ليّت اللِذي خَلق العُيون السُود ... خَلق القُلوب الخَافقات حَديد

البارت التاسع والثلاثين

ابتسم يتركه ومشى عقاب مع ناصر يطلعون للمستشفى ..
" فالمعسّكر عند آسر "
اخذ نفس بصعوبة ومشى راجع للسكن ، نزل عيونه يشوف جسده المكشوف والمعّرق ، وتحديدًا ليده اللي ماسكه جاكيته ويضغط فيها ع الدم والجرح اللي تصاوب فيه توو ، مشى حتى وصل للمدخل وطاح وانهّد حيله وجلس ع عتبة المدخل ، اخذ نفس وزفره وانقبّض صدره من قوة الالم وبدأ اسر يوّن بهدوء ، رفع عيونه للسماء اللي بدأت تمطر وابتسم بخفه من بدأ المطر يداعب وجنتيه ، ترك جرحه وارخى يدينه بجانبه ، طاح جاكيته عند رجوله واختلط جرحه ودمه مع قطرات المطر ، مسك شعره يرجعه لورا ونطق بثقل صوته من تذكر اللي م تغيّب عن باله وقال :
من شاف عيون الميلا م عرفت عينه النوم
ويهيم ولعيونها والله ان يجّر معه الف ونه
حتى الشجاع اللي يهابونه العرب والقوم
لا شاف عينها ؟ يعقب وانا بن عايض تحرم عنه !
-
غمض عيونه يتذكرها ويتذكر طيفّها اللي يمر قدامه واكتفى بأنه يشّل فيها شيلة يحبها وقال :
كل م تناسيت اذكره .. انسى الثقل واتذكره
اذكر حلاه وسكره .. واسمع مع طيفه صداه
يابري حاالي .. يابري حاالي !
-
تمسك بمقبض باب المدخل وقام ، مشى يدخل مكتب من هو اعلى منه رتب ومنهو ماسك المهمة ، دخل وفزّ السكيورتي العسكري يساعده ، مشى معه وجلس قدام العميد سراج علي ، ابتسم العميد وقال : يالله حيّ ابن عايض وسلامة قلبك وش صاير ؟
اسر ابتسم وقال بتعب : عرس اغلى من خلق ربي بعد يومين تسمح لي اظهر بنفس اليوم واعوّد ؟
العميد سراج نطق بصرامة : من هو ؟
اسر : اوخيتي
ابتسم العميد سراج وقال : والله لو ماني مجرب شعور الخوات م سمحت لك تطلع وانت تعرف القوانين لكن معك اربعة وعشرين ساعة تروح وتحضر عرسها والله يبارك لها وترجع !
اسر ابتسم بوسع ثغره واشر بأصبعه ع خشمه وقال : ع ذا الخشم يبو علي !
العميد سراج ضحك وقال : عليه الشحم يبن عايض
قام بمساعدة السكيورتي العسكري ونطق العميد بحدة وقال : الحين تسعفونه وراه عرس الشيخ
ضحكوا اثنينهم وطلعوا يسعفون اسر ، هو بعد الموافقة اللي اخذها بمساعدة ضحى والجرح بعد الله م كان يحسّ بأي آلم كان طاير فالسماء وحالف محد يدري عن جيته ، هو ماهو مصدق انه بيشوف اهله وميالته بعد يومين بس من الان ، انسدح ع الفراش الابيض وبدأوا يسعفونه ويطلعون الرصاصة اللي اخترقت جنبه الايمن ..
" فالمستشفى "
طلع عقاب وناصر معه ونطق : اسيّر جاء لك منه خبر ؟
عقاب لفّ لناصر وقال : لا ليه ؟
ناصر ابتسم وقال : مدري الكلب مستحيل يفوت عرس ضحى احسه بيطلع لنا من العدم
عقاب ابتسم بخفه ونطق : ليت والله لكن الدورة حقته صارمة مستحيل يطلعونه عشان عرس اذا هو الوفاة يبون شهادة ومدري وشو وحوسة فما بالك بعرس ؟
ناصر ابتسم وقال : عادي يسجل صوته ويكفي والله عشان ضحى
عقاب ابتسم وقال : ايوه ؟ وش ناوية عليه وضيحي ؟!
ناصر ابتسم وقال : لا يعين اخوك النية انا اللي ناويها بسوي تسجيل صوتي لأبوي وانتوا ي اخواني وثامر نبارك لها وكذا
عقاب تحمسّ ونطق : وكل واحد بعد م تنتهي صوتيته ينفتح الستار اللي مقابل الكوشة ويدخل يعني ابوي اول واحد بعده فهد بعدين انت وكذا
ناصر شّد ع نفسه بحماس وقال : وربي فكرة !! وبما ان اسر وثويمر ماهم موجودين يكونون الاخيرين
عقاب ضحك بسخرية وقال : هو سواء موجودين ولا لا بيكونون الاخيرين
ضحك ناصر معه ومشوا يركبون الونيت راجعين للبيت بعد م تأكدوا ان عقاب سليم وبس فيه شّعره بكتفه الايمن وعالجوه له وجبّروه ..
" في بانكوك ، تايلند "
صحت من نومها وفتحت جوالها وصرخت برعب من شافت ان اختباراتها بتبدأ بعد اسبوع ، مشت تغسل وجهها وتتوضأ صلت وخلصت ولبست ومشت تطلع ، شهقت من شافت سامي تاكي ع بابها ، ضحك بسخرية وقال : انا يدلوعة انا
حصة مسكت صدرها اللي ينبضّ ونطقت : روعتني !
سامي ابتسم وقال : ماهو جديد روعتتس مليون مره ؟
خزّته ومشت ومشى وراها وقال : تعرفين الطريق ماشاءالله ؟
حصة : ماني صغيرة اكيد اعرف !
سامي ضحك وقال : عمرها ستطعش وتسولف !؟
حصة لفّت له وقالت : اعقل منك وتسولف ؟
ابتسم وتقدم يسابقها بخطواته وقال : تعالي عندي لتس مفاجأة
مد يده وسرعان م سحبها وضحك وقال : نسيت اني م قد تزوجتتس
توسعت عيونها بصدمة وقالت : ولا تفكر حتى !
سامي : التفكير قضيّنا منه يحصيص غيره ؟
تقدمت وتساوت بالمسافة معه وقالت : سامي انت منجدك ؟
ابتسم يتأمل ملامح وجهها اللطيفة ونطق : يعيون سامي انتي اشهد بالله انتس استوطنتي ضلوعي مسكنن لتس !
