ليّت اللِذي خَلق العُيون السُود ... خَلق القُلوب الخَافقات حَديد

البارت الثلاثين

لفت لحصة اللي دخلت بوجهها الذابل ونطقت : فيتس شيء ؟
حصة لفت لها وقالت بقرف : وجهتس طويل تدرين ؟!
استحقرت غزيل وطلعت من المطبخ ، ضحكت بسخرية وقالت : يملَا المسرع !
صدت تكمل شغلها هي تدري وزين ان حصة حاقده من سالفة امها اللي صارت وكملت بهدوء تنتظر ضحى تجي ..
" في غرفة اسر "
فتح جواله وشاف تاريخ مهمته الجاية بتكون بعد يوم العيد ، واللي بتكون مدتها سنة وستة اشهر لأجل يترقى مقدم ، زفر بتوتر وقال بنفسه ( ماشاءالله عليك ي اسير تبي تروح سنة وترجع وبنتك كبيرة !! ) صدّ من شافها تدخل ونطق : هلا ميالتي
الميلا قطبت حواجبها وقالت : فيك شيء ؟
هز راسه بنفي وضحك بخفه وقال : لا امشي للفطور
الميلا : تمام مشينا
طلعت وطلع وراها وسكر الباب وراه ، زفر بربكة يتمنى لو كان مثل عقاب اللي يرمي نفسه رمايه ع المهمات ولا يهتم للمدة ، قلبه رقيق ويهتم لناس واجد حوله ، مشى يطلع من البيت وشاف فلاح الشخص اللي لطالما كان سبب بضحكات اسر ، ضحك وقال : فليييح !!!
فلاح ابتسم وقال : ارررحب !
اسر ركض بكل سرعته وحضن فلاح ، حاوطه وهمس : يارب م تعصب
اسر قرص اذنه ونطق : والله م تسلم اولاً وثانيًا الله يتمم ع خير يعيون اخوك
فلاح : به سوالف صارت وانت م تدري عنها
اسر ابتسم وقال : نفطر يالخوي وورانا حديث مطّول !
فلاح اشر بأصبعه ع خشمه وقال : ع ذا الخشم يبو كنوز
ابتسم يحسّ قلبه يرفرف كل م ارتبط اسمه ابّ لها ، جلسوا حول السفرة وارتفع صوت اذان المغرب يعلّن دخول وقت الافطار ونهاية صيام اول ايام رمضان المبارك ، اعتلت اصوات البسملة والادعية واهمهّا " اللهم اني لك صمّت وعلى رزقك افطَرت " ، لفت تشوف اهله كلهم بس هو له فقدة ، لدرجة ان مكانه جنب اسر فاضي ومحد جالس فيه ، صّدت بضيق زعلانه انه راح وارسلت له فيّض من الرسايل بس م لقت جواب ، بدأت تاكل وهي تحمل اسمه واسم جنينهم بدعواتها ، لفوا ع دخول احلام مع فهد اللي مبتسم ونطق : عسانا م تأخرنا ؟
حصة فزّت بفرحة ونطقت : اررحبي يميمتي !
ام فهد نزلت راسها وهمست : م كسرني الا حصة ولا احلام تاكل تراب م هزت فيني شعره !!
غالية ابتسمت بخفه وقالت : الله يعين يمه الله يعين
جلست جنب فهد وبدأ يفطر ، هو ماهو غبي ولا يستغبي يدري بعدم راحة اهله بوجودها لكن قلبه يحبها وقرر يطيع قلبه ع اهله للمرة المليون ، اسر قام بعصبية وقال : كثر الله خيركم وتقبل الله منا ومنكم !
مشى طالع ولحقه فلاح علطول ، فلاح : بدخل بصلب الموضوع
اسر : بعد الصلاة يفليييح بعدها
فلاح : سمّ
حاوط اسر ودخله تحت ذراعه ومشوا مع بعض للمسجد ، فلاح افتقد اسر مثل م تركي افتقد ناصر اللي طلعوا مع بعضهم ، تركي : نويصر به شيء جاي فالطريق ؟
ناصر انفجر يضحك وقال : يوولدد !! علوم اهلنا وش تبي بها
ضحك تركي وقال : نسأل م نسأل ؟ لا اله الا الله !!
ناصر ابتسم وقال : ع قولة اسيّيير الله يجيب الخير !
تركي : اميين يارب وعقاب متى بيجي ؟
ناصر : كلمته وقالي ع العشر الاواخر
تركي تأفف وقال : اووف ؟! الله يخارجنا وش حدّه ؟
ناصر : كأنك م تعرف عقاب يهوى المهمات ويعشق الاسلحة !
تركي ابتسم وقال : م ظنتي مثل هيامه للجود !
ناصر مشى يدخل للمسجد ولحقه تركي ، بدأت الصلاة وكل الرجال دخلوا للمسجد مثل م الحريم صفّوا فبيوتهم ، اللي انفردت فيهم ع سجادتها واللي فضّلوا الصلاة جماعة ..
" فالمعسّكر "
بعد الفطور وبعد الصلاة ، تقدّم مع ضيدان وارتفع صوته وهو يقول : اصطفّاااااف !
صفّوا جميع العساكر واطلق عليهم مهامهم جميعًا ، والكل استجاب وانطلق يسابق الثاني للمهمة ، مشى ومسك فيّلق منهم ونطق بحدة صوته : انزلوا ضغط !
احد الجنود : كم يطويل العمر ؟
عقاب : مية وعشرين !!
مشى متجاهلهم فور نزولهم ع اذرعهم ، ضيدان تقدم وقال : عقيب
لف عليه وقال : سمّ ؟
ضيدان : م تحسّ انه متأخر ؟!
عقاب قطب حواجبه وقال : وشو ؟
ضيدان بحدة : رجعتنا !! انت اللي تقرر ليه حطيتها العشر الاواخر انا م عندي اهل ومتضايق ! وانت بخير وبين اهلك وجماعتك ومع ذلك رافض ترجع قبلها فيه سبب انا م اعرفه ؟!
عقاب بجدية وبعقّده حواجب : وش حارقك طيب ؟ ع مهمتك ي عسكري
مشى ودخل مكتبه وسكر الباب وراه ، زفر ضيدان بعصبية وهو يعرف عقاب اذا نهّره بالشكل ذا ان وراه علم وكايد بعد ، نطق بصدمة : معقولة مهُاب قايله علم !!
صدّ ومشى راجع للعسكر ولمهمته بالتحديد ..
" في بيت ابو فهد "
تجمعّوا للدور الثاني من قهوة وحلى وشاهي وموالح ، لف اسر ونطق : يابه
ابو فهد لف وقال : هلا ؟
اسر : جاك واحد من صّلب ال طالب ورفضته ليه ؟
ابو فهد : كنت اشوف ان فلاح اقرب
فلاح ابتسم وقال : جعلني فداك يعم هذاني خذيت امال بنت عمتي سعاد وانسحب من السالفة كلها
ابو فهد ابتسم وقال : الله يوفقكم يعيالي الله يوفقكم
اسر ابتسم وقال : تراه بيجي الليلة وبتوافق عليه لا تفشلني مع الرجال
ابو فهد : منهو ؟
اسر : يابه جعلني فداك منهو !! سهم مغيره
ابو فهد : م يطمن الرجال م نبيه
اسر : افا ! افا ي عايض ولد مساعد !! متى قد جبت لك رجال م يطمن !؟
ابو تركي ابتسم وقال : انا موافق مع اسر
اسر : شكرًا يعم بس خلك ع جنب شوي
ناصر كح بالقهوة ونطق وهو ميت ضحك : يويلي جاتك ع جنبها يعمي
ابو تركي ضحك وقال : ترا باخذ بنتي
اسر طلعّ لسانه يحسّر بعمه وقال : من قالك انها بتختارك الحين ؟
ابو تركي ابتسم وقال : الله يخليك لها يولدي
ابو فهد بحدة : يبي للسانك قصّ !
اسر : قصّه بس وافق ع الرجال
ابو فهد : اشغلتنا ترا
اسر مسك راسه وضحك بخفه وقال : يبه تكفى ! عطيته كلمه ولا ابي اتفشل
فهد لف لأبوه وقال : وافق يبو فهد !
ابو فهد : الله يجيب الخير يولدي خله يجي وبنتمّم
صرخت من داخل وهي تسمعهم مع شباك المطبخ ، البندري بصدمة : وشو وشو !! وافقوا علييه !
