي
ضحى : لحظة لحظة وش السالفة ؟
البندري وهي تضحك قالت : جودي قبل شوي تغني م عاش من يغلط ع سيد الاحباب وقلت لها منهو نور عينتس قالت اخوتس
غزيل وضحى والميلا وتالين بصوت عالي وواحد قالوا : ععشششنننااا !!
البندري ضحكت وقالت : صدز وربي
الجود ضربتها وقالت : وانتي الحكي م يقعد في بطنتس ؟
تالين بضحك : لا البنت طاحت وبقوة
الجود عضت ع اصبعها وقالت : وش اسوي يجنن م اتحمل
الميلا صرخت بأنتصار وقالت : شششفتتييي قلللتت لتتسس
الجود : يووه يميلو شكلها بعيركم اللي ضاع يبنات م تنسى
انهاروا البنات يضحكون والميلا معهم وقالت : اه يكلبة انا بعير يالخروف طحتي لأثقل واحد
الجود صغرت عيونها وقالت : اقول اص اخرتها بتاخذين اسر تحسبين اني غافلة عنكم ؟
الميلا حمرت خدودها وقالت : ايش ؟
البندري : مررره واضحيينن واليوم يوم غطى شفايفه وش قالتس
ضحى بحماس وهي تذكرت قالت : اااييييعه ووشش !!
تالين ضحكت وقالت : يويلتس يالميلا منهم
الميلا قامت ورفعت طرف جلابيتها وركضت وهي تقول : شيء م يخصكم ولا يناسب اعماركم يالبزران
غزيل ركضت وراها وهي تقول : حرام فيتس وان تقولين يورعه
ضحى قامت وراهم تركض والكل لحقوها يبون يشوفون وش السالفة ..
" في مكتب دانه "
وقعت وطلعت وسكرت المكتب ولفت بقوة وصدمت وتعثرت بماهر اللي ابتسم وقال : تجودي فيني [ تمسكي ]
تمسكت دانه فيه وقالت برعب : وشش بلاك واقف عند باب مكتبي
ابعدت منه وقال : انتي اللي وش بلاتس تتهربين مني ؟
دانه انفجرت وقالت : بس صرت اخاف منك ومن خيلك ذاك صرت اهوجس باللي صار لي ولعاد تسألني وانت تعرف الاجابة !!
ماهر ابتسم بضيق وقال : انا تخافين مني ؟
دانه هزت راسها وقالت : واتمنى معاد اشوفك بعد !
مشت وتركته وراها مكسور واثنينهم جاهلين عن حلا وابتسامة الانتصار اللي اعتلت مبسمها مشى ماهر وعلطول دخل مكتب الادارة وقال : سلام جيت اسحب بياناتي
المدير قام بصدمة وقال : عليكم السلام لا يماهر كلهم الا انت عسى م شر ؟؟
ماهر : وشفيك اصلاً جيت زيارة وبرجع للإسطبل حقي
المدير بحزن : ابد ابد حقك
ماهر سحب بياناته ووقع اخر توقيع له وطلع وركب اللطيم وطلعوا اثنينهم وقابل هتان برا وقال : ودعناك الله يبو سلطان
هتان فز وقال : نععمم !! ع وييين ؟
ماهر دخل اللطيم بغرفته وربطها بسيارته وقال : الديار طلبت اهلها
هتان بصدمة : ماهر تكفى بخاطرك شيء ؟
ماهر ابتسم وقال : لا والله بس برجع حايل
هتان : والله ؟
ماهر : ايه وتشاويت منه [ يقصد انه تعافى من حبه لدانه ]
هتان ابتسم وقال : ودعناك ربي ولا تقطعنا
ماهر ابتسم واشر له بمعنى " ابشر " ومشى بسيارته راجع حايل خارج حدود الرياض ..
" في بيت ابو فهد "
اسر : يبه بنروح للحلال ؟
ابو فهد : ايه وين عقيب ؟
ناصر : سبقنا لها
ابو فلاح : اييه ازيين اجل يالله مشينا قبل تغيب الشمس
ابو تركي ابتسم وقال : يوووه عاد منزمان عن العزبة
ابو فهد ابتسم وقال : مشينا
طلعوا العيال مع الاباء ووصلوا لبيت ام غزيل وطلعوا حريمهم والبنات وقال ابو تركي : ميمي وين جودي ؟
الميلا : راحت مع عقاب
ابو فهد : احسن لها تتعلم مع عقاب
اسر انفجر يضحك بالصامت وناصر منهار جنبه وهم عارفين ان عقاب م يرحم اللي يروح معه ..
" فالعزبة "
وصلوا ونزل عقاب وقال : عاد م هي اول مره لتس هنا صح ؟
الجود نزلت وقالت : ايه ايه قد جيت قبل تطمن
عقاب : تعرفين تحلبين الناقة ؟
الجود توسعت عيونها بقرف وقالت : يععع تسستههبلل !
عقاب بحدة : خييير وش يع فكيني من المياعة !
الجود : مستحيل انسى برجع للسيارة !
عقاب ابتسم وقال : اييه عاد ورا بخليتس ترجعين
مشى وسحب الجود مع رسغها تحت مقاومتها ودخل فيها للشبك وانهبلت اول م شافت الناقات كبار والبعران صرخت برعب وفزت برقبة عقاب وحط يده ورا ظهرها وهو ميت ضحك وقال : يمهبولة انزلي
الجود بصراخ مرعب : عقاااب ييحيووانن والله م اسااامحك طلعننيي !!!
عقاب نزلها وركض ورا البعير وقال : جودي
الجود بحدة : وم حصلت تدلعني الا الحيين اااه يوييلليي !!
عقاب ابتسم وقال : تعالي طيب
الجود لفت للباب وكانت احد الناقات عنده وفجأة كأنهم بدؤا يحاوطونها وانهارت الجود تصارخ وقالت : تككفى يععقااب تكففى طلععننيي والله بسووي القهووة وبشب الضو بس طللعنيي
عقاب تقدم وسحبها وقال : خير خير شفيتس ؟
الجود طالعت فيه ورفعت الاوراق الجافة والشوك اللي تاكله الناقات ورمتها عليه تحت ضحكات عقاب تقدمت بهدوء وحضنته وقالت : يكلب والله م اسامحك
عقاب ابتسم ومسح ع راسها وباسه وقال : افا وليه ؟
مشى والجود كل مالها وتشّد عليه طلعوا وقال : شرايتس تفكيني طلعنا خلاص
الجود رفعت راسها وقالت : كل ذا ثقل م تبي حضني تقلع
ابعدت منه ومشت وعقاب مبتسم استوعب ع نفسه وقال : ايه جودي خلصي الخيام تنظيف والقهوة والقدوع
الجود : ابشر
وكملت وهي تقول بهمس : يروح جودك انت
دخلت للخيام ودخل عقاب وحلب الناقة وشب الضو وجات بالدلال والتمر والاغراض اللي جابوها من الدكان ابتسم وقال : حيي عيينها بنتي
الجود ضحكت وقالت : ماشاءالله صرت بنتك ؟ من متى
عقاب حضن راسها له وقال : من اول يالنتفه
الجود ابتسم وقالت : عقاب يحلوك وانت مروق خلك كذا دايم
عقاب : اييه ابشري ع خيير
الجود بعدت وقالت : والله اني صادزة الواحد يصير يعرف يسولف معك
عقاب ابتسم وقال : انتي لحالتس اللي مكبرة الموضوع ولا تراني ونيس
الجود قامت وقالت : ايييه ماشاءالله عليك واضح
عقاب شاف السيارات وقال : هشرايتس تدخلين عشانهم شرفوا
الجود مشت ودخلت خيمة الحريم ونزلوا كلهم واستقبلهم عقاب والجود استقبلت الحريم بالطرف الثاني
ابو فهد : حيي عينك يولدي اييه ذا الشغل اللي يبرد القلب
ابو تركي : سموا واجلسوا
ابو فلاح : عيال قوموا من عندنا لاتشغلونا
ثامر : اح وش الطردة السريعة ذي !
فهد بحدة : ثويييمر ودي انك معاد ترااد جدانك بالكلام !
اسر : يووه ي استاذ البدنية شفيك ع ولدك ؟
ركض اسر وهو ميت ضحك والعيال معه واشر اسر لعقاب ولف عليه وقال : تعال !
عقاب ابتسم وقال : لا م بجي روحوا انتوا
كمل عقاب يصب لعمانه وكملوا العيال يلعبون من مطاردة وشوي بلوت ومنها وفيها ليين داخوا ع اذان المغرب وغروب الشمس
صقر : فيه عشاء صح ؟
اسر هز راسه بنعم وقال : ايه ليه قدك جويع ؟
صقر ابتسم وقال : وزوود
ناصر : معليه كلها ساعتين والعشاء نازل
جلسوا العيال يسولفون ع بعض ..
" عند الحريم "
جلست الجود وقالت : ام تالين جات افوووه
ضحى بعصبية : ايه م تشوفوني ساكته لأني لا تكلمت لعنت والد والدينها
الميلا ضحكت وقالت : اف اف اهدا يحبيبي م يستاهل والله
الجود ابتسمت وقالت : منجد ! وبعدين اص بناتها جلسوا
البندري : جوجو اتسأل ليه جلابيتتس مغبرة ؟
لفوا البنات كلهم لها وقالت وهي تلعن البندري داخلها : تعرفين رتبت ونظفت الخيمة والغبار يوووه م احكي لكم
تالين : ايه بس فيتس ريحة ابل
الجود : دخلت اعطي عقاب جواله وطلعت حتى من عند الباب تعرفون فوبيا
ضحى ضحكت وقالت : لا ترقعين احس
الميلا انفجر تضحك وقالت : مررره لا ترقعييين
الجود : شفيكم ؟ وش ارقع وش تخيلتوا صار مثلاً
دالين بقرف : يع صدق سوالفكم تسد النفس
قامت وراحت جنب امها وغزيل شايلة حجر كبير وقالت : فكوني عليها بفقش راسها ذي !!
تالين : الضوء الاخضر ولتس قومي
ضحى : غزل اهجدي قلبي
غزيل بحدة : حسسرتني الله يحسرها !!
قاطع حديثهم صوت اسر اللي ارتفع وهو يقول : يووولدد يبنااات
ضحى ضحكت وقالت : ميلو طالبتس تقومين له
الميلا توسعت عيونها وقالت : وانا حمارة وبقوم ؟
الجود قامت وقالت : نعم اسر ؟
عقاب كان معه وقال بحدة : سبحان الله معاد من البنات الا انتي !
الجود طلعت وقالت : يغبي عشان انا وانت اللي مقلطينهم
عقاب مسح وجهه وشنبه وقال : وعادها تطلع ادخلي !
اسر : وين ضحى ؟
الجود : وش بغيت ؟
اسر : نبي فناجيل نظيفة ودلة قهوة
الجود اشرت لعقاب يمشي معها ولحقها ودخلت المطبخ وقالت : تعال ساعدني
عقاب تكتف وقال : احلفي ؟ ومتزوجتس ع غير سنع ؟ عشان تخدميني وتكرفين
الجود : الرسول صلى الله عليه وسلم [ صلوا ع النبي ] كان يساعد حرمة بيته تعال ساعدني وانت مقفل فمك
عقاب جلس وقال : عليه افضل الصلاة واتم التسليم وش تبين ؟
الجود : يبون عشاء صح ؟
عقاب حك لحيته وقال : اييه طبعًا
الجود بجدية : لحم حاشي من الحين م بطبخ
عقاب ابتسم وقال : لحم حاشي وبتطبخينه غصب
الجود : تحلم واجد ؟؟
عقاب : اعجلي معتس ساعة بجي وبشوف الشغل كيف
الجود وقفته وهو طالع وقالت : والمساعدة !