ابتسمت وابعدت تمشي قدامه وقالت : صعبة وانا صغيرة !
سامي ابتسم وقال : ننتظر الاميرة تكبر ماهي صعبة ع شنبي اجيتس لو بعد مية سنة واتعنى لتس مع رجال قاضي كلهم !
صدّت عنه ومشت وهي تقول : وش مفاجأتك ؟
سامي مشى وراها وقال : بتشوفين ي دلوعتي بتشوفين
مشوا ودخلوا للمستشفى ومشت وراه ، شهقت بصدمة تشوف ثامر واقف ع رجوله وضحك من شاف صدمتها وقال بصوته : حصووصتي ! تعاالي ضميني
شهقت ونزلت دموعها تسابق ركضها له ، ضمتّه بكل قوتها وضحك يضمّها له ونطق بحدة : وراتس كاشفة وجهتس ؟
حصة : هم عنصرين ضدنا معليش !
كانت حصة تكذب بكلامها لأن تايلند تعتبر احد الدول اللي سكانها بنسبة تتراوح من العشرة فالمية مسلمين ، لكن بانكوك م كانت مسلمة واقترحت الكذبة علطول ، ابتسم يحاوط ظهرها ويضّمها له ، كان واقف يتأمل طريقة حُضنها ، مسح شاربه وفتّله ونطق : كلها سنين واجرب هالحُضن !
عضّ شفايفه يتأملها هو يدري انه طاح وفعلاً طاح ولد هادي بحُب دلوعة فهد ، شّد ع ذراعه ونطق : سفرتنا للسعودية بكره اخيرًا مشيتي ي ثمراء بعد اسبوع كامل !
ضحك ثامر وقال : الله يقطعك يورعي مصّر تسميني ثمراء استح ع وجهك !
سامي ضحك وقال : اذا كنسلت اسم ورعي بفكر
طالع فيها بحدة نظراته وصدّ ، مشى يسابقهم للفندق يقشون عفشهم وراهم سفرة للرياض عاصمة المملكة العربية السعودية ..
" في قصور مساعد "
انتقلوا من اسبوع رسميًا للقصور ، وترتبت امورهم وسلّكت ، وفاليوم المنتظر عقيقة تميّم ولد عقاب ، والكُل طاير بأعلى سماء من كشخة وفعاليات ، نزلت تركض ونطقت : اوف يمه ترا بعلن ع خالي اشّد الخصام ! ليه يذبح خروفين لتميّم الورع ولا انا خروف واحد !
ضحكت غالية بصوت عالي وقالت : ي امي ي سحابتي هذا الدين ويقول كذا والله لو الودّ ودّ خالتس كان ذبح كل النياق لأجل عين بكّره
سحاب رفعت حاجبها وقالت : افووه وليته حلو يشبه خالي اسر
ضحكت وقالت : سحاب !
سحاب ابتسمت ابتسامة عريضة وركضت داخل ، لفّت غالية وابتسمت وقالت : نوني وش هالزين ؟
البندري ضحكت وقالت : ملكتي اليوم اكيد بكون بهالزين
غالية : اوف تصدقين نسيت !
البندري ابتسمت وقالت : وسخة والله !
غالية ابتسمت وقالت : معليتس ربع ساعة واغطي عليتس بالزين
البندري : ماهو غريب ي غالية ابوي !
مشت غالية وشّدت البندري ع قبضتها ، ونطقت بتوتر : ي تمم ي ننتهي ! انا ناخيتك يالصقّر م تغلط وتعذب قلبي
مشت تنزل تشوف الصالة الرئيسية مليانه بالزينة الزرقاء واسم تميّم كامل يتوسط مراية كبيرة فالنُص ، وقفت قدامها تشوف كشختها باللون الزيّتي ابتسمت تشوف انعكاس ضحى وراها ونطقت : وضوحتي تعالي نصور
ضحى نزلت القدّوع ونطقت : ماني فاضية !
البندري ركضت وقالت : بس بس اولاً انتي عروس ثانيًا القصر مليان خدم خير ؟ ولا للحين الديرة مأثره عليتس ؟
ضحى عضّت شفايفها السُفلية لثواني ونطقت : اكيد بتأثر وبعدين ماله دخل اذا فيه خدم اصير رفله ؟
سحبتها البندري ونطقت : م بتصيرين يبنت عايض افا عليتس بس تعالي نصور ولا يكثر !
نزلت الميلا وقالت : اهلييين يالكشخه خوات زوجي وش هالطلة العسل !
ضحى : حبيت خوات زوجي تحسب لتس تعالي صوري معنا
البندري ضحكت وقالت : منجد استغربت ليه قالتها وبعدين ضحى تشوفين الكروشه الصغيرة ؟
ضحى تبدلت ملامحها للأستلطاف ونطقت : هذا ووشش !!
الميلا ابتسمت واخذت لفّة بمكانها وانتشر فستانها اللي تلّون باللون الاوف وايت ، ضحكت ومشت لهم ونطقت غزيل من فوق : لحد يرجّ بكنوز الحين اهجدي
ضحكوا البنات ونزلت غزيل والجود معها ، كانت لابسه فستان احمر دامي ، عكس الجود اللي لابسه سماوي تحّلت فيه وتزينت ، ماسك ع جسمها يبرز مفاتنها بشكل جميل جدًا ، ضحكت وقالت : اجل وش تقولون لكروشة غزيل ؟
غزيل لفّت لها وقالت : اصه لا اسمع وحدة تتكلم كأني حامل بعشر الله ياخذ راس ناصر
طاحوا البنات يضحكون وتقدمت امال وقالت : اف كلنا حوامل وجع احس الناس بينقدون !
تالين ضحكت وقالت : معليه ينقدون ع الرجال ترا
دالين مشت تركض وقالت : لازم صورة لحواملنا
الجود مشت ترجع ورا ونطقت : انا خرجت منهم بالسلامة ووراهم لقاء مع الم..
قاطعتها الميلا اللي صرخت ونطقت : ويمين بالله اذا نطقتي ان ادعستس !!
ضحكت وقالت : تصوروا يالحوامل اللهم لا شماته
ضحى ضحكت بخبث وقالت : رجعتي فاتنه تتوقعين يخليتس عقيّب ؟ هذا وجهي اذا م جات السنة الجاية وانتي م معتس ورعين
الجود توسعت عيونها وقالت بصدمة : يعقب !
