ليّت اللِذي خَلق العُيون السُود ... خَلق القُلوب الخَافقات حَديد

البارت التاسع والعشرين

ابتسمت ومسكت يده اللي ع قيّر الموتر ، سحبها ومسكت القيّر وحاصر يدها ولف نظره للطريق بينما هي كانت تتأمل يده اللي مشابكتها طول الطريق ..
" فالحوش "
اسر قام يشّيك ع الميلا اللي من طلع من عندها معاد سمع لها حسّ ، دخل البيت ونادى : ي أم كنووز !
ابتسمت فالمطبخ وهي تقطع السلطة مع غزيل اللي تحرّك الكشنة فالقدر ، رفعت صوتها وهي تقول : لبيه ؟
مشت وشافها فتح ذراعينه لها وحضنها وقال : طمنيني ؟ كيف صرتي !
الميلا : حمدلله مجرد الم خفيف وسهالات بنتنا م يجيها شيء !! بنتنا عن الف رجال
اسر ابتسم وباس راسها بقوة وقال : انشهد !! كيف لا وابوها الآسر !
الميلا ضحكت وتخصّرت ونطقت : خير وانا ؟
اسر ابتسم وقال : لا انتي رقيقه ! م تنفعين
الميلا : شكلك نسيت انها بنت
اسر : وشكلتس نسيتي اننا م ندري للحين
الميلا زفر بقرف وقالت : م تبي تنهي السيرة ؟ اذا كنا نبيها بنت بتجي بنت !
اسر انفجر يضحك وقال : الله يجيب الخير يبنتي الله يجيبه
الميلا : اييه ؟ وش صار ع احلام ؟!
اسر : لعنتها بطلع للحارة منزمان عن الشباب هناك برجع ع المغرب طيب ؟
الميلا : تمام بس جب معك فراولة احس اشتهيتها
اسر ابتسم وقال : بدري ع الوحام ؟
الميلا زفرت بملل وقالت : stop asking and get it for me !
*توقف عن طرح الاسئلة واحضّرها من اجلي*
اسر ضرب الباب بداعي انها تخاف ، فعلاً هي فزت برعب ونطق وهو يضحك : الحتسي ذا العنقليزي امنعيني منه ! وتحاتسي عربي !
الميلا انفجرت تضحك وقالت : اللهجة قلبت بحتت !!
اسر ابتسم وقال : ان شاءالله احصل فراولة بس
مشى طلع وشماغه ع كتفه ، تشوفه يمشي معطيها ظهره ، عضّت شفايفها لثواني ونطقت : بسم الله عليك يحبيبي ! فاتن اول مره اشوف ولد ديرة يسّحر مثله !!
مشت تدخل بعد م نادتها غزيل تكمل معها الشغل ..
" بعد يومين من الحادثة في بيت ابو دانه "
طلعت وهي تاكل الشيبس حقها ، لابسه افخم الملابس وريحة البخور والعطور تفوح منها ، تلفّ وترقص بهدوء وهي لابسة السماعات بأذنها ، ضحكت اول م تذكرت شلون انهارت عند المهرة امس وكأن فرّسها تواسيها ، ابتسمت اول م وصلها اتصال من " دييميّ " ردت علطول وقالت : لبيه ؟
ديم : انا تحت
دانه : الا طالعة
سكرت ومشت تركض مع الدرج ، هي من وقتها حلفت يمين معاد تشوف ابوها وفعلاً كملت يومين كاملة بدون م تلمحه حتى ، تشغل نفسها عن السالفة بالخرجات مع ديم للأسطبل بس اليوم اجبرتها ديم يروحون كوفي وتسمع السالفة كاملة هي تعرف صاحبتها والاكيد انها م هي بخير ، طلعوا ثنتينهم ومشوا للكوفي الموعود ، احد افخم وارقى الاماكن ، فيه ميوزك هادئ يبون يقضون ليلة من الفضفضة قبل رمضان اللي ع الابواب ، دخلوا وجلست وسرعان م سألت : صاير شيء بينتس وبين ماهر ؟
دانه زفرت بضيق وقالت : صار اشياء ! متخيلة زواج م فيه..
ومن صدمة واسئلة مع القهوة اللي قدام كل وحدة ، سردت دانه السالفة كاملة لديم ، شهقت بقوة ونزلت دموعها بحرقة وقالت ببكي : تركني من وقتها حتى م تكلفّ يرسل !!!
ديم تقدمت وحضنتها وقالت : يبنتي يمكن انشغل مع اهله يمكن صاير لهم شيء !
دانه قامت وقالت : احسني مو بخير بروح الحمام
ديم : اجي معتس ؟
دانه هزت راسها بنفي وقالت : لا لا ارتاحي
مشت للحمام ودخلت ع خرجه احد الموجودين ، ضربت فيها بكل قوة ونطقت : بسسم الله بشوويش !
دانه لفت لها وقالت : معليش اسفه م انتبهت
بيان بصدمة : لا عادي حصل خير
سلمى من وراها بحدة : وش اللي حصل خيير ؟! تستهبلين
دانه لفت للبنت اللي وراها ومن شافت عيون دانه الحمراء ، صدت وطلعت علطول والذيب بيدينها ، بيان ابتسمت ومسكت كتوفها وقالت : معليش بس تعرفين اختي دفشة كذا
دانه ضحكت بخفه وقالت : بس م اعرفها انا ؟
بيان ضحكت بسخرية من نفسها وقالت : امسحيها بوجهي
مشت بيان طالعة ودخلت دانه ، هي تغيرت نفسيتها من شافت البيبي اللي بأحضان سلمى ، واللي يكون ولد منصور ، ابتسمت من تذكرت شكله من جديد كيف بريء وصغير ، طلعت من الحمام ونطقت : نمشي ؟
ديم : اللي ودتس !
دانه ابتسمت وقالت : يالله
مشوا بيطلعون بس استوقفها صوت سلمى وهي تقول : لو سمحتي !
دانه لفت لها وابتسمت وقالت : عادي حصل خير
سلمى ضحكت وقالت : والله كنت معصبة من ولدي وحطيت الحرة فيتس العذر والسموحة تبون قهوة ؟
ديم بأستغراب : م نعرفكم شلون تعزموننا ؟
دانه ضربتها بخفه وقالت بهمس : شوي ذوق تكفيين !!
بيان بضحك : لا تردون ام الذيب !!
سلمى بحدة : حسيت اني اكبر بأربعين سنة !
مشت دانه وقالت : والله توو تقهوينا تتقهوى معكم العافية وتكفين لا تاخذينها بخاطرتس والله م زعلت بس كنت متضايقة من سالفة طويلة صارت لي
سلمى ابتسمت وقالت : يالله انك تحيّيها نفس لهجتنا !!
بيان ضحكت بسخرية وقالت : كل اللي فالديرة ذي نفس اللهجة لا تحاولين
سلمى مباشرةً نطقت : لازم نتعرف اكثر احس القدر جمعنا
دانه ضحكت بوسع ثغرها ونطقت : تم !
تبادلوا الارقام وقالت : سميتتس ام الذيب
سلمى ضربت بيان ونطقت : كله منتس !!
دانه ضحكت وقالت : دانه ال سليمان
سلمى وقفت وقالت : سلمى ال قايد
بيان وقفت مع اختها ومدت يدها : بيان اخت سلمى
دانه : نتعرف زين بعدين مستعجلة ومن محاسن الصدف
سلمى بضحك : متأكدة ؟
ضحكت وغمزت لها تطلع من الكوفي ، جلست سلمى وقالت بيان : يعمري عليها واضح م هي بخير
سلمى بقرف : ركزتي فيها ؟ وانا عيني ع السلقة اللي معها حتى سلام م سلمت عمى ان شاءالله !!!
بيان انفجرت تضحك وقالت : يخي سلمى يخخي !! اخر مره اعزمتس !
سلمى ضحكت وقالت : ورعه !
ضحكوا وكملوا سوالف بعد خروج دانه وديم من عندهم ..
" فالديرة تحديدًا السوق "
الناس يمشون طالعين داخلين ، ابتسم وقال : يولدي ي اسر
اسر لف وشاف ابو عايدة وضحك وقال : اررحب يعمي !!
تقدم وسلم عليه وسأل عن حاله وكان رده مثل دايم : ع حالنا ي اسر
اسر ابتسم وقال : الله يرزقك يعمي وابشرك اني خذيت الميلا !!
ابو عايدة ضحك وقال : سمعت يولدي سمعت والمعذرة منك م قدرت احضر والمهم انك خذيت مرادك الله يوسع صدرك ويشرحه ويعطيك الحلال الطيب !
اسر باس راسه وقال : من طيب اصلك يعمي وابد معذور وم حصل منك الا الخير جعلني فداك !
ابو عايدة : توصي ؟
اسر : سلامتك والله
مشى اسر لدكة الشاهي اللي منزمان م جلسوا فيها العيال مع بعضهم ، ابتسم وهو يشوف كتابات الجدارن بالطباشير السوداء ، كلام كبير وشعر منه ومن عقاب وناصر وفلاح وتركي اللي كانوا بصغرهم م يفارقون الدكة اللي تقابل دكان ابو فهد ، ضحك ودخل محل الخضار ونطق : ي باشا فيه فراولة ؟
العامل : ايوه فيه كم تبغى ؟
اسر ابتسم وقال : عطني علبتين
حط له فالكيس وحاسب وطلع يمشي ، دخل محل هدايا وغلفّه بشكل جميل وصارت حبّات الفراولة متشكلة ومتراصة مثل الورد فالباقة ، طلع يركض ورفع عيونه للسماء يشوف الغروب تاره تجي بداخله ضيقة صدر من ذكريات الماضي ، وتاره ينشرح صدره من يشوف الكيس ويتذكر شكلها وهي تطلبه ، صوتها الطاغي فالعنقليزي ع قولته ، ضحك وقال :
ي حبيبن كم تمنيته على العدل والميل
‏والحمدلله اليوم ي ميالتي قدتس لي خلن تهّيا !
-
مشى يسابق خطواته وده يعطيها الفراولة قبل يأذن المغرب ، دخل البيت وسكر الباب وراه ، مشى وهو يسمع صوت البنات وضحكهم فالمطبخ ، البيت فاضي من الشباب هو ماهو فاضي كثر م انه اذا اختفى عقاب معاد ينسمع للبيت حسّ ، رفع صوته من ورا البيت وهو يقول : ي ميالتي
طلعت البندري تضحك وفز وحط الباقة ورا ظهره ، شهقت وهي تقول : اكيد جبت لها شيء عطنا حنّا اولى !
ضحى وهي تأشر ع راسها : ادري انك ناقد علينا بس شف راسي مفقوش والفراولة تزيد الدم اللي فقدته
الميلا ضحكت وقالت : ليتني م علمتهم وبعديم خير انا وحام انقلعوا !
شهقت البندري وقالت : وللممهاا الخوات حوامل ! عزّ الله كدينّا خييير ي اخواني والعجلة !!
اسر انفجر يضحك وقال : بنت ! اوزني حكيتس !!
ضحى بخبث : وهي صادزة شغالين ماشاءالله !
الميلا تفجرت ملامحها باللون الاحمر ، وصدّت وهي تقول : وجع ي ضحى !!
ضحى ضحكت وقالت : لا تتحسسين هذا الصدز
اسر فز من سمع صوت ابوه ويلحقه صوت اذان المسجد ينادي للصلاة ، زفر بعصبية : يووه م تخلوني اتهنى ! واشوفها واختلّي فيها بالفراولة !!
مد لها الفراولة ومشى يركض وهو يسمع طقطقة البنات ع الميلا اللي ميته احراج ..
" فالرياض "
تركي مشى وهو يضحك وقال : يخوي هدي طيب !
فلاح بحدة : وش ارجي منك اصلاً يالرخمة احسبك عازمني ع قهوة طلعت تشّيك ع اوراق فمكتبك !!
تركي انهار يضحك وفلاح يهاوش فيه ، مشى وقال : ابشر الحين نطلع وافر فيك الرياض فر ! بعدين تذكر انت مين ؟ اخو الحب !
فلاح بعصبية خزّه ونطق : حبك بُرص قل امين
ضحك وقال : مشينا خلصت
طلعوا من المستشفى متجهين لأي مكان هادئ تُسكب فيه القهوة بعيد عن صخب الديرة ومشاكلها ، ابتسم فلاح وقال : ننزل ؟
تركي هز راسه بنعم ومشى ينزل من سيارته وفلاح معه ، دخلوا لمحّل شاهي بحكم ان تركي وفلاح من عشاق الشاهي وكل ال مقّبل من وهم صغار م ربّوا وكبروا الا ع ريحة الشاهي والنعناع ، جلسوا ع الطاولة وقال فلاح : صح امال فالرياض شرايك نمرّهم ؟
تركي ابتسم وقال : تم عطهم خبر
فلاح ابتسم بوسع ثغره واتصل في عمته سعاد ووصله صوتها وهي تقول : ارحب يولدي ارحب يفليييح !
فلاح ابتسم وقال : الله يبقيتس ويسلمتس يعمة
ام عبدالعزيز : بشرني وقل انك بتزورنا ؟ عندنا وحدة قدهي بتخبل من الشوق
امال غصّت ونطقت بفشلة : مااما !!!
ضحك وحسّ ان قلبه هو اللي يضحك ، صوتها سعادة بالنسبة له نطق وقال : ابشرتس بعد اذان العشاء وحنّ عندكم
ام عبدالعزيز بفرحة : ي مرحبا وقربة الدار ! انت ومن ؟
فلاح ابتسم واشر بعيونه لتركي اللي فهم علطول وضحك وقال : تركي يعمة تركي
ضحكت وقالت : ي مرحبا والله ومسهلا بحبايبي !!
انتهت المكالمة بعد م اتفقوا ولف لتركي وقال بحماس : ولد نروح !
غصّ تركي بالشاهي وكح بكل قوته وقال : حششى !! يالمخفه اثقل يويلي ويلاه تووك تقول بعد اذان العشاء !!!
فلاح حكّ راسه وضحك وجلس بهدوء وقال : صادز
كملوا سوالف واخذ وعطى وتخمين للجاي من حياتهم والاحداث واسئلة كثيره عن كمية استعدادهم للي بيصير ..
" في بيت ابو فلاح "
دخل الغرفة وفزت تسكر كتاب اسود بين يدينها وتبعده عنها وتلف له وتنطق : سالم ؟
ابو فلاح بنعاس : بنام الحين صحيني ع العشاء عشان اصلي
هزت راسها بنعم وقالت : ابشر يحبيبي
مشى للسرير ابو فلاح وانسدح ومشت له وانسدحت بحضنه وقالت بحنّية : احبك !
ابو فلاح ابتسم وهي تجّدد شعوره فالحياة وترجعه عشرين سنة ورا ، ضحك وقال : اعشقتس ي خدوج !
حضنته ونام علطول وابعدت عنه بعد م غطّ بنومته ، مشت وطلعت وهي تشوف هيثم جالس مع تالين ودالين فالصالة تكلمت بحدة وقالت : وش مقعدكم هنا ؟
تالين ضحكت بسخرية وقالت : م بقى الا تطردينا نفس فلاح
ام تالين بحدة : اقصري حستس جعلتس اللسنة يحيوانه !!
هيثم قام وقال : ان لله وانا اليه راجعون ! مستحيل تسكتون هواش هواش خلاص يخي !! وين صقر ؟
دالين لفت له وهي تبتسم والكيكة بثغرها : فغرفته اقنعه يجي وتعال تكفى
هيثم : طيب
مشى لغرفة صقر ودق الباب ودخل وكان تاكي بمنشفته ع الجدار وشعره المبلول دليل شور اخذه ، ابتسم وقال : نعيمًا يالصقر
صقر ابتسم وقال : الله ينعم عليك يالثومه
ضحك بصوت عالي وقال : شف الوسخ !
صقر : شتبي ؟
هيثم : تعال البنات مسويين كيك ويبونك تجي معي
صقر هز راسه بنعم وقال : البس واجيكم
طلع هيثم ولبس صقر وخلص ومشى للتسريحة حقته يتعطر ، لف بعيونه وشاف رسالة كاتب فيها اهداف يبي يحققها ، ضحك من اول هدف وكان " اتزوج البندري غصب عنها " سحب الولاعة واحرقها وهو يحسّ قلبه يحترق ، ابعد وقال :
صابني من سواتتس في الشعور انفصام
‏مابين اغليييييك جداً و عافتس الخاطر !
-
مشى يطلع للقهوة والكيك مع اشقائه ومنها يغير جو ويغيرون هم جوهم مع بعض ..
" في مكان غريب جدًا "
عقاب ضرب تانكي الونيت وقال : جودي ؟
طلعت من السيارة ومشت له وقالت : لبيه ؟
عقاب : شكلنا بنتكي هنا
الجود برعب : تمزح صح ؟
عقاب بجدية : لا بالله م امزح فاصل اللاسلكي من الونيت ولا كان اتصلت ع ضيد منه وهنا م فيه ارسال والبنزين خلص عندتس حلول ؟
الجود لفت بأنظارها تشوف البر والظلام الدامس ع مدّ الشوف ، صدت من حسّت بالبرد ونطقت : عقاب تصرف !
عقاب بضحك : بكره صيام معتس شيء نتسحر عليه ؟
الجود بعصبية : جلسة هنا لو تنطبق السماء ع الارض م جلست تسمع ؟!
عقاب ابتسم وقال : م فيه حل ثاني
الجود بحدة : قلت لك لا تجي من هنا شف الطريق محد يمر منه الا فالسنة حسنة !!
عقاب : والمقابلة ؟
الجود : بشّيل الحظر وبتصل عليه
عقاب بحدة : يحماره اقولتس م فيه ارسال وغير كذا تحسبين بسمح ؟
الجود : انت تقول عندتس حلول هذي حلولي !
عقاب : الله يسلم رجلتس لعاد اسمع حل !!
الجود لفت له وقالت : اف منك اف !
ركبت السيارة وقفلت الباب بقوة ، ابتسم وقال : مقدر اعصب عليها والله مقدر مدري وش صابني ومدري وش حصل وصرت رقيق ورهيف معها !
مشى للباب وفتحه ولفت عليه ، سحب بوكيت دخانه والولاعة وقفل الباب ، شافته متلطم بس اللطمة تحت شفايفه لافهّ ع دقنه ، رفعت جوالها تصوره وهو يدخن ابتسمت وقالت : المنظر قبل كان عادي ومقرف الحين وش تغير !! لييه اشوفه فاتن ومُغري لحد مرعب !
صورته كم صوره وكم فيد ورجعت جوالها ، رمى زقارته ورفع جواله وشاف علامة ارسال وحده ، ارسل لضيدان موقعه وانتظر حتى صارت علامة الصحّين باللون الازرق دليل استلام ضيدان للرسالة وعلطول فهم ووجهّ مع الفريق اللي معه لحضرة فريقهم ، ركب السيارة وقال : بردانه ؟
لفت له وهزت راسها بنعم وكمل يقول : اقربي لحضني
مشت بهدوء وحضنته ، ابتسم وشّد عليها وقال :
جيتتس غريبٍ والمدى كلّه أغراب !
‏حضنتس بلد ويدينتس البيِض غيمة
-
ارتخت وتركت نفسها بحضنه ، ثقّلت عليه ويكبر فرحته ابتسم وباس راسها بقوة ولا ابعّد ترك منطوقه وشنبه ودقنه يلامسون نعومة شعرها اللي تلّون بلون البُن ..
" فالمركز "
وصلته الرسالة وانطلق يركض وقال : ضارب قداح مشينا
مشوا وهم فريق عقاب اللي يثق فيهم ، ابتسم وقال : شكله في مصيبة
ضارب : وش عنده صدق ؟
ضيدان : مدري والله بنروح ونشوف
قداح ببحة صوته المعتادة : يووه يبعده مننا !
ضيدان : والبعيد والمسافة ناكلها اكل دام فيها عقاب !
ضحكوا وقالوا بصوت واحد : حاااااي !!
ضحك ضيدان معهم ومشى لعقاب اللي يبعد ٣٠ دقيقة عنهم ، وبعد المسافة اللي صارت وصلوا للوجهة ونزلوا ثلاثتهم ، ضحك وقال : م بغيتوا ؟
قداح : البنزين ؟
هز راسه وضحكوا كلهم وقال ضارب : فجعتنا يفريق !
عقاب : افا عليك بس يالله مشينا ؟
ضيدان : تعبيه احمر ؟
عقاب ابتسم وقال : قدييم م يأثر
ضيدان : خلاص اجل نعبيه وتلحقنا سيارتي فُل
ضارب سحب غطاء التانكي وعبّوا دبّة كاملة وملؤها فتانكي الونيت وركبوا سيارتهم ، ركب ولف عليها منسدحة نايمة ، هي من قصرها وصغُر حجمها كفتها المرتبة ووفت ، شغل الونيت واشتغلت انواره الكبار وانطلق ورا ضيدان والفريق ، وبعد مسافة خط وقف بعيد عن الشركة اللي تخص عساف وطاحت عينه عليه يدخلها مع رجال اعمال وراه ، ابتسم وقال : جودي نبدأ ؟
هي صحت من فترة وابتسمت وهزت راسها بنعم وقال : انطلقي يالذيبة ! اكليه قبل اقضي عليه انا بقّي لي العظم وافتفته تفتيت !
ضحكت ونزلت ودقت تحية وقالت : اي اي كابتن !!
ضحك بوسع ثغره ونطق : يجعلني فدا منطوقتس !
مشت وسكرت الباب وركضت بالكعب والعباية الواسعة اللي تزينت بالكرستال الخفيف ، شنطتها الماركة وشكلها بالنقاب كل شيء كان مثالي ، شافته قدامها بمسافة اخذت نفس كبير وزفرته ونطقت : استاذ عساف ؟
لف عليها من عرف صوتها وابعد عن كبار رجال الاعمال وقاطع حكيهم وهو يقول : يالله ان تحيّيها !! اخيييرًا !
ابتسمت بكلافة وقالت : اسفه جيت متأخر بس تعرف الديرة والنت فيها نبدأ ؟
عساف بصدمة وفرحة بالوقت نفسه : اكيييد ! مشينا
مشت جنبه وبدأ يوريها اسم الشركة اللي يبي يتعاون معها ونطق : والله نيتي م كانت خبيثة بس ذي صفقة العمر وكنت محتاجك فيها والحمدلله جيتي !
ابتسمت بهدوء وقالت : خير ان شاءالله خير
مشوا ودخلوا غرفة الاجتماعات ، صارت تقلب فالأوراق اللي قدامها وفجأة همس فالسماعة اللي بأذنها : جودي ؟
لفت عليه وقالت : وين دورة المياه ؟
عساف : اخر السيب يمين خلصي وتعالي بسرعة
هزت راسها بنعم ومشت وفتحت الباب وقالت : عيوني ؟
عقاب : كيف الوضع ؟
الجود بضحك : تحت السيطرة وان شاءالله م تصير تحت المصخرة !
عقاب ابتسم وقال : ودعتتس ربي انتبهي لتس
ابتسمت وقالت : من عيينييا !
سكرت السماعة ورجعت تدخل غرفة الاجتماعات ، جلست ع الكرسي وقرأت الاسم وقالت : واو ! المديرة التنفيذية لصفقة عمرك انثى !؟
عساف وهو تاكي ع الطاولة : ايه اسمها حنين ال قاضي
الجود هزت راسها بمعنى " فهمت " وكملت تقرأ السيرة الذاتية الخاصة بحنين ، لفت من صوت الكعب وشافتها تدخل للمكتب وليما معها ، مدتها للمربية وقالت : take care of her !
*اعتني بها جيدًا*
هزت راسها المربية لحنين وطلعت ، ودخلوا كم رجل اجنبي للمكتب الخاص بالاجتماعات ، حنين تقدمت وقالت : اهلاً استاذ عساف ؟
عساف ابتسم ومدّ يده يصافحها ونطقت : م يحتاج !
جلس ومدّت يدها تصافح الجود اللي وقفت قايمة ع رجولها وصافحت حنين ، ابتسمت بعذوبه ونطقت : تشرفنا ؟ انا حنين
الجود بتوتر وربكة : اهلين الجود
جلست وبدأت تتكلم وتتناقش عن المجال الاول والاساسي في شركة HMQ والكل يسمعونها كل م نطقت بجمله وانتهت منها ترجمت معها مساعدتها ، تكلم احد المستثمرين بالانقليزي يسأل عساف ولف للجود اللي بدأت تتكلم بكل طلاقه تدري به م يتكلم انقليزي ابدًا ، صارت تتكلم عن حقيقته وانه جايبها هنا قصّرًا واجبارًا منه ، والكل تغيرت وجيههم وهو مثل م توقعت م يدري ولا طالع حتى فيهم ، حنين وقفت بصدمة وقال عساف : عسى م شر ؟
حنين ابتسمت وقالت : لا بس احتاج اشّيك ع بنتي
عساف : اوه لا ابد خذي راحتك
مشت تطلع وقامت الجود وقالت : دورة المياه !
عساف ضحك وقال : خذي راحتك
طلعت ومشت لحنين اللي وقفت مصدومة ، نطقت : وين بطاقتتس الوظيفية ؟
الجود ابتسمت من سمعت اللهجة وقالت : حبيبي اي بطاقة اقولتس جايبني غصب وباقي تقولين بطاقة ؟
حنين برعب : والسواة ؟
الجود : بسيطة ندخل وقولي انه فيه خسارة لكم كبيرة وانسحبي
حنين اخذت نفس وزفرته وقالت : يالله توكلنا ع الله
دخلت وفعلاً قامت تشيل اغراضها المساعدة من عرفت نظرة حنين الفارس لها ، عساف قام وقال : فيه شيء صاير ؟
حنين بحزن : معليش بس اشوف فيه خسارة كبيرة لشركتي والله يعوضك باللي احسن ..
" عند عقاب وفريقه "
اول م سمع صوته دقّ قلبه برعب وقال : هذا سبب التفجير فالمبنى !!!
ضيدان لف وقال : ايش ؟
عقاب بحدة : هو نفسه نفس الصوت اللي كان يشوش علي وخلاني ادعس الخيط ونفس الضحكة !!
ضارب بحدة : ابو سعود !
قداح بصدمة : ابو يوسف !!
ضيدان : وانا بن حثلين !!!!
عقاب : ونعم خلصتوا ؟ مشينا نداهم
دخلوا كلهم من الدرج الخلفي للشركة ، عقاب متيقن انه هو وشكّه كان في محله ، طبّوا مكتب الاجتماعات ونطق عقاب بحدة صوته الجهورّي : عساف !!
لف عليه بصدمة والكل وقفوا برعب من تشهّرت الاسلحة بوجه عساف ، نطق ضيدان بهمس : شد حزامك وانا لك سند !!
عقاب ابتسم بخفه وسحبه علطول وضرب راسه تاركه يستقّر ع الطاولة قدامه ونطق بحدة : انت موقف بأتهامات اولها الشروع بقتل رتبة فريق والثانية ابتزاز فتاة بصورها ونشرها !!
كان يقصد نفسه ويقصد حَرمه اللي تطالع فيه مفجوعة ، شلون لبس عقاب بدلته ودروعه ، م كانت تعرفه ابدًا وجهه مغطى بالكامل وم يميزه الا صوته اللي تعرفه زين واسمه اللي معلق ع صدره ، ابتسمت بخفه اول م مشى لها وباس راسها ونطق : مشينا ؟
هزت راسها بنعم وطلعت معه ، نزلوا وبقى ضارب وقداح اللي فتشوا كل انش فالشركة وطلعوا اشياء تشّيب الراس من غسيل اموال وشهادات مزورة ، اشياء كثيرة م بتفيد عساف ابدًا بالعكس بتغرقه للأبد فالسجن ، ضحك وقال : اجل غانم اسمه !
عقاب وهو يشوفها فالسيارة تنتظره لف لضيدان وقال : الباقي عليكم يرجال !
ضيدان : استرح نفداك
مشى عقاب وركب سيارته ولف عليها وقال : للديرة ؟
هزت راسها بنعم وقالت : عبّ بنزين اول
ضحك وشابك يده بيدها ، لفت وتذكرت يده اليوم والدبلة اللي بيده والحين القفاز الاسود والدرع البسيط اللي ع كفه ضحكت وحطت راسها ع كتفه وابتسم ومشى للديرة ..
" عند تركي وفلاح "
زفر بعصبية وهو يستنى من بعد الاذان تركي يطلع من المحل ويفكه من الانتظار ، صرخ وقال : تركي !!!
طلع من المحل وهو يقول : وجع وجع اص فشلتنا !!
فلاح رفع حاجبة وقال : وشذا ؟
تركي : دبلة لأختك
فلاح بحدة : خير وانا بعد ابي !!
تركي انفجر يضحك وقال : انزل خذلك !
نزل فلاح وبالفعل سأل عن اغلى واندر قطعة عندهم واخذها لآمال كيف لا وهي صارت الغناة بحياته بعد الفقدان المحزن اللي صار له مع امه ، طلع وهو يبتسم ومعه ورد وحركات ضحك تركي وقال : م يليق يخي !!
فلاح ركب وقال : محد سألك حرك !
تركي كتم ضحكته ونطق : سمّ
مشوا لبيت ابو عبدالعزيز ودخلوا من شافوا عبدالهادي ينتظرهم ونطق : ارحبوا !!
فلاح ابتسم وقال : البقى ي مرحب !
تركي : يالله انك تبقييهم !
دخلوا داخل للمجلس وكان ابو عبدالعزيز فيه وام عبدالعزيز بعد ، فزّوا وسلموا ع بعضهم ونطقت بهمس : امال فالمقلط
فلاح ضحك وقال : م قد صار كتب كتاب جيت نكتب ونخلص امورنا
ام عبدالعزيز زغرطت بفرحة ونطقت : والشيخ جاي بعد اقتراح من عمك مقرن
لف فلاح لأبو عبدالعزيز اللي ابتسم له وابتسم وقال : م تقصرون ابوي م جاء والمعذرة
ام عبدالعزيز بحدة : م نبيه يجي اصلاً
عبدالعزيز ضحك بصوت عالي وقال : جاته ع م يحب فليح
تركي انفجر يضحك وقال : اييييه م تشوفه طاير ! وبعدين يحظي انا الوحيد اللي بشوف فلاح يوقع
فلاح : اسر بيذبحني لكن معليه
بعد الكلام بنص ساعة جابوا الشيخ وتممّوا ووقع فلاح ع امال زوجة له مع الموافقة ع جميع شروطها ، م قدر يفرط فيها ووافق ع كل شيء بصدر رحب ، ام عبدالعزيز زغرطت من عند الباب اول م وقعت امال ضحكت وقالت : ي ماما خلاص
ام عبدالعزيز باست راس بنتها وقالت : يجعلني دوم افرح فيتس يبنيتي يالله عساه عرس الدهر !!
امال بفرحة : امييين يميمتي اميين !
ام عبدالعزيز لفت وقالت : الشوفة الشرعية ولبّس الدبلة
مشى فلاح ودخل بتوتر ، سكر الباب ولف عليها ، ركضت بعذوبتها وانوثتها الطاغية وضمتّه لصدرها بكل قوتها وقالت بحنّية : والله لا احتويك والله م اكسرك ولا ابكيك بيوم والله لا اعوضك كل اللي فقدته ي حبيبي انت
تراعد جسده وهو يحسّ فيها تدخله لضلوعها ، كثير ع فلاح اللي م ذاق الحضن الا كم مره من خواته في ثلاثة وثلاثين سنة م تعتبر شيء ينذكر ، كلامها له وحلفّها يمين انها م تخذله ولا تتركه كان كثير عليه ، بكى من فرط شعوره ، بكى حزن وفرح واختلاط كبير بمشاعره ، بكى وحسّت بدموعه ع كتفها العاري ، شهقت وقالت : لا يبعد اهلي م تبكي !!
حاوط خصرها وشّدها عليه ، دفن وجهه بعنقها وهو يقول بهمس : يجعلني م اخلا ولا اعدم يالله انك لا تحرمني منها !
امال برجفة دقنها والبكية اللي داهمتها : امين يحبيبي بس تكفى انتبه لقلبك لا تبكي وتحزنه وتحزني !!
ابعد عنها وباس راسها بقوة وقال :
تخاف على قلبي.. وقلبي مبدّيّك
‏ياللي معي حتى لو إنّي لحالي
أغليك مدري ليه للحيّني أغليك؟
‏تستاهل أكثر من غلا وأنت غالي
على كثر ما أعطيك ماكنّي أعطيك
‏ماعندي أغلى منْك يا أغلى حلالي
لاضقت ماراح أسألك ليه؟ وش فيك؟
‏أبخص طريق رضاك.. وأجهل سؤالي !
-
حضنته من جديد وهي تضحك وتقول : اف كيوت وعلومه غانمة !
انفجر يضحك بحضنها وقال : اعقبي !
امال ضحكت وقالت : تجنن والله مقدر شلون فرطوا فيك الله حسيبهم !!
فلاح ابتسم وقال : ظروف الوقت ردّيه وانا اخوتس..
قاطعته وهي تقول : وانت اخوي اوكيييه اسلم ؟
فلاح ابتسم وباس خدها بهدوء وقال : لا تلعبين ع الحامي من البداية ونخربّها !
ضحكت بتوتر من فعلاً حسّت انها مندفعة وقالت : شدعوة !!
فلاح سحب الورد ومدّه لها واخذ الدبلة ولبسها وقال : الحين اللي بخاطرتس لا تردينه قوليه ووالله م يجيتس الا تم وامرتس ولبيه !
ابتسمت ابتسامة عريضة وقالت : احبك !
هزّت كيانه بالكامل واكتفى بأبتسامة خفيفه ونطق بهدوء : كثير ع قلب بدوي هالحُب والحركات كثييير ي امال !
ابتسمت وقالت : اسمي حلو منك ! قوله مره ثانية
فلاح حاوط خصرها وشّدها عليه وقال بصوته الثقييل : انتي والله م ينقال لتس املي ؟ انتي امال اسم ع مسمى انتي امالي فالدنيا كلها واقصى امنياتي
ابتسمت وباست لحيته بهدوء وقالت : لا خلا ولا عدم ع قولتك !
ابتسم وقال : ايه ليه وافقتي ؟
امال شابكت يدينها ونطقت : سمعت كلام كثير من تالين عنك والصدق متحسفة اني فكرت ارفض !
فلاح ابتسم وبعد الخصلة اللي ع خدها وترك اصابعه تلامس خدها النّدي ونطق :
لو ادري ان العوض ي امالي فيتس ؟
م كان ضاق خاطري ع خيبات الماضي !
-
باس راسها بحنّية وقال : وداعتتس نفستس انا ماشي للديار
ابتسمت وقالت : انت اللي انتبه لنفسك م اضمن خديجة الساحرة ذيك !!
ضحك بخفه من قالت الساحرة مثل م هو يناديها ، مشى وطلع برا يشوف تركي واقف مع عبدالعزيز ، لف تركي وقال : اخيرًا يعريس ؟ مشينا !
فلاح هز راسه بنعم وقال : ودعناكم الله ي عزوز
عبدالعزيز ابتسم وقال : الله يحفظكم ويستر عليكم جايينكم بكره للفطور ان شاءالله
تركي ابتسم وضرب كتفه بخفه ونطق : اجل في امان الله
مشوا وطلعوا من البيت راجعين للديرة بأخبار جديدة ومع دخول رمضان اولها واهمها ملّكة فلاح ع امال وثانيها خاص بتالين اللي طلبت دبلة ماركة وطقم لها وله وجابها تركي لها بدون م يفكر بالسعر حتى ، الغالي يرخص عند الغالي ..
" فالديرة "
اصوات الاذان بعد صلاة العشاء والمنادى لصلاة التراويح في ليلة الثلاثين من شعبان ، كل من فالديرة يتسابقون للمسجد ، سواء اللي فيه وقاموا يصطفون ، واللي جايين يلحقون الصلاة ، الكل لبى النداء والكل كبروّا لرب العالمين صلاة التراويح احد السنن المؤكدة للرجال والنساء ، صلّوا صف يليّه صف بشكل جميل جدًا ومريح للصدر ..
" في بيت ابو فهد بعد منتصف الليل "
رجع بعد قعدة طويلة مع شباب الحارة ، مشى يترنح ويلعب بالسبّحة بيده ، يدندن شيلة يحبها وقريبه لقلبه :
اتعبتنا بالصد ماقدت الاسباب .. ماهكذا طبع المحبه والاحباب
نظره تداوينا وتروي ضمانا .. نظره تداوينا وتروي ضمانا
ضحك لثواني اول م شافها ولمح عيونها الوساع السود وهو يقول : اووووه .. نظره تداوينا وتروي ضمانا خلك معنا خلك معنا
مشت الميلا وطلعت تجلس ع عتبة باب المطبخ الخلفي وضحكت وهي تشوفه وتاكل بقايا الفراولة : جييت ؟
مشى وهو يترقص ويناقز ويكمل اخر ابياتها وهو يقول :
العمر مايسوى بدونك دقيقه .. مقدر على فرقاك هذي الحقيقه !!
قرب وباس خشمها وقال : اي والله مقدر ع فرقاتس !
ضحكت بخجل واشرت جنبها ونطقت : اجلس
جلس وحاوط خصرها وشّدها عليه وقال : وين الاهل ؟
الميلا : نايمين شايف الساعة كم ولا م انت شايف ؟
اسر ضحك وقال : كم يحبيبي كم ؟
الميلا ابتسمت وقالت : نص الليل صرنا
اسر ابتسم وتركها وشابك يدينه قدامه ، تستقر ع ركبَه ورفع عيونه لنصّف الهلال فالسماء دليل دخول شهر رمضان المبارك ، ابتسم وقال :
قبل كنت انا والليل خلاّن ورفاقه !
-
لفت له وقالت : والحين ؟
اسر ابتسم ونزل راسه وانظاره لحُضنه ونطق :
خذيتيني منه عشق واخذتتس لي عشّاقه !
-
الميلا تقدمت وباست خده ودقنه الشائك اثر الشعر الخفيف بكل قوتها ونطقت : يعساه ينعاد علي وانت معي كل عام وانت بخير ي آسري !!
لف عليها وشابك يده بيدينها الصغار ونطق :
جانا رمضان وحنا حبايب وخلان
‏اول رمضان معتس ياجعله كل عام !!
-
حضنها لصدره وفز من نطق عقاب : متوزّي هنا يالوسخ ! وش تسوي !!
شهقت برعب ودخلت داخل ، فز وقال : لعنه يكلب !! وش عندك جاي تختل !!
عقاب ابتسم وقال : الشهر علييكم مبارك يبو كنوز وام كنوز
الجود ضحكت من وراه وقالت : انا اللي قلت له يخرشكم
" قبل دقايق معدودة "
دخلوا مع البوابة ورفعت عيونها تشوف الهلال ، ابتسمت وقالت : رمضان جااناا وفرحنااا به !! بعد غييااابو
ضحك وقال : ابوي لا يطلع عليتس قطع ظهرتس !
الجود : وشو بقوله رمضان كريم يعم !!
عقاب وهو يضبّط ثوبه بعد م نزل البدلة فالونيت : وجلدّ ابوي اكرم ؟
ضحكت بسخرية وقالت : سخيييف !
مشت متجاهلته وراها ، وسمعت صوت الميلا واسر ضحكت وركضت راجعه له ، نطق وقال : علامتس ؟
الجود بهمس : ااصص لا يسمعونك رح افجعهم
عقاب اشر بأصبعه ع خشمه وقال : ابشري
مشى وفعلاً فجع اسر اللي فز والميلا اللي دفعت نفسها داخل المطبخ ..
" وعندهم "
اسر لف لها وقال : حسايف كنت احسبتس العاقلة طلعتي اخس من عقيب !
الجود ضحكت وقالت : رمضان كريم يبو كنوز
اسر ابتسم وقال : ربنا اكرم يأم تميّم
عقاب حضن اخوه وقال : ثلاث وثلاثين رمضان معك يالعضيد ويارب كل اعوامي تغرقَ بحسّك نفداك
اسر حاوطه ونطق : يجعلني فداك صدق ! ينعاد علينا وعليكم بالصحة والعافية !
ابتعدوا عن بعضهم ونطق عقاب : وينعاد اعوامًا مديدة والاخوات ع ذمّة الاخوان
ضحكوا كلهم ، الميلا اللي متلثمه عند باب المطبخ ، والجود اللي سبقتهم لغرفتها ، واثنينهم واقفين فالحوش ، دخلوا بعد كلمات جميلة استقبالًا لرمضان وكل واحد غطّ في نومته ..
" عند باب بيت ابو فلاح "
تركي وقف وقال : ودي انزل لها بس دايخ الوعد بعد الفطور
ضحك فلاح وهو ينزل وقال : اييه انتبه لصيامك يولد العم
تركي ابتسم وقال : المشكى ع الله يفلييح !!
مشى بسيارته لبيت ابو تركي اللي يكون بعيد شوي عن الديرة ، او عن بيوت اخوانه ، فتح بمفتاحه ودخل علطول للبيت ومنها لغرفته ، ابتسم ونزل اغراضها والورد مشى للفريزر فالمطبخ وحطه فيه وضحك وقال : يارب امي م تحطه ع الحلى بكره !
مشى راجع لغرفته ينام عشان يلحقون الصلاة بكره ..
" اول ايام الشهر الفضيل "
بيت ابو فهد يعجّ بالاصوات والناس طالعين داخلين ، الجود مشت ودخلت المطبخ وهي طالعة من غرفتهم ونطقت : نوني !
البندري لفت وقالت : جابتس الله تعالي لفي السمبوسة معي
الجود غسلت يدينها وