ليّت اللِذي خَلق العُيون السُود ... خَلق القُلوب الخَافقات حَديد

البارت الثالث والثلاثين

" بحدود الرياض "
صقر رفع جواله ونزل من السيارة ونطق : دالين سنة عشان تردين ؟!
دالين تثاوبت وقالت : وشو بسم الله كنت نايمة وش بغيت ؟
صقر : بنجي انا وامي وافتحي لنا الباب الخلفي اللي ورا القصر الشرقي طيب ؟
دالين : شدعوة ادخلوا مع البوا..
قاطعها صراخه وهو يقول : الشرطة تدور امي !! تستهبلين انتي !
دالين شهقت وقالت : هاااه ؟ لييه وش مسوية !
صقر : بقولتس السالفة بس افتحي لنا
دالين قامت من السرير ومشت وهي تقول : تمام تمام
سكر صقر الجوال وركب سيارته وحرّك للقصور ..
" في قصور مساعد "
طلعت تركض بجلال الصلاة وتدعّي م تقابل احد بطريقها ، مشت ووصلت للقصر الشرقي وشافت ثامر نازل مع الدرج شهقت ودخلت بين الاشجار وشافته يبتعد من طريقها ، ركضت تكمل ووصلت للباب وفتحته علطول وشهقت برعب وقالت : ضيدان !!!
ضيدان ابتسم وقال : يالله حييّ بنت سالم !
تلثمت علطول وسرعان م قلبت وجهها تصّد عنه ، هي متفشلة لأن توها صحت وخوفها وجهها يكون معفوس ، ضحك وقال : ايه ايه سمعتك ، لا مو الحين ، ابشر م بترك المحل اصلاً تووه جاز لي ! ، عُلم ..
سكر اللاسلكي ولف عليها وقال : ايه ؟ ناوية تنخطفين مره ثانية ؟ وش جابك هنا
تالين عضّت شفايفها السُفلية لثواني ، هي لازم تبعده عن المدخل اللي صقر بيجي منه وامها معه ، لفت عليه وقالت : سمعت صوتك وجيت اتأكد من مسامعي
ضيدان : اييه وصلتي خير امري ؟
دالين : تجي معي ؟
ضيدان رفع حاجبة ونطق : وين ؟!
دالين ابتسمت وابعدت اللثَام عن وجهها وقالت : تعال معي شوي بوريك حاجه
انتفض ضيدان من جمالها وجرائتها ، صّد وهو يسحب اللاسلكي وينطق : سهم الحمار خلوه يجيني الحين
ضارب ضحك من اللاسلكي وقال : سمّ
وفعلاً ماهي الا دقيقة ووصل سهم وقال : امرني حضرة اللواء ؟
ضيدان بجدية : لا تتحرك منا فاهم ؟ شوي واجي
دخل ضيدان وسكر الباب وراه وسحبها مع يدها ياخذها ورا القصور فالحديقة الخلفية ، نفسها اللي شاف صقر البندري ودالين فيها قبل ايام ، دالين حاولت تسحب يدها منه ولف عليها ونطق : ولا تفكرين حتى !!
دالين بتردد وربكة : وش بتسوي !؟
ضيدان دفعها ع الجدار وراها وحاصّرها ونطق وهو يصر ع اسنانه : القصر مليان اجهزة تنصُت من اخر غرفة لأول غرفة وسمعت مكالمتك مع صقر وبيكون مشتبه فيه بتهريب مجرمة !! وبيدخل بمشاكل ومحاكم م تلعبين علي بجمالك ي الفاتنة !
دالين عضّت شفايفها تمنع نفسها تبكي ، صدّت عنه ورجع يلف وجهها له وقال : بتبكين ؟
دالين نزلت دموعها بحرقة وقالت ببكي : امي تكفى لا تسوي لها شيء امي انت تعرف شعور فقدان الام لا تخليني اجربه بحاول اكلمها بس تكفى لا انا ادري انها غلطت بس غلطت فينا واحلام اللي سّيرتها تكفى اقلها زواج تالين بعد بكره خلها تحضره !!
ضيدان نزل البريهه من راسه وقال : انا م شفت امي عشان اعرف شعور فقدها !
دالين مسكت وجهه بيدينها وقالت برجاء : انا في شنبك ووجهك لا تاخذ امي وتحرمني شوفها
ضيدان نزل عيونه للأرض ورجع يرفعها لها وينطق : كلمي مهُاب هو اللي ماسك السالفة ذي كلها انت مجرد فرد فالمهمة لا اكثر ولا اقل
دالين : بس تقدر تهربها
ضيدان بصدمة : دالين تستهبلين ؟!
دالين : تكفى طلبتك
صّد وابعد يدينها بعنّف ومشى ، ركضت ونطقت : والله م تاخذني وان احرم عليك اذا سجنت امي
ضيدان ضحك بسخرية وقال : علمتك وش بسوي ولا اعلمك ؟
قطّبت حواجبها ولف عليها وقال : بخطفك وتعرفيني اسويها يالفاتنة
مشى يطلع للباب الخلفي ، ركضت تدخل للغرفة وتسحب جوالها واتصلت ع صقر وقالت له عن اللي صاير وقرر يجي من الباب اللي انخطفت منه دالين ، مشت ووصلت له وشافت عسكري اول مره تشوفه وصرخت بشكل درامي : م عندك خووات !! جاي عند قسمناا !! يببه يععياااال !!
حمدان بخرشة : هاه ؟!
دالين صرخت وقالت : وتقرررب منني يممهه يببهه ي فلاااح !! ي صقرر..
قاطعها فزت حمدان وركضه من عند الباب ، هي لخمته وهو مبتدئ وجندي اول ، ضحكت بسخرية وجلست تتكي تنتظر صقر وامه وفعلاً وصلوا بعدها بمدة ودخلوا علطول ، صقر ابتسم وباس راسها بقوة وقال : اختي ! محزمي وسلاحي
دالين طلعت لسانها ونطقت : شفت مالك غيري
ام تالين : حيّ عينتس يبنت !!
دالين فَلت شعرها وقالت بغنج : حيّ نباتس يميمتي
ضحكت ام تالين وقالت : شف شف الحركات !؟
صقر : يووه صدق اشغلتوني ادخلوا داخل لحد يشوفكم
دالين : ايه لا معليك خرشت العسكري المسيكين اعتذر منه بدالي
صقر بعجلة : يوصل انتي بس ادخلي ونرتاح
ام تالين مسكت يد اخر عنقودها بنتها وركضوا داخل القصر بعجلة منهم تحت مراقبة صقر لهم ، وفور م اختفوا طلع يركض وركب موتره وانطلق خوفًا من انه يجذب العساكر له ..