تقدمت دالين وسحبت الميلا وتالين وامال وغزيل والتقطت صورة لهم وهي تضحك ، تالين لفّت وقالت : الا انتي يالسلوقية م حملتي ؟ يزين ضيدان
غزيل ضربت الكنب وقالت : م كنت حاطه عيني عليه عبث
ارتفع صوت ناصر وهو يقول : من هو جعله الموت ؟
شهقت دالين برعب وقالت : الله ياخذتس انتي ورجلتس !!
انفجرت تضحك ع ردة فعل دالين ونطقت : انت وامين
ضحك بصوت عالي وقال : نموت لأجل عين بنت عبدالملك ليه م نموت
ضحى رفعت صوتها وهي تقول : اخيييّه !
غزيل سحبت الفلات اللي لابسته ونطقت : بيجيتس يعدّي م في طبالينه ! ع الوجه علطول
ضحكت وقالت : تخسين يورعه وامشوا ندخل خوفي يجون العرب وحّن فالصالة
البندري ضحكت وقالت : م بيجي احد بنملّك انا وصقر وفالليل التمايم يالتيس
الميلا انفجرت تضحك وقالت : ذبات لا نهائية امشوا بس نجلس
مشوا للجلسة اللي فنُص الصالة وجلسوا ، جلست الجود وعلطول صاح تميّم ، عضّت شفايفها السُفلية لثواني ونطقت بتعب : بنات الحقوا انفسكم وسقطوهم ترا تعب انا بديت اندم
شهقوا كلهم من كُبر الكلمة ، ضحكت بهدوء وقالت : نمازحكم بسم الله !
مشت وطلعت الدرج رايحة لتميّم ، لفت الميلا لضحى وقالت : يخي والله مستحيل يفرط فيتس ! دقي عليه وقولي تعال زواجي
ضحى نطقت بحزن : طيب نفرض مشى بنفس الليلة وصار له شيء شلون بسامح نفسي ؟
الميلا : يمشي قبلها بيوم وعلى مهلة !
ضحى ابتسمت بضيق وقالت : يعطونهم مهلة اربع وعشرين ساعة بس ! وبعدين اسكتي كل م ذكرتيني ان اللي صاحبته طول عمري وحبيبي الاول وسندي واللي اسرني قبل ابوي وسهم مابيكون موجود اضيق !
الميلا شالت الفنجال وهشّت ضحى فيه ونطقت بعصبية تميّل للغيرة : فليتيها ترا ! متزوج ونغار عليه !!
ضحى طلعت لسانها تحسّر الميلا ونطقت : م انتي اغلى عنده مني صدقيني
الميلا ضحكت وقالت : اوكييييه حبيت الثقة ! جد جد !
عدلت جلستها وكملت وهي تقول : I like it !
*تعجبيني !*
لفّت ضحى لها وقالت بأستغراب : ويش هو !؟
ضحكوا البنات كلهم ونطقت دالين : يعني تعجبينها
ضحى رجعت شعرها ورا ظهرها بتغنجّ ونطقت : ادري طيب
امال صفقت بيدينها ونطقت : حبييتتت ضحى ! اسمعي ايش رايتس تصبغين اشقر ؟
ضحى : محلّاي بين العرب كأني اخت سهم ويمسكونها علي سنتين قدام
امال : لا جد اسمعي اصبغي اشقر كامل هي صابغة هايلايت
تالين كملت كلام امال وقالت : ايه ايه وهي قالت بتغييره قريب لأنها مو حابته ومّر ع زواجنا انا وامال ثلاث اشهر تتوقعين انها عليه للحين ؟
غزيل : والله اللي تحبون السوالف قوموا نشوف وش صار فالمجلس
الميلا : وش نقّط معهم ؟
البندري بحماس مفرط : اييه مشينا والله م يدرون
الميلا : معكم بس لا يلمح عقاب طرف الجود احرقنا !
الجود نطقت من ورا اذن الميلا بالضبط وبهمس : ليه ؟
صرخت الميلا برعب وضحكوا البنات لكن سرعان م عّم الهدوء من صرخ ناصر وقال بحدة : الصوت اقططعوه يولد !!
الميلا لفّت ورفست الجود اللي طايحه تضحك ، البندري مشت وقالت : امشوا نشوف الفعاليات كفاية حاسرّني عيد الضحية وكيف م عيدنا
الجود : م لمتنا بعد اللي صار لنا والنقلة والبلشة
دالين : اصلاً يقولون بنعيّد مع زواج ضحى
ضحى توسعت عيونها وقالت : لا حبيبي معليش هذا زواج ماهو استراحة عيد !
دالين ضحكت وقالت : تبين الصدز كلها واحد
ضحى نطقت بغضّب : لا يروحي ماهو..
قاطعتها البندري وهي تقول : امششوا وجع !
مشت ضحى ودالين يلحقون البنات ، دخلوا قسم الرجال لأول مره ، ضحكت امال وقالت : اذا قفطونا جج للحوامل ولي معهم !
ضحى وغزيل نطقوا بصوت واحد وقالوا : ويشش هو ؟!
الميلا ضربتهم بخفه ونطقت : اااص !! تقصد اننا بنودع الملاعب !
غزيل نطقت بقرف وقالت : وعّلة وش عندكم يالمخانيز انتوا والعنقليزي ذا ! امرضتوني
الجود اشرت للميلا وابتسمت الميلا بخجل من فهمت مقصّد اختها ، وكيف تذكرت اسر مع الميلا وكيف كان يهاوشها ع الانقليزية وينطقها مثل نطق غزيل بالضبط ، البندري رفعت عيونها للسقف وقالت : واو يالفخامة وانا اقول وشفيهم م يطلعون من قسمهم !
دالين ابتسمت وقالت : تشوفييين !!!
ميّلت راسها البندري وكانوا كلهم فالمجلس ، ابتسمت من وسَعه وطوله وعُرضه ، ضحكت ضحى وقالت : اللي بيصب قهوة بيقول دعاء السفر !
الجود ابتسمت وقالت : منجد واللي يبي يقولهم سالفة يرفع يده وياخذون بالدور واللي عنده ذبه يطلعونه ع المنبر
تالين ضحكت وقالت : لا لا واذا يبون يروحون للجهة الثانية من المجلس يمديهم يقصّرون الصلاة من طول وبعد المسافة !!
طاحوا عند المدخل مصروعين ضحك ، الجود سدّت منطوق دالين وقالت : لااا واللي يرحم والديتس شهقة الخنزير فكينا منها
دالين انصرعت تضحك والجود م تركتها ، البندري نطقت برعب وقالت : يممه اص تكلموا !!