عقاب : بجيب لتس الاغراض
مشى للونيت وجاب اللحم والاغراض من رز واغراض سلطة ونزلها وقال : لاتدعين احد ترا اعرف تقطيع خواتي وطبخهم ابيتس تبهريني وتصدميني مع اني م اتوقع منتس شيء لكن نشوف
الجود ابتسمت بتحدي وقالت : يشيينك اخرتها بصدمك صدمة عمرك تحسب م بيطلع مني شيء ؟ كفاية اني تزوجتك وقبلت فيك هذي لحالها اكبر انجاز بحياتي واكبر صدمة لك
عقاب ابتسم وقال بنرجسية : احلى من تزوجتي ولا ؟ المهم عجلي علي يالنتفه ساعة وانا عندتس
طلع عقاب وبدأت الجود تشتغل وفعلاً كانوا البنات يجوون ويسألون اذا تحتاج مساعدة بس كانت ترفض وخلصت كل شيء في اربعين دقيقة غسلت يدينها بقوة وطلعت الخضار وقطعت السلطة وغطتها بالثلج عشان تحفظ برودتها وخبزت خبز لعمانها مع مرقة الحاشي وانتهت ومشت وشافت ثامر ابتسمت وقالت : ثااامر
ثامر لف لها وقال : سمي ؟
الجود : سم الله عدوينك ناد لي عقاب اذا م عليك امر
ثامر : ابشري
مشى يركض ووصل للرجال وهمس بأذنه وقال : الجود تبيك
عقاب نزل الدلة وقام ومشى للمطبخ ووصل وكانت تتهوى من الحر اللي داخل المطبخ وكان شعرها يلاعبه الهواء ونحرها مكشوف وملتف عليه سلسالها الذهب انهبل عقاب من المنظر وقال :
في عنقتس مرت تفاصييل مقتلي
مثل مرّ النسييم الي يلاعب شعرتس
لبى خصرتس وشامتتس وخدتس الندي
والبدر ماخذ منتس لا بالله انتي البدر كلتس
-
لفت الجود بصدمة وقالت : ص..صح لسانك !
تقدم عقاب ودفن وجهه في نحرها واستنشقه وقال : اه يجودي ارفقي بي اعنبوتس طحت وجيتتس ع وجهي !
الجود كانت ميتة احراج لفت بهدوء وقالت : عقاب ناديتك عشان العشاء
عقاب استوعب وكح بفشلة وقال : اييه العشاء وينه ؟
مشت الجود ودخلت وهي ترجف من الموقف كله اللي صار لهم وشافت فيه حقيقة عقاب اللي من الفشلة م دخل المطبخ خذا لفة كاملة عليه ورجع ودخل وقال : هذا شغلتس ؟
الجود م قدرت تتكلم وهزت راسها بنعم جلس عقاب وجرب المرقة وابتسم وقال : سللم يميينها يالله حضروا حضروا وادعي البنات يساعدونتس
الجود بهدوء وبخجل قالت : ابشر
قام عقاب وطلع ونفض يدينه وقال بنفسه ( الله يلوم اللي يلومك يعقاب طحت لك ع قمر لا والله انها احلى ! ) مشى وجلس عند الضو وبدأ تحضير العشاء وتعشوا الرجال والحريم بالجهة الثانية تحديدًا داخل خيمتهم
الميلا : كشففيي زييين
تالين بحدة : سلامات وش قاعدة اسوي انا !
البندري لفت وقالت : جود تعشي !
الجود ابتسمت وقالت : ايه طيب
ضحى ضحكت وقالت : شكله صار لها شيء اسوء من الغبرة والابل
انفجروا البنات يضحكون ولفت ام فهد بهدوء وقالت : بس يبناتي تعشوا !
غالية ابتسمت وقالت : ابشري يمه
ام تركي : غالية ودتس تجين عندنا كثير والله
غالية قامت وجلست وسحبت سحاب تعشيها معها وكملت ضحى تقول : جودي شفيتس ؟
الميلا : منجد انطقي
الجود كانت تهوجس بمنظر عقاب وكلامه المعسول تحت البدر اللي قربب يكتمل بنص السماء ابتسمت وقالت : تعشوا
تالين نزلت الجوال وقالت : افف كمليي وشفيتس !
الميلا بصراخ : يالتييس الكشااااف
ارتفع صوت اسر وهو يقول : وطووا الصوووت يوللد !
ضحى : هممم طبعًا غار فديته
الميلا ضربت راسها بخفه وقالت : يكرهي هااتي الكشاف
سحبته وصارت تكشف لهم وهم ياكلون بالظلام ..
::::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، وحشتكم صح ؟ ادري م يحتاج المهم ههههههههههه بارت جديد يييجننننن لكن بتكرهوني بالبارت العاشر واسفه لكم من الحين لكن هذا تمهيد للمصيبة والهدوء م قبل العاصفة 😭 ، نقدر نقول عقاب طاح ؟ وشلون م يطيح وهي سمّيتي 🤣❤️‍🔥! ، عطوني رايكم بكل شي ولاتنسونا من النجمة ولا ترا م بينزل العاشر تأكدوا انكم ضاغطينها احبكم اشوفكم ع خير ببارت جديد 🤍🤍 )