" فالديرة "
ع الفرَس حقته يدندن اغانيه المفضلة ويقصَد فيها ميالته ابتسم وقال : اشهد بالله انها موتي !
نزل براسه وباس راس الخوصاء وخلخل لحيته اللي بدت تصير كثيفة بين شعرات الخوصاء البيضاء ، ضرب خلفيتها وركضت بكل سرعتها تعدّي وتتسابق اول م شافت المرتجز وعقاب يركضون بالجهة الثانية ، عقاب صرخ وقال : حااااي يالمرتجز !!
ضحك اسر وقال بصراخ اثر الهواء والازعاج : وش الحين بتسبقني ؟
عقاب ابتسم وقال : اييه بعيدة عن شواربك تفوز انت وياها
اسر لف عليه وقال : سخن سخن يبو تميّم
عضّ طرف ثوبه ورفع نفسه من ظهرها ، فهمته علطول وركضت تشّق البيداء تحتها من سرعتها واختفت من جنب المرتجز وعقاب ، حكّ شنبه وقال : الله يفشلك يبوك امش امش
مشى المرتجز وراء الخوصاء ووصلوا للبيت ونزل ومشى يحلق اسر ودخل وشافه جالس يتقهوى ولف نظره للصينية والقهوة المنتثره عليها ورجع يلتفت له ونطق اسر : يوووه ؟ توك تجي قد تقهويت وخلصت
عقاب نزل نفسه وسحب له حجرة من التراب وفز اسر يركض ورماها عقاب وصفقت بأذن اسر وصرخ علطول ، عقاب كتم ضحكته وقال : ابرك واسعّد يحمار !! مسوي اني واصل من اول وهو عفس الدنيا عشان يصب له فنجال اشهد بالله انك ورع الله يخلف ع الميلا بس
اسر بصراخ : بيخلف عليها ومن ظهري يحمار !
عقاب جلس وضحك وقال : الا نويصر وينه ؟
ناصر طلع من المجلس وهو ينزل اكمامه وقال : صليتوا ؟
اسر هز راسه بنعم وكمل وهو يقول : ايه صلينا عند الاسطبل
ناصر : حرام عليكم وين الادهم ؟
عقاب : م جابوه بس الاثنين ذولا
اسر جلس ورفس عقاب وقال : حيوان !
عقاب توسعت عيونه وقال بحدة : اخوو العيااال !!
ناصر جلس وقال : والله البلشة يعيال خلاص بزران انتوا
اسر : هو اللي بدا
ناصر شهق وقال : الله ياخذكم من اللي كب القهوة !!
عقاب انفجر يضحك بصوت عالي وهو يقول : اسيّر
ناصر رفع الفنجال وركض اسر يصرخ ورماه وضرب بظهره وقال بحدة : ورع انت ورع وش اللعب ذا
عقاب ابتسم وقال بهمس : حرام عليك اوجعته
اسر بآلم وهو يونّ : انتوا اخوان انتوا ؟ كيف تعاملوني كذا
ناصر عضّ شفايفه وهمس : اه جاني تأنيب ضمير
قام عقاب وباس راسه وضحك بخفه وقال : جعله بضلوع صدري عنك يالعضييد قم جعلني قبلك قم م فيك الا العافية
مسك يده اسر وقام وحضنه عقاب وضحك اسر وقال : يبو تميّم وشفيك ؟
عقاب شّد عليه وقال : وحشتني ام تميّم وبشبع نفسي بك
صرخ اسر وقال : افوووه الله يمغصك
ركض وجلس جنب ناصر اللي حضنه وقال : خل اسيّر ولدي وش تبي به
اسر حاوط ظهر ناصر وقال : ايه ايه ولدك وانت رامي الفنجال علي وش عنده عايض بن مساعد ؟
ضحك ناصر وباس كتف اسر وقال : من حبك ضربك
اسر : لا خُبري انها من سبك حبك
ناصر شّد عليه وقال : هالله هالله كلها واحد وانا اخوك
جلس عقاب وقال : البلالين بتنسّم وذولا م جاوا
اسر طلع جواله واتصل ع ابوه وشوي ووصله صوته وهو يقول : خير ؟
اسر : سلام عليكم يرجال !
ابو فهد بحدة : فلا حيا ولا قرب الدار اعنبوكم وين دياركم ؟!
اسر ضحك وقال : رد السلام يبه رده
ابو فهد اخذ نفس وقال : عليك السلام ي اسيّر
اسر : وابد حن فالديرة فالبيت ننتظركم للعيد
ابو فهد ابتسم واستهَل وجهه وقال : ايييه ذي والله السناعه والمرجلة والنخوة يعيالي
اسر ضحك وقال : معليك زود نفداك
ابو فهد : ماشيين الليلة
اسر : بحفظ الرحمن
سكر ابو فهد ولف اسر وقال : جايين الليلة استعدوا لسّب والضرب من ضحى والبندري
ضحك ناصر وقال : ليه ؟
عقاب عدل جلسته وقال : انا اقولك ليه عشانهم تجحفلوا وم صاموا فالدلع وفالقصور والحين عيدّهم فالديرة
ناصر ضحك بصوت عالي وقال : والله يويلنا صدز
اسر : يخوي ياكلون هوا ! الله اكبر بيرجعون فالليل عشان زواج تركي الله يبارك له
عقاب : يووه انت صادز ؟
اسر : ايه زواجه بأول ايام العيد
ناصر : الله يوفقه ويجمع بينهم على خير
عقاب : امين امين
اسر رفع عيونه للسماء وقال : وعقاب الحمار اول م جينا يقول الديرة حيّا ومطر وينه م اشوف الا شمس تحرق الفؤاد !
عقاب ابتسم وقال : والله شوف
اسر وهو يهوش له بيده : البخ البخ بس
عقاب عضّ شفايفه يكتم ضحكته وقال : سمّ
تسدحّوا يستظلون بجدار البيت من الشمس الحارقه فنص السماء ..
" فالقصر الغربي "
طلعت تركض ودخلت غرفة تالين ونطقت : عرستس متى ؟
تالين ابتسمت وقالت : غزيل الواحد يدق الباب !
غزيل رفعت حاجبها وقالت : وييلمها لييه شايفتني رجال !!
تالين ضحكت وقالت : وشدخل !! بس من الادب
غزيل بحدة : اييه اخلصي بس متى ؟
تالين : يوم العيد فالليل يعني بتتونسون مرتين
غزيل عضّت اصبعها ونطقت : اي وناسة الله ينكبتس م طلبت الا فستان واحد للعيد
انفجرت تضحك وخزّتها غزيل وطلعت تمشي لجناح الميلا فالقصر الرئيسي ، دخلت ع الميلا وشافتها تسلم من الصلاة شهقت وقالت : يالعاقبه توو تصلين !!