قاموا الجود ودالين اللي تمسح دموعها من الضحك ، الكل سكت وقفوا يسمعون صقر اللي نطق : والله يعمي اول شيء اعتذر منك ومنكم جميع مما بدر مني فالفترة اللي راحت واتوقع كلكم تدرون وش عّلتي وش فيني
ابو فهد ابتسم وقال : معذور يولد اخوي معذور يقولك وانا عمك احد يقدر يشيل بخاطره ع اهله ؟
ضحكوا ابو تركي وابو فلاح من تغيرت الجملة من اخ لأهل لكنهم فهموا وسرعان م نطقوا : وان شال م يسمى اهلّ !
صقر ابتسم وقال : اجل انا جايك وابوي فالمجلس اطلب يد بنتك البندري زوجة لي ع سنة الله ورسوله
صدّ عقاب بغضّب ولمحَ البنات بأخر السيب عند المدخل ، اشتعل راسه نيران ونطق بحدة وبصوته الجهورّي : اخو العيياال !
فزّوا فهد وناصر ونطقوا : اسسللم !!
فلاح نطق وقال : احتززم يولد عمي !!!
عقاب سحب عقاله من ع راسه ومشى ، البندري صغّرت عيونها وسرعان م شهقت وقالت : شاافنا !!!
الجود صرخت برعب وركضت ، توسعت عيونه بصدمة وقال بغضّب الارض : الله يسده وانا استغفر الله !! بنتت !
ركضوا كلهم وطلعت اصوات رجولهم ، الحسنة الوحيدة اللي سووها هو انهم تركوا الجزم عند مدخلهم ، والحوامل وركضهم كان منظر مميت من الضحك ، سكرت ضحى الباب بالمفتاح ونطقت بحدة : وش تنتظرون والله م يخلينا عقيّب اعرفه خبز يدي
امال توسعت عيونها بصدمة وقالت : استحالة يدخل علين..
قاطعها ضربته للباب وصرخوا كلهم برعب ، صرخ يعّلي صوته عليهم ونطق : افتحي فتحوا قبرتس انتي وهي !!!
الجود دَقت تحية وركضت وركضوا كل البنات ، وفكّت ضحى الباب وسحبت غالية وركضت ، فلّج الباب بكل قوته نُصين ونطق بحدة : وييينهم !؟
غالية ابتسمت ابتسامة عريضة وقالت : مين هم ينظر العين ؟
تنفس عقاب وزفره وابتسم يبوس خدها وقال : التيوس خواتي وجويّد وقافلة الغنم اللي معهم !
غالية ضحكت وقالت : مقدر اقولك لأنهم في وجهي
عقاب ضحك بسخرية وقال : يعقبون الجود م تجي بوجه احد وهي ع ذمتي وبوجهي وشنبي ! عيب الكلام ذا يالغالية !!
غالية : سمع وطاعة نعقب لعيونك
ابتسم وباس خشمها وقال : محشومة لعيونتس هالمره والله حرام حرم الدم اني م اعديها
مشى يطلع يضبَط نسفة شماغه وشكله ، راجع للمجلس وهي تشوفه سكرت الباب وضحكت وقالت : اطلعوا راح
طلعوا البنات كلهم من ورا الكنبات ، ضحى نطقت بحدة : يلعنمي م يسلم اجل انا تيس !
انصفقت بكيسة المناديل ولفّت ع صراخ ام فهد وهي تقول لها : يقليلة الخاتمة تلعنيني !!
ضحى مسحت خدها من قوة الضربة وقالت : محشومة يالقائدة الله يلعني انا
ضحكت غزيل وقالت : استغفرك يربي وانا كل م حّلى لي تويّلت بأمهاتكم وترجع لأمي !
ضحكوا البنات كلهم ونطقت امال : صباح الليل ؟ امشوا نتقهوى بس
البندري جلست وقالت : بالله عليكم سمعتوا شيء ؟
الميلا لفّت لها وقالت : تستهبلين صح ؟ اصلاً حنّ م شفنا عقاب وهو جاي لنا تبين نسمع كلام صقر بأخر المسجد ذا
انصرعوا من جديد يضحكون ، ضحكت ام تركي وقالت : بس خلاص تقهوّوا !
صبت القهوة سحاب للبنات وبدأت سوالف جلسة مافيها نفس ثقيلة ..
" فالمعسّكر "
دخل العميد سراج للقسم العيادات الطبية العسكرية ، ابتسم من شاف اسر ونطق : شلونك اليوم ؟
اسر بأستهبال : وردي
ضحك العميد وسرعان م نطق اسر من استوعب كلمته ولا استوعب الموقف وانه يمازح عميد : اعقبب وانا ولد ابوي قصدي ازرق !!
العميد تغيّرت ملامح وجهه وانصرع ضحك عنده ، ابتسم اسر وقال : دوم يبو علي !
العميد سراج رفع راسه وانجلط اسر من شاف تبدل ملامحه لجدية وقال بحدة : خفيف دم يعسكري !
اسر ابتسم بفشلة وقال : الله يطول عمرك
العميد سراج : بكره ماشي ؟
هز راسه بنعم وقال بصوته الجهورّي : م تقصصر جعلني م اعدمك !!
العميد سراج ابتسم بهدوء وقال : الله يوفقك يبن عايض
مشى يطلع بعد م ضرّب اسر له تحية ، ونطق بهدوء : استرح
ابتسم اسر وقال بهمس : جايكم بدخولية ملعونة جد !
ضحك بهدوء ورجع يرخي ظهره ويرتاح ..
" فالمجلس "
دخل عقاب ولفّوا عليه كلهم ، ونطق ابو فهد بحدة : علامك ي صبي ؟
عقاب حكّ دقنه اللي بدأ يكثف وقال : ابد نسيت ان ضيدان قالي ادق عليه..
سكت من لفّوا كلهم لضيدان اللي جالس بينهم ، لوهلة عقاب نسى ان ضيدان صار نسيبهم وم يقدر يصرف عمره بأسم ضيدان ، ابتسم ضيدان بأنتصار ونطق عقاب بفشلة : قصدي يبيني اكلم واحد له
ضيدان ابتسم وقال : ايه ايه كلمته ابو ذياب ؟
عقاب : ايه يسلم عليك
جلس عقاب ونطق : كمل يالصقر
صقر ابتسم وقال : تممّنا يبو تميّم والممَلك جاي
عقاب توسعت عيونه وقال : بالله ؟ الله يتمم ع خير اجل
صقر : امين يارب
لفّوا من دخل الشيخ وقاموا الرجال يسلمون عليه ، ابتسم وقال : نبدأ ؟
بدؤوا مراسم عقد القران وعقد القلوب ببعضها ، عقد اسم البندري بأسم صقر للنهاية عقد يلمّ شملهم بعد معاناة كملت سنتين كاملة ، ابتسم وقطّرت دمعته من وقع بأسمه ونطق عمه ابو فهد : زوجتك بنتي ي صقر بن سالم
صقر ابتسم بوسع ثغره واستهَل وجهه وقال : قبلت ببنتك يعم والله قبلت !
ضحكوا العيال ونطق هيثم بفرحة : اخييييرًا ي صقيّر !
ابتسم وتقدموا يسلمون ع بعضهم ، ابتسم عقاب من جاه ومسك اذنه وهو يسلم عليه وقال : بندري بعيونك ! ويويلك تشكي منك تراك قاهرني
ضحك صقر واشر بعيونه ونطق : افا عليك اذا اللي صار وعقدنا يساوي عُمر بعيون صقر وعُمر صقر زول البندري وضحكتها وطيفها جعلني قبلها !
ابتسم عقاب وباسوا خشوم بعض " سلام الرجال " ونطق بحدة صوته : رجااال ولد عمي رجال !
رفع صقر صدره ونطق بجهورّية صوته : معلييك زود يالنسيب !
ابتسم صقر ومشى فهد ياخذ الكتاب ويمشي راجع للقسم الحريم لأجل توقع البندري ، ابتسم يدق الباب ونطقت ام تالين وقالت : مين ؟
فهد ابتسم وقال : طلعوا لي البندري توقع لصقر
ام تالين ضحكت بفرحة وقالت : الحمدلله الان بتجيك
مشت ام تالين للحريم وقالت : بندري تعالي وقعي ع ولدي
غزيل ضحكت وقالت : وشفيتس تقولينها بفخر ؟
البندري ضحكت وقالت : م جات الا بعد طلعة الروح م الومها والله !
مشت البندري وتمسكت ام تالين بيدها ونطقت : والله اني احبتس من حُب صقر لتس والله ي بندري انه يعزتس ويغليتس ولا يرضى عليتس دقّ الشوك تكفين قلبه بالهون عليه ! العاشق لا عشّق محدن يلومه والعشق نشوفه من عيون صقر ونشتم ريحته لا مرّ طيفه
ابتسمت البندري من الكلام العميق ونطقت : والله انه بضلوعي قبل عيوني يعمة !
ام تالين ابتسمت وضمّتها ونطقت : الله يتمم ع خير يارب
مشت البندري وفتحت الباب وضحكت بخجل وضرب فهد راسها بخفه ونطق : وقعي حركات العشق والبزران ماهي بعندي
البندري ضحكت وهي توقع وقالت : خف علينا لا تتشمت وتطيح لك ع بنيّه وتجيب راسك يستود البدنية
فهد اخذ نفس ونطق : حلو ! وصلكم اللقب ؟ الله ياخذ راسك ي اسيّر !!
ضحكت وقالت : بسسم الله لا !! لاتقول كذا وهو بعيد
فهد : استغفر الله استغفر الله ! المهم مبروك يحلوه وادخلي بس
البندري وهي تناظر رجولها نطقت : يعني منّا مناك م فيه شوفة شرعية ؟
فهد دفعها ومسك الباب ونطق قبل يسكره : انحريني لو م كان حافظتس السلقة
سكر الباب وانفجرت تضحك وراه ، ابتسم فهد يسمع ضحكاتها ودخل وقال : ماش لو ولدي هنا كان سمعتوا احلى زغاريط
عقاب : الا ازيّن انه ماهو بموجود ولا كان فضحنا اجل الرجال يزغرطون ؟
فهد ابتسم وقال : بندم عليها بس لأجل عيون ثويمر تكرم مداين !
لفّوا عليه كلهم من زغرط وتصرعوا العيال يضحكون ، وناصر يناقز فالهوا ويقول : صوووررتت !!!! وربي لا امسكها عليييك واوري اسيّر الشمات !!
لفّ فلاح وانفجر ميت ضحك من وجه عقاب المتصّلب والصدمة تعتلّي ملامحه ، ناصر صور وجه عقاب وطاح بحضّنه يضحك ، فهد مشى وسحب خد عقاب وقال : زوجوه يعقل ؟ م نفعت ، بيخّلف ويعقل ؟ برضو م نفعت وش تقترح يبو تميّم ؟
فزّ عقاب وسحب يد فهد ونطق : اعقل ولا عقّلتك ماني اصغر عيالك !
ابو فهد نطق بحدة : اعقب يالعاقب اخوك الكبير يكلب !!
ناصر ابتسم وهجدهم وقال : بس لا تقتلون المتعة الله يسد نفس عقاب ولا لو ان اسر اللي مسويها بتشوفونه مصروع ضحك !
عقاب جلس ونطق : تعقب م يسويها
فهد ضحك بسخرية وقال : ومن ثويمر طالع عليه ؟ ع عمه
عقاب صدّ يشرب قهوته ونطق هيثم : يوه يعقاب وش النفسية ذي الله يعين تميّم عليك !
ناصر : لا معليك م يمسّ تميّم وانا عمه
ابو فلاح ابتسم وقال : والله اني احب الونيّس والضحوك وش نبي بالنفسية الشينة ؟ اضحك يعقاب لأجلي وانا عمك !
ابتسم عقاب ولفّ لأبو فلاح وضحكوا العيال كلهم ، ابتسم ابو فلاح وقال : جعلني فداه يعرب
عقاب فزّ وباس راس عمه ونطق : مجار جعلني قبلك !
ابتسم ابو فلاح وقال : يالبى قلبك بسم الله عليك يولدي
ابتسم عقاب بخفه ولفّ يشوف ضيدان ، مشى له وجلس جنبه ونطق : لازم تذكرني انك صرت نسيبنا !
ضيدان ضحك وقال : مو بشغلي انك تنسى وبعدين واضح ان لك سوابق فالتصريف وبأسمي بعد ؟!
عقاب تكى جنبه وقال : تبي الصدز ؟ اي والله كنت اصرف ناس كثير بأسمك الا اسيّر دايم يقفطني
ضيدان : عشنا يطويل العمر ! عزتي لآسر بس
ابتسم عقاب يتأمل خويه اللي صار رسميًا فرد من عايلته ، هو الاكيد واللي خالصين منه ان عقاب يشوف ضيد قلبه احد افراد اسرته واقرب شخص لقلبه ، ابتسم يحاوط رقبته ويضمّه له ، ضحك ضيدان لا شعوريًا وقال : عقييّب !! يبعد راسي والله !
