ليّت اللِذي خَلق العُيون السُود ... خَلق القُلوب الخَافقات حَديد

البارت الثاني والثلاثين

" فالمستشفى سابقًا "
صحى ومسك مكتبه يسنّد نفسه عليه ، مسك راسه وخشمه اللي كان ينزف والدليل الارض وملابسه ، سحب جواله ورد ع اتصال الاسر العاشر ، ووصله صوته وهو يقول : لعنه م بغيت !!
ناصر جلس وهو يرجف ونطق : يخوي وشفيك ؟!
اسر بحدة : م فيني الا العافية عقاب طايح علينا فغرفة العمليات !!
ناصر توسعت عيونه بصدمة وقال : تقوله صادز ؟
اسر : لا بالله اكذب ! نوييييصر اعقل
ناصر : خلاص سد حلقك اكبر منك انطم
اسر : ذليتنا ترا
ناصر : وينكم بروح للبيت واجيكم
اسر : مستشفى ****..
ناصر ابتسم بخفه ونطق : جايكم
اسر : عجل
سكر المكالمة ومشى يطلع من مكتبه ، مشى بيطلع بس م يدري شلون استدرجته رجوله لمكتب الممرضات ، دخل ولفّوا سارا وشريفة ع دخوله وفزوا واقفين ، سارا وهي تمسح يدينها من الاكل : سمّ دكتور ناصر ؟
ناصر تكى وصار يتأمل شريفة من ساسها لراسها ، صدّ وطلع بدون اي كلمة ، ضحكت وقالت : جبتي راسه ؟
شريفة مسكت قلبها وقالت : يمه يحظي صدق !!!
سارا ضربتها بخفه ونطقت : يلعن القوة ي شروف !
شريفة بدأت تغتّر وبقوة ، ضحكت بصوت عالي وقالت : يارب عاد اذا فيه شيء تتم !
سارا وهي ترجع تجلس : الصراحة اعرفهم عيال عايض ابوي يعرفهم م عندهم لف ودوران علطول رقم ابوس ويخطبونس م فيه واحد ولا اثنين
شريفة بحماس : الممرضة شريفة بنت عبدالحكيم حَرم ناصر بن عايض !! واو تكفييين
-
سارا ضحكت وقالت : هو مو متزوج ؟
شريفة لفت بصدمة ونطقت : لا تكفين !!
سارا : الصدق مدري والله بس كأن طيبة شافته لابس دبلة اسأليها عاد
شريفة عضّت شفايفها السُفلية لثواني ونطقت : ايه ! شفتها انا بعد بس ان شاءالله خاتم هدية
سارا ضحكت وقالت : حلمتي واجد شكلس !
شريفة : وش محرقك خليني
كملوا شغلهم الباقي فالساعات الاخيرة من الشفت ..
" عند القصور "
داخل سيارته ، مسك قلبه وقال : يويل حالي ي شريفة !!
نزل ومشى بشبه ركض للمدخل ، دخل وطيران للغرفة حقته دخل وسكر الباب وراه ، فزت من السرير وكانت بتنطق بس الجمّها رده من قال : لا اسمع لتس حرف اص !
غزيل تكت ع السرير وقالت : خير ؟ وبعدين وشذا الدم !!
ناصر قفل اذانيه من اجتاحه الآلم ونطق : بخير م فيني شيء بس اسكتي انا فيني بلاء اذا سمعت صوتتس اموت آلم ي شريفة..
سكت من نطق اسمها زلة ، عضّ شفايفه بقهر ولف ع غزيل اللي احتدّت ملامحها ونطقت : شريفة ؟!!
ناصر بحدة : انططمميي !!!
غزيل مشت وبكل قوتها صفقته كف لفّه بمكانه عشر مرات ، نطقت بحدة : انت اللي تنطم يحيوان !! عطيتك وجه ترا م تغلط علي سااامع وييلممه تخسى انت واشنابك وانا بنت نورة وعبدالملك !!!
ناصر رفع نفسه وعيونه تطلع شرار ، خنقها ودفعها للجدار اللي كان وراه ، عكسّ الموقف وصرخ بوجهها : انطمميي انطميي صوتتس م ابي اسمعه صوتتس يفجر آلم داخل راسي ااص م تفهمييينن !!
غزيل ضحكت بسخرية وقالت : حسايف الحب ي ابوي..
سكتت وتغورقت دموعها وقالت : انت ؟ لا والله تخسى من بعد كلامك وين راح اللي يقولي مستحيل اخليتس !؟ حسايف
دفعته بكل قوتها وطلعت ، هي فهمت انه يخونها وقاعد يغطي ع فعايله بأشياء غير منطقية بالنسبة لها ابدًا ، وهو يدري انه م خان ابد لكن عيونه وعقله يخون ! ماهو قادر يسيطر ع نفسه اختفت غزيل تمامًا من عيونه ، بس موجودة وبقلبه بعد ، بس م قدر ع اللي فيه ابد وطاحوا بأسوء سحر اللي حتى لو يموت المصدر م افتكوا منه ، صحيح بالشيخ والرقية بيختفي بس وين وناصر يعاند اهله وغزيل م تدري ان اللي فيه سحر ، ارتبط بمخها انه يختفي فالدوام يخونها مع وحده اسمها شريفة وهذي السالفة براسها ..
" فالمستشفى "
دخل ناصر وهو متلطم ومشى للقسم وشاف العيال تاكين ، ابتسم فلاح وفز وقال : نويصر اقعد معهم بدالي
ناصر ابتسم وقال : وين ؟
فلاح : ضيدان
مشى يركض يطلع من المستشفى هو سمع السالفة كاملة من ضيدان واللي هي ..