الميلا ابتسمت وقالت : يالله ظهر الخير توو صحيت وش بغيتي
غزيل بحدة : وش اللي وش بغيت طردة هي ؟
الميلا رفعت سجادتها وقالت : شدعوة غزل ؟
غزيل بجدية : ابي فستان
الميلا مشت لها وجلست جنبها وقالت : افتحي جوالتس واطلبي زوجتس دكتور ترا !
غزيل : م علي من الفلوس وم بطلبه حتى بس التوصيل
الميلا ضحكت وقالت : صح صادزة بس ليه انتي شريتي للعيد
غزيل ضحكت وقالت : لا يحماره لعرس الدبشة تالين
الميلا : يووه اجل ننزل للسوق قبل نرجع للديرة
غزيل : اسمعي ميلا
الميلا لفت لها وقالت : سمّي يعروق قلبي ؟
غزيل سحبت خدها وباسته وقالت : يحلوتس انتي بنت مدن صح ؟ واكيد تعرفين فالرياض واسواقها
الميلا : ايه ازهليها بس اجي الرياض من وانا بزر وسكنت فيها قبل اعرس بعد
غزيل : م قلت لتس قولي قصة حياتتس ساعديني وبس وجع
قامت وانفجرت الميلا تضحك ورمتها فالمخدة وضحكت غزيل وطلعت من الغرفة ..
" فالصالة "
ام فهد وهي تكلم ع الجوال : ايه ، موجودين يأم مهُاب موجودين
همست ام تركي وقالت : الله يشغلها اشغلتنا قولي بعد العيد
ام فهد اشرت لها تسكت وكملت : ابد العصر فاضين وبعدها بنمشي الديرة تعالوا وبيننا كلام ، ع خير
سكرت ولفت لأم تركي اللي نطقت بغضب : وانتي صاحية بتعطينهم البندري !!
ام فهد تكت وقالت : وش يمنع الرجال وله بيت خاص وقصر بعد ورتبه ومن معارف اخوها !
ام تركي بجدية وهي تعدل جلستها وتقرب من ام فهد وتمسك كفوفها : شوفي اذا انتي منعمية انا اشوف صقر شاري بنت عمه وشايل نفسه ومتوظف وغيره مهُاب ذا مدري هيبة عمره ستة واربعين سنة ! بتعطينه للبندري بنت العشرين !؟ صاحية ي قمراء ؟؟
ام فهد بربكة : صقر ؟
ام تركي : ايييه صقر ميتن فيها وعيوني تشوف واذاني تسمع !
ام فهد : وش اسوي طيب عطيتهم كلمة ؟!
ام تركي ضحكت وقالت : خليها علي بس
ام فهد : وش بتسوين ؟؟
ام تركي : اقولتس خليها علي
ام فهد تنهدت وقالت : الله يستر
ام تركي مشت للمطبخ ودخلت وقالت : سحاب اطلعي بكلم امتس
سحاب كانت بتتكلم وتلاسّن ام تركي بس لفت لأمها اللي قالت : سحابي اطلعي
سحاب زفرت بملل وقالت : ابشري
طلعت ومشت ام تركي وقالت : جايتس عريس
غالية توسعت عيونها وقالت : اسألتس بالله !!
ام تركي : اييه فريق اول نفس اخوتس
غالية م كانت تدري عن سالفة مهُاب وانه جاي عشان البندري عشان كذا ضحكت بوسع ثغرها ونطقت : يالله لك الحمد والمنة يالله !
ام تركي ابتسمت وقالت : اخيرًا بنفرح فيتس للمره الثانية وعساه قد الهقوة يارب
غالية رفعت يدينها للسماء وقالت بتّرجي : يااارب
طلعت ام تركي وضحكت بفرحة وقالت : خلاص نفرح بتركي وفلاح وينتهون ونبدأ بغالية وبعدها الباقيين
مشت تطلع لغرفتها تاركه ام فهد بحيرة وبدون علم ابدًا ..
" في ميونيخ المانيا "
فتحت عيونها وابتسمت وهي تناظره يتأملها وهي منسدحة ع صدره
هتان ابتسم وقال : صح النوم
ديم ضحكت وقالت بخجل : صح بدنك
هتان : مشينا ؟ ورانا رحلة للسعودية
ديم هزت راسها بنعم وقالت : ايه مشينا
هتان باس راسها بقوة وقال : يالله يبنتي
ديم تقدمت ومسكت رقبته وقالت : بس بنفطر اخر فطور لنا في ميونيخ وبتدلعني !
هتان حط جبينه على جبينها وقال : من غير شر وابشري بأحلى عشاء
ديم ابتسمت ومشت للحمام وجلس هتان ينتظرها تخلص عشان يطلعون وفعلاً م اخذت دقايق الا وهي طالعة بمكياج خفيف ولبس مرتب وشتّوي بحت اثر الثلوج اللي تغطي ناطحات السحاب والبيوت في المانيا ، ابتسم وقال : كل يوم تحلّوين اكثر من اليوم اللي قبله
تقدم وباس خدها بنعومة شابهت نعومتها ونطق : اه ي ديم بتخليني اسحب ع الخرجة والعشاء وارجع للسرير !
ديم توسعت عيونها بصدمة وقالت : هتان ! وجع
ضحك وقال : حلوة وعسل وش تبيني اسوي ؟
كشرت وضحك ومشى ودخل للحمام وجلست هي بدورها تنتظره يطلع ، طلع بعد فترة وسحب جاكيته ولبسه وقال : يالله مشينا ؟ اخذي اغراضك كلها لأن م بنرجع للفندق
ديم تقدمت وقالت : خلصت ولا يهمك
هتان ابتسم وفتح لها ذراعه وحاوطتها ونزلوا يتمشون فالثلوج ، هم راح نهارهم كله نوم وتوو صحوا ع مغيب الشمس والظلام اللي كسى سماء ميونيخ ، شّدت ع ذراعه ونطقت بدقن راجف : بموت برد !!
هتان ابتسم ولفها يطالع بوجهها وخشمها الاحمر اثر البرد ووجنتيها وشعرها البني وانحنى ينزل لها من مَالت وباسها ع خدها ونطق : ادفيك ببوساتي ؟
ابتسمت وابعدت وهي ميتة خجل وضحك ومشى وراها يدورون مطعم حلو ومكان دافي ..