حاوطه وضحك عقاب وقال : خلاص ابعد
ضحك ضيدان معه ولفّوا من ابتسم صقر وقال : اخذها الليلة ؟
عقاب : لا يالحبيب بعد عرس وضيحي
ابو فهد ابتسم وقال : ايه زين بعد العرس يفلحون كلهم
صقر ابتسم وقال : ع خير ان شاءالله
عمّ الصمت لدقايق والكل استنفر يتجهز ويكشخ لعقيقة تميّم فالليل ..
" في مطار الملك خالد ، بالرياض "
مشى ثامر ويستند بهدوء ع رفيق الدرب سامي ، نزلوا ودخلوا للصالات واستلموا شناطهم ومشوا ، لفّ ثامر وضحك من شاف حصة جاية تركض ومتنقبة ، ضحكت بفشلة وقالت : خير تضحك !؟
ثامر ضحك وقال : اسلمتي اختي ؟
حصة نطقت بغنج وهي تتأمل نظرات سامي لعيونها وقالت : لا بس نحرم الولهان ونمنعه من النظر !
سامي ابتسم ع جنب وقال : ملامحتس م تغيب عن البال وطاريتس يطري علي بكل لحظة و لا احتاج تذكير حريص القلب ما ينسى ملامح ظبي العفر وخده الندّي لا توصيني !
ثامر توسعت عيونه بصدمة وقال : اخو حصة !!
ضحكت بخجل تصدّ ونطق سامي : ونعم بك والله وبحصيصة !
ثامر رفسه وقال بحدة : اعنبو غييرك ! انتبه لنفسك من لهايّب حفيد عايض ! والله لا اشلوطك تسمع ؟
ابتسم سامي وقال : حمدلله ع السلامة يبعد هالروح واشوفك ع خير وتكفى وصايّا الزم اختك لحد ياخذها مني انا شاريها ومتى م سمحت لي الفرصة جيت ! وانتبه تروح ع حفيد قاضي دفنتك انت واهلك بأرضكم !
ابتسموا وباسوا خشوم بعض " سلام الرجال " ومشى سامي ولفّ يشوفها لآخر مره ، ابتسمت من تحت نقابها لكن لغة العيون كانت واضحة وهي اللي تنطق ، ابتسم من عرف انها ابتسمت له ومشى واختفى سامي من حياتهم وبعد وداعهم الصعب ، هو بيبقى بحياة ثامر لكنه استحالة عاد يشوف حصة مره ثانية ، مشوا ثامر وحصة للفندق بحكم بُعد القصور عنهم وم معهم سيارة والوقت نوعًا ما تأخر ..
" عقيقة تميّم بِن عقّاب "
كُل اهل مساعد مجتمعين بحوش واحد ، الحريم برا مع رجالهم والعيال بعد ومجتمعين حول صحون العشاء ، اما عند البنات اكتفوا بالجلسة داخل عشان راحتهم ، ابتسم ابو فهد يتأمل حفيده بحضنه وضحك يلّفه وقال : دخلوه بردٍ عليه !
عقاب ابتسم وقال : م يبرد وابوه عقاب !!
فلاح : ياشيّب عيني من بعض الحركات الصبي بيموت من زكام وذا يهايط ! وبعدين وش م يبرد لاتكون ابليس بس لأني شاك من فترة
ناصر انصرع يضحك بصوت عالي وقال : فليييح !!! لا بارك الله فالكتمان !
فلاح مسك ازرار ثوبه ونطق : قهررني يعيال كل شوي يرفع بنفسه
عقاب انفجر يضحك وقال : شدعوة مو من حقي
فلاح : لاا تخسى بعد
مشى بياخذ تميّم من حضن ابو فهد اللي يضحك ونطق : م تاخذه من حضن جده ولا يبرد مع جده !
فزّ عقاب وسحب فلاح وقال : ابوو تميّم صدز ! وش تبي بضناي ؟
فلاح : صدز وش لزومي ؟
مشى يجلس وضحك عقاب وتوجهة لأبوه وقال : عطني يابه لا يوجعك !
ابو فهد ابتسم وحضّن تميّم وقال : م يوجعني !
عقاب : هاته جعلني فداك
ابو فهد ابتسم يمّد تميّم لأبوه وقال : انت ابخّص يولدي
ابتسم عقاب يبوس راس ابوه ومشى يركض للمدخل ونطق : يوولدد طررييقق
ضحى نطقت : تعال والله م تسلم
مشى يدخل وقال : اييييه !!
ضحكت وضحك من تذكروا اللي صار فالمجلس وقالت : تسميني تيس هاشوف والله انها فكرة الجود !
عقاب : وغيره ؟
الجود شهقت وقالت : الله لايوفقتس يتبن !
عقاب لفّ عليها ونطق : لعاد تشهقين وتعالي الزمي الورع
مشت له واخذت تميّم وقالت : تبي تاكل من الكيك ؟
عقاب : م حضرتوه ؟
ضحى : لا طبعًا لنا بس التيس مرتك م تتحمل ولا قد قلنا لها تسّد حلقها !
عقاب ابتسم وقال : م ابي اصلاً عافية
ضحى ضحكت وقالت : حسيت بتأنيب ضمير تبي جد ؟
هز راسه بنفي وقال : لا بالله م ابي
الجود نطقت بحدة : م الومه نشبتي بحلقه بسم الله !!
ابتسم ونزل يبوس خدها قريب من مبسمها وهمس : رجعنا للعشق القديم ؟ حرام بالله اني اطيح فيتس كل مره !
م قدرت تبعده لأن تميّم بين يدينها اكتفت بالصمت ولفّت لضحى اللي تناظرهم بشكل خبيث ، ضحكت وقالت : كمل يبو تميّم ادعسس نبي نشوف انتاجك فالبنيات
ابتسم وقال : خلفّي انتي ولا شفت انتاجتس والله وشوفيني احلف ان يجي الثاني ع خير
الجود توسعت عيونها وقالت : لحظة بريكات يعقاااب !
ابتسم وغمز لها وقال : على م اعتدنا يبنت راشد ليلنا طوييييل جدًا لي تسعة اشهر فاقدن لي فاتن وضامر سرجوف
مشى يطلع ونزلت تاخذ جزمتها ورمتها ع ضحى اللي انفجرت تضحك ، الجود اخذت نفس تنظم نبّضها اللي تلخبط من بوسته وكلامه وغمزته ، مشت تدخل وهي بدأت تدوخ فعليًا ..
" عند البنات الساعة الثانية منتصف الليل "
الكل فيهم بالبجايم وجالسين حول بعض ، يتأملون الحوش والارض الواسعة المليانة بالاشجار وتحفّها النخل من كل جهة ، قدامهم براد شاهي نعناع وكاساتهم الناعمة اللي تدّل انها لكل وحدة فيهم من اسمائهم المنقوشة عليها ، ابتسمت الميلا وقالت : ندمتوا انكم اعرستوا ؟
تالين هزت راسها بنفي وقالت : احد يندم وعنده تركي ؟
الجود : جد احسدتس ترا !
امال نطقت بحدة : وهل فيه احد عاقل يندم وعنده فلوحي ؟
انفجروا البنات يضحكون عليها ونطقت دالين : هو اللي بيندم من فلوحي !!
ضحى ابتسمت وقالت : الزواج اضافة حلوة جدًا ! بس م اخفي لكم اني اشتقت للديرة وكل م اذكر ان معاد عندنا هناك الا العزبة يضيق صدري
غزيل : والله انتس صادزة انا م كنت مقتنعة اخذ ناصر عشان وصية امي الله يرحمها بس والله اني بكل مره اسجد لربي شكر انه جابني لعند ناصر !
ابتسمت البندري وضمّتها ونطقت : يحظ اخوي والله ويحظنا فيتس ي غزلي !
ابتسمت للبندري وقالت : يعمري والله
الجود : انا ندمت
لفّوا عليها كلهم بصدمة وكملت وهي تقول : اني زعلت ع ميلو بوقت خطوبتي وملكّتي من عقاب
الميلا انفجرت تضحك وقالت : اووف لازم اقولكم السالفة
ضحى توسعت عيونها وقالت : انطقي واصدميني
الميلا : كنت احب عقاب !
صرخوا كلهم بصدمة وبقرف بنفس الوقت ، دالين وهي تضحك نطقت : وربي كوووبل الكبير مع الكبيرة والصغير مع الصغير كانت بتنفع قهر !
الجود ضربتها ونطقت : يزينتس تمسّين بس ! وش اللي بتضبط بعد
ضحى بصدمة نطقت : يع ميلا منجد يع !!
الميلا وهي ميتة ضحك قالت : هيه وشدخلني كنت اشوفه اقرب واحد للزواج وفيه فرصة كبيرة اسكن فالديرة بعدين من مراحي للخوصاء بذيك الليلة تغييرت حياتي وتغيير كل شيء رجعت للبيت والجود زوجة لعقاب ومع رجعتي خذيت معي قلب اسر وصار مهتّوي وعاشق للميلا !
ابتسموا كلهم يسمعون السالفة وكملت الجود وقالت : صدز ان لله في خلقه شؤون ! شوفوا كيف ساق الميلا لآسر بذيك الليلة ليلة خمسطعش والبدر كامل !! وكيف ساقني قدام ابوي ورماني لعقاب علطول
تالين : اوكييييه اكشششن وربي !! حماااس
امال ضحكت وقالت : مرره مقدر كأنه مسلسل يهببلوون بنات راشد وعيال عايض !
ضحكوا كلهم ونطقت ضحى : اجل لازم ننام العرس بكره ولازم يتعدل نومي ! قبل يهّج واخسى اعدله
شهقت البندري برعب وقالت : بكرره !!!
الجود : قصدها اننا دخلنا يوم جديد يبقرة روعتيني !
ابتسمت البندري بفهم ومشوا كلهم متجهين لأجنحتهم مرّ وقت طويل ع موعد نومهم واليوم وراهم كرف لعرس ضحى وسهم بكره ..
" جناح عقاب "
دخلت بهدوء وسكرت الباب بحذر ، مشت ودخلت الغرفة وابتسمت بحنّية من شافت تميّم نايم ع صدر عقاب العاري بشكل لطيف جدًا ، ضحكت بهدوء ومشت لهم شالت الشيلة من ع راسها وانسدحت جنبه ، فتح عينه بهدوء ونطق بثقل صوته : شيليه وتعالي
ضحكت تناظر سقف الغرفة ونطقت : حرام عقاب واضح عاجبه حضنك
عقاب : خوفي اميّل عليه اخذيه وحطيه بسريره
هزت راسها بنفي وقالت : قم انت
رفع نفسه بيده اليسار ومشى شايل ولده بين يدينه ، نزله بفراشه جنب سريرهم ورجع لها ، ابتسم يحاوط خصرها ويسحبها لحضّنه ، دفن وجهه بنحرها ونطق : الله حسيبتس وش سويتي فيني ؟ انا اللي م اؤمن بالحب ولا اواطن الحريم وانا الجلّف الصعب صرت سهل تجيبين راسي واخرتي !! جودي احبتس واعشقتس واهيم لتس واغرق والله وتالله وبالله م اطلب نجاة عقاب هايم بالعيون الوساع والخصر المزّوي والخد الندي والمبسم الخدرَ والغمازة المليّحة يعساني فدا لماطاتس فالارض يجعل عقيّب قبل يومتس !
ضحكت بخجل تتمسك بيدينه ونطقت بحب : احبك واحب صلابتك واعشق رجولتك وهيبتك واهيّم بحنيتك لي ومشاعرك وعاطفتك ولذاذتك وشخصيتك اللي م يشوفها غيري الجود حصلت بطل روايتها ! انت بطلي ودنيتي وزوجي واهلي وعايلتي الصغيرة دام الله علي وجودك ونعمتك علي
شّد عليها وابتسم بحنّية يبوس نحرها ، لفّها عليه وضحكت بخجل من باس مبسمها لثواني وابتعد وقال : دايخ ودخت زود يبرّي حالك يعقاب
ابتسمت تحاوط رقبته وناموا بأحضان بعضهم ، قريبين لبعض انفاسهم وحدة ونبضّهم واحد ، انجازهم العظيم تميّم بكرهم معهم تحت سقف واحد ، نزل يده يشابك يدها الصغيرة بالنسبة له وغطّ بنومته ..
" الصباح المنتظر ، زواج ضحى وسهم "
الكل مستنفر وطالعين راجعين ، شهقت البندري وقالت بصراخ : فستاني الثاني وييينه !؟
رئيسة الخدم عذَبة : موجود فالغرفة ؟
البندري بتوتر : لا لا م حصلته
مشت مع عذَبة ودخلوا لغرفة تبديل الملابس وضحكت من طلعته لها وقالت بفشلة : اسفه
عذَبة : لا لا م صار شيء
مشت تطلع ولبست البندري لبسها الاول ، بما ان عندها لوكين فالليل وفالعصر بحكم انها اخت العروس ، واغلب البنات سووا المثل ، لفّت من دخل مع الشباك ونطق بغضّب : حتى زوجتي ادخل عليها بالطريقة ذي !!
