ليّت اللِذي خَلق العُيون السُود ... خَلق القُلوب الخَافقات حَديد

البارت الثامن

مشت وانسدحت واجبرت نفسها تنام وفعلاً غطت بنومها وعقاب ابتسم اول م اختفى حسها ودخل بهدوء ومشى وسكر الباب وفرش فراشه فالارض ودخل فيه ونام علطول ..
" الساعة ثلاثة الفجر "
صحت الجود تبي الحمام ولفت جنبها وشافت جوال عقاب وحسبت انه نزله وهو طالع وفتحته وشافت الساعة وقالت بصوت هامس : اخ الساعة ثلاث والجوع الف !
مشت متجهة للحمام لكن تعثرت بعقاب اللي نايم عند المدخل عشان يحس فيها اذا طلعت ويحس بأي شخص يدخل وهو ماهو مرتاح لغامد وفز عقاب وصرخت الجود مثل عوايدها وقلبها واعتلاها وسد منطوقها بيده وقال : انتتيي م بتعقلييين صح !!
الجود كان قلبها يدق بقوة وقالت بخوف : ووش جااابك هنا
عقاب قرب وجهه وقال : لاتسوين مصدومة انا انام ع الارض
الجود : عقااب ! ع الارض مو عند المدخل طيرت عقلي !
عقاب ابتسم وقال : وش اللي مصحيتس ؟
الجود بخجل من قرب عقاب قالت : طيب ممكن تبعد
عقاب استوعب ع نفسه وكان كل جزء من جسمه ملتحم بجسمها وكانوا قريبين من بعضهم بشكل مرعب فز وقام وهو يتنحنح ضحكت الجود بنفسها وقالت : تكفى عقاب خلنا نطلب اكل
عقاب لف لها وهو يمسح وجهه وشنبه من الخجل وقال : وش يعني تطلبين اكل ؟
الجود : يعني نطلب من المطاعم اللي بالرياض بيتزا او برجر
عقاب توسعت عيونه وقال بحدة : اهجدي بس م معتس المطبخ وموجود جوعانة ؟ انقلعي سوي لتس زادن تاكلينه
الجود عبست ورفست جنبه وقالت : يكررهي
عقاب توسعت عيونه وقال بحدة : اذا انتي قد الحركة وقفي
الجود لفت وهي تدلع بلسانها تحسّره وشافته يقوم وكان عقاب عملاااااق بالنسبة لها فزت وركضت وفتحت الباب وكان عقاب سابقها بعشر خطوات ومسكر الباب بالمفتاح ضحك وقال : تدورين لذا ؟
ورفع المفتاح بيده وركضت الجود له وقالت : خير بتحبسني بعد ؟
عقاب تذكر كيف كان يذّل اخوانه وقال : سهلة بوسيني واعطيتس المفتاح
الجود توسعت عيونها وقالت بصدمة : ابوسك !!!!
عقاب استوعب وكح علطول من الفشلة وقال : لا لا اقصد راسي والله ولا يدي اسويها مع اخواني وخواتي دايم
الجود تفشلت وقالت : م كنت اقصد شيء ثاني اصلا !
مشت بهدوء ودخلت الحمام وسكرت الباب وغسلت وجهها اللي كان يحترق من الخجل وقالت بنفسها ( يمه صدق قلبي شفيه يدق كذا !! يويلتس يجود اذا حبيته يويلتس ! ) خلصت حاجتها وطلعت بعد م غسلت يدينها وفتحت الباب وكان عقاب فاتح لها الباب ضحكت وطلعت واستوقفتها يده اللي سحبتها داخل وسكر الباب وحشرها بين جسمه والباب وقال بحدة : خيير طالعة كذا ناسية ان اخواني موجودين ؟!
الجود ابتسمت وقالت : ابشر الان
وسحبت شماغه من على الدولاب اللي جنب الباب وتلطمت فيه وقالت : شرايك ؟
عقاب رفع حاجبة وقال : وجسمتس ؟
الجود نزلت بنظرها لجسمها وتخصرت وقالت : وشفيه ؟
عقاب مشى داخل الغرفة وسحب جلال الصلاة حقها اللي كساه اللون الاسود وكان منقط باللون الاحمر وحطه ع راسها وقال : يالله امشي
الجود : تجي معي ؟
عقاب هز راسه بنفي وقال : ماني جوعان اذا جيتي لاتصحيني بنام شوي قبل يفجر ابوي فينا لصلاة الفجر
الجود عبست وهي تخاف فالليل لكن م كانت تبي توضح له وقالت : عقاب تعال معي
عقاب انسدح وغطى راسه بالبطانية حقته ورفست الجود برجلها الارض وقالت : كرييه
طلعت برا القسم حقهم وكان الجود بااارد فالليل ضحكت وهي تشم ريحة عقاب بالشماغ حقه ومشت للباب الخلفي للبيت وفتحته وكان مسكر ومشت لباب المطبخ وكان مردود دخلت منه وفتحت الثلاجة وصارت تلف بنظرها تدور شيء مقبول وم يحتاج طبخ وفزت اول م سمعت صوت عمها يقول : من انت يذا السلووقي !!
الجود صرخت بأعلى صوتها وقال ابو فهد بحدة : ووججعع
الجود طاحت وصدرها يرتفع وينزل من الخوف وبالجهة الثانية فز عقاب اول م سمع صوتها وركض بكل سرعته ودخل مع الباب وشاف ابوه واقف والجود دموعها بعيونها انفجر يضحك وقال : والله يبه انها ع ذا الحال من يوم خذيتها
ابو فهد : جود عسى مهنا خلاف !! صوتتس يبنتي لعاد اسمعه
الجود بحدة ودموعها اخذت مجراها : حراام علييكم بتجيني جلطة منكم لعاد تخوفوني !!
ابو فهد : وانت وش مصحيك ؟
عقاب : سمعت صوتها وجيت
ابو فهد بعصبية ضرب بعصاه ع الارض وقال : لعاد اسمع حستس بذا الوقت !
الجود بحزن : يعمي جوعانة والله
ابو فهد بحدة : جووع جدي ان شاءالله العشاء عاده في بطني م راح وانتي تقولين جوعانة قومي لغرفتتس بسرعة !