ضحى بدموعها : م قلت لكم رمضان الجاي بصومه مع زوجي !!
الجود ضحكت وقالت : الله يرزقني صمّلت اسر
الميلا ابتسمت وقالت : شفتي كيف يهتم بخواته اف محظوظين فيه كلنا
غزيل انفجرت تضحك وقالت : وييلممهاا !!
لفوا ع ضحى اللي ربطّت شيلتها ع خصرها ، بدأت تتمايل بغنج وفرحة ، تحت تصفيق البنات وفرحتهم معها ، ضحكت ورفعت الشيلة وقالت : يوه استغفر الله رمضان رمضان
جاء يركض ودق الباب وهو يقول : وضييحي !!
طلعت وحضنته بكل فرحة وقالت : وافق الشيبه !!؟
اسر قبصّها ونطق : عساس م سمعت صراختس ؟
ضحكت وقالت : شسوي حبيته الله يصيبه !
اسر انفجر يضحك وقال : استغفري !!!
ضحى عضّت شفايفها لثواني ونطقت : استغفر الله
الميلا مشت وقالت : متى بيجي ؟
اسر رفع حاجبة وقال : وشدخلتس ! اسألي عني انا وبس !!
ضحى دفعته وطاح من العتبة حقّت المطبخ وقالت : اخيييه مسوي يغار !
الميلا انفجرت تضحك وقالت : خلييه يغار شكو ياربي شكو !!
اسر : جهزي نفستس بس تراه بيجي بعد التراويح
ضحى اشرت بأصبعها ع عيونها وقالت : من عيني ذي قبل ذي !
ضحك ومشى يطلع للرجال ، انضربت من غزيل اللي قالت : اعنبوتس اثقلي اثقلي !
ضحى : اييه معليتس ابشريبي !
غزيل : والله م ظنتي !!
احلام دخلت وقالت : فيه سمبوسة ؟
غزيل لفت عليها وقالت : ليه تبين تملّين كرشتتس ؟
الجود دقّتها بخفه وقالت بهمس : بس يبنت !!
غزيل : وش يحبيبتي ؟ م سويت شيء
مشت وطلعت من المطبخ وطلعوا كل البنات وراها ، دخلوا للصالة وكل الحريم جالسين ، غالية : جاتس نفس الرجال يخطب ! متأكدة م بينكم شيء ؟
ضحى تأوهت لثواني ونطقت : اااه ياااربي صبرني ! غلو انكتمي لا يسمعونتس ويحسبون صدق بيني وبينه شيء !!
غالية ضحكت وقالت : يووه ابشري ابشري
ام فهد بجدية : م يحتاج نسمع شيء واثقين فيتس ! م تجيبين العار لنا واكيد انه م شافتس بس طامع بنسبنا من اخوانتس !
ام تركي ابتسمت وقالت : وقمراء صادزة !
ضحى عضّت شفايفها السُفلية من تذكرت حضُنه لها ، صدّت منهم وبدأت تصُب قهوة للبنات ، البندري لفت بعيونها ع ام تالين اللي ماسكه تالين ودالين جنبها من دخلوا ولا نطقّوا بحرف واحد مع البنات ، تنفست بغضّب وقالت بنفسها ( وانا صادزة ماهو برجال !! احبتس وشاريتس واخرتها الثقل اعمى بصيرته ويكابر وعوه صدز ! عساه م خذاني !! ) صدّت منهم ونطقت غزيل : حبيبي وش الحراسة ذي ترا م حنّ رجال ! بنات امشوا !!
قامت تالين وهي تنتظر غزيل تتكلم لأن محد يقدر عليها ، ام تالين بحدة : بكييفي بناتي !!
ام تركي : لا اله الا الله !! وش قالت غزيل طيب ؟ خليهم البنات ويعرفون لبعضهم ! بينبسطون لا تفرقين بين بنات عم !!
ام فهد : خلاص ادحرّوا ابليس !
ام عبدالعزيز ضحكت بسخرية وقالت : وش نرجي اصلاً ؟
ام تالين بحدة : تالين !
تالين بغضّب : يالله يمه ! بجلس هنا م بروح محل
دالين ركضت من جنب امها وحضنت غزيل وامال ، غزيل ضحكت وقالت : يالبى بنتي !!
جلسوا كلهم قبّال بعضهم وسوالف واخذ وعطى وانتظار لخطبة ضحى الليلة ..
" في بيت ابو ماهر القديم "
عبير مشت وطلعت برا وفتحت المشّب وشافته نايم ، عضّت شفايفها تمنع نفسها تبكي وقالت برجفة صوتها : ماهر
فزّ من نومته ونطق : دانتي !!
عبير ميلت راسها وطاحت دموعها ع وجنتيها ونطقت : يروحي عليك انت
قام ماهر وحضّنها بكل قوته ونطق : عبير تكفين لا تبكين !
عبير ابتسمت وقالت ببكي : م ابكي حزن مزوني راحت للي ارحم مني ومنك !! م ببكي حزن !
شّد عليها وطاح ع كتفها يبكي ، يشاهق مثل م هي تشاهق تعرف ان الحمّل زاد ع ظهره وهو بكَر ابوهم ، لازم يداري كل خاطر ، تعرف وش سووا ايام العزاء وكيف كان حاله ومع ذلك م قصّر بأكرام الضيفان ، شّدت عليه وقالت : انت بخير معها ! اقّلها لا تتركها وتموت وانت حيّ ! تكفى يبعد حيّي وميتي تكفى يوخيي لا تهلك عمرك !!
ماهر ابتسم ومسح دموعه بعنّف ونطق : فات الاوان ع الكلام ذا عطيتها كلمة وجاء الزفت اليوم ووقعت ع اوراق الطلاق !
عبير بكّت زيادة وقالت : ياربي عوضّ اخوي يارب !
حضنته وابعدها وقال : خلاص يبنتي روحي لأمي وونسيها واجلسي داري خاطرها تكفين ي عبير
ابتسمت وقالت : ابشر يحبيبي واسأل الله ان يجبر قلبك ويعوضك باللي احسن ويعوضها يارب
ماهر ابتسم وقال : امين يارب امين
مشت وطلعت وجلس بهدوء ، هو كسّر جواله ولا يقدر يتواصل معها ، يعرف اكيد ان الخبر وصلها والاوراق بعد ، جاء عمه اليوم وخلّاه يوقع هو م غصبه كثر م انه هدده وماهر منهّد حيله وقع علطول وبدون اي كلمة وسكر الباب بوجه عمه ، صدّ عن الباب والنور ورجع يدفن نفسه بفراشه ..
" في بيت ابو دانه "
فتح الباب وشاف شخصين واقفين ، ابو دانه : امروّا ؟
العسكري دقّ المحامي اللي جنبه ونطق : هلا والله بيت دانه بنت ملهم ال سليمان ؟
ابو دانه هز راسه بنعم وكمل المحامي : هذي اوراق طلاق من زوجها ماهر بن طلال الفيصل ؟
ابو دانه ضحك وقال : م بغى !! اجل م تقدر تجبرني وش غيره الرخمة !!؟
المحامي : رجاءً اللي بينك وبينه م نبي نتدخل فيه بتجيب زوجته توقع ؟ ولا نمشي
ابو دانه سحب الورقة ومشى يدخل ويسكر الباب وراه ، دخل البيت ونطق بصوته العصبي : ي داانه !!
مشت تطلع من المطبخ وبيدها كاسة موية ، اخذت الحبّه وبلعتها مع الماء وتقدمت وقالت : سمّ ؟
ابو دانه بحدة : هذا اللي ازعجتينا عليه ؟ بكي وصراخ اخرتها مرسل اوراق الطلاق وموقع عليها ؟
دانه ببرود ملامحها : طيب ؟! وش المفروض اسوي ؟
ابو دانه : وقعي ولا تلعبين بأعصابي !
دانه : بس ؟
مشّت وسحبت الورقة من ابوها وشقّتها نصين قدامه ونطقت بعصبية : الرخمة ماهر م يرسل لي ويتهرب والله م اوقع طلاقي منه الا اذا شفته قدامي سامع !! ولا علي بأعرض شارب فييكم !!
مشت طالعة تحت صراخ ابوها وصدمته ، نزلت دموعها ومسحتها بعنّف ملّت من الدموع والبكاء اللي م نفع ولا جاب ولا اخذ ، وقت الافعال وبدأت ي يجي وتوقع وتتطلق منه ي تجلس ع ذمته ويحاسبه ربي ليّن يموت ..
" فمنتصف الليل في بيت ابو فهد "
سحب جواله بغضّب يتصل فيه للمرة المليار واخيرًا ردّ ونطق علطول بحدة : فشلتني وسّودت وجهي قدام ابوي وعماني !!
سهم عضّ شفايفه بربكة ونطق : اسر جدي مات !
ارتخت ملامحه وقال : عظم الله اجركم يخوي
سهم : واجرك وابشر بعد اسبوعين ان اجيكم واتعنى معي اهلي كلهم !
اسر ابتسم بخفه وقال : امسحها بوجهي..
قاطعه سهم وهو يقول : محشوووم !! لا والله محشووم ومن حقك وابسط حقوقك تهاوشني
اسر : جدك من ؟
سهم : ابو امي
اسر ابتسم بضيق وقال : الله يجبر كسرها ويربط ع قلبها خلك معها تكفى يالسهم
سهم ابتسم بحزن ونطق : الله يسمع منك وودعناكم الله سلمّ لي ع ضحى
ضحك وقال : دز امها بس !!
سكر سهم ورجع اسر للمجلس وفزّ من صرخة ابوه وهو يقول : شفت اني علمتك ان وضعه م يطمن !!
ابو تركي بحدة : اسيّير وش العلم وانا عمك !؟
اسر تنهد ونطق : يجماعة جده متوفي اليوم !
تعالت الاصوات بكلمتين " لا حول ولا قوة الا بالله ، انا لله وانا اليه راجعون " ابتسم وقال : بيجون بعد م تهدأ النفوس يابه
ابو فهد بحزن : ابد اللي ودهم
جلس اسر ينتظر رجعة عضيده ، هو مّر يومين بس عقاب فقيدة من اول ساعة ، وخصوصًا لمّا نتكلم عن اسر ، ارخى راسه ع المساند اللي ورا ظهورهم ورفع عيونه للسماء يتأمل النجوم ، لف لعبدالعزيز اللي جنبه ونطق : عزوز
عبدالعزيز لف وقال : لبيه ؟
اسر : نروح للخيول ؟
عبدالعزيز ضحك وقال : قدااام !
ركض يطلع اول نطّق وقال : اخر واحد حرمة !
طاروا العيال ورا اسر اللي يركض للإسطبل القديم ، الخيول وصلت ع المغرب من حسين واحد الخدم وطاقم الخيول كامل وصلوها ومشّوا راجعين للرياض ، صرخ من البوابات وقال : اقبلي يالخوصااااء اقبلي جعلني فدا لخطاتس !
تركي ضحك وقال : والله لا اعلم الميلا
ناصر : اف وش نظام المبزرة ذا !
تركي ابتسم وقال : شرايك بس ؟
ناصر : ليتك نايم
فلاح ابتسم وركب الادهم وباس راسه وقال : وحشتني !
اسر ضّم الخوصاء له وقال بهمس :
مافيتس من الميلا شيء من ملامحها
‏بس انتس فرس ما طالها كل خيال !
-
باس راسها بكل حب وركب وقال : نتسابق يعزييز ؟
عبدالعزيز ضحك وقال : يولد تهايط ؟
اسر : لا ! انا اتحداك !!
عبدالعزيز : بفوز..
قاطعه صوت اسر وهو يقول : بعيدة ع شواربكم !
فلاح بحدة : ابو سالم ابوه !!!
ضحكوا العيال كلهم وطلعوا يتمشون بينما الثلاثة ع خيولهم " الادهم ، الخوصاء ، الخضراء " ..
~ بعد اسبوعين بدون اي احداث بعد تأجيل خطوبة سهم من ضحى اثر ظرف وفاة عند صّلب ال طالب ~
" في بيت جديد بيت ابو ذعار "
*تعريف بسيط*
ابو ذعار ( سلطان )
له صلة فالسلك العسكري وتقاعد ع رتبة لواء
ام ذعار ( فجر )
حنونة ع عيالها وتهتم فيهم وفي زوجها ، ربة منزل والحضن الدافئ لهم كلهم
-
ذعار ( البكر )
اول ابناء سلطان وفجر ، مهندس متزوج وله من الذرية " التوأم لمى ، لمياء " عمره " ٣٦ "
افنان
زوجة ذعار وام بناته ، خلّفوا توأم اثر الوراثة فالعايلة ، حنونة ع الجميع وتشاركهم احزانهم قبل افراحهم عمرها " ٣٠ "
-
لولوة
اول بنات سلطان وفجر ، معلمة كيمياء عمرها " ٣٣ "
سهم
ثاني ابناء سلطان وفجر ، عسكري نقيب تحت الترقية ، صديق اسر الصدوق من قبل العسكرية وهم لهم تعارف ايام التدريب ، شخص حّبي واذا عشق يغرق ويعطي م وراه ودونه عمره " ٣٠ "
قوس
ثاني بنات سلطان وفجر ، محامية طلاق ، توأم سهم اللي يتشابهون بكل شيء الا الصفات ، م تحبه ولا يحبها وكل منهم يهاوش الثاني عمرها " ٣٠ "
طالب
اخر عنقود بيت سلطان وفجر ، طالب جامعي تخصص علوم حاسب عمره " ٢٤ "
-
ابو ذعار بحدة صوته : يالله يولد ابطينا ع الربع !!
قوس ميلت شفايفها لثواني ونطقت بسخرية : بتتزوج ؟ الله يكون بعونها ! انا م تحملت ببطن واحد هي شلون بتتحمل !!
سهم بحدة : يبه فكني من قوس !!
ابو ذعار ضحك بخفه ونطق : بس عاد انت وياها ! محد فرحان انه بتعرس كثري بفتكّ من المشاكل
سهم دخل وقال : يمه خلصتي ؟
ام ذعار ابتسمت ونطقت : ايه يمّي ايه مشينا
لولوة دخلت تركض وقالت بحدة : قووس !! اخذتي سلسالي صح ؟
قوس بصدمة : خير !! لا
لولوة : الا وربي شوفيه ع رقبتك !!
قوس ركضت ورا طالب ونطقت : خلاص تخسين انزله !
لولوة مشت وضربتها وقالت : تستاهلين يحيوانه !
تعبّرت ملامحها للبكي ، ضحك وقال : بتفقدين توأمك احسن !
قوس بنبرة حزن : لا مين قال !!
ذعار دخل وقال : جبت السيارة يالله ؟
ام ذعار : يالله مشينا
طلعوا كلهم ولولوة وافنان يسولفون مع بعضهم ، سهم بين ذعار وطالب ، وقوس منفردة لحالها ركبوا السيارة وانطلقوا من ديرتهم لديرة ال مقّبل ..
" في بيت ابو فهد "
الانوار ع اخر شيء والطيّب وريحة العودة واصلة اخر الديرة ، معلنّة للكل ان عايض بن مساعد ال مقّبل عنده ضيفان ، اسر ركض وقال : خلصتوا ؟
لفوا العيال له وكلهم صافين بأسلحتهم من كبيرهم فهد لصغيرهم ثامر بن فهد ، ونطقوا بصوت واحد وعالي : اييه
اسر ضحك وهو يشّد حزامه وسلاحه ونطق :
عيال عمي حزامي لا عبس وجه الليالي
‏ولا استفاق الهم و الدنيا شطيطه !
والله انّي ما التفت في ضيق بالي
لا ذكرت انّكم لي درع على وجه البسيطه !
-
اعتلّت اصواتهم ونطقّوا : حاااااي ، ابشششر بعزززك !
لفّوا من صوت الطلق الناري ، عقاب رافع سلاحه فالسماء ، مطلع راسه من شباك جيب وكالة ، فزّوا ونطقّوا : ارررححبب
ضحك وقال بصوته الجهورّي : البقى ي مرحب !!
ركضوا للسيارة الجديدة ، الواضح لهم ان عقاب قرر يتخلى عن الونيت ويجي بجيبّ وكالة جديد بقراطيسه ، ضحك اسر وقال : تكملة ابياااتي !
لفّوا له من نطق وكمل :
ياعضيدي فالحياة و راس مالي
‏لاوقفت تعيد تشكيل الخريطه
دون وجهك ما حسبت حساب غالي
والعسيره لا نصت مثلك بسيطه !!
-
عقاب نزل من الموتر وتوجه لآسر وباس راسه ونطق : صح منطوقك يالعضييد وابشر والله بالغالي نرخصه لأجل عينك ولا تهون !! والله اني وراك اضرب فيهم ولا تسمي وشّد ظهرك وحزامك فيني !
اسر ابتسم بوسع ثغره وباسوا خشوم بعض " سلام الرجال " ونطق : جيت عشان وضيحي ؟
عقاب : تخيل م اجي ! وقسم بالله ان تذبحني الجنية
ضحك اسر وقال : مشينا العرب قربّوا
ثامر ابتسم وقال : ارررحب يعم ارحب !
عقاب ابتسم وقال : البقى يبن الفهد !!
تقدم وسلم ع عمه ، بعد م سلّموا عيال عمه واخوانه ناصر وفهد عليه ، فهد : متى مشيت ؟
عقاب حكّ راسه وضحك وقال : توو مشيت وطيران للحلاق والمغسلة اللي هنا اخذ ثيابي وتكشخت عنده وجيتكم
فهد ابتسم وقال : والسلاح ؟
عقاب : افا عليك يالفهد ! فريق اول وتسأله عن سلاحه
صرخوا كلهم بصدمة وضحك عقاب بكل قوته ، ناصر بصدمة : استحااالة ترقيييت !!
عقاب ابتسم وقال : ابشركم م تشوفوني رميّت نفسي ع المهمة من عرفت ان فيها ترقية
اسر ابتسم وقال : حاااااي والله عقبالنا !
عقاب : م هي بعيدة ع شواربك يبن عايض تاصلها وتاطى عليها بعد !
تركي انفجر يضحك وقال : يهوووه شوووشت خلااص !!
عبدالعزيز : منننجدد !
غريب طلع يركض وقال : هييه خالتي قمراء تقول ان ام المعرس اتصلت وتقول وصلنا
اسر لف وشاف موكب صّلب آل طالب ، من عيال عم وقرايب وخوال وعمان وجدان ، الكل جاء وتعنى لأجل سهم ، ولو انها خطبة والملكّة بعيد مع الزواج الا انهم حضروا كلهم ولا تركوا للعذال كلمة ولا خلّوا مكان فاضي في صفوفهم ، عقاب رزّ ظهره وشّده بآسر جنبه وناصر ع ذراعه اليسار ونطق : صفّوا !
صفّوا رجال آل مقّبل تحت منظر مُهيب ، بأسلحتهم وعرضهم وهيبتهم ، من شيبانهم لأصغر ورعانهم ، هيبة ولا كلمة تعلو ع المشهد ذا ، نطق ابو فهد كبيرهم وقال : اطلقّوا ترحيبكم يرجال مساعد آل مقّبل !!
رفعوا اسلحتهم تعانق السماء فوقهم ، اطلقّوا الرصاص واعتلّت اصواتهم ترحيب وهو يقولون زامل ترحيبي في آل طالب :
يا مرحبا عد ما ينشأ المطر من مخاله
ي آل طالب مرحبا مليون اهل قبل الضيوف
‏بأسم آل مقّبل نكرم الضيف لي جاء قباله
‏فالكم في الشحم والعود الازرق يطوف !
-
نزلوا آل طالب وصفّوا ومشوا مقبلين ع بيبان ورجال آل مقّبل ، ونطقوا زاملهم وقالوا فيه :
البقى واعداد ماهل من غزر القنوف
‏يارجال مقّبل في الظماير لهم شان وقدر
‏مذكر اهل النعم من عادها جوع وخوف
‏هم هل الحد المخيف و مقابيس الظفر
-
بدأ السلام والترحيب فيهم كلهم ، سهم تقدم وسلم ع اسر السلام الحار ونطق يهمس بأذنه : حريمنا ؟
اسر ضحك وقال : ورا من الباب الخلفي
سهم ارتفع صوته وهو يقول : منا يولد !
لفوا عليه الحريم ومشّوا متجهين للحريم من الباب اللي ورا ، ضحى ضحكت وقالت : يمه جاوا يممه !
ام فهد بحدة : طيب علامتس اثقلي لا يهونون !
ضحى بسخرية : عساس هموني !؟
غزيل دقّتها بقوة وقالت : لاتفشلينا وبس !!
ام ذعار ابتسمت وقالت : سلام عليكم
ام فهد ابتسمت وقالت : وعليكم السلام ارحبوا ارحبوا
البندري وقفت جنب ضحى والمبخّرة معها ، همست قوس ونطقت : وشذا تبخّر الجو من زود الكرامة والعطى ؟!
سديم انفجرت تضحك وقالت : وجع قوس انطمي !
قوس ابتسمت بفشلة وقالت : طيب !
تقدمت لولوة وسلمت ع ضحى وهمست : انتي العروسة ؟
ضحى ابتسمت بخجل وقالت : ايه
لولوة ضحكت بوسع ثغرها وقالت : وه بسم الله عليك الرحمن الرحيم !!
افنان بأنهيار درامي : تجنن !! تبارك الله طلع الديار ذي وبيوت الطين تمسّك بنات مزايين !؟
غزيل ابعدتهم وقالت : تفضلوا داخل
مشّوا كلهم ودخلوا ، همست لضحى وقالت : مدري تسّب ولا تمدح وانتي من قوّ الخفة من الكلام معاد رديتي فشلتينا !!
ضحى ضحكت وقالت : مقدر اوقف قلبي يدق جمالهم يذبح ويمدحون فينا !!
غزيل لفّت خصلة ع اصبعها ونطقت : م فيه مثلنا لو يدورون والدليل واضح ولدهم جاء وتعنّى عشانتس ولا اخذ من بنات عمه !!
ضحى : الحيين تزيديني غرور !!
البندري بهمس حاّد : بنااات ووجع امشوا !
سكرت الباب ضحى ومشت داخل للحريم ، ام فهد ابتسمت وقالت : والله ي ام ذعار اعذرينا م حصّلنا فرصة نتقابل قبل الخطوبة !
ام ذعار توسعت عيونها مع ابتسامة ونطقت : لا بالله م حصّل الا الخير الحين نتعرف وشفيك عادي م صار شيء !
ام فهد ابتسمت وقالت : انا قمراء ام القّوم كلهم وهذول بنياتي
لفت ام فهد ع بناتها ونطقت : غالية وضحى والبندري
ام ذعار ابتسمت بفرحة وقالت : وبناخذ قمركم ضحى لنجمنا السهم !
ام فهد : الله يرفع قدرتس من طيب اصلتس ي ام ذعار
ولفت ام فهد ونطقت : وهذي احلام زوجة بكّري فهد واللي جنبها الميلا زوجة اخر عيالي اسر وبعدهم غزيل زوجة ولدي ناصر والاخيرة الجود زوجة عقاب ولدي
ام ذعار بهمس مسموع : الميلا والجود خوات ؟
ضحكوا ثنتينهم ونطقوا : ايه
ام تركي ابتسمت وقالت : وبناتي انا
ام ذعار : بسم الله علييهم يهبلون !! وغزيل قمر واحلام فيها البركة
غزيل غصّت بالقهوة تضحك بهمس ونطقت : حتى الحرمة انخرشت وقالت فيها البركة
الميلا دقّتها بقوة وقالت : ويمين عظيم اذا م سكّتي !
ام ذعار : انا فجر وهذي بنتي لولوة وقوس تؤام العريس سهم..
كحت ضحى بصدمة وقالت : هااه !!
ام ذعار انفجرت تضحك وقالت : ادري صدمة لكم بس تراها نسخة سهم بس الله يصلحهم م يتوالفون..
قوس بفشلة وبوجهها الاحمر : يمه شرايك تكبين العفش ! بيهونون والله
ام فهد ضحكت وقالت : لا يبنتي شدعوة !
لفت ام ذعار وقالت : وهذي اخر بناتي افنان زوجة بكّري ذعار وعندي اخر العنقود طالب
افنان حضّنت بناتها ونطقت : وهذول بناتي التوأم لمى ولمياء
البندري بصدمة : شكل التوأم وراثة ؟
قوس : بالضبط !
ضحى ابتسمت وقالت : الله يجيب الخير ع قولة اسر
ام ذعار ضحكت وقالت : م جينا الا بالخير وم بنطلع الا بك يالقمر !
ضحى حمّرت وجنتيها وضحكوا كل البنات عليها ، الجود قامت ومشت للمطبخ او م سمعت صوت ، البندري لفت ولحقتها وقالت : فيه شيء ؟
الجود رفعت كتوفها بعدم معرفة ونطقت : مدري سمعت احد يقول يولد
البندري : اكيد العيال
مشت وفتحت باب المطبخ وشهقت : عقاااب !!!
عقاب ابتسم وقال : هلا ؟ علامتس !
فزت وضمته بكل قوتها وقالت : يحيوان متى جيت !؟
عقاب حاوط البندري وضحك وقال : توو ليه ؟ وبعدين وراتس تسّبين ؟
البندري ابعدت ونطقت : وحشتنا والله طول رمضان وانت م جيت وابوي علمنا انك كنسلت الروحة للقصور ! وش الحقد ذا تبينا نكرف انت ولا وشو
عقاب : عشان كان فيها صيانة والعمال رايحين جايين وتعرفين اخوانتس وغيرتهم م يحتاج اقول ! وبنروح لها بعد بكره اصلاً
البندري : اخيرًا العشر الاواخر بتصير تعبّد لله بدال الكرف لعبيد الله !
ضحك بعلّو صوته ، وانطلقت ضحكته الرنانة بأذنها وفزت وركضت وفتحت الباب اللي البندري واقفة وماسكته ، شهقت وقالت : وع شوفوا من جاااء !!
عقاب رفع عيونه لها ونطق وهو يضحك : البقى يالجود البقى !
البندري ضحكت بخبث وقالت : اجل اترككم لبعض الوقت لحالكم !
مشت تدخل وتقدمت الجود وتخّصرت ونطقت : ايه برر موقفك اسمعك !
ابتسم وتقدم يضمّها لصدره ، حاوطته وهي ترجف وتقول بتكرار : كان يمديك تودعني كان يمديك !!
عقاب ابتسم وباس كتفها ونطق : انا م اواطن الموادعّ وتعرفين يبنتي وبعدين وشذا الزين الحمدلله جيت وانا ماني صايم ! هجيت منتس عشان م ينقطع صيامي من محاجر عيونتس وحفّر غمازتتس وشامة شفايفتس !
الجود ضحكت بخجل وقالت : يالله مقدر وحشتني مرره !
عقاب : م يوحشتس غالي يبنت راشد !
الجود : معاد بتروح صح ؟
هز راسه بنعم وقال : رحت فريق وجيت فريق اول تتوقعين اروح من جديد وحنّ ع مشارف العيد ؟ وكيف اعيّد وانتي كل اعيادي ؟!
حضنته من جديد ولفت تبوس فكه وخده وتضحك ، ابتسم وقال : انا م قلت لتس لعاد تنعاد ؟!
تذكرت اول مره تجرأت وباست عقاب فيها ، ضحكت وقالت : بس الحين انت راضي ولا تكذب !
عقاب : والله ؟ من كذب عليتس وقالتس اني م كنت راضي وقتها ؟!
الجود توسعت عيونها وقالت : عقاااب ؟
عقاب حاوط خصرها وشّدها عليه وقال بصوته الرخّيم : يعيون عقاب لبيه ؟
ضحكت وباست خشمه وقالت : ركزت بفكّك وخدك وتركت خشمك المحمّر ! تقول مهرج
عقاب ابتسم وقال بخبث : الله اعلم خشمي حمّر من روجتس ولا من شدّة الرغبة فيتس !!
ابعدته وقالت بحرج وخجل : امم .. بجيب مناديل امسحه
عقاب ضحك من عرف انه احرجها ونطق : م يحتاج يبنتي !
مشى ينزل الصينية اللي جاء عشانها ، ورفع راسه لها يشوفها تعضّ شفايفها ، وتجرح يدينها ، هو اول مره يركز مشى وقال : اووب يبنتي ! يدينتس !! بشووييش
الجود ابتسمت بخجل مفرط ونطقت : خلاص طيب ابعد
عقاب باس راحة كفوفها ونطق : امنتس الله معاد تسوينها !
هزت راسها بنعم وقالت : ابشر بحاول
عقاب رفع نفسه وعضّ طرف خشمها ونطق : م ابي محاولة معاد ابي اشوفها !
الجود : ابشر خلاص بس ابعد
عقاب بصوته الثقييل : يوولدد جددّوا الفناجيل والبيالات !
مشى تاركها وراه للمغاسل ، شافته يغسل وجهه وشنبه ، ضحكت وقالت : تستاهل !
نزلت تشيل الصينية ، ولفت وصرخت من غزيل اللي واقفة وراها بالضبط : وجع علامتس تصارخين !!
الجود بخرشة : الله يفجع العدو !!
غزيل : هاتي يالرفلة !
سحبت الصينية ومشت الجود وراها تساعدها ، دخلت قوس وقالت : بنات معليش وين الحمام ؟
غزيل لفت للجود اللي نطقت : الباب اللي جنب المطبخ
قوس ابتسمت ومشت تطلع ، غزيل : اذا هذي البنت التوأم الولد كيف !؟
الجود ضحكت وقالت : يووه يغزل انكتمي لا اقول لناصر
غزيل مدت لها الصينية ونطقت : ادعي رَجلتس يشيلها بس
مشت تطلع من المطبخ ولفت الجود للباب ، ودقّت الشباك بيدها ، مشى ثامر وقال : يولد اجي ؟
الجود نزلت غطاها ع وجهها ونطقت : تعال
مشى ثامر واخذ الصينية وقال : شخبارتس ؟
الجود ابتسمت وقالت : بخيير وانت ؟
ثامر وهو يلّف بيمشي : نسلم عليتس
دخلت وسكرت الباب وراها ، وثامر مشى رايح للرجال ، دخلوا والكل يعرفون سبب الزيارة لكن توجّب الكلام : مالك فالطويلة ي عايض !
ابو فهد لف لأبو ذعار من نطّق وقال : اسلم ؟
ابو ذعار : جايين نطلب كريمتكم لولدي سهم
ابو فهد ابتسم وقال : الله يجيب الخير
اسر ضحك والكل صاروا يقولون كلمته ، ابو ذعار : الليلة بنخطّب..
قاطعه ابو فهد وقال : وبنمّلك بعد !
ابو ذعار بصدمة : بس ي عايض من سلمّنا الملكة مع الزواج !!
ابو فهد : ومن سلمّنا ياخذ الرجال بنتنا من اول زيارة وتحّل له لا بغى يزورنا قبل العرس ولا بغى ياخذها لسوق الذهب لا هي تحّل له فهمت مقصدي ي ابو ذعار ؟
ابو ذعار ابتسم وقال : معك حق وابد اللي ودكم
سهم زفر براحة وقال بنفسه ( يارب لك الحمد حتى ترضى ولك الحمد عند الرضى ولك الحمد بعد الرضى !! ) لف لآسر اللي يبتسم له ورَد له الابتسامة ، عقاب قام وقال : وزعوا القهاوي يرجال !
قاموا العيال يصبّون ويوزعون ، لف لآسر وقال : الماء وينه ؟
اسر ركض للباب الخارجي وشاف العمّال وصلوا الماء من الدكان وحطّوه عند المدخل ، شال كرتونين بيّد والثالث بيّد ومشى ودخلها وحطّها عند باب المجلس ، سحب غريب الصينية ومشى عند اسر وعبّوها بعلب الموية ، ومشى يوزعها ع الطاولات قدام كل فرد فالمجلس ، كل واحد يكملّ شغل الثاني بشكل مُتقن ورهيب ..
" بعد ساعة ونص "
دخل الشيخ وضيّفوه سحب الكتاب وتكلم : مالكم فالطويلة وانا مستعجل نخّلص وخير البر عاجلة ؟!
ابو فهد ابتسم وقال : توكلنا ع الله
بدؤا مراسم توقيع عقّد القرآن ونطق ابو فهد : يالسهم زوجتك بنتي ضحى ع سنة الله ورسوله !
سهم ابتسم بتوتر وهو يحسّ قلبه بينفجر باللحظة ذي ونطق : قبلت هذا الزواج وقبلت ب ضحى زوجة لي !!
الشيخ ابتسم وقال : الله يتمّم ع خير !
وقع سهم وشالوه عيال عمه وخواله بين اذرعهم فرح ، وطاروا عيال عايض لضحى والبنات عند المدخل ينتظرون ، ضحى صرخت بفرحة وقالت : ووقعع !!!
البندري ضربتها بخفه وقالت : اص العيال جاوو !
عقاب مشى وضحك من نطق اسر جنبه : وش التجمهر ذا ترا وحدة اللي بتعرس صدز انكم مشافيييح !
الميلا : يليتك تقّلل حكي !
اسر ابتسم ومشى يركض لها ، ضحكت ودخلت للمطبخ ، لحقها داخل وشهقت قوس ورفعت شيلتها من دخل اسر ، اسر لفّ بكل قوته وشهق وركض برا وهو يقول : اخووك يعقااب !!!!
عقاب فز ونطق : احتززم !!
الميلا لفت لقوس وقالت : تتخطين حبيبي !
قوس بصدمة : تستهبلين انتي وياه ! اقّلها يقول يولد ولا اي زفت !!
الميلا توسعت عيونها وقالت : اهدا حبي !؟
خزّتها قوس وطلعت من المطبخ ، هي جات تاخذ مناديل بعد م طلعت من الحمام ، طلعت الميلا وضربت راسه بخفه ونطقت : وانت والله لعاد تنعاد !!
اسر انفجر يضحك وقال : حرام اني م لمحتها وبعدين انا ليه التفت لناس وعيونتس جماهيري ؟!
البنات بصوت واحد : اوووووهه !!!
عقاب بصدمة سحبّ عقاله وقال : وييلممها والصووت ! حرام ان يشبع ذا العقال من ظهوركم ادخلوا !
غزيل : يرجال اخلص حنّ جايين عشان ضحى !
ضحى انفجرت تضحك وقالت : سّددت لك وحدة يبو تميّم !
الجود ضحكت وقالت : تتخطى حبيبي
عقاب بحدة : ينعنبى عدوتس اخلصي يالميتة !!
ضحى وقعت وصرخوا البنات ، وفزّوا من ضرب عقاب لهم بالعقال ، هو م ضّرب كثر م هوّش به عندهم ودخلوا من الرعب ، الجود زغرطت ولحقتها تالين وامال وبعدها البنات كلهم ، عقاب سّد اذانيه ونطق : يملاّ العود صدز !
اسر ضحك وقال : خلهم يفرحون بنتنا !!
عقاب : م اصدق انها اعرست !؟
اسر : منجد مثلي !
ناصر من عند المغاسل ضحك وقال : الله يوفقها يارب
اسر ابتسم وقال : عقيب بعد العيد عندي مهمة ترقية لمقدم
عقاب : ماشاءالله تبارك الرحمن ! رحّ ولا تفكر كم مدتها سنة ؟
اسر هز راسه بنعم وقال : بس كنوزي بتجّي وانا بعيد منها !
عقاب : يرجال ترا م يعطونك المدة كاملة شّد حيلك بأول ست اشهر وخلاص الباقي يهّون
اسر : تتوسط لي !؟
عقاب ابتسم وباس راس اخوه ونطق : اتوسط لك ابشر بس زي م قلت لك احررقهم بالست اشهر الاولى !
اسر ابتسم وباس خشمه وقال : ع ذا الخشم يبو تميّم !!
ناصر : وش السالفة بيروح السلقة ذا ؟
عقاب هز راسه بنعم وكمل ناصر : شفتوا كيف الطّب راحة ؟ كان شديتّوا حيلكم مثلي شوفوني من ممرض طوارئ لدكتور طب اسرة !
عقاب : الله يوفقك يخوي م حنّ لك حسّاد !
اسر : وعقيب صادز !
مشوا للمجلس ودخلوا ع كلمة ابو ذعار وهو يقول : والشوفة الشرعية ؟
ابو فهد لف لهم ونزل فنجاله ، تمسّك بمعكازه بيدينه الثنتين ونطق : ابد ياخذ راحته وابسط حقوقه !
سهم ابتسم وقال : الحين ؟
اسر انفجر يضحك وقال : ودك الحين يالمشفوح ؟
سهم توسعت عيونه بفشلة وقال : اسرر !
ضحك اسر وتكلم عقاب : تعال يعريس
قام سهم ومشى مع عقاب واسر ، اسر بملامح مختلفة تميّل للجدية : بنتنا في امانتك وبذمتّك م يجيها شيء ولا يمسّها حزن وحنّ والله م عطيناك الله وانت قدها يبو سلطان !!
سهم ابتسم وقال : والله انها في وجهي وشنبي والله م يمسّها شيء م يرضيني اولاً ولا يرضيكم !
عقاب خبط كتفه وقال : رجال يبن سلطان رجال !
سهم : من طيب اصلك يبو تميّم !!
مشوا ودخلوا مع الباب الرئيسي للمقلط ، طلع اسر راسه وشافها جالسة ابتسم وقال : جاهزة ؟
هزت راسها بنعم وقالت بخجل : اف متوترة !
اسر انفجر يضحك وقال : اددعسس ي ضحى وقدتس تتوترين ؟!
مشى يطلع ودخل سهم وقفل الباب وراه ، تقدم وسحب يدها يوقفها ع رجولها ، وقفت بصدمة وتقدم يبوس راسها بقوة سحب يدها ولبسها الدبلة ، ابتسمت ولبسّته دبلته ، شابك يدها بيده ونطق :
خذيتك من عيون اللي يبونك مرجله وعناد
‏مثل ما ياخذ البحار .. من جوف البحر درّه !!
-
ابتسمت وقالت : قول وفعل يبن سلطان !
ابعدته وجلست تصّب له قهوة وكملت تقول : من الحين بقولك السالفة كلها عشان م تنصدم بعدين انا بنت كبرت ع يد اسر وعقاب واسلوبي الدفش منهم صح اني انثى وسنعّة ومستحيل تلقى عذروب فيني ! لكن بهينك لو تزعلني وتطيّح دمعتي !!
سهم توسعت عيونه وضحك وقال : حرام انك من ظهر رجال !
شافته ينزل حزامه وسحبت سلاحه وفرغته من الرصاص ، ابتسمت وقالت : خفت تغدر فيني
سهم تكى ع وهو يشرب فنجاله وقال : ارجعي امليّه !
بحركة سريعة من ضحى رجعت تعبّي السلاح ذخيرة وتلف عليه وتصوّبه ع راسه ، ضحكت بسخرية وقالت : ماني سهلة وانا اخت فهد !
سهم سحب سلاحه بسرعة بديهة منه ونطق : وقفي هياط يبنت عايض !
حط سلاحه بمحزمّه وكمل يقول : وش خاطرك فيه ؟
ضحى : اولاً لهجتك غريبة علي بس نتعود ثانيًا انت وش خاطرك فيه ؟
سهم ابتسم وقال : مقدر اتكلم بلهجتكم تجيّب الشلل فاللسان كلها تس وتس ! وابي حضن تسمحين ؟
وقف ومشت ضحى وحضنها سهم بكل قوته ، حاوطته وقالت : حلو ان الضعف من جهتك انت
سهم ضحك وقال : انا ساكت ومعطيك جوك كملي عاجبتني ثقتك وغرورك ترا !!
ضحى ابعدت وقالت : اشوفك بيوم الزواج ؟
سهم هز راسه بنفي وقال : يوم العيد !! من حقي اعيّد واشوفك قبال عيوني !
ضحى ضحكت ومشت تطلع من الغرفة ، فتحت الباب وتعثر اسر وانفجر يضحك عقاب عليه ، ضحى بصدمة : وش الوقاحة ذي ؟
اسر بفشلة : غريبة العروس طلعت قبل المعرس ؟
تقدم وهمس لضحى : وشفيتس هوّنتي ؟
ضحى ابعدته وقالت : الله يخلف عليك يخوي
مشت وضحك عقاب وقال : تجيب الكلام لنفسك !!
اسر حكّ راسه بفشلة وقال : ضحى ؟ تمون ع رقبتي وانت وضحكناك ! يعني يستاهل ولا ؟
سهم طلع وقال : بنتكم ذي وش !! داهيييية
عقاب : اختنا وش بتدور زلة الحين ؟ م بتحصل
اسر مشى وهمس بنفسه ( كويس عقاب نسى السالفة ) مشوا يطلعون من البيت للمجلس ، بينما فور دخول ضحى للصالة طاروا البنات كلهم يسألونها وش صار ، ضحكت وقالت : عسول والله !
قوس ضحكت بسخرية وقالت : الله يعينك ضحى ! اذا تبين شيء ولا تحتاجين مساعدة اغمزي طيب ؟
انفجرت لولوة تضحك وقالت : حرام عليك قوس والله ان سهم حلّيل !
ضحى بضحك : اي والله انه حلّيل
غزيل عضّت اصبعها وتنهدت : اااه اعنبوتس اثقلي !!!
الميلا انفجرت تضحك وقالت : غزل من اليوم تحاول فيها تثقل البنت ودعت خلاص !
امال ضحكت وقالت : منجد !! الله يرزقني صمّلة غزيل
غزيل : حسوفة وربي !
البندري ضحكت وقالت : اوكييه اسفه ادري اني صرت اخبث من اخواني بس الله اعلم وش بيصير بينتس وبين نويصر يالثقيييلة !!
غزيل طارت عيونها وقالت : ويييلمها صدز ؟!!
انهارت قوس تضحك وقالت : يمه يحلوكم سولفوا سولفوا !
الجود ابتسمت وقالت : باقي م شفتي شيء !
قوس : الحين انتوا ماخذين اخوان ؟
الجود اشرت ع نفسها وقالت : انا واختي ايه وغزيل تصير بنت عمة زوجها من الرضاعة
قوس مسكت راسها وقالت : اف صدعت !
ع منظر قوس اللطيف والصغير ، شعرها اللي يوصل تحت اذنها وغرّتها ، طبيعي تتلقى مثل هالسؤال ، امال : قوس ولا يكون فيه حرج عليتس كم عمرتس ؟
قوس ابتسمت وبانت غمازاتها ونطقت : كم تعطوني ؟
افنان ابتسمت بسخرية وقالت : لولي شوفي بدأ الغرور
الجود : للأمانه عشرين !
قوس انفجرت تضحك وقالت : اكبر منها بعشّر !
شهقوا البنات كلهم بصدمة : مستحييييل !
افنان ضحكت وقالت : نفس عمري السلقة ذي !!
كان الواضح ع افنان انها كبيرة وامّ بأختصار ، والصدمة كلها تجمعت بملامحهم من عرفوا عمر قوس ، ضحى ضحكت وقالت : منجد صدمة سهم اعطيه سبعة وثلاثين ع العّرض والهيئة !! شلون ثلاثين مدري وانتي الحين جلطتيني
قوس خبطت ع كتفها وقالت : تتخطين حياتو المهم انا صديقتك من اليوم ورايح..
سكتت لثواني ولفت للبنات كلهم وقالت : وصديقتكم برضو بس اقصد ضحى عشاني بسكن معها اذا تحتاجين نتّيم ضد سهم قولي لي ترا جوي !!
ضحى قطبت حواجبها وقالت : ويش هو ؟
امال ضحكت بصوت عالي وقالت : يويلي ي ضحى !! قصدها تصيرون فريق ضده !
قوس توسعت عيونها بصدمة وقالت : استحالة انها م فهمت
ضحى : حياتكم غير عن حياتي يقلبي اكيد م بفهم ! وبعدين اذا بنصير فريق ضده امنعيني من العنقليزي ذا
انفجرت الميلا تضحك وقالت : يالله سبحان اللي حطكم اخوان !! م يحتاج دي ان ايّ !!!
قوس ضحكت وقالت : لا يقمر م بمنعك منه بالعكس بثقفك فيه تروحين من هنا ضحى وترجعين لهم Duha !
تغير صّوتها وقت نطقت اسم ضحى بالانقليزي ، وتوسعت عيونها وهي تطالعها وقالت : يحلو اسمي !!
غزيل : حرام انها م بتثقل !!
دالين ابتسمت وقامت وهي تقول : غزولي وقفي تحاولين !
مشت بعد م حسّت بالكتمة اللي جات بدون سبب ، طلعت للحوش مع باب المطبخ الخلفي ، شافته واقف جنب عقاب والواضح انه جاي من اول بس م كان له حسّ ، شماغه ع كتفه بعشوائية ، وطاقيته وعقّاله اعتلّت راسه ، دخل يده بجيبه يسحب زقارته من البوكيت ، شغّلها وهو يراقب اصابع عقاب اللي تتمشى ع الايباد وتوريه اوراق هي تجهلها ، منظره اقّل من شديد الوسامة ! جلست وتكت ع الجدار ، بفستانها العوّدي المخملي ، وكعبها الشفاف وبقطّع الكريستال ، اساورها وشيلتها الخفيفة ع راسها ، كم تتمنى لو يشوفها هي تدري انه يحبها بس مشكلته ثقيل ، صدت ترفع عيونها للسماء تشوف نصف البدر فالسماء ، ابتسمت ابتسامة عريضة وقالت : يعني اشوفه قدامي والبدر فالسماء ناقصة يجي ويجلس جنبي ويضمني لصدره مثل ضمتّه اللي عهدتها والله راضية لو بالغلط !!
قصّدت دالين ضمتّه لها اول مره وقت انخطفت ، والمره الثانية خوفًا من الفحل لا يصدم فيها ، لفت وشافته تاكي ويتأملها ، كان واقف ودخل عقاب ولف بيدخل بس لمح جسم غريب وهيئة لطيفة بعيد منه ، لف بعيونه وحمد ربه انه لف شافها وهو كان محتاج هالشوف ، لف بعيونه حوالينه ومشى تجاهها ، فزّت برعب واقفة هي تمنت وجاها مبتغاها ليه فزّعت م تدري ، مشت علطول ورا البيت تحديدًا غرفة عقاب والجود لحقها ونطق : دالين ؟
لفت له وقالت : هلا ؟
ضيدان ابتسم وصّد علطول وقال : خلصت النظرة الاولى !!
دالين ضحكت وطاحت شيلتها ع كتوفها ، ابتسمت من لفحّها الهواء وقالت : ليه جاي طيب ؟ اصلاً استغربت وقت شفتك
ضيدان رمى زقارته ورا الحوش وقال : قلبي دّلني لداليني
مشى متجهة لها عيونه بعيونها ، توسعت عيونها وقت مسك كتوفها ونطق : بترضين فيني لو اتقدم لتس ؟ بترضين بلقيّط !
دالين طاح ثغرها بصدمة ودموعها اخذت مجراها وقالت بنبرة حزن : شلون !! شلون لقيّط واسمك ضيدان بن صالح بن حثلين شلووون !!
ضيدان وهو يطالع بدموعها : بأختصار حصلوني عند مسجد وانا صغير ورباني شيبه الله يبيح منه اسمه صالح وقالي كل السالفة واني من بني حثلين وسماني ضيدان ع اسم ولده اللي فقده وحطني ع اسمه !
دالين بكت علطول وقالت : انا راضية بس ابوي بيعقّدها !
ضيدان بجدية وهو يقرّب منها : فاللعنة ! م همني احد ولو وصلت لأسوء الظروف خطفتك منهم وتزوجنا !!
ضحكت بخفه عجّبها قربه وم تنكر وقالت : اذا ابوي بيعقّدها فأمي اسوء منه امي تتعاون مع جن وعفاريت !!
توسعت عيونه بصدمة وقت صرخت ام تالين وقالت : ووش تسوووي ببنتي !!! هذااا مييين !
كان صراخها رعب ، ركض بكل سرعته وطمّر مع السور ، م وده يجيب الرذيلة لأهل خويّه عقاب بعد السنين ذي كلها ولا وده بالرذيلة لنفسه ولها ، دالين ركضت وسدّت منطوق امها ونطقت : يمه بسم الله عليتس !! اللي معي هيثم وانخرش منتس وركض !!
ام تالين بصدمة : تستهبلين ع مييين انتي !!!
دالين عضّت شفايفها بخوف ، امها شلون عرفت انهم هنا وم جات الا بعد م جابوا طاريها وكأن فيه احد قايل لها شيء ، دالين تدري بكل الخرابيط اللي امها تسويها وشافت الكتب والطلاسم اللي بالغرفة ، وحصّلت كيسة مليانه سحر تحت مخدة ابو فلاح ، ركضت تاركه امها وراها ، الصرخة م كانت قوية ولحد سمعها اصلاً ، زفرت بضيق وقالت بنفسها ( وشلون بيقبلون فيه ! ) ضحكت من تذكرته وقت قالها " فاللعنة ! م همني احد ولو وصلت لأسوء الظروف خطفتك منهم وتزوجنا !! " دخلت وجلست بهدوء وقلبها معه ، ريحته من سوء حظها لبّقت فيها مع الدخان ، شهقت بيسان وقالت : الين تشمين ؟!