" فالرياض تحديدًا المول "
مشوا السباعي مع بعضهم يدخلون للمول ، شهقت غزيل وقالت : يمّال فرقى العين ذا ويش ؟؟
الجود بفشلة : اه سكتوها ذي !!!
غزيل توسعت عيونها وقالت : ابكييتس صدز وش يسكتوني
الميلا بفشلة سحبتها من بدؤا الناس يطالعون فيهم وقالت : غزل حبيبي امشي معي وانتي ساكته !
غزيل هزت راسها بنعم وقالت : سمّي !!
مشوا البنات وانتشروا فالمول يتخيرون باقي اغراضهم وتجهيزاتهم للعرس وللعيد ..
" بعد ساعة "
سحبت جوالها وهي واقفة عند الكاشير واتصلت عليه ووصلها صوته وهو يقول : هلا جود ؟
الجود بهمس : تركي حوّل لي خمس مية الان
تركي توسعت عيونه وقال وهو يطلع من المستشفى : وبعدين معتس انتي ؟ وين عقاب دقي عليه دقاق يدق نحره !!
الجود بصدمة : تستهبل صح عقاب طريح فراش ولا ناسي ؟!
تركي شهق وقال : لا جعله فداتتس صحى من قبل يومين وفالديرة ينتظرونا !
الجود شهقت وقالت : حمدلله يارب بس اسمع منزمان م كلمته ويبي لي وقت اتعود عليه
تركي بعصبية : مو شغلي اتصلي ولا رجعي اغراضتس !
سكر وزفرت بتوتر وقالت بهمس : الله يهديك ي تركي !!
لفت من نطقت الموظفة : لو سمحتي بتدفعين ولا وش ؟
الجود بملل : طيب بسم الله توو حاسبتيها اصلاً !!
لفت واتصلت عليه وصارت تدق الارض برجلها بتوتر تنتظره يرد ..
" فالديرة "
طلع من شبك الابل يشوف الشمس قربت ع المغيب وسحب جواله وسطل الحليب بيده اليسار ، رفع الجوال وشاف اسمها ابتسم ورد وقال : مرحبا
الجود فزت برعب وقالت : عقاب ؟
عقاب بجدية : لا جدي ايه عقاب !
الجود بتوتر : بسرعة حوّل لي خمس مية
عقاب رفع حاجبة وقال : بدون م تتحمدين ع سلامتي كذا علطول ؟ وبعدين م تحسين انه بدري ع العيدية ؟؟
الموظفة بحدة : لو سمحتي !!
الجود بعجلة : لا حول ولا قوة الا بالله يحبيبي اخلص ذي اشغلتني !!
عقاب نزل السطل عند الفرشة وقال : امري يحبيبي
بعَد الجوال من اذنه وقال بصوت عالي : لا تسكرين !
الجود بأبتسامة عريضة قالت : طيب
ابعدت اذنها من وصلها اشعار من البنك وشهقت من شافت الاصفار وشافته محّول لها خمسين الف ، دفعت علطول وهي تنتفض وسحبت كيستها ومشت وحطت الجوال ع اذنها ونطقت بحدة : تستهبل عقاب قلت خمس مية ؟!
عقاب ابتسم وقال : تستاهليين ي ام تميّم وقليييل بحقتس وباقي العيدية
الجود ابتسمت وقالت : تستاهل الطيب ووحشتني مرره !
عقاب : خير خير ان شاءالله كلها الليلة وانتي عندي
الجود : الحمدلله ع السلامة يحبيبي
عقاب فز وقال : ابو تميّم صدز ! ويش هو ؟
الجود فزّت وقالت : بسم الله وشفيك ؟؟ تحمدت لك بالسلامة فيها شيء ؟
عقاب بحدة : اللي بعدها وش هي ؟
ضحكت من فهمت وقالت : من العايدين يبو تميّم
عقاب ضحك بسخرية وقال : وانتي من الفايزين يجويّد
الجود شّدت ع الكيس بيدها وقالت : يحلوك احبك والله !
عقاب ارتخى ع الشبك وجرح كتفه وضحك بخفه من الآلم ونطق : اول مره يعجبني جرح من الشبك !
الجود : بسم الله عليك بسم الله
عقاب : عيديها انا في وجه الله !!
الجود ابتسمت وقالت : بسكر مره مشغولة
سكرت علطول وزفر بعصبية ودخل الجوال بيده وسحب يده لكتفه وابعدها وهو يشوف الدم شهق وقال : اخو العيال يعقييب اثقل نعنبو اللاش !!
ضحك وهو عرف انه طايح لها قام ورفع طرف ثوبه ومشى للفرشة يجلس مع اخوانه ..
" فالمول "
غزيل وهي تشوف المراية : اممم ماش م زان لي !
الميلا بتعب : اووف غزيل اووف لتس اربع ساعات تلفين وللحين م حصلتي شيء يناسب الكاريزما حقتتس !!
غزيل لفت عليها وقالت : من هو ؟
الميلا عبست وحضنت وجهها بكفوفها وقالت : اللهم صبر ايوب !!
غزيل : امشي نشوف محل ثاني
الميلا بحدة وصراخ : بدعععي عليتس ترا !! خلاص م اقدر صايمة ارحميييني
غزيل : وانا ؟ صايمة ولا اشتكيت امشي بس
مشت تلبس عبايتها وتطلع من المحل ولحقتها الميلا بتعب يشوفون محل ثاني ، دخلوا ولفت من مسكت الميلا يدها ونطقت بحدة : هذا اخر محل والله معاد اجي معتس !!
غزيل زفرت بملل وقالت : خلاص طيب وعد اخر واحد
مشت داخل المحل وبعد ثلاثين دقيقة من الفّرة فيه ثبتت ع فستان سكري بدون اكمام ونطقت : خلاص مع كيرلياتي بيصير يجنن !!
الميلا ابتسمت وقالت : عسل عسسل ! وتفهم بالكيرلي بعد اموت انا يالبدوية المزيونة يحظ ناصر بس
غزيل : ايه يحظه المخنز ذاك
مشوا يدفعون ويطلعون من المول وتقابلوا مع البنات تحت دخلوا مطعم وطاحت عيونها عليهم ونطقت بصدمة : اذن ؟!
الجود بتعب : م بغيتوا ايه اذن اجلسوا
تالين بحدة : اجلسوا وينكم من ساعة !؟
الميلا اشرت ع غزيل وقالت : اهلكتني مالي ذنب !!