ام فهد دخلت وقالت : خير وش صاير ؟
الجود كانت كارهه عمها وصدمها بتعامله وعرفت انه م يفرق بين احد وانه كذا معهم كلهم قفلت الثلاجة بعنف وقالت : ولا شيء يعمتي انتي وعمي روحوا ناموا جيت اشرب موية بس
عقاب غطى منطوقه ع امل انه م يضحك لكن لفت الجود له وقالت بحدة وهي تهمس : وانت والله م اخليك !!
عقاب تبدلت ملامحه لجدية وقال : وش بتسوين يالنتفه ؟
الجود شربت موية وطلعت من جنبه ودعست طرف رجله وركضت لقسمهم وقفلت ع عقاب وهي تضحك بأنتصار وجاء ودق الباب وقال بهمس : جود وربي لا اتوطى ببطنتس افتحي يحماره ابوي لا يسمع انتس طاردتني بطييح من عينه !!
الجود وهي ميتة ضحك قالت : القم هذا اللي يصير لك اذا م فزعت لزوجتك
عقاب ضحك بسخرية وقال : عساس ماخذتس عن حب عشان افزع لتس
الجود بقرف : يع لعاد تفزع واذلف للمقلط مع اخوانك
مشت وبعد مدة طويلة طفش عقاب من الدق ومشى للمقلط وفتحه وانسدح جنب اخوانه وفز اسر منه وقال : عقاب ؟؟
عقاب ابتسم وقال : خير ؟
اسر فرك عيونه وقال : وشجابك ؟!
عقاب : انطردت
اسر انفجر يضحك بصوت عالي صحى ناصر منه وقال : بسم الله اللهم سكنهم مساكنهم !!
عقاب ضرب اسر بقبضته ع راسه وفز اسر الم منها وقال عقاب : تستاهل انطم جعلك الوجع !!
ناصر ابتسم وقال : سوسو وش اللي صار ؟
اسر بحدة من الالم : جعلك العود وش سوسو والزفت ذا مطرود من النتفه ذيك وجاي يرقد عندنا
ناصر كان يشرب مويته اللي جنب راسه وغص وطرطش بالماء ع عقاب وعلى طرف ثوب اسر بحكم انه واقف وانفجروا الثلاثة يضحكون وقال اسر : يويلي اذن !!
عقاب : وخير يطير ؟ امشوا نتوضئ ونلحق الاقامة
قاموا ثلاثتهم واسر وناصر ماسكين عقاب طقطقة من اول م طلعوا من المقلط ليين م وصلوا للمسجد وهم م سكتوا وقابلوا فلاح وانفجر يضحك اسر وقال : فليييح تعال
فلاح تقدم من عند صقر وهيثم وابوه وقال : صباح الخير شفيكم تضحكون كأنكم سكارى !
ناصر همس في اذنه وقال : عقاب الجود طردته من غرفته وجاء يرقد معنا
فلاح بصدمة والضحكة شوي وتطلع قال : لااااا عاااد !! عقاااب بهيبته ؟
عقاب : خير حسستني اني ملك منزل !؟
اسر بضحك : الله يعز الملائكة عنك يالمطرود يعديم الهيبة
انفجروا الثلاثة يضحكون ع عقاب وكان صقر معهم ويضحك بهدوء عكس هيثم اللي دخل للمسجد وانصعقوا اسر وناصر وفلاح وصقر من ابو فهد اول م جلدهم بعصاه وعقاب كتم ضحكته وقال : احسسسسن
دخلوا وهم يعرجون من الالم واللي ماسك راسه واللي كتفه وكلهم متوجعين ومختلفه اماكن اصاباتهم وصلوا وخلصوا وطلعوا ومن سوء حظ غامد طلع بوجهه عقاب اللي علطول تولدت الحرارة نفسها فيه وهو يتذكر نظرات غامد للجود وفز علطول وسدد له لكمة يحلف انه كسر فكه وفزوا الرجال كلهم وركض حامد يفزع لأخوه ورفس عقاب في بطنه ولكن كانت هذي اكبر غلطة سواها حامد لأنه طاح بين يدين احفاد مساعد اللي نهشوه كلهم من صقر وهيثم وفلاح واسر وناصر وعقاب ع راسهم ومحد قدر يوقفهم كان عقاب طايح ضرب في غامد وكل شوي يتولد داخله جحيم ويتذكر صوتها وتمايلها تحت نظارته المحرمة لها وفزعوا عيال ابو سلطان مع عيال ابو الهنوف وفعلاً صارت مضاربة مرعبة انقطع فيها ثوب عقاب وخشمه ينزف ويده متقطعة اثر مخوش غامد واسر بالجهة الثانية يحلف انه م يحس بشفايفه اللي انضرب فيها وكانت تسيل دم والاسوء فالباقين وم وقفوا حتى شافوهم يركضون كلهم وم وقف قدامهم الا سلطان واخوانه العشرة
سلطان وهو يضحك بأستفزاز : هجدتوا ؟
اسر تقدم وضرب براسه خشم سلطان وقال : والله انك تعقب !
عقاب سحب اسر وراه وهو فاتح عين ومقفل عين اثر الالم الفضيع اللي اجتاح راسه وقال بحدة : فزاع بتأخذ اخوك الكبير وبتذلفون من قدامي ولا شلون !؟
فزاع مسك ذراع سلطان وفعلاً مشوا واختفوا وتقدم ابو فهد يضحك وقال : اشهد بالله اني جبت رجال
كل احفاد مساعد قالوا بصوت واحد : اححتتززمم ، شدد حززاامك
ابو فهد ابتسم وقال : امشوا نلحق الفطور لكن لا اشوف احد جالس معي وهو بالشكل ذا اغتسلوا وتعالوا
مسك ابو فهد ذراع ابو فلاح وقال : سالم امش
ابو فلاح ابتسم وقال : حيي والله عييينكم
مشوا الاباء ولفوا العيال لبعض وانفجروا يضحكون كانوا مشوهين وكل ملابسهم دم وتراب ابتسم اسر وقال : احد اصابته بليغة ؟
هيثم بألم : انا اظن انهم طعنوني بقلم
عقاب تقدم وشق ثوبه من عند ذراعه وفعلاً كان منطعن لكن ماهو الجرح العميق ابتسم عقاب وقال : معلييك يبطل م فيه شيء خل امك تعقمه وتعال للفطور
هيثم مسك ذراع صقر ومشى معه وفلاح لحقهم بمدة وعيال عايض مشوا لبيتهم وقابلوا فهد اللي رمى شماغه وقال : احتتزموواا !!
عقاب ابتسم وقال : م تقصر يبو ثامر لكن شقييناهم وجينا
فهد مسك ناصر وقال : من من ؟
ناصر بألم : عيال الكلب ابو سلطان وابو الهنوف
فهد : جاكم شيء ؟
اسر : لا يبن الحلال
فهد زفر براحة وقال : يعيال تكفون انتبهوا والحين غسلوا وتعالوا
اسر وناصر مشوا داخل بيتهم عكس عقاب اللي مشى من ورا البيت رايح لقسمه ووصل وقال : لا عاد للحين متسكرة !
مشى ووصل قدام البيت ومسكه وانفتح ابتسم ودخل ع خروج الجود من الحمام بمنشفتها صرخت ورمت الكريم عليه وقالت برعب : عقااااب اعنببوكك م تعررف تدقق الباااب ولا تتنحنح !!!
عقاب سكر الباب عشان محد يسمع صوتها وقال : وانتي م تعرفين تسدين حلقتس ومعاد تصارخين ؟
الجود استوعبت شكلها ودخلت للحمام ركض وقالت : وجع صدق وجع
عقاب دخل للغرفة وطلع بدلته وخذا منشفته ومشى للحمام وقال : بغمض معليتس ماني مييت ع جسمتس اطلعي وراي فطور ودوام
الجود بحدة : كلتبن محد قالك تموت عليه واصلاً لبست
طلعت الجود ببجامة قطنية بيضاء وعليها ارانب صغيرة وشعرها المبلول انسدل ع ظهرها وشوي ع وجهها توسعت عيونها وقالت بخوف : عقاااب شفيييك ؟!!
عقاب : صباح الخير ؟
مشى واستوقفته يدها الصغيرة اللي تمسكت بذراعه وقالت برعب : يويل قلبي من اللي مسوي فيك كذا !
عقاب نزل لها وتساوى بطولها وقال : بسم الله ع قليبتس من الويل
الجود سحبته ومشى عقاب وراها وجلست ع الكنب وجلسته ع الارض قدامها وسحبت شنطة الاسعافات الاولية وقالت : من اللي وصلك للحالة ذي ؟
عقاب ابتسم وقال : نقول صرتي تهتمين الحين ؟
الجود زفرت بملل وقالت : كم مره بعيد انا ؟ عشان عمي وعمتي وخواتك واخوانك يعني تخيل تلتهب الجروح وتموت ؟
عقاب انفجر يضحك بصوت عالي وكانت هذي ثاني مره تسمع الجود ضحكته ابتسمت وقالت : وشفيك ؟
عقاب وهو يضحك قال : وش تصعيد الامور ذا ؟ قولي انتس تهتمين لي وخلاص
الجود مسحت ع جرحه بقول وقالت : تخسى
عقاب كان يموت الم بس م كان يطلع اي شيء ضحك وقال : اخسي ! تصدقين عاد ابي منتس شغلة
الجود همهمت له وكمل عقاب وهو يقول : من اول م تزوجت للحين م اعتذرت ولا قابلت خواتي
الجود قطبت وقالت : بعد م مديت يدك عليهم عشان السلقة ذيك قصدك ؟
عقاب : ايه ابيتس تطلعينهم الساعة ثمان الليل اذا رجعت
الجود شهقت بقوة وقالت : سلامات تجلس بالدوام طول اليوم !!
عقاب زفر بعصبية وقال : مالتس شغل ماهو بموضوعنا ذا ابيتس تطلعينهم للحوش عشاني بجيب لهم اشياء يحبونها
الجود ابتسمت وقالت : اقلع ابو البجاحة ! تقولي مالي شغل وتكمل فالخطة وبعدين خواتك رضوا عنك والفضل لله ثم لي طيب ؟
عقاب توسعت عيونه وقال : كييف ؟
الجود قامت اول م خلصت تعقيم جروحه وقالت : باقي فيك شيء ؟
عقاب ابتسم بخبث ونزل ثوبه وفنيلته وقال : هنا
والجود بحكم انها تستحي فزت وعطته ظهرها وقالت : هنا عقمها بنفسك انا وش لي !
مشت وضحك عقاب وشافها تجلس بالزاوية ع الكنب الثاني فالصالة وتقرأ كتابها دخل للحمام واخذ دش سريع وطلع ولبس بدلته وشاراته ومشى وقال : بنت
الجود م ردت وهي دخلت جو فظيع وردد وهو يقول : جود !
الجود رفعت عينها له وقالت : الجود لو سمحت وش جود !
عقاب تكى ع الباب وقال : جود امشي نفطر مع اهلي
الجود قامت وقالت : مع بعض ؟
عقاب : ايه فالحوش قدام المجلس ليه ؟
الجود : اقصد اخوانك فيه ؟
عقاب بحدة : اييه وراتس انتي !
الجود بعصبية : وشفييك يخي اسأل عشان اشوف البس جلابية ونقاب وشيلة ولا لا اافف !!
مشت ولبست وخلصت وطلعت وكان عقاب عند الباب ينتظرها لبست حذيانها وقالت : امش !
مشى عقاب قدامها وكانت الجود ماسكة نفسها م تقوم وتحضن عقاب الفاتن بالبدلة واللي كان تقريبًا نفس صفات بطل روايتها اللي تقرأها ابتسمت بحب وقالت بنفسها ( بسم الله علييه يجنن !! ) كانت تبيه يلتفت لها وقالت : عقاب
عقاب همهم لها وهو مشغول بجواله زفرت بملل وقالت : عقااب
عقاب لف لها وقال : وشفيتس وشبغيتي ؟
الجود ابتسمت وقالت : ولا شيء
عقاب رفع حاجبة وقال : الله يخلف عليتس
الجود توسعت عيونها وقالت : مقصوودة صح !!
عقاب ابتسم ومشى وهو يقول : افهميها باللي تبين
مشت وراه ووصلوا للفرشة والاكل جاهز جلسوا وصرخ فيهم ابو فهد وهو يقول : سسنة ننتظر !!
عقاب : يبه وين عمي ؟
ابو فهد : جاء هيثم والسلقة ذيك مرسلته يزهم عمك للفطور وراحوا
عقاب : اييه ازين والله عشان جود
ابو فهد ابتسم وقال : اييه والله ازين
ضحى واسر علطول قالوا : اووووه عشششنناا ييععقييب
الجود فزت برعب وقالت : وش التخاطر ذا !
البندري ضحكت وقالت : معليتس منهم
عقاب : وضيحي والله اذا م سكتي اني لا اوريتس شغلتس ترا للحين م نسيت امس
ضحى بعتب واضح : يخي انا انسى اسوء افعالك واخرتها بليلة عرسك وانت للحين شايل ع امس وبعدين انت اللي مديت يدك
عقاب بهمس وهو يصر ع اسنانه : اججل اخليي العصاا تكسرر وجهه بندري !!
البندري بملل : خلاص انت وياها امي لا تسمعكم بتحز بخاطرها
الجود همست لعقاب وقالت وهي تضحك : يقولون لك عقيب ؟
عقاب : ايه وشوهوا اسمي ونحروا هيبته
الجود : طيب يعقيب عطني الخبز
عقاب ابتسم بخفاء ومد لها الخبز وشوي وجلس ناصر وقال : وانتوا مستحيل تنتظروني ؟
ابو فهد بعصبية : اعقبب يالعاااقب حناا ننتظررك !!
ناصر : لا يبه محشوم اقصد اخواني عشاني اكبر منهم
ابو فهد : وفهيد م حشمته !! وغالية !!
ناصر زفر بملل وقال : اسف
مد يده يبي ياكل وانصعق اول م انضرب ع قفاها بعصا ابوه
فهد ابتسم وقال : مفروض تجي تحب راسه وانت تقول اسف
ابو فهد بحدة : فههد انطططم ماللك لزززوم !!
فهد توسعت عيونه وقال : ابشر
الجود كانت مصدومة من تعامل عمها وشافت كيف نشر الخوف وقطع الشهية للجميع ابتسمت بحزن وقالت : يعمي
ابو فهد لف بحدة وقال : نعم يجود ؟
الجود : خلنا نكشت عند العزبة اليوم منزمااان عنها
ابو فهد ابتسم وهو يحب عزبته ويروق فيها وقال : ايييه والله اجل جهزوا وخلونا نروح لها
اسر : اييه بس يبه انا بروح للأسطبل وبتدرب شوي وبحاول الحقكم بتعزم عمي ؟
ابو فهد : اييه لابد اعزم سالم
ام فهد : اجل يالله خلونا نجهز يبنات
غالية ابتسمت وقالت : يالله يميمتي
قاموا الكل ولبس عقاب البريهه ولف لآسر وقال : اجي اخذك ؟
اسر : لا يخوي بتطول انت
عقاب : براحتك اجل
الجود تقدمت من وراهم وقالت : عقاب
اسر لف لها وابتسم ومشى وتركهم وتقدم عقاب ونزل لها وقال : سمي يبنت راشد ؟
الجود وهي مشابكة يدينها بكل قوتها ودايم تتجرح بالطريقة ذي قالت بتوتر : اسمع م ابي ينعاد اللي صار امس وشرايك تشتري ثلاجة صغيرة وتحطها بغرفتنا واصير اروح مع البنات لدكان عمي
عقاب مسك فكها بقوة وقال بحدة وهو يصر ع اسنانه : ولا تطرري عليتس تروحين للدكان محد من بناتنا ينزل للسوق سامعة !!
الجود طارت عيونها وقالت : حشششى صدق !!
عقاب قرب اكثر وقال : سامعة ؟
الجود بحزن ع حالها : اف خلاص بس كل م وصيتك للبقالة بتقوم تجيب لي
عقاب : ايه اكيد عطيني اغراضتس الحين وبجيبها اذا جيت فالليل
الجود ابتسمت ومدت له ورقه كتبت فيها كل اللي تبيه دخلها بجيبه وقال : تدخلين ؟
الجود بحنية قالت : استودعتك ربي
عقاب ابتسم وضبط البريهه وقال : في امان الله
طلع وسكر الباب ومشت الجود تجهز مع عمتها وخوات زوجها وكانت خيير عليهم واحسن لهم من احلام اللي م تحرك ساكن ..
" فالرياض "
الميلا صحت بتعب وهي زكمت قامت وقالت : اااه يالصداع !
مشت وشافت الساعة بجوالها وفزت بفرحة اول م شافت ان اليوم الخميس وانهم بينزلون للديرة ركضت للحمام وتروشت تجدد حيويتها وفرشت اسنانها ومن عناية واهتمام خلصت وطلعت ولبست وجففت شعرها وجدلته وكان شعرها طويييل واسود سواد عيونها ابتسمت وقالت : نروح نشكي للوالد بدموع التماسيح اللي ورثناها من جودي
نزلت تركض ووصلت للصالة وقالت : ابووي حبيبي
ابو تركي ابتسم وقال : تجهزي ببنزل للديرة
الميلا صرخت بحب وقالت : اخخيييييرًا !!!!
ام تركي : م بجي انا
الميلا : فاتتس يمه
تركي ضحك وقال : اجهزي طيب
الميلا ضحكت وقالت : حتى انت رجعت تجنن اول م عرفت اننا بنرجع للديار
ركضت وهي ترقص وتلف بجديلتها وابتسمت ومسكت جوالها وفتحت رسايل دانه وشافت الخوصاء وكبرت ع وجهها وقالت : جايتتس يالدنيييا اليوم
لفت لوجه اسر وابتسمت وقالت : وانت بعد عساني احصلك ونتعارك ع الخوصاء
طلعت من الصورة وانصعقت اول م قرأت اللي كتبته دانه وشهقت وقالت : اسررتتس !!! الوسسسخة وانا كاتببه صدق انتس محظوظهه الله يفششلننيي !
حطت وجهها ع مخدتها وصرختت بفشلة وقامت وهي محمره وخدودها تحترق صارت تهف ع نفسها وطلعت باغراضها وعبايتها وطلعت مع تركي وابوها ومشوا للديرة ..
" فالمستشفى "
غزيل طلعت من الغرفة وهي ترجف اول م سمعت صوت الاجهزة معلنة وفاة امها طاحت بطولها ورجولها معاد شالتها شهقت بكل قوتها وهي تحس ان روحها طلعت وكان كل شيء يمشي ببطيء وكل الطاقم الطبي يركضون يحاولون يسعفونها لكن غزيل عرفت انه انتهى كل شيء من الورقة اللي بيدينها وهي وصية امها فتحتها بصعوبة وتغورقت عيونها اول م قرأت الموجود وكانت ام غزيل تقول :
" غزولي اسفه اني تركتتس لحالتس ورحت مع ابوتس ان شاءالله انتس بخير وانا يبنتي اهلكتني الاجهزة ولعاد قويت عليها ووفاتي والله انها احسن لي من الدنيا صح انتس حسنة حياتي يبنتي الوحيدة ويقرة عيون امتس اسفه انتي خليتتس كذا لكن بطلب منتس طلب ان كان لي خاطر فتزوجي من ناصر بن عايض بن مساعد " توسعت عيونها بصدمة وهي تشاهق وقالت : ااه يمه وش جابتس عنده الحين !!
كملت تقرأ الباقي وكان مكتوب فيه " والله ونعم الرجال ونعم الاهل خليتس تقربين من ناس انا اثق فيهم يبنتي ودام عقاب افلح واعرس واسر اشوف انه صغير عليتس ع انتس اصغر منه لكن اشوف نويصر خيرهم يبنتي وعسى الله يتمم لكم ويوفقكم وعادي اذا تستحين عطيه الورقة وخليه يقرأها احبتس يبنتي والله اني احبتس وعساني م اتركتس ع شيء يوجعتس وانتبهي تذلين نفستس واثبتي نفستس بكل مكان يبنت عبدالملك وبنت نوره ! "
انتهت الوصية وانهارت غزيل تبكي بحرقة واحد الممرضات جات تقومها وتقول : احسسن الله عزاك يحبيبتي دقي ع اهلك تكفين
غزيل طلعت جوالها ودقت ع ناصر وهو عطاها رقمه عشان اذا صار شيء لهم هي وامها ووصلها صوته وهو يقول : هلا غزيل ؟
غزيل شهقت ونزلت دموعها وقالت : ناصر امي توفت
ناصر فز من عند كتبه وقال : اسألتس بالله !!! لا حول ولا قوة الا بالله انا لله وانا اليه راجعون !! وينتس فيه ؟
غزيل بصوت مهزوز : بن..بنفس القس..القسم
ناصر سكر وركض وقال : يببه يببه
ابو فهد فز وقال بحدة : وجع وشفيييك !!
ناصر وهو يرجف : يبه عمتي نوره توفت !
ابو فهد توسعت عيونه وقال : لا حول ولا قوة الا بالله الله يرحمها وين غزيل ؟
ناصر : تعال معي يبه نجيبها وانت يفهد
فهد بحزن : انا لله وانا اليه راجعون يالله امشوا البنت معاد معها فالدنيا الا الله ثم حنا
ابو فهد تلطم بشماغه وقال : ايه والله وعسانا عند الهقوة يعيالي ولا نخلي بنت اختي لحالها
ناصر ابتسم بضيق وقال : ان شاءالله
مشوا متجهين للمستشفى ووصلوا بعد نص ساعة مسافة طريق ونزلوا وكانوا يمشون ورا ناصر اللي واضح عليه انه يعرف الطريق ووصلوا وشافوها تبكي انطلقوا عيال خالها لها ولفت لهم وافتحت يدينها لخالها وحضنته بكل حزن وقالت : ااااه يخاالي اميي راحت وخلتننيي اميي ماتت ولحققت ابويي يخال معااد لي فالدنيييا ذي احد
ناصر بحدة : حن وراتس والله م نخليتس يغزيل لجور الايام وانتس في وجيهنا
فهد : ايه والله وصدق ناصر
ابو فهد مسح ع راسها وقال : ع ان امتس الله يرحمها اختي من الرضاعة لكن والله كأنها من نسلنا ودمنا والله اننا نعزها يعساها فالجنة يارب والله يجبر كسرتس ويربط ع قليبتس
غزيل ابتسمت براحة وقالت : تعبت نفسك يخالي ليتك م جيت بسلامتك
ابو فهد : افا وش تعب الله يصلحتس امشي اجلسي
جلست غزيل ومشى ابو فهد يعبي بيانات ام غزيل وفهد معه ولفت غزيل لناصر وقالت : ناصر
ناصر لف وقال : سمي ؟
مدت غزيل الورقة له وقالت : هاك
اخذها ناصر وفتحها وفجعته غزيل وهي تقول بحدة : اسمع ماهو انا اللي طلبت لكن ذي وصيتها وبنفذها عشان خاطرها
ناصر : بسم الله عساه خير ؟
غزيل : مختصرها امي تبيك تتزوجني
ناصر ضحك وقال : ااايششش !!!
غزيل رفعت حاجبها وقالت : خير ان شاءالله ؟
ناصر بحدة : تستهبلين صح ؟
غزيل جلست وقالت : ليتني والله استهبل
ناصر بسرعة فتح الوصية وقرأها والصدمة معتليه ملامحه ولف لها وقال : ع خير ان شاءالله
غزيل توسعت عيونها وقالت : بتسويها !
ناصر بجدية : ايه بس ماهو الحين لازم اتوظف وامسك وظيفتي وبعدها ان كان م جاتس خطاب وافلحتي خذيتتس
غزيل رفعت يدينها للسماء وقالت : يااارب اتزوج قبل تتوظف
ناصر استحقرها وقال : بقرة انتي ؟ وش التناقض ذا قبل شوي تقولين انفذ ومدري وش والحين تدعين م تاخذيني ؟ عساس بموت انا !
غزيل قامت وقطعت المسافة بينها وبين ناصر وقالت بحدة : البقرة ذي بترفسك يالثور ! والله ماني ميتة عليك وتمنيت اني اموت ولا اقرأ وصيتها جعلها فالجنة !
ناصر نطح راسها براسه وقال : فارقي مني هناك !
عطاها ظهره ومشى وسحبت غزيل حذيانها ورمتها ع ناصر وضربت براسه وفز ولف عليها وقالت : جب الحذيان يالكلب
ناصر انجلط وقال : الله يعوضني ان كان خذيتتس ولد انتي وشذا وين الانوثه ! وبعدين تبين الحذيان ؟
غزيل : معاد الا اتغنج قدامك يالمنتهي وجبها اعجل علي
ناصر : طيب شوي الكلب وش بيسوي فيتس
رماها بكل قوته وصقعت بجبهتها وطاح ناصر يضحك وركضت غزيل وشهق وعض طرف ثوبه وركض وهي وراه تصارخ وجبهتها محمرة وقفت وقالت : وقسسم بالله لا اردها واقوى انتظرني ينويصر
ناصر طلع من القسم وقال : يقليب نويصر انتي
مشى وقابل ابوه وقال : يبه برجع للبيت ارجع مع فهد
ابو فهد : طيب الله يجزاك خير يولدي لولا الله ثم انت م درينا عنها المسكينة
ناصر : وياك وياك
طلع وهو يضحك عليها وقال : الله يستر خوفي تفقشني ذي والله اتوقعها منها
ركب سيارته ومشى راجع للديرة وتحديدًا العزبة عشان يركب الونيت ويروح فيه للبيت ويحمل الاغراض فالصندوق ..
" عند مدخل الديرة "
دخلت سيارة ابو تركي ومشى فالسوق مع الشارع اللي يدخله لحارتهم وفز اسر اول م شاف سيارة عمه راشد وصقع راسه فالحديدة اللي عند الباب مسح راسه وقال : اررححبببوواا
ابو تركي ضحك ووقف قدام دكان اخوه وقال : الله يبقيييك ي اسر
تركي : الله يبقييك
اسر تكى ع شباك سيارة ابو تركي وباس راس عمه وقال : وشحالكم يعمي توو م اسفرت وانورت الديرة فذمتي
ابو تركي : والله بخيير جعلك بخيير وانتوا عساكم طيبين
اسر لف بعيونه للميلا اللي صدت علطول وابتسم وقال : تووني صرت بخيير بشوفكم
الميلا ابتسمت بخجل وقالت بنفسها ( خوفي تجيب العيد بنفسك امش يبه تكفى ) ولفت له وكان اسر يطالع بأبوها سامح للميلا تتأمل تفاصيل وجهه بحكم انها جالسة ورا مرتبة ابوها ابتسمت وكملت وهي تقول ( تفاصيل وجهه جميييلة شلون تغييرت يالاسر ؟ ) ضحكت وصدت منه وطار اسر وسكر الدكان وقال : اقلطوا يعمي
ابو تركي ضحك وقال : دام حن بنقلط اركب خل نوصلك
اسر فتح الباب وقال : تركي دز ورا يالله
تركي توسعت عيونه وقال : خير تقوم اللي اكبر منك تقلع ورا !
الميلا شهقت وضربت كتف تركي وقالت : اععقب تركبه جنب اختك !
تركي ضحك وقال : يووه نسيت منتس والله
ابو تركي ضحك وقال : اركب اعجل
نزل تركي وضحك اسر وقال : يالله بسسس
ركب تركي ورا وركب اسر معهم وقال : يالله انك تحييهم
ابو تركي : الله يبقييكم يولدي
وصلوا لبيت ابو فهد ونزلوا وقلطهم اسر فالمجلس ومشوا تركي وابو تركي مع بعض ودخلوا ورجع اسر للميلا وقال : وانتي امشي بسرعة ابي اسكر الباب
الميلا : طيب لا اله الا الله !
دخلت وقال اسر وهو يضحك : وبعدين كلها فترة بسيطة وتركبين جنبي
الميلا توسعت عيونها وقالت : ماشاءالله وش الثقة ذي ؟
اسر : ثقة ؟
الميلا : الحين صدق كلن ع همه سرا انا ابي اشوف الخوصاء وانت تبيني !
مشت وقال اسر : م قلت اني ابيتس لكن يحظ الخوصاء يعرب
دخلت الميلا للبيت ونزلت جزمتها وقالت : ياهل المحل ؟
ام فهد وغالية فزوا وقالوا : اررححبيي
الميلا ضحكت وقالت : ابقهم يالله
تقدمت وسلمت ع راس ام فهد وخدادي ع غالية وقالت : وين وضوح ؟
ضحى طلعت من المطبخ وهي تخيرهم بين الاغراض وطيحتها وقالت : مميييلاا !!
الجود شهقت بقوة وقالت : ايشش
طلعوا الجود والبندري ورا ضحى وشافوا الميلا تنزل عبايتها وتضحك وقالت : جوودي
الجود فزت تركض ودموع الشوق والفرحة خذت مجراها وحضنت اختها بكل قوتها وقالت : ااه مييلو وحشتيينيي
الميلا ابتسمت وقالت : والله وانتي اكثثرر
ضحى سحبت الجود وقالت : بس عااد دورنا
تقدمت وحضنت الميلا وقالت : والله لتس فقدة يخي حسيت بنعمتتس محد مثلتس ليتتس مع الجود
وقربت من اذن الميلا وهمست بأذنها وهي تقول : شرايتس تاخذين ناصر ولا اسر ؟
الميلا توسعت عيونها وقالت بهمس : ناصصر !! حرام عليتس وبعدين شكلتس متفقة مع اسر
ضحى : والله مدري وش انتي تهذرين لكن اللهم يارب انك تزوج ميلا بالاسر
الميلا دفتها وقالت : لا يارب
البندري ضحكت وقالت : شخبارتس ؟
الميلا وهي تقلد الاسر بدون م يدرون قالت : توني صرت بخيير بشوفتكم !
الجود بحب : يبعد الدنييييا يميلو
ضحى ضحكت وقالت : اييه والله يبععد الدنييا
البندري : ترا بنكشت للعزبة تجين معنا ؟
الميلا : ع اني اخاف من الناقات لكن تم
ضحى : ماش اجل جود اجييد منتس هي اللي جابت الفكرة لأبوي
الميلا بصدمة : لا عااد جودي اكبر خوافة شلون غيرتوها
الجود ضحكت بفشلة وقالت : الصدق اني م زلت لكن شفت التوتر اليوم وقلت اعطيكم فكرة وانسي عمي ولعلي ندمت
البندري انفجرت تضحك وقالت : القميي ع عينتس الحيين
الميلا ضحكت وقالت : حسييت وربي
ضحى ضربتها بخفه وقالت : صدق ان الرفلة رفلة وش بتسوي بكم الناقات ! بلا دلع يبنات المدن
الميلا مثّلت انها تستفرغ وقالت : الا ذا اللقب لاتقولينه لي
ضحى : اص اص يبنت الرياض
الميلا دعست اصبع رجل ضحى الصغير وقالت : اذا قلت لتس شيء تسمعينه !
ضحى توسعت عيونها بألم وقالت : يحييوانه !!
فزوا ع صوت اسر وهو يقول : يووولدد اعججلووا عليينا
غالية : حصيص تعالي ساعديني
حصة تقدمت وعاونت عمتها ومشت وقالت : عم اسر
اسر لف لها بهدوء وقال : ارحبي حصيصة
حصة كانت بتبوس ع راسه لكن اسر م كان يحب هالاشياء مثل عقاب اللي يقدسها وفز وباس راسها وقال : م بيننا يحلوتي
حصة ضحكت وقالت : الله لايحرمني منك
مشت وصارت تساعد ناصر واسر فالاغراض وخلصت ومشت داخل تنادي البنات ولف اسر لناصر وقال : ولد وين ابوي ؟
ناصر : تخيل توفت عمتي نوره
اسر طارت عيونه من الصدمة وقال : لا اله الا الله !! انا لله وانا اليه راجعون
ابو تركي طلع وقال : وش العلم !!
تركي ركض من ورا ابوه وقال : احد فيه شيء !
اسر : ناصر يقول عمتي نوره ماتت
تركي بصدمة : لا حول ولا قوة الا بالله
ابو تركي : انا لله وانا اليه راجعون وانتوا ناوين الكشته !
ناصر : الصدق م حبيت اخرب عليكم
اسر بحدة : تستهبل انت !!
ابو تركي : اجلسوا اجلسوا بروح ادعي سالم واجيكم خلوكم فالمجلس العزاء بيكون في بيت عايض للرجال والحريم في بيت نوره الله يغمد روحها الجنة
مشى ابو تركي ودخلوا العيال ينتظرون قدومه وأجلوا كل خططهم من الاسطبل والعزبة ..
" في اسطبل الصقلاوية "
دخلت دانه وهي تعكز بعكازات تحت اصابتها بشعره بالرجل اليمنى والكل استقبلها بحب وتحمدوا لها بالسلامة وهي ترد وتقول بكل هدوء : م يجيكم الشر ، الله يسلمكم
دخلت بالغرفة حقتها ولفت للهدايا وكانت اغلبها ورود نادت حلا اللي كانت واقفة عند الباب ودخلت وقالت : هلا دانه
دانه : حلاوي لا هنتي دخلي الهدايا بمكتبي
تقدمت حلا وشافت الوردتين اللي كانت اكبر من حجم الباقية وقرأت البطاقة وعرفت انها من ديم وفتحت البطاقة الثانية وتوسعت عيونها بصدمة اول م قرأت اسم ماهر وقالت بنفسها ( يجعله الوجع جاايب لها ورد !! ااخ م يدري اني احببه لكن اوريه والله م تشوفها السلقة ذي ! ) مشت وشالت ورد ماهر اللي تزيين باللون الابيض كامل وطلعت فيه وشافت ماهر وهتان قاعدين عند دكة الشاهي ورفعت صوتها وهي تقول : الله يقلعتس ي دانه كل ذا كره فيه ؟
ومثّلت ان فيه محادثة تدور بينها وبين دانه ورمت ورد ماهر فالزبالة بأسوء منظر وبعنف وهي تدخله وتقطعه قدام عيونه اللي تطلع شرار ودخلت داخل وكملت تشيل باقي الهدايا وتنقلها للمكتب حق دانه وبالجهة الثانية انكسرت الكاسه بيد ماهر واحترق من الشاهي وفز هتان وكان يقول : مااااهر بسم الله علييك !!
ماهر قام ومشى متجاهل هتان وراه وطلع باللطيم وركب عليه وركض فيه برا اسوار الاسطبل
" عند دانه "
دانه : ايه ديم ؟
ديم : والله يطويلة العمر والسلامة اللطيم هو اللي انطلق عليتس والظاهر ان ماهر هو اللي مطلقه
روز بحدة : خيير عسى م هنا خلاف مرييض صدق
دانه بعصبية : ويينه هو !
ديم بكل برود وهي تاكل الشوكولاته اللي وصلت لدانه قالت : مدري عنه اكيد عند دكة الشاهي
دانه قامت بكل عصبية وهي تحس ان جنون الارض كلها ع راسها طلعت وشافت هتان وقالت : هتاان وين ماهر !
هتان فز برعب وقال : يهووه شفييكم ؟ طلع معصب باللطيم
دانه بحدة : وله وجه بعد !!
هتان : ليه عسى م شر ؟
دانه : لا ولا شيء بس اذا جاء تعال علمني
مشت دانه ووقفت احد المساعدات وقالت : وين مهرتي ؟
المساعدة : فالعيادة وممنوع تشوفيها عشان م تنكسر
دانه توسعت عيونها وقالت : مهرتي مصابة !!