" قبل ساعات طويلة "
جالس بمكتبه يتأمل صورتها ، صورة احوالها الشخصية ، ابتسم ورفع جواله وبحث عن اسمه ، يدري انه شقيقها واكبر اخوانها الاشقاء ، خجل يتصل ع فلاح ويخطبها بالصريح منه
وفضّل صقر عليه ، وصله الرد ونطق : سلام صقر..
سكت من سمعه يقول : نعم ! وشفيه !!
وانلجّم ضيدان من نطقت ام تالين وقالت : امك يكلب
وسرعان م ضحك ومشى يسجل المكالمة ، عرف ان صقر رد بالغلط والنقاش حامي بينه وبين امه ، سمع كل شيء واول م انتهى النقاش قفل علطول ، يدري بصقر وقد ايش يعشقها وم يرضى ع امه ، حتى بعد كلمته يعرفه نصاب م يقوى ابدًا ، هي اعترفت بكل شيء وبلسانها فالمكالمة المسجلة ، ضحك بأنتصار وقال : قربنا يالفاتنة قربنا !
يناديها كذا بمعنى اسمها ، اللي فعلاً هي بمقولته جسّدتها اسم ع مسمى ، دالين فاتنة وملامحها جميلة جدًا ، ضحك وعلطول رفع جواله واتصل ع فلاح ، وقاله انه يبيه ضروري ويجي هو والمحامية معه ، ضيدان م يدري انها الميلا ولا عنده خبر وجلس ينتظر فلاح ..
" نرجع للحاضر "
وصل للقصور وهو يبتسم ، معه رخصة المحاماة الخاصة بالميلا ، اسر سلّمها لفلاح وامنه عليها وفلاح قد الامانة وزود ، هي سجّلت وانقبلت علطول بعد يوم من تقديمها لأسمها ، شهاداتها قوية واسمها فالجامعة قوي ، بس اهملت نفسها وجدًا بسبب دلع ابوها والروحات للرياض والديرة ، م فكرت تكمل وشافت انها ماهي حامل وانها فرصة لها تبدأ مشوار هي تعشقه وجدًا ، دخل فلاح للقصور ومشى ودخل وقال : بنت راشد الكبيرة !
الكل قاموا واقفين فالصالة ، غزيل لفت للميلا اللي نطقت : سمّ ؟
فلاح ابتسم وقال : تخاويني ؟
الميلا توسعت عيونها بصدمة ونطق ابو فهد : وجع !!!
فلاح ضحك وقال : يالله يالمحامية الميلا بنت راشد بن مساعد آل مقّبل يالله ي حَرم الآسر !!
رفع رخصتها قدامهم كلهم ، وفزوا كلهم فرح وضحك وتباريك ، غزيل بهمس : بسرعة م فيه وقت برفع قضية خلع !!
ضحى انفجرت تضحك وقالت : برفع بعد انا ع ابوي واخواني يعنفوني ترا !!
امال ودموعها تصّب من الضحك : وانا ع فلاح يقولتس تخاويني وانا لا
الميلا كانت ميته ضحك ولا هي قادرة تسكت ، الجود بضحك : وجعااااه يمشافيح !! خلوا محاميتنا تشوف شغلها
مشت الميلا ولبست عبايتها ع جلابيتها ، نطق من وراها : يرحم والديتس بتجين كذا ؟
الميلا : ايه محد بيشوف ترا !
فلاح بحدة : دزي غيري بس والبسي افخم المجوهرات اللي جايبها اسر لتس فوق
الميلا قطبت حواجبها وقالت : مجوهرات ؟
فلاح بعجلة : ايييه يبنت الحلال جايب هدية الخفيف فوق عشانتس انقبلتي
ضحكت ومشت تطلع للغرفة ، وصلت وضحكت بعلّو صوتها وفرحتها ، باقة ورد كبيرة مختلطة بالورد الاحمر وقطع الفراولة يعرفها تعشقها ، جنبها بوكس كبير كحلي والواضح انه غالي ، مشت له وهي مبتسمة فتحته وضحكت من المجوهرات والكريستال اللي يتلألأ انعكاسه ع عيونها ودموعها ، اخذت الرسالة وقرأت اللي فيها ..
ترأست رسالته كلمة آسرتها فوق آسر الآسِر لها يقول فيها : ميالة الآسر وكل كنوزه ، يتليها باقي الرسالة
" مبروك يحبيبتي القبول ، وتبّعها بالشعر اللي عشقه وعشقته الميلا معه ،
ليِت اللذِي خَلق العيُون السُود
خَلق القُلوب الخَافقات حدِيد "
-
ضحكت بكل شعور حُب داهمها بكل لهفة وشوق له ، منزمان م جلسوا مع بعضهم ، اخرها وقت م قال لها الشعر اللي كتبه لها فالرسالة ونفّوره منها وقت نطق " اللهم اني صايييم يالله جَارك من الفتن والعيون السود !! " ضحكت ومشت تلبس الكريستال اللي توسطته رسالة ثانية انكتب فيها " يزهاتس وانتي اللي تحلينه ي ام كنوز " ابتسمت بخجل شّع نوره بملامحها ، انتهت منه وطلعت تنزل لفلاح اللي واقف جنب امال والفرق شاسع بينهم بالضبط مثل فرق الفريق اول عن حَرمه
امال بحدة : ع كيفك !! تطلبها تخاويك وانا مثلي مثل الجدار
فلاح : ي مسلمة ! محد قال انتس مثل الجدار وحشى ! م صرتي اعنبوتس انتي اللي هدّيتيني وساويتي طولي مع القاع تحتي !
امال : يقالك برضى كذا !
فلاح وهو يضَبط نسفة شماغه : والله رضيتي ولا اعرف زين شلون ارضيتس
لف ونطق من شافها جايه : يالله ي ام كنوز !
ابتسمت ومشت تطلع وراه ، امال خزّتها وقالت : ميلو انا اوريتس !
الميلا ارسلت بوسة طايره فالسماء لآمال اللي ابتسمت بخفه ومشت تدخل من خرجوا فلاح وحَرم الآسر ..
" فالمستشفى "
صحى واول م فتح عيونه داهمة آلم فظييع اثر الغرز اللي براسه ، عقاب كل شيء يهون الا آلم الرأس ، لف بعيونه وبصعوبة جدًا ، يسمع صوت تنفسه والاجهزة اللي عليه ، بغرفة كساها اللون الازرق ، يضُمه لحاف ابيض ، ونّ من الآلم المُميت بجسده الهزيل ، م هدّه طلق نار ولا هدّته حروب وقنابل ، م هدّه الا ترجيها له بآخر كلمة سمعها قبل يطيح ضحك بخفه وقال : حيّو ابو تميّم عطيتها الرد المناسب قبل تطيح !!
لف من دخل الدكتور ووراه ناصر وآسر وتركي ، الدكتور سعيد : وشحالك حضرة الفريق اول ؟
عقاب هز راسه بهدوء ونطق : نحمد الله ونشكره
سعيد : خارج من الشر
عقاب : م يجيكم
اسر تقدم وقال : خطاك الشر يالعضيد !
عقاب ابتسم بآلم وهو يحسّ براسه ينبض وان قلبه توسد راسه وترك ضلوعه ، نطق من اشتّد عليه الصداع وقال : تكفون يخواني الموت في راسي !!
الدكتور سعيد همس لناصر وقال : بالمناسبة اللي في راسه عجزنا نشوف له حل ! م ظنتي انه آلم الغرز !!
ناصر ابتسم وقال : خله علينا
اسر بحدة : تعبان ؟!
بسرعة صادمة لهم ، فزّ عقاب وضرب راسه برأس السرير وراه ، وصرخ بآلم كان متشنج وكأنه منصَرع ، صرخ الدكتور سعيد ينادي الطاقم ، وفزوا اخوانه وولد عمه تركي يمسكونه ، هم تعودوا ع المهمات ذي فالديرة ، ي كم حاوطوا البعيّر حق ابوهم ولا قدر عليهم ، تركي بصدمة : وراه ذا اقوى من البعير !
ناصر ضحك بخفه وقال : يتبن م تضحكني الحين !!
وفعلاً بتعاونهم ثبتوا عقاب اللي كان يرجف بشكل مرعب واسر يصيح ويزهم بالأطباء والطاقم كامل ..
" فالمركز "
دخل فلاح والميلا وراه ، ابتسمت بهدوء من لف عليها ونطق : بندخل عند ضيدان
الميلا توسعت عيونها وقالت : مين ضيدان ؟
فلاح : خوي عقاب ويعرف رجَلتس امشي انتي معي يبنت العم
الميلا دخلت بهدوء للمكتب وفز ضيدان واقف ونطق : ارحب يبو سالم !
فلاح ابتسم وقال : البقى ي مرحب !!
دخلت الميلا داخل وجلست بالكنب ، م لف ولا رحب فيها حتى طبعه م يكلم حريم ، وم لعّب به الا دالين ، ع صغر سنّها الا انها عصفت فيه يمين وشمال ، ابتسم وقال : العلم بترفع قضية ع عمت..
قاطعه فلاح وهو رافع حاجبة بنرفزة ونطق : تعقب !!
ضيدان ضحك ويده ع دقنه ونطق : اوووب ونعم ي ابو سالم ! بس اهجد والله لو تطير وتوقع هي عمتك زوجة ابوك وانتهى !!
فلاح : بدق وجهك هنا يبو صالح !
ضيدان : تعقب
الميلا صدعت من سوالفهم ونطقت : الحين وش جابني ؟
ضيدان لف عليها وقال : حَرم الآسر مرحبًا !
الميلا ميّلت راسها ونطقت : اهلاً !
ضيدان : محاميتنا ؟ بتحامين ع ولد عمك
الميلا : يستاهل الحميّة ولد عمي !
ضيدان ابتسم وهو يناظر بفلاح المبتسم لبنت عمه وقال : يستاهل يستاهل نبدأ ؟
فلاح : بسم الله توكلنا ع الله
برخصة المحاماة قدرت تدخل بكل قوتها بشهاداتها وعلاماتها وتفوقها دليل عشقها للمجال ذا ، بعد كلام مطول وسماعهم للمكالمة انصفقوا فلاح والميلا من الكلام ، عرفت من كلام غزيل عن الخلع ان ناصر مسحور ومسوي لها شيء ، عضّت شفايفها لثواني ونطقت بحماس كبير وقالت لهم ثغرة محد انتبه لها وضحك ضيدان وقال : تعجبني بنت عمك !
فلاح صغر عيونه ونطق : ورع !
ضيدان ضحك بصوت عالي وقال : عيديها يبنت راشد
الميلا بجدية : فيه صوت ثالث معهم وهي احلام !!
ضحك فلاح وقال : فوق م انها طارت نطيّرها بعد ؟
الميلا رجعت ظهرها ع الكنب ونطقت : عصفورين بحجر ؟
ضيدان دعى بصوته وقال : يولد سعد !
دخل عبدالكريم يركض وقال : سمّ ؟
ضيدان : جهز الفريق فيه امر القاء القبض ع ساحرة
عبدالكريم طارت عيونه بصدمة وقال : هااه ؟
ضيدان ضحك وهو يضّبط درعه وسلاحه بحزامه ، مشى وقال : فلاح خلك قريب من جوالك عشان اول م اتصل عليك ترد
فلاح : ابشر وعليكم بها !!
مشى ضيدان وصفّر بالسيب ، طلعوا ضارب وقداح وضحك وقال : شجعااان رجااال !
ضارب رفع حاجبة وقال : معليك زود يبن حثلين غيره ؟
قداح بصوته المبحوح : اكيد مداهمة ع الدعسة !!
ضحك ضيدان وضرب قداح ومسك خدوده وقال : يزينك يقداح فاااهم !
قداح فز ودفعه وقال : اعقب !!
ضحك بصوت عالي ومسك ضارب اللي كان يجهزّ وهو يشوف ضيدان يحارش قداح ، مشوا اثنينهم وركض قداح فالسيب وراهم وهو يضّبط الدرع حقه ..
" فالمستشفى "
اسر سحب ناصر ونطق بحدة : مسحور انت بعد !؟
ناصر : اعوذبالله !! لا
اسر بعصبية : والله لو تموت اني م افكك ولو اقرا عليك انا
ناصر بصدمة : اسر !! خير ان شاءالله م فيني شيء
اسر دفعه ونطق : انطم لا اسمع صوتك تحسب غزيل م دقت علي تشكي !؟
ناصر طارت عيونه بصدمة وقال بحدة : نعمم !!
اسر : نعامة ترفسك الا نعم من شريفة عند غزيل ؟ محد ياصل مواصيل بنت عبدالملك ودامها جاتني والله واحلف باللي رفع سبع ونزل سبع اني م اخليك لين اشوف وش عّلتك
ناصر ضحك بصدمة ونطق : تكلم حَرمي ؟ وتحسب بسكت لك !!
اسر : الحين صارت حَرمك !؟
ناصر مشى يتعدى اسر لكنه سحبه مع ذراعه ونطق بحدة : هي في وجهي وشنبي من شرك !! والله م تمسّها سامع
ناصر بحدة وعيونه تطلع شرار : تستهبل انت ترضى اكلم الميلا !؟
اسر ضحك بسخرية وقال : ايه ارضى لأني م افكر فيكم ي اخواني الرذيلة واعرفكم م تجيبونها لا مت محد بيحتوي الميلا الا انتوا ! عشان كذا متطمن !!
ناصر ارتخت ملامحه وكمل اسر : وعشان كذا اهجد غزيل مستوجعة منك وم حصلت احد يفهمها الا انا ولا هو غلطة ولا هي كبيرة من الكبائر انها تتصل بأخو زوجها ! حمّوها وابسط حقوقها تلجأ لي ولا لعقاب من بعد الله سبحانه
ناصر : مدري وشفيني معاد طقّتها ولا ودي اطول عندها وينتهي اللي بيننا !
اسر بسخرية : ايه بس انا اعرف وش عّلتك واعرف دواها بعد !! عقاب مطول الله حسيب اللي كان السبب وفلاح بدق عليه واسأله وش صار بينه وبين ضيدان ! بس انت سهل وخلنا نلحق نشوفك
ناصر هز راسه بنعم وقال : ابشر يبو كنوز
اسر جلس وضحك بخفه وقال :
واذا طحت يالميلا وانهد الحيل
عسى من طيحتي يجيب لي الله كنوز !
-
يقصد كنوز بنته اللي م قد جات للدنيا ولا ببطن حَرمه ، وبالوقت نفسه يقصد كنوز الارض من مال وبنين ، ابتسم وهو يشوف ناصر يغادر المستشفى مع تركي ، ع اسر دّين كبير بحق عقاب ولازم يرافقه ، وعقاب يدري بآسر ولو م بينهم دّين بيرافق معه م اهتم لنفسه ولا لأحد ثاني ، من وقت م عطوه المهدئ طاح عقاب ومرّت ساعتين من وقتها ..
" في جناح ابو فلاح "
طلعت تركض بأغراضها هي سمعت حديث الميلا وفلاح والاكيد انهم بيرفعون امر القاء القبض عليها ، رفعت جوالها ونطقت : ويينك ؟
صقر حكّ وشنبه ونطق وزيقارته بين شفايفه : برا
مشت تركض من الباب الخلفي وطلعت وشافته ، صقر جاها من اول اتصال وهو مختفي من القصور ، ركبت ورمت اغراضها ورا وقالت : والحين وش السواة ؟؟
رمى زيقارته برا ولف عليها ونطق : مدري عنتس وين تبين تروحين ؟
ام تالين برعب : صقرر !! الشرطة ذي الشررطة ! مستحيل اروح لأهلي مستحيل فلاح يعرف وينهم
صقر بهمس : نسافر انا وانتي ؟
لفت عليه وقالت : اييه وين ؟!
صقر رجع ظهره ورا ونطق بتعب : اي مكان بعيد عنهم كلهم
ام تالين مسحت ع راسه ودموعها اخذت مجراها وقالت : ايه معك والله م اخاف ولا ارتعب من شيء امش يولدي
صقر ابتسم وقال : بجيب اغراضي واجيتس
نزل صقر ومشى ركض للقصر الشرقي ، لف من نطق عمه ابو فهد وقال : ولدي يالصقر !
صقر رد علطول وقال : ارحب لبيه يعم ؟
ابو فهد تقدم وقال : احس اني تعبان ولا ودي اخوف اللي فالبيت علمت البندري وراحت تجي لي جاكيت توديني ؟
صقر ارهق نفسه بالتفكير فيها ، م طلعت من باله ثانية وحدة ، ولا هو قادر يطلعها اصلاً سكنت قلبه وبين ضلوعه محلاً لها ، مشى لعمه وقال : ابشر تبيني اساعدك ؟
ابو فهد كحّ بصعوبة ومشى ودخل ذراعه بين ذراع صقر يمشي معه ، لفوا من نطقت : يبه !!
ابو فهد ابتسم وقال : تعالي تعالي ي عنقود بيتنا تعالي
مشت ولفت عليه وتلاقت عيونهم من بعد اخر مره ونطقت بعد م ازاحت عيونها تلبس ابوها : جزاك الله خير يولد العم
صقر عضّ شفايفه من سمع صوتها قريب منه ونطق : م سوينا شيء يبنت عايض
ركبوا ابو فهد السيارة ولف صقر بعد م سكر الباب وقال : انتظري عنده شوي واجيكم
م لفت البندري ولا حتى ردت واكتفت بهَز راسها بخفيف ووقفت عند السيارة قدامه ، مشى يركض وطلع جواله يدق ع امه ونطق : يمه عمي فالسيارة الثانية بوديه للمستشفى وانتي خليتس فالسيارة م يفتشون برا ترا
ام تالين زفرت بملل وقالت : عشان البندري معه صح ؟
صقر : هاه ؟
ام تالين : انت م تجلس مع الحريم والاكيد انك م تدري البندري خطبها امس الفريق اول مهُاب !
وقفت الدنيا عند صقر ، انقبّض قلبه وصار م يسمع حوله الا دقات قلبه حتى حفيّف الرياح والشجر اختفى لثواني ونطق : متى ؟!
ام تالين : اتصلت ام مهُاب ع عمتك قمراء امس وسمعت المكالمة كاملة بيجون الليلة يمّلكون بعد !
شّد ع قبضته هو درى ان فيه شيء من برودها وتعاملها معه وكيف تغيرت عن امس ، نطق : عمي اجّلها اكيد !! شوفيه تعبان
ام تالين ضحكت بسخرية وقالت : وشدخله ؟ الحريم بيجون اول يسألون ويتعارفون
صقر زفر بقرف وقال : طيب طيب يصير خير
قفل الجوال ومشى يطلع ، فتح دولابه يجيب له كم ثوب ولبس ، رماها بشنطة من الشناط ورتبها بسرعة واخذها معه ، طلع من ممرات القصر الشرقي ، القصر بيّن عليه انه قديم جدًا واقَل حد ينقال عنه انه انبنى قبل ٧٠ سنة ! يعني ع حياة مساعد واخوانه تقريبًا ، مشى يشوف النقوّش العتيقة والاثاث الفخم ، نزل مع الدرج يركض ووصل للباب نفسه ، طلع وفتح السيارة ورمى شنطته ولف لأمه وقال : اذا م صار اللي ابيه الليلة بننطلق ولعاد نرجع لهم م حييّنا بصرف عليتس طول عمري وادور رضاتس واسامحتس ع اللي سويتيه كله !!
ام تالين ابتسمت ابتسامة عريضة وقالت : الله يطمن قلبك
سكر الباب وهو يدعي بنفسه ويكرر " امين امين.." ركب السيارة الثانية مع عمه وانطلقوا للمستشفى..
" بعد ساعة فالقصور "
دخلت وحدات الشرطة ويترأسها فريق عقاب المعروف من ضارب وقداح لضيدان ، قام ابو تركي وابو فلاح وهيثم واقفين ، مشى ضيدان لهم من ارتفع ترحيبهم به وقال : البقى جميع واستريحوا يرجال
تقدم وكمل كلامه ونطق : عندنا امر القاء القبض ع خديجة زوجة سالم بن مساعد
سكتوا بصدمة ورجع ينطق : واحلام زوجة فهد بن عايض بن مساعد !!
لفوا ع صوت الاواني اللي تساوت بالارض ، كان ثامر واقف ومصدوم مو كفاية انهم اخذوها منهم والحين بتنسجن وهم م شافوها من وقت م خذاها فهد ، ثامر بحدة : وش قلت !؟
ضيدان ابتسم وقال : دخلوا الورع ذا وجاوبوني
ابو فلاح بصدمة : زوجتي انا ؟
ضيدان ضحك بصوت عالي وقال : وشدراني ؟
ابو فلاح : موجودة داخل
ضيدان تبدلت ملامحه لجدية فورًا ونطق بجهورية صوته : كثر خيرك ! قداح انطلق
مشى قداح وفريقه وراه من ست عساكر ، سهم بحماس : وش احلى من اني اداهم بيت حَرمي !؟
قداح بحدة صوته : اصلاً ناشب فينا عند باب المركز عساس نأخذك معنا يالنشبة !
سهم ضحك وقال : اص اص بس !
دخلوا للقصر علطول وكان خالي وكل فرد فيه بغرفته مشوا يفّرون القصور كاملة ، دخل سهم للمطبخ وشافها واقفه فالظلام تشرب موية ، ابتسم وتقدم لها من عرف انها ضحى ، بوسط المداهمة قرر يتوقف عند محطتها ، حاوط خصرها وشّدها عليه وقال بصوته الرخّيم : حبيبة سهم !
فزّت برعب وطاح الكأس من يدينها ، لقطّه قبل يطيح ومسكه بيده ورجع يحطه ع الرخام وهو م ترك خصرها ، لفّها عليه وشافته وابتسمت وقالت : حمدلله انك م نسيتني ؟
سهم باس راسها بقوة وقال : نساك موتك م نسيتك !
ضحى ضحكت بخجل وقالت : وش جابك ؟ وكيف دخلت
سهم : الصدق اني طبّيت الاسوار وجيت عشان اخطفك معي تجين ؟
ضحى طاحت عينها ع اشخاص يرتدون الاسود بالضبط نفس لبس سهم ، فزّت وحضنته وقالت : فييه واحد يناظرر !!
لف سهم وصفّر وقال : كمل طريقك م فيه احد هنا !
العسكري دق تحية ونطق : ابشر حضرة المقدم !
مشى ولف سهم عليها وقال : ترقيت قبل اخوك اسر
ضحى زفرت بملل ورفعت جسدها تجلس ع الرخام ونطقت : لا تذكرني من بعد م طاح عقيب عندنا معاد شفتهم والليلة بيجون حريم يخطبون البندري
سهم تقدم وحاوط رجولها ع خصره ، لف يده ورا خصرها وشّدها عليه وقال : طيب وانتي ؟ سولفي لي عنك وحشتيني ترا
ضحى : يكثر م تقولها لي حتى من قبل احّل لك
سهم ابتسم وباس خدها قريب من مبسمها وقال : لأني احبك !
ضحى رفعت حاجبها وقالت : ايش ؟
سهم قرب اكثر ونطق :
إني احبك حبًا لا عداد لهُ 
إلّا الحجيجَ إذا قاموا ملبينا !
-
ضحكت ودفعته عنها ومشت تطلع من المطبخ ، وقف بمحله يشوفها تطلع ليّن م اختفت من انظاره وصّد وضحك وقال : الحين وضحت لها يحمار ان الضعف من عندك ! بس م اقاومها والله !!
ضحك ونزل راسه وسحب كاستها يشرب من نفس مشربها ويهواها زودٍ عن هواها ..
" بعد ساعة ونص "
طلعوا الشرطة كلهم اثر عدم وجود لا خديجة ولا احلام ، حددوا موعد ثاني يجون فيه وكان عند آل مقّبل علم بالموعد ، ركبوا سياراتهم وكانت واقفة ع سور السطح تراقبه نفس اول مره شافته بزواج اسر ، ابتسمت وابعدت تنزل لغرفتها ..
" فالمستشفى "
نزل صقر وساعد عمه عايض ينزل ، دخلوا للمستشفى وعلطول دخلوه للطوارئ ، بعد عشرين دقيقة طلع عنده خفقان اثر القهوة السوداء اللي جابتها امال قبل اربع ساعات ع اساس يحّلون بعد الفطور ويتقهوون ، ضحك بصوت عالي وقال : شفت يعم ان حاجات البنات م تناسبك ؟
ابو فهد ابتسم وقال : والله م اسلمها بنت مقرن الحّية !
ضحك صقر وقال : بسيطة وخارج من الشر نفداك
انفتحت الستارة وطّل تركي براسه وقال : صقر عمي !!
صقر ابتسم وقال : ادري اني عمك
تركي دفعه ونطق بهمس : تخسى !
لف لأبو فهد وكمل بصوت مرتفع : سلامات يعمي وش صاير ؟
ابو فهد : م صار شيء شربت القهوة السادا وجاني ذا وشسمه خفقه ؟
صقر انفجر يضحك وقال : خفقان خفقان
تركي ضحك وقال : سلامات سلامات م حصل الا الخير ان شاءالله
ابو فهد : الله الله
صقر : بيخلص المغذي واخذك يعم للبيت
ابو فهد هز راسه بنعم وقفل عيونه ، لف صقر وقال : ايه وش تسوي انت ؟
تركي : ابد باقي عشرين دقيقة ويخلص الشفت حقي واطلع
صقر : كوويس ! اجلس واخذ عمي معك مستعجل انا
تركي ابتسم وقال : دربك خضر
صقر ابتسم وتقدم وباسوا خشوم بعض " سلام الرجال " ومشى يطلع بعد م ودع تركي وركب السيارة وحرّك للقصور يلحق امه ..
" بعد اسبوع كامل تحديدًا يوم ٢٨ "
صحى بهدوء وفزّ برعب من شاف عقاب واقف فوق راسه ، عقاب بصدمة : بسم الرحمن علييك !!
اسر برعب : يخوي..
سكت لثواني وشهق وفزّ يحضن عقاب بكل قوته وقال : صحييتتت !!!
عقاب ابتسم وحاوطه بهدوء وقال : ابشرك !
اسر ابتسم وابتعد يبوس راس عقاب ونطق : الحمدلله ع سلامتك يبو تميّم وخارج من الشر نفداك !!
عقاب ابتسم وقال : م يجيك الشر يالعضييد
اسر : كم لك صاحي ؟
عقاب رفع عيونه للساعة اللي بنص الممر ونطق : كملت واحد وعشرين ساعة صاحي
اسر توسعت عيونه وقال : ابو عايض !!
عقاب ابتسم وقال : من قوّ النومة نسيت كنوز !
اسر حكّ راسه وضحك بخفه وقال : ابو كنوز العلم ويش هو انت تقوله صادز ؟
عقاب : الله الله من امس العصر وانا صاحي
اسر : اشهد بالله ان فالمستشفى نومة ماهي بصاحية يرجال !
عقاب : والدليل اني كملت اسبوع نايم !!
اسر : دخلت غيبوبة انت وخارج من الشر !
عقاب جلس وقال : استريح
جلس اسر وقال : كتبوا لك خروج ؟
عقاب هز راسه بنعم وقال : جلست اقولهم امي وابوي لحالهم فالبيت وم عندهم الا انا واسر وتخيل الصدمة
اسر كتم ضحكته وقال : يارب وش ؟
عقاب : ناصر اللي يعبي البيانات وانا م انتبهت
انفجر يضحك بصوت عالي ، لف عقاب وضربه وقال : مستشفى يالدلخ اصه !
اسر وسط انهياره وضحكاته : وش قالك !!
عقاب : حرّم علي اطلع الا بكره وبعد شوي بنخرج
لفوا من سمعوا صوته يسلم ونطق عقاب بهمس : شف العاقب
ناصر تقدم وحطّ يدينه بجيوب البالطو حقه وقال : سد حلقك بس
اسر ابتسم وقال : حيّو ابو محسن !
ناصر ابتسم من تذكر وقت طفولتهم وكيف ان كل واحد منهم تمنى اسم لعياله المستقبلين وكان ناصر يحّب اسم محسن وعقاب اختار تميّم واسر اختار عايض ، جلس القرفصاء ونطق : الله يبقي ابو عايض !
عقاب حط رجل ع رجل وقال : نويصر اعجل متى نطلع !
ناصر : الحين قوموا
اسر دخل وشال كل اغراض عقاب ومشى وطلع برا ، مشوا للسيارة وركبوا ونطق اسر : نويصر وش الحال ؟
ناصر فهمه وابتسم وقال : ابشرك طلع سحر وحمدلله انيّ ذا مداوم ع الرقية واشرب موية مقّري فيها
اسر ابتسم وقال : والشيخة ؟
ناصر : ليومك ذا م استجريت ادخل عليها اصلاً تنام عند البنات وعفشها كله هناك
عقاب : الله ! شكل به شيء كبير ؟
اسر : الله الله مشينا والله يجيب الخير
مشوا عيال عايض للقصور وقت عصّر والشمس بنص السماء قدامهم ، الجو حار جدًا فالرياض معلوم ، وعلى اخر ايام رمضان ، كلهم بجانب بعضهم ، عقاب وناصر قدام واسر الصغير وراهم متجهين للقصور بشوق كبير ..
" بعد ساعات فالظلام الحالك "
وقفوا ع جنب ونزلوا الثلاثة مع بعضهم ، بحكم قُرب السنين بينهم كانوا ثلاثتهم اسر وعقاب وناصر ملازمين بعض ، فرش الفرشة وانطلق عقاب يحّطب ، جلس اسر وركَب بالقهوة ع الدافور وشغل عليها بعد م بهّرها وخلص ، تجمعوا وشّب عقاب الضّو لهم هم ع اخر لحظة قرروا يغيرون الوجهة ويمشون للديرة ، يحسون القصور شؤم لهم وكل م راحوا لها صارت مشكلة وقرروا اقل شيء يعيّدون فالديار
عقاب ابتسم وقال : م تروقني وتشفيني بعد الله الا الشقرا وريحتها !
ناصر استنشق ريحة البُن والهيل ونطق : اشهد بالله اووووه !
ضحك اسر وقال : عاد واحشتني قعداتنا مره !!
عقاب ارتخى براسه ع فخذ ناصر اللي حاوطه علطول وقال : وحشتني وانت تنسدح ع فخذي !
عقاب ابتسم بآلم وقال : واحشتنا اشياء واجد بس من يرجع لنا ايامنا قبل ؟
اسر ابتسم وقال : الله تكفى يعقاب اقصّد واحشني قصيدك
ناصر استرجل ونطق : بغني لكم
عقاب قام وقال : اسلمم يبو محسن
ناصر ابتسم وقال :
لا ضاقت الدار بّدل دارك بغييره
البعد راحة ترا في بعض الاحوالِ
ابتسم ولفّوا ع بعضهم ونطقوا بصوت واحد :
مع خوين تبيه وم تبي غيييره
تفداك روحه قبل يفداك بالمالِ
هذا المثل م توافقني تعابيييره
لي ديرة احبها فالمر والحاااالي
-
ضحكوا ثلاثتهم مع بعضهم وتحاضنّوا بالأذرع ، عقاب ابتسم وقال : جعلني م افقد حسّكم
اسر وناصر : ولا حسّك
جلسوا يسولفون ومن مواقف فالماضي وضحك اخذهم الليل الطويل وقام اسر بعد م طفّت ضوئهم وقال : سرينا يخواني
قاموا ناصر وعقاب وركبوا الونيت ، هم نزلوا من الجيب وصّفوه مع السيارات الثانية داخل القصر وشغلوا الونيت وحركوا للديرة ..
" في بيت ابو ماهر "
دق باب الحوش وهمست لعبير : مين ؟
عبير رفعت كتوفها بعدم معرفة ومشت للباب وفتحته ودخل سابر وجهه مسّود ونطقت برعب : وشنوحك ؟
سابر : عمي عطاتس عمره
عبير شهقت ونزلت دموعها بفرحة ونطقت : يارب لك الحمد !
ماهر طلع يساعد امه وقال : شسالفة ؟
سابر : عمي ابو خالد توفى
ماهر توسعت عيونه بصدمة وقال : وش تقول انت !؟
ام ماهر : راح بخير..
قاطعها ماهر وهو يقول : راح بشّره ولا له عزاء عندي !
ام ماهر مسكت كتوفه ونطقت : اذكر الله يوليدي !!
ماهر بحدة : ونعم بالله !! بس حرام محد يخطي خطوة لبيته وانت والله لا تتحاسب ع روحتك لهم
سابر نزل راسه ونطق : رحت اجيب غريضات من الدكان وسمعت اهل الديرة يحكون
دانه بحماس : كويس خلونا نهج للرياض !
ام ماهر بحزن : واخلي مزون لحاله بقبره ؟
دانه : يعمتي اذكري الله مزون فالسماء روحها..
قاطعتها ام ماهر وهي تقول : وجسمها النحيل فالارض م يهنى لي روحوا انتوا وعيشوا حياتكم هنّية لكم وانا هنا متى م بغيتوني تعالوا
جلسوا ع الفرشة ودخلت ام ماهر للبيت ونطقت دانه : اذا م عندك مشكلة نروح نسكن فالشرقية ؟
ماهر : يصير خير
عبير : وانا وسابر نشوف لنا محل فالرياض
ماهر رفع حاجبة وقال بحدة : وامي ؟ تستهبلين !!
عبير نزلت راسها بحزن وقالت : امي رفضت وانا ابي اعيش حياتي واتزوج واشوف مستقبلي
ماهر : ي تحاولين فيها تجي معتس يا م فيه !
عبير قامت بغضب ومشت تدخل داخل ، لحقها سابر فورًا ولفت دانه ع ماهر ونطقت : عاجبك ؟
ماهر لف عليها وقال : مو عاجبن بس م بخلي اميمتي واروح
دانه زفرت بملل وقالت : اقولك نهج دام عندنا وقت وترفض
ماهر ابتسم وباس راسها بقوة وقال : بتزيين والله وبتتيسر
حطت راسها ع صدره ، هي كذبت ع اهلها انها مع ديم في ميونيخ ومحد فقدها منهم بحكم المعرفة الكبيرة بينهم وبين ديم واهلها ، غمضت عيونها بخوف وهي تدري لو بس يجي ابوها خبر انها هنا احرق حايل وولع فيه وفي اهله ..
" فالديرة "
وصلوا ع ونيت عقاب وهم يضحكون ، عقاب بضحك : يويلنا ي سواد ليلنا من ابوي !!
اسر نزل وتمغّط وقال : ااه يالبى نسايم الديرة ! نسايم اول المحبة والغلا ! نسايم الطفولة والذكريات
ناصر نزل وسكر الباب وراه وقال : ايه ؟ نعّيد هنا
عقاب : شكله والله الديرة عليها حيّا ومطر ولا الرياض حر وعجاج
ناصر ابتسم وقال : متى نعلمهم
اسر بحماس شديد : بعد م نجهز البيت بالزيّنة والبلونات
عقاب ابتسم بسخرية وقال : اتمنى انت تمزح
ناصر : انهبل الصبي
اسر عبّس بشفايفه من رفضوه وقال : عيال ! تكفون بخاطري والله
عقاب : ابو تميّم صدز !!
ناصر بحدة : ولد استرجل !
اسر : شدخل ابي افهم ؟ شدخل
صّدوا عنه ومشوا يدخلون واسر يصارخ ع رؤوسهم ..
" بعد ساعة "
ناصر ارتخى وهو يأخذ نفس عميق ، ونطق : الله ياخذ نفسك ي اسيّر !!
اسر انفجر يضحك وقال : استغفر الله تخيل تفقد اخوك الصغير
عقاب زفر بعصبية وقال : اربط الزفت ذي ي زفت !
ناصر التفت وشافهم الثلاثة بأشنابهم بين البلونات وضحك مع اسر ، عقاب فجّر احد البلونات وصرخ : ورع انت وياه !!!
ناصر نطق بين ضحكاته : يخي الحمدلله ع وجود اسر بيننا
اسر عبّس بملامحه ونطق : تووك قبيل تقول الله ياخذني ؟
ناصر فزّ وضّم اسر لحضنه ، ابتسم عقاب يناظرهم وهو يحاول يربط البلونة اللي بين يدينه الضخمة ، فزّوا له وضمّوه لهم وضحك وهو يحاوطهم تحت منظر لطيف جدًا ، اسر ابتسم وقال : وحشوني البنات وابوي وامي قبل نتزوج
عقاب : انشهد بالله اشتقت يولد !
ناصر ابتسم وقال : بس م ننكر انهم اضافه حلوة لحياتنا
اسر : يرجال م يبي لها ذي انا لو بيدي طيرتكم من حياتي وبدلت الميلا بكم
طاح يضحك من هجموا عليه وبدؤا بشتمه مره ثانية ، ضحك عقاب وقال : والحين كلها سبع اشهر واصير اب !!
ناصر : للأمانه احسني متشفق ع تميّم اكثر منك
اسر ضحك وقال : وربي نفسي !!!
عقاب : الله يتمم ع خيير الا انت ي شيخ نويصر متى ناوي ؟
ناصر حكّ شنبه وضحك بخفه وقال : غزيل جنيّة والله م تخليني اقرب صوبها
عقاب : معليه بس اخلص..
قاطعه اسر اللي نطق : منجد يخي نبي نشوفك اب !
ضحكوا كلهم واشر ناصر بأصبعه ع خشمه وقال : ع ذا الخشم !
اسر ابتسم وقال : عليه الشحم وعساه سبب صُلح بينكم
عقاب توسعت عيونه وقال : ايييوه بالضبط خله سبب تصالح
ناصر : خير خير
كملوا تزيين اخر اللمسات وكان بيت الديرة مليان بالاشياء الحلوة واللطيفة ، الإنارة تحّف الاسوار حفّ ، البلونات بكل زاوية ، كلمة عّاد عيـدكم يَ آل مقّبل تتوسّط سماء الحوش بخط يد الفريق اول عقاب ، وانتهوا من كل وتسّدحوا فالحوش هلكانين بعد م ارسلوا للجماعة بالقصور انهم سبقوهم والعيد فالديرة ..
::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ، ادري قلت لكم لليلة العيد بس تعرفوني يلقبوني بعديمة الارادة 🤣 ، عطوها حقها يحباااااني ولا تنسون النجمة 🤍)