غزيل خزّتها وقالت : يمال العّلة امشي اعتاشي وافطري بس
جلسوا وبدؤا يفطرون مع البنات ولفت دالين وقالت : خلصتوا اهم شيء ؟
الميلا وهي فاتحه وجهها مثل باقي البنات الا غزيل ، لفت ع دالين وقالت : ايييه يبنات فستانها عسل ولا تقول كيرليات اه سامحتها علطول
ضحى لفت عليهم وقالت : ماش غزيل وش كيركي ذا ؟
غزيل وهي تغمز للميلا : اص يالبدوية وش عرفتس فيه كيرلي ذا
ضحكت الميلا بصوت عالي وانفجرت البندري تضحك وقالت : شوفوا من يتكلم !!
غزيل ضحكت وقالت : شعري شعري
ضحى استوعبت وقالت : ايييه ملّولّو ؟
تالين ضحكت وقالت : بالضبط ملّولّو !! بس بلباقه اكثر
ضحى بجدية : شدخل لباقه قولي نعومة يحماره يمكن افهم وبعدين تراكم من الديرة لحد ينفخ خشمه الا بنات راشد
ضحكوا كلهم وضحكت ضحى معهم وكملوا اكلهم وسرعان م انتهوا طلعوا من المول مع السايق راجعين للقصور ..
" فالقصور "
دخلوا اهل مهُاب ومعهم رجالهم والشيخ وناوين يخلصون قبل العيد ملكة وياخذ حرمته علطول ، مشوا الحريم ودخلوا داخل وضيفتهم ام فهد ومعها وام تركي وام تالين ، هم انصدموا من وجود ام تالين بس م قدرت وطلعت وكّبت عشاء احلام وانها ساحرة خديجة وان خديجة مالها ذنب وبكل كلمة قالتها كانت تبكي وصادقة فيها عشان كذا قالوا لها تتعوذ من ابليس وتجي معهم ، وفعلاً هذا اللي صار وجلسوا ونطقت ام مهُاب وقالت : وين عروستنا ؟
ام فهد ابتسمت واشرت ع غالية وسرعان م استهَل وجه ام مهُاب ونطقت : بسم الله ماشاءالله تبارك الرحمن
غالية ابتسمت بخجل ، هي جميلة جدًا واللي يشوفها يحلف انها مو اربعينة وكملت ام مهُاب طايره من الفرحة تزغرط بفرحة ونطقت : الله يتمم
ام فهد : بس قبل كل شيء ترا غالية مطلقة وعندها بنت
ام مهُاب انمحت فرحتها وقالت : هاه ؟
غالية شّدت ع يدينها ونزلت راسها وكملت ام تركي : ايه واذا مطلقة والله م تحصلون بنت مثل زين غالية وبنت ذربة وسنعة مثلها
ام مهُاب بصدمة : ونعم والله بس م قلتوا لي !
ام فهد : قلت لتس بيننا كلام
ام مهُاب : وروني بنتها اذا عادي
غالية عضّت شفايفها بتوتر وهمست لأمها وقالت : سحاب طويلة لسان وبتفهم اللي صاير !
ام فهد لفت لأم مهُاب وقالت : نايمة بنت صغيرة عمرها اثنى عشر سنة عسل بسم الرحمن عليها
ام مهُاب زفرت براحة وقالت بأبتسامة : حمدلله حسبتها عشرينية ولا شيء والله يتمم حنّ موافقين
ام فهد استهَلت واستبشرت وقالت بفرحة : حمدلله ع خير ان شاءالله
وصل العلم للرجال فالمجلس وسرعان م وقع مهُاب ع غالية هو بآخر لحظة حمد ربه وحسّ ان فالأمر خيره ، وطلع ثامر يركض وقال بصوته الثقييل : يعمة تعالي وقعي
مشت غالية وام فهد وام تركي وام تالين معها ووقعوا وانتهوا ، زغرطوا بكل فرحة لبنتهم وطلع ثامر مبتسم ابتسامة عريضة ونزل الكتاب ونطق ابو فهد : بنتنا في اماناتك وتاخذها معك لبيتك بعد العيد ان شاءالله
مهُاب : ع خير يعمي
قام ابو مهُاب ومهُاب وطلعوا راجعين لبيتهم وانتهى كل شيء مهم في القصور وجهزوا الشناط من وصلوا البنات من المول وسرعان م مشّوا للديرة مع بعضهم ..
" ليلة العيد في بيت ابو فهد "
طلعت له تركض وقالت بحدة : خلاص ثامر حشى قول لعمانك ينتظرون !
ثامر ابتسم وقال : حصة اعقلي !
حصة ضحكت وقالت : وش اسوي قول لهم البنات يتنقشون ويتحنون وحركات بركات محد فاضي لهم
ثامر : عماني يبون حريمهم يطلعون عشان يعايدونهم
حصة دفعته وهي تضحك وقالت : بكره العيد يعايدون بكره
سكرت الباب بوجهه ورجع ثامر لعمانه للمره الثالثة ، اسر بحماس : هاه وش قالوا لك ؟
ثامر : اقرفتوني وربي معاد اروح
مشى وضربه عقاب بخفه وهو يضحك ولف لأخوانه اللي ميتين ضحك ع خّفتهم والثقل معاد حصل له طريق عند عيال عايض ابتسم وقال : والحين وش السواة ؟
ناصر : نروح لل..
قاطعه صراخ ابو فهد وهو يقول : امشوا العزبة لا بارك الله فييكم !!
ناصر بلع ريقه وقال : للعزبة
ضحكوا ومشوا مع ابوهم يركبون الونيت واسر ورا فالصندوق وابو فهد وعقاب وناصر فالغمارة ، ابو فهد بهدوء : وين فهد كلمكم من بعد م خذا الساحرة ؟
عقاب : مدري عنكم
ناصر هز راسه بنفي وقال : لا والله م كلمني
ابو فهد شّد ع معكازه وقال بحدة : اجل يبدّي هوى الساحرة الكافرة على خاطر ابوه ؟؟
عقاب بهدوء : يبه تعوذ من ابليس
ابو فهد نطق بحدة اثر قهره :
من فعايل بكَري معاد فالخاطر انّسه
‏ضايق ومتوسد من الضيقه لحافي !
-
عقاب شّد ع ذراع ابوه وقال : احتزم يبه والله م نخلييك !!
ناصر بحدة : وفهيد بيرجع يمكن صار له شيء
ابو فهد نزل راسه وقال : معاد ابي شوفته
وقف عقاب الونيت ونزلوا كلهم ومشى اسر ومسك عقاب وقال : وش العلم ؟
عقاب بحزن : يخوي فهد من راح م كلم ابوي ولا عطانا خبر وبكره العيد وابوي غاضب عليه
اسر ابتسم بضيق وقال : معليه بيجي ويرضى ابوك
مشى اسر واتصل عليه ووصله صوت " عزيزي المتصل ان الهاتف المطلوب مغلق.." زفر بملل ومشى لجلستهم مع عيال عمهم
فلاح ابتسم وقال : عريسسنا وش جابك ؟
تركي : ابعد التوتر شفيك انت !