الين توسعت عيونها بصدمة وقالت : دالين تدخنين !؟!
دالين لفت لهم وقالت بحدة : قّوموا قام نقمتس انتي وياها !
فزوا الين وبيسان لجهة حصة اللي جالسة لحالها ، امال جلست بمكان خواتها ولفت لدالين وقالت : فيتس ريحة !
دالين بربكة : يخي كنت عند فلاح !
امال عضّت شفايفها السُفلية لثواني ونطقت : الله ! وينه بروح اشوفه وحشني
دالين رفعت حاجبها وقالت : يحبيبي رقمه معتس ! كلميه
صدّت للجهة الثانية وضحكت امال وفعلاً سحبت جوالها تتصل فيه ، وصلها صوته وهو يقول : ارحبي !
امال : هااي شخبارك ؟؟
فلاح ضحك وقال : بخير وانتي ؟
امال ابتسمت وقالت : ابي اشوفك اذا ممكن !
فلاح : ابد اطلعي وبجيتس
امال : تم شوفني عند باب الحريم
فلاح بصدمة : لا !! اطلعي مع الباب الخلفي !! تبين تطلعين عند الرجال صاحيية انتي
امال ابتسمت بسخرية وقالت : تبي الصدز ؟ م هموني بس تمام عشانك
فلاح ابتسم وقال : نغار طيب !
امال : وه يزينك !!
سكر فلاح ومشت امال تطلع مع الباب ، ابتسمت وقالت : حيّو !!
فلاح ابتسم وفك لطمته وفتح ذراعينه ، طلعت تمشي وضمّها له وحاوطته وقالت : م اكذب بس اشتقت !!
فلاح ابتسم وقال : اكيييد كم صار لنا ؟ بنكمل شهر !!
امال بحنّية : يالله احبك واحب حضنّك صدق محرومين !! ولا ارضى تحضّن احد بدالي !؟
فلاح : شسمه وتالين ؟ م ارضى عليها والله
امال ابتسمت وقالت : بصير لك تالين ودالين وصقر وهيثم وخالي سالم بس لا تحضّن !
فلاح ابتسم وقال : ابشري
امال : ايه عرفتوا متى زواج تركي وتالين ؟
فلاح : ليلة العيد يقول
امال ضحكت وقالت : واحنّا ؟ شرايك نسويه معهم !
فلاح ابتسم وقال : انتي زوجتي خلاص بس ان كان خاطرتس بعرس تبشرين وعرس لتس لحالتس !
امال بصدمة : اكييد ابي عرس ! بعزم صحباتي كلهم وبقّول لهم كلهم اني تزوجت رجل احلامي ..، تقريبًا !
فلاح : ماش م حبيت تقريبًا ذي !؟
امال ضحكت وحضنته وقالت : كنت احلم برجل اعمال نفس بابا وكذا بس عادي انت احلى اصلاً !!
فلاح حاوطها وقال : جعل العوض فيتس ماهو فغيرتس !
تركها ومشى وهو يقول : ودعناتس الله !
امال ابتسمت وقالت بهمس : قهر ! كنت ببوسه !!
مشت تدخل للبيت بعد م قابلت فلاح وجلست بالصالة وشافت آل طالب يطلعون بعباياتهم دليل انتهاء الخطوبة والملّكة ، نطق ابو ذعار : المهر بيجيكم كامل والذهب بعد اسبوع بينزل لكم سهم ويروح هو وحَرمه
ابو فهد ابتسم وقال : ع خير ان شاءالله !!
طلعوا كل اهل سهم وقرايبه ، نطقت قوس : هذا رقمي بورقة اذا شريتي جوال سجليه واكتبي قوس السهم !
ضحى ميّلت شفايفها ونطقت : خير ! بسميتس قوس النشبة !
ضحكت قوس وقالت : يحق لتس وم يحق لغيرتس !
ضحى ضحكت وقالت : ادعس ياللهجة !!
قوس : تشّنج لساني الله حسيبك !
مشت تطلع بعد م صرخت افنان تناديها ، دخلت ضحى وبدأ الاستديو التحليلي وابسط عوايد اهل مساعد ..
" فالرياض تحديدًا بيت ابو دانه "
ريحة المطر ورشّاته الخفيفة بنصّ رمضان ، شيء صادم لأهل الرياض اللي طالعين كلهم يلعبون ويدعّون ربهم ، بغرفتها والشباك مفتوح ، عاشقة للمطر تاكية جنّب الشباك ، ديم مسافرة لألمانيا لظرف طارئ ، ولا قدرت تطلع من البيت صح انها لعبت تحته حتى داخت فالسطح ، ونزلت اخذت دش سريع وطلعت وجلست بالروّب ، فاتحه كتابها وترسم ، دانه رسامة وتعشق الرسم ، اشتاقت لحياتها القديمة وقت تشوفه ويشوفها بدون عائق تدري ان عمه السبب بكل شيء وابوها م زاد النيران الا حطّبها ، رسمت المهرة واللطيم وماهر ، طاحت دمعتها ع الورق ومسحتها بعنّف ، قفلته وطاحت ع الوسايد العديدة ع سريرها تبكي ، تبكي بحرقة وحزن للي يصير لها ، تاره تضحك ع نفسها وتحسّ انها دلوعة وتبكي ع اشياء تدري انه بوضع اسوء منها ، وتاره تحسّ انه من حقها تبكي معاد اتصل فيها ولعاد سمعت صوته ، داخت من كثر التفكير فيه وم كان ضعف تفكيرها الا الدموع ..
" عند باب بيت ابو دانه "
نزل من سيارته ، هو مقدر يتحمل اكثر من كذا وحفزّته عبير يروح ويشوفها لو من بعيد هو بخير جنبها واكثر من بخير ، تقدم وطمّر ع السور وطلع ع البلكونة حقتها وشاف باب الشرفة مفتوح ، ابتسم بلهفة وقال : والله لو انتس موقعة ع الطلاق اني لا اضمتس !
مشى ودخل غرفتها وشافها بالروّب نايمه ، ابتسم وتقدم وضمّها له بدون اي مقدمات باس راسها ودخل معها بفراشها ، ضمّها له لفت بهدوء وفتحت عيونها بخفه ونطق :
دانتي ضميني من الدّنيا لحضنتس ؟
‏في حضنتس الدّنيا والله م تقدر تضايقن !
-
فزّت برعب وتوسعت عيونها بصدمة وقالت : شلون..
ابعدت منه وفتحت دفترها وقالت : انت مو موجود !! انا اتخييل
سحبها لحضنه وقال : انا هنا والله انا هنا
رفعت عينها له وقالت : ماهري ! حبيبي ودنيتي كلها اف انت بخييير يارب لك الحمد
بكت علطول بحضّنه وانهار ماهر بحضّنها ، حاوطت وجهه بيدينها وباست خده وحطتّ خدها ع خده ونطقت : الله يجبر بخاطرك يحبيبي الله يجبر به ويربط ع قلوبكم !
ماهر شّد عليها وقال : خليتس دايم جنبي..
فزّت من النوم ع صوت امها وهي تقول : صليتي قبل تنامين !!
طاحت تبكي وقت استوعبت ان حلمها انتهى ، ماهر م جاء ولا شافته حتى ، انبسطت ببوساتها له وحضّنه لها بس كانت مجرد ثواني معدودة ، نطقت وهي تمسح دموعها بعنّف : كم الساعة ؟
ام دانه : عشر ليه ؟
قامت واستوعبت بعد انها نامت ثلاث ساعات متتالية ، مشت للحمام وهي غرقانه بدموعها ، تحسّ ان دموعها عادلت قطرات المطر اللي نزلت ، هي غسلت روحها وقت طلعت للسطح وبكّت ودعت له ولها ، لكن رجعت للضيقة بعد الحلم ، ابتسمت وقالت : اكيد انه بخير !
:::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، شرايكم بكذبة ابريل وخبر اعتزالي بس 🤣🤣🤣! عطوها حقها يحباني ولاتنسون النجمة انا فداكم 🥹! )