توسعت عيونها ورفعت كمّ فستانها ونطقت برعب : اطلع باقي م لبست !!
مشى لها يشوفها وابتسم بوسع ثغره وقال : يزين الزييين ! تعالي اساعدتس
شهقت من سحبها وسكر سحّاب فستانها وقال : خلصتي صح
البندري نطقت بتوتر : ايه
ابتسم وباس كتفها ولفّت تطالع انعكاسهم وشافت دموعه بعيونه ، ابتسمت بهدوء وقالت : تبكي ؟
ضحك يمسح خشمه بعنّف وقال : كيف اخفي دمعتي لا مني ملكتتّس كيف ابين اني عادي لا صرتي حلالي !؟
ضحكت بخجل وقالت : حمدلله يارب
صقر ابتسم وقال : اي والله الحمدلله يالله يعسل بنطلع سوا
البندري ابتسمت وقالت : كيف بتقنع عقيّب ؟
صقر : ياكل تبن يشيخه
مشوا يطلعون وركبوا سيارة صقر ، وكان هياط صقر لعدم وجود عقاب والكل سبقوهم للقاعة ..
" بخطّ السفر "
ماسك كوب قهوته ويطالع بالساعة في موتره ، متوجهة للقاعة علطول ومتكشخ ومرسّم ، زفر بقرف ونطق : العن ابوك شاحن !
جواله طافي من فترة قدومه للمعسّكر والشاحن م يشحنه ولا يشتغل ابدًا ، زفر بغضّب ورفع عيونه يشوف اللوحة والمتبقي ع الرياض حول الميتين كيلو ، ابتسم اسر ونطق : جايكم ي اهلي جايكم والشوق سابقني !
شدّ ع الدركسون بحماس وقال : وضيحي عروس ي سرعّ الايام ويسعّد حظك ي سهييم فيها
لفّ يشوف الهدايا حقته لها ، وابتسم يرجع عيونه ورا للمرتبة الخلفية وهدايا الميلا فيها ضحك وقال : اوووه ي ميالتي
ركز بالطريق وده يوصل بسرعة قبل العشاء واذانه ..
" فالقاعة "
البنات جالسين يجهزون ويتأكدون من كل شيء ، ضحكت ام فهد وقالت : يويلي ي تميّم والكشخة
ابتسمت الجود وهي تشيله بين يدينها وقالت : طالع ع ابوه
ضحكت ام فهد بوسع ثغرها ونطقت : الله يحفظهم لتس ولنا يبنتي
ابتسمت وقالت : امين يعمة
مشوا يرقصون ويستهبلون بعرس العصر اللي فيه ال مقبل بس ، والحضور بيكتّثف ع المغرب ولمنتصف الليل ، امال ركضت وقالت : بناااتي تعالوا
ضحكوا الين وبيسان ومشوا لأختهم يضمونها ويصورون حول بعضهم ، تقدمت ام عبدالعزيز وضحكت وقالت : لي محل !
فزّوا بناتها وسحبوها معهم وضحكوا يلتقطون صور لكشختهم ، الميلا نطقت من بعيد : غرت بصور مع جودي وصباحي الحلو
ابتسمت ام تركي وقالت : يالله نصور
ضحكت الجود وقالت : نسيتي تميّمي ؟
الميلا اخذته بين احضانها ونطقت بلطافة : اخسى انساه عيون خالته
لفّت ونطقت : اييه صح جودي ترا جبت لكم باقة ورد عني انت خالته وعن حبيبي اسر عمه
الجود ابتسمت بحنّية وقالت : م تقصرون جعلني م اعدمكم
ابتسمت ام تركي واخذت تميّم ونطقت : تعالوا
تصوروا عن المراية اللي انكتب فيها " زواج الدهر ، زواج السهم بضحّاه " وانكتب تحتها " سهم وضحى " ابتسمت الميلا وقالت : عسسسل الصورة !
ام تركي مسحت ع بطن بنتها وقالت : بأذن الله المناسبة الجاية وكنوزكم بين يدين جدتها
ابتسمت الميلا وتغورقت عيونها وقالت : ان شاءالله يميمتي
احتضنت امها بقوة ، وحاوطتها ام تركي بحنّية ، مشت البندري وسحبتهم وقالت : تعالوا تنكسوا يخي
ابتسموا الجود والميلا ومشوا للمنصة يرقصون مع باقي البنات ..
" فالفندق "
صحوا مفجوعين وانطلقوا يتجهزون ، حصة مشت تركض ولبست وسوت الميكب حقها بكل اتقان وسرعة ، انتهت من شعرها من امس وتنتظر ثامر يطلع عشان تساعده ، طلع يركض ونطق : بسسرعة الثوب !!
مشت تركض تساعده ولبسته وخلصت وقالت : كم الساعة !
ثامر بتوتر : سبعة ونص وربي وش النومة ذي صليتي ؟
هزت راسها بنفي وقالت : عذر شرعي
ثامر هز راسه بمعنى " فهمت " ومشى يركض يلحق يصلي اللي فاته ، كملوا فوق الاربع وعشرين ساعة نايمين ، شهقت وقالت : ثوييمر وين الكعب حقي !؟!
انتظرته ومن سلّم نطق : بشنطتي
مشت تركض وسحبت شنطته تطلع كعبها ، ابتسمت ابتسامة عريضة وقالت : وش جابه معك ؟
ثامر لفّ لها وهو يرفع سجادته وقال : سامي ذكرني فيه
ابتسمت بخجل ترفع شعرها ورا اذنها ، ومشت تجيب المبخرة الالكترونية ونطقت : تعال ابخرك
ابتسم ومشى لها وبخرته وقالت : عقبالك واشوفك عريس
ابتسم ثامر وضحك وقال : بعدك ان شاءالله
ضحكت وقالت : تم !
سحب عقالة وضحكت تصرخ وقال : خلاص يخوافه امشي
مشوا ولبست عبايتها وطلعوا ركض يلحقون التكاسي واوبر يوصلون للقاعة ..
:::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
(ارحبوا يحباااااني رجعنا ببارت جديد ، عطوه حقه عشان اكمل هنا ولاتنسون النجمة 🤍🤍)