ضحكوا كلهم ونطق عقاب وقال : ابد يعريسنا اطلق حجاجك بكره وحن وراك
ابو تركي ابتسم وقال : م تقصرون يعيال اخواني م تقصرون
اسر بضحك وهو رافع ثوبه : هو اخو الميلا والله ان يبشر بالخير
ارتفع صوت الضحك والشتّم من ابو فهد اللي ناقد ع اسر ولده ، جالسين حول بعضهم والنار شابّه ، ابو عبدالعزيز وعياله وابو فلاح وعياله وابو تركي وولده وابو فهد وعياله ..
" بينما في بيت ابو فهد "
جالسين كلهم فالصالة بعد م غسلوا البيت ونظفوه للعيد وخلصوا انفسهم من حنّا ونقشات ، الجود دخلت الصالة وقالت : عمة متى بيجون العيال ؟
ام فهد رفعت كتوفها بعدم معرفة وقالت : مدري عن عايض
الميلا : احسن نرتاح اليوم بعد
غزيل جلست بعد م جات من المطبخ وقالت : يحماره بينامون هنا
الميلا ضحكت وقالت : الله يحييّهم
الجود ابتسمت بربكة ومشت تجلس جنب امها ، دالين رفعت جوالها وشافت اتصال من هيثم ردت وقامت من عندهم وقالت : هلا هيثم ؟
هيثم : بنت دالين ترا عيدنا بيكون كبير واخوياء العيال بيجون وشسمه ذاك سهم خطيب ضحى بيجي واهله بعد قولي للبنات وعماتي
دالين ابتسمت من عرفت ان ضيدان بيكون موجود وقالت : خلاص تمام
هيثم : يالله يالله
سكر ومشت وقالت بحماس مفرط : بناات بيجون اخوياء عقاب العساكر و..
قاطعتها ضحى وهي تكح بقوة تغطي عليها ، الجود قامت ومسكتها وهمست بحدة : يمريضه !!
دالين عضّت شفايفها السُفلية لثواني ونطقت : نسيتت !!!
الجود ضربت راسها بخفه وقالت : الله يفشلتس
ضحى بحدة : هاتوها اعطيها قرصة تموت م تنساها !!
دالين ابتسمت بفشلة وقالت : شسوي جايب راسي
تالين ضحكت وقالت : وتعترف الخفيفه
امال : جد جد يحظ ضيدان !
دالين ابتسمت بخجل وقالت : اقول يحظ اخووي بس
ضحكوا من عرفوا انها اقصد فلاح وانه محظوظ بآمال ومن سوالف مرّ الليل كله ووصلوا العيال كلهم للبيت ..
" في غرفة اسر "
دخل ونزل شماغه ع كتفه وبقى بالطاقية والعقّال ع راسه مشى وقال : يالميلا ؟
الميلا ردت من عند الدولاب بتوتر : اصببرر لا تجي البس !
اسر ابتسم وقال : يحيّ هالصوت وحيّ طاريه والله اللي تجددت روحي !
ضحكت بهدوء وهي ترفع قميصها ، حسّت بيدينه تحاوطها وسرعان م لفها وباس كتفها ولف راسه يستنشق عطرها ، ابتسم بتخدر وقال :
العيد طيّب والله ان ميالتي اطيب من الطيّب
ريح البخور وعبق هالورد يخسون عند عطرتس !!
-
باس نحرها وضحكت بخجل وقالت : صح لسانك يواحشني
اسر ابتعد وقال : خلي عني بس والله محد وحشني كثرتس
الميلا : وشدعوة مالي حق اشتاق ؟
اسر ابتسم وقال : المشتاق يالميلا يحضن !
استوعبت مقصده وانه زعلان عشانها م ضمتّه وابتسمت بهدوء ، تقدم يحاوط خصرها ويشّدها عليه ، انتظر لكن م كان منها اي مبادرة ، عضّ شفايفه وقال بهمس وهو يصر ع اسنانه : حاوطي رقبتي يبنت !
ضحكت بسخرية وقالت : احب العب بأعصابك
اسر بعد منها بدون م يفّلت خصرها وحط جبينه ع جبينها وقال : وانا م بمسك اعصابي بمسك خصرتس
ابتسمت وتقدمت بهدوء تطبع قُبلتها ع منطوقه وارتخى وهو يبادلها ، ابعدت وابتسمت وقالت : انا م احضن انا كذا اعبر عن شوقي لك
اسر بتخدر : هو طبيعي الواحد بيجلس يتمنى تشتاقين له دايم ؟
هزت راسها بنعم ومشت تجلس ع سريره ، تقدم وسحب يدها يحتضنها من جديد ، رفعت راسها ونزل عيونه لها وتساوى بطولها وقال : اشهد بالله ان تفاصيل مقتلي مّرت ع ثغرتس قبّليني وغرقيني فيه
رفعت نفسها وسحبها ، تحسّ بيده ع خصرها يشّدها ويضغطها حاصرها وصارت بين يدينه مشتاق وبغرفته محد بيمنعه ، يبادلها وبقوة وضعف اللي هي تسويه وو..
" في غرفة ناصر "
مشى وشافها ولأول مره من بعد الهوشة والكف اللي اكله من يدينها ، ابتسم يشوف كيرلياتها والنظارة اللي تخُصه فوق راسها ، تقدم يدخل الغرفة ولف من نطقت : ع وين ؟
ناصر لف لها وقال : غرفتي ؟!
غزيل اشرت بيدها للصالة وفراشه الموجود فيها ونطقت : برا تحسب بتنام عندي ؟
ناصر انفجر يضحك وقال : غرفتي انتي اللي اذلفي برا
غزيل تقدمت وشّدت شعره تسحبه برا ، ضحك وحاوط خصرها ورفعها شايلها بين يدينه ، ركض تحت رفّسها له ودخل الغرفة وسكر الباب بالمفتاح ورماه فالظلام ، شهقت وتمسكت فيه بقوة وقالت : افتح النور !! م احب الظلام
ناصر : بتخافين دايم بس بتقربين مني كذا ؟ راضي اخوفتس كل ليلة
رفسته وضحك بخفه ونطق : اسف ي امي انتي كنت مسحور يعني مرفوع عني القلم
غزيل نطقت بحدة : م يهمني !! عقلك مسحور بس قلبك !!؟
حاوط راسها وباسه بقوة وقال : جعلني فدا لخطاتس ع الرمضى لا تزعلين مني مالي الا انتي يمال الغناة
ابتسمت هي تحب ضُعفه لها ، مشت تبتعد عنه وزَلت ونطقت : م صار شيء ي ابوي انت
ضحك وقال : طاح الحطب ؟
غزيل بحدة : انقلع جعله يطيح ع راسك ويفلقه نصيين !!
ناصر ابتسم وتقدم لها يحاوطها من وراها ويحضّنها له ، قرب وهمس لها : ودي اشوف عيالي شورتس وشهو ؟
توسعت عيونها ورفسته بكل قوتها وطار ناصر منصرع آلم وضحك بالوقت نفسه ، ابعدت كيرلياتها عن وجهها ونطقت : وحرام حرم الدم م تقرب مني !! مقرووع بأحكام الله !
ابتسم بهدوء وقال : قوية الكلمة ي غزلي
لفت من نطق باسمها بهالطريقة ، تقدم وحاصرها ع سريره وقال بحدة : تدرين من اقوى من الكلمة بعد الله سبحانه ؟
هزت راسها بنفي وهي مرعوبة ، ابتسم ع جنب وقال : ابو محسن
قطّبت حواجبها بعدم معرفة وقالت : مين..
قاطعها وهو يدخل بمعركة مع شفايفها وهو الكسبان بالحالتين لو يطلع مهزوم ولا فايز ، رفعها يحاوط برجولها خصره وو..
" فالحوش "
قام ابو فهد وقال : عقيب م انت بممسّي ؟
عقاب : الا بالله بس انتظرك تقوم ترقد
ابو فهد ابتسم وقال : سرينا يولدي
مشى ابو فهد وعقاب وراه يساعده دخله ليّن وصل باب غرفته ولف عليه وقال : الله يرضى عليك يولدي ويتمم ع تميّم واشله قبلك
ضحك عقاب بخفه وقال : امين امين وفداك تميّم وابو تميّم
سكر الباب ومشى يطلع واستوقفه صوت ضحى وراه ، لف وضحك وقال : من الحين جاييني وبتنفردون فيني
البندري ضحكت وقالت : اف اف وعقاب بيخاف ؟
ضحى تكت ع الجدار وقالت : م عندنا سالفة بس اشتقنا لك من يوم طحت م شفناك
عقاب فتح ذراعينه وقال : يالله يالله من بتسّبق لحضني
ضحكوا وطاروا يركضون ، هم تذكروا قبل سنين وقت كان يقولها اول م يرجع من دورة او مهمة ، احتضّنوه وشّد عليهم باس رؤوسهم وضحك وقال : كبروا بناتي
ضحى رفعت راسها وقالت : وكبر ابونا وبيصير ابو صدق !
البندري باست لحيته وقالت : الله لا يحرمني هالزول !!
عقاب ابتسم وقال : ولا منكم يارب تسمحون لي ؟
ضحى بعدت وقالت : ولو م سمحنا بتموتنا الجود بنت راشد !
عقاب ضحك من طاريها وقال : بكره ابي اشوف كشختكم قبل الكل بعايدكم زيين ؟
هزوا رؤوسهم بنعم ومشى عقاب بعد م دخلوا متجهة لها وشوّقه واضح وحُبه لها مفضوح وريحته الكل يقدر يشمّها ، ابتسم يشوف غرفته نورها طافي وهمس بداخله وقال " تكفين لا تنامين " مشى ودخل وسكر الباب وراه ، دخل للغرفة ولفت ترفع عيونها من جوالها ، سكرته وضحكت بوسع ثغرها ونطقت : يوااااحشني !
عقاب طيح ذراعينه وقال : أقربي لجوفي وازهلي وكثر م ودتس ي جودي تمِاديي !!
قامت تلبس السليبرز وتمشي بهدوء ، رفعت رجولها من انحنى لها وحاوطت رقبته وباست فكه وقالت : اف الحمدلله يارب !!
ضحك وحاوط خصرها وشّدها عليه وقال بصوته الرخّيم :
العيد والله شوفتتس يا أريش العين
‏ماهي بشوفة ربعنا والجماعة
والعيد فرحة منطوقتس ي صغير السن
‏عيدّي والعبي بقلوب العذاله
-
ضحكت وقالت : الله الله صح لسانك ي بطلي !
ابتسم بخبث وهو يناظر مبسمها وقال : حرام لولا الله ثم احترامي لتميّم كان لعبت لعب ووريتتس الشوق صح !!
طارت عيونها بصدمة وابعدت وهي تقول : حمدلله ان تميّم فيه ! يمنعك مني يالخبيث
تقدم ينزل ثوبه وبقى بالشورت ، مشى وانسدح وفتح ذراعه لها يشوفها ع طرف السرير بالجهة الثانية ، ابتسم وقال :
اقربي بين السوالف وشوفتتس وحضني والذراع
واضحكي ليّ ضحكتتس يالجود تبّري كل عّلة !
-
تقدمت وقالت بأبتسامة عريضة : وحضنك ولو انك عقّابي والله انه يغنيني ويرضيني ويكفيني !
سحبها وارتفع معتليها ابتسم وقال : روقي لا اقلبّها !
حاوطت رقبته وارتخى عليها سكر عيونه وحضنته ، حاوطها ودفن وجهه في نحرها وغفى ولحقته بعدها علطول ..
" صباح يوم العيد "
ريحة العطورات والعّود تتسابق بالجو ، التهاني والتبريكات والاتصالات م وقفت ، حطت اخر لمساتها سيتينق باودر وطلعت ، ابتسمت غزيل وقالت : ميلو م بغيتي !
الميلا ضحكت بتوتر وقالت : تأخرت ؟
غزيل : امشي بس بفضفض
سحبتها ومشت الميلا معها دخلوا غرفة ناصر وسكرت غزيل الباب وراها ولفت ع الميلا وعمّ الصمت ثواني معدودة وانفجروا ثنتينهم يضحكون ، الميلا فهمت من عيون غزيل اللي تأشر ع السرير وهي قامطة ونطقت تحت صراخها من الضحك ودموعها اللي تحاول م تنزلها : نففسسسي !!
غزيل توسعت عيونها بصدمة وهي تضحك وقالت : يههب ولا تسّد وييلمهم حشى !!!
الميلا : القهر اني قلت لآسر ابي وقت طويل ارتاح فيه !
غزيل عضّت اصبعها وقالت بقهر : وانا بعد القوة والهياط سدحني ولا قدرت الله يقهره مع ذا الصبح !!