المساعدة : اه حضرتك اول م وقعتي اصابت المهرة بشعره بالساق اليمنى
ضحكت دانه وقالت : ماشاءالله مطقمين ؟
المساعدة : ايه ؟
دانه : لا ولا شيء وخلاص
مشت وشافت الخيول تركض وتتدرب ابتسمت بحزن ورفعت جوالها ودقت ع الميلا ووصلها صوتها وهي تقول : ارحبي
دانه ابتسمت وقالت : من يرحب يبقى اسمعي وينتس ؟
الميلا : فالديرة
دانه ابتسمت بفرحة وقالت : وانا اقول وشفيها منورة
الميلا ضحكت وقالت : ع كييف من اصلاً م انتي فالديرة
دانه انفجرت تضحك وقالت : يحيوانه كيف عرفتي ؟
الميلا : من صوت الخيول
دانه : جودي عندتس ؟
الميلا : ايه تعالي لنا كلنا متجمعين ببيت عمي عايض
دانه : ماش مقدر مصابة
الميلا برعب : سلامتتس ان شاءالله بسيطة ؟
دانه : ايه معليتس شعره عشان حادثة صارت امس وانا اتسابق مع ولد عمتس ذا
الميلا : اي واحد ؟
دانه ضحكت بخبث وقالت : اسرتس
الميلا توسعت عيونها وقالت : وجع يكلبة اصلاً م دريت انتس كاتبه اسرتس
دانه انفجرت تضحك وقالت : سبحااااااان الله دززي بس م تمشي علي
الميلا : انقلعيي
سكرت ودانه تضحك وقالت بنفسها ( عاد اتمنى ان كان اسر خير لها تتزوجه عشان جودي ) مشت داخل جاهلة وجود ماهر وراها واستوقفها وهو يقول : الحمدلله ع السلامة
لفت دانه وقالت : الله يسلمك وتسلم لولا المجازفة واطلاقك للطيم م صار ذا كله
ماهر بعتب واضح : وش نوحتس انتي تعامليني هاللون !
دانه بحدة : وش بيني وبينك اصلاً وبعد اللي سويته تنتظر مني معاملة زينة !
ماهر : اجل غميضة اني عطيتس الورد وانتي م تستاهلينه
مشى وقالت دانه : تستهبل صح ! وبعد تمن علي بوردك !
ماهر ابتسم بحرقة وقال : اييه وتحطينه بالزبالة !
دانه توسعت عيونها وقالت بنفسها ( حلا !!! ) مشت للزبالة وكان منتف ولا فيه وردة وحدة سليمة سحبت الكرت وقرأت المكتوب وانه فعلاً منه ضربت السلة وقالت : اااه يحلا !
لفت لماهر اللي وقع وطلع من الاسطبل كامل وشافته بسيارته ينتظر هتان ومشى علطول زفرت بقهر وقالت : يارب وش اقوله الحين وكيف ابرر وانا توو قلت له تمن ومدري وش !
مشت داخل ووقعت وطلعت مع ابوها راجعة للبيت وماهر ماخذ تسعين بالمية من تفكيرها ..
" في بيت ام غزيل "
الكل تجمعوا فيه يعزون وشوي دخلت الميلا مع اهل ابو فهد وركضت وحضنت غزيل وقالت : الله يرحمها يغزل والله يجبر كسرتس وكسرنا يحبيبتي انتي
غزيل بحزن ودموعها اخذت مجراها : وقسم بالله يميلا اني مدري وش اقول والله اني مكسورة وجزاتس الله خير
تقدموا البنات وسلموا عليها وعزوا وخلصوا وصاروا يد بيد ويساعدون غزيل وم خلوها تشتكي من شيء ..
" عند بيت ابو فهد "
نزل عقاب من سيارته ومشى ودخل وقال : سلام عليكم يرجال واحسن الله عزاكم
فزوا كلهم له وسلموا عليه ولف لآسر وقال : وين الحريم ؟
اسر : في بيت عمتي نوره ليه ؟
عقاب اللي كان يبي يشوف الجود انكر وقال : ولا شيء اسأل بس
اسر بحزن : والله مدري شلون صار ذا كله
عقاب شّد ع كتفه وقال : قدر ومكتوب اجل كان عاجبك حالها قبل مغير ع الاجهزة !
اسر : عسى الله يرحمها ويغفر لها
عقاب : عزتي والله لغزيل معاد لها من الدنيا شيء
ناصر لف لهم وقال : حن اهلها وماحن مخلينها ورانا
عقاب ابتسم وقال : اكييد م بنخليها لكن محد مثل الام والاب ينويصر
ناصر : صادق والله
فلاح بهدوء : عيال واحد يقوم معي يوزع ماء
عقاب قام وقال : يالله امش
قاموا يوزعون ع الموجودين وخلصوا وطلع عقاب ومشى لبيت ام غزيل ووصل وقال : والحين شلون بطلعها ؟
دق الباب وشوي ووصله صوت الهنوف وهي تقول : مين ؟
عقاب مسح وجهه وشنبه وقال بنفسه ( وش حظي انا ! ) وكمل ورفع صوته وهو يقول : عقاب
الهنوف فتحت وهي مبتسمة وقالت : وش بغيت ؟
عقاب صد منها وقال : ادعي الجود لي
الهنوف صدت بقرف وقالت : يالبندري ادعي الجود لرجلها
البندري توسعت عيونها وسحبت الهنوف وقالت : وانتي يالسلقة م تتوبين طالعة كذا قدامه وهو م يحل لتس وفعزاء بعد !!
دفتها ومشت لجود وقالت : بنوته عقاب يبيتس
الجود قامت وقالت : والله ؟ وينه
البندري : عند الباب تغطي بشيلتتس
الجود سحبت شيلتها ع راسها ومشت للباب وقالت : عقاب ؟
عقاب لف لها بهدوء وقال : سمي
الجود قطبت وقالت : سم الله عدوينك وشفيك ؟
عقاب : ابد جيت اتطمن
الجود ضحكت وقالت : علي ؟!
عقاب مسح ع شنبه ولحيته وقال : يعني كلكم بشوف وشفيكم ووش ناقصكم تطمنت ع البندري واهلي والحين دورتس
الجود ابتسمت وقالت : معليك بخير انا وانت شخبارك ؟
عقاب رفع عيونه لعينها وقال : بخير نحمد الله ونشكره
الجود : توصي طيب ؟
عقاب : سلامتتس
مشى عقاب والجود تناظر بقفى ظهره ابتسمت ودخلت وسكرت الباب وراها ..
::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( عدنا اليكم يحباااااني ببارت جديد جميل لذيييذ بس حزين عشان غزولتي 😔 ، استمتعوا فيه وعطوه حقه بالكومنت والنجوم وتأكدوا انكم ضاغطين نجمة عشان ينزل البارت التاسع قريب احبكم واشوفكم ع خيير ببارت جديد 🫶🏻 )