انفجرت الميلا تضحك بشكل هستيري ، ابتسمت غزيل معها وقالت : امشي نطلع بس
الميلا مسحت دموعها وقالت : حسااافة الميكب
غزيل : حلوة به وبدونه
مشوا يطلعون من الغرفة وشافوا كل البنات برا فالصالة ، بدا السلام وبعده الفطور وكانت ضحى اللي تحضّره وانتهت وقالت : خلوني اروح اكشخ
ام فهد : افطري اول ! محد بجايتس الحين ترا
جلست ضحى وقالت : الله يطمنتس يمه
سمّوا وبدؤوا ياكلون وسوالف وضحك ، الجود بهمس : عطوني حليب زنجبيل
مدته امال لها وشربت منه وقالت : اووه يحظ سهم !!
ضحى كحت بقوة وهي غصّت باللقمة ، طاحوا البنات يضحكون عليها ونطقت بحدة : الله ياخذتس مو كذا !!!
الجود وهي تضحك : يحييوانه الشرهه علي !
ضحى بحدة وعيونها تغورقت بدموعها : اني داريه انها عليتس اجل وشهو !!
امال وهي مصروعة ع دالين ودالين اسوء منها ، ضحكت الميلا وقالت : بس يبنات العيال ارتفع صوتهم !
وفعلاً كان صوت عقاب من الحوش يقول : اقصروا حسّكم !!
سكتوا علطول وكملوا فطورهم وقاموا وحدة ورا الثانية يغسلون ويساعدون بعض بالمواعين ..
" عند باب المطبخ الخلفي "
ضحك ثامر وقال : جاهز يعم ؟
اسر بضحك : اعنبو غييرك ازهل
شغلّوا الطراقيع " الطراطيع او اي اسم تقولونه " ورموها فالمطبخ وانفجرت وطلع صوت البنات وصراخهم ، طاحوا ع بعض يضحكون وفّز اسر من شاف ضحى جايه بالشبشب وركض ثامر يشيلون بعض وميتين ضحك ، ناصر ضحك بصوت عالي وقال : انت يكلب !!!
اسر هز راسه بنعم ودموعه تنزل من الضحك وثامر اسوء منه ، عقاب مسح وجهه وشنبه وقال : اسيّر اعقل لا اتوطى ببطنك !
اسر كان ميت وماتوا عبدالعزيز وفلاح معه من ضحكه المرعب ، لفوا من دخل فهد وقال : سلام عليكم
نزلت عيونهم لرجله المكسور والجبّيرة عليها والمعكاز اللي بيده وفزّوا له وارتفع صوت رجال آل مقّبل يرحبون فيه ونطقوا بصوت واحد وعالي : ارررررحب !!!
ضحك فهد وقال : ابقّهم يالله
حضنه ثامر بكل قوته وقال : ارحب يالغالي ارحب يتاج راسي !
فهد حاوط ولده بكل سرعته عشان م يطيح وقال : جّودني ولا تفكني تكفى يثويمر
شّد عليه ثامر وحاوط فهد رقبة ولده ومشى بدون معكازه وقال ثامر بصوته الجهوّري : والله اني ي ابوي معكازك لا خانتك خطاويك !
صرخوا العيال وقالوا بصوت واحد : ونععم !!
ابتسم وقال : معليكم زوود
تقدم فهد وسلم ع ابوه وقال : سامحني يبوي صار علي حادث وراحت السيارة تشاليح واغراضي معها
ابو فهد ابتسم وقّطرت دمعته وقال : معذور ي فهد وانا ابوك معذور وخطاك الشر
عقاب بصوته الثقييل : عساها دافعة بلاء عنك يبو ثامر
فهد ابتسم وقال وهو يبوس راس ابوه : اميين
تقدم وسلم ع عمانه وانتهى منهم وتقدم لأخوانه اللي طاروا له الاربع من تعثر وضحك وضحكوا معه ، اسر : بالهداوة يبو سديم بالهداوة
فهد ابتسم وقال : وحشوني البنات وينهم ؟
عقاب ضحك وقال : ابد داخل روّعهم ولدك واسيّر الحمار
فهد : وابو عايض م وده يعقل
اسر : هو شوف عقّل ولدك واوعدك اعقل
فلاح ضحك وقال : انت الكبير يهطف !!
اسر : اصه اصه اني داري
ضحكوا ومشى فهد وثامر معه يدخل يسلم ع بناته وخواته وامه ، طلعوا كلهم وسّلموا عليه وتحمدوا له بالسلامة وطلع يجلس فالمجلس مع اهله ..
" فغرفة ضحى والبندري "
جالسة بين الميكب والبنات حولها ، الميلا تسوي لها المكياج بشكل ناعم وجميل وم بقى ع ضيدان وسهم واهله ومهُاب واهله الا شوي عشان يوصلون ، ابتسمت وقالت : عسسسل
ضحى : انا ؟ ادري طيب
قامت وضحكت الميلا وقالت : حلوة الثقة قومي البسي بسرعة
دالين ابتسمت ابتسامة عريضة وقالت : تالين وامي فالرياض يووه يالحماس الليلة
امال ضحكت وقالت : اوبس كنت بشارك بس فلاح دخل يسلم سيو حبيباتي
طلعت وكلهم يخزّونها تحت ضحكاتها المليانه غنج ، مشت له وقال : يمرحبااا
امال ابتسمت وقالت : وحشتني كل عام وانت بخير
حضنها وشّد عليها وهو يقول : م يوحشتس غالي وانتي بخير وعساتس من عواده
امال ابتسمت وباست خده وقالت : اوبس مره ثانية وسختك
فلاح ابتسم وقال : اووووه يحلوها من وساخة عيديها واعايدتس
امال رجعت تبوسه ولف فلاح وباست طرف مبسمه وشنبه ضحك وضحكت بخجل ووردّت ملامحها ، ابتسم وحط بيدها عيديتها وقال : امسحيه لا تفضحيني
سحبت مناديل من الطاولة وتقدمت تمسح روجها ، لفوا ع صوت دالين وراهم وهي تقول : اف اف من ايش تمسحين ؟
فلاح تنحنح وقال : كليت شوقولاطه عشان كذا
امال بقرف : الله يقرفك ايش شوقولاطه تشوكلت اسمه !
فلاح سحب المناديل وتلطم وقال : اللي هو ي امالي
مشى يطلع وضحكت دالين وقالت : يوسخه بستي اخوي ؟
امال : بعرف شيء واحد انتي ليه حشورة ؟
ضحكت دالين بصوت عالي ودخلت امال ولحقتها دالين ..
:::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، من العايدين جميعًا وعساكم من عواده ، لا تنسون النجمة انا فداكم واشوفكم ع خير ببارت جديد ✋🏻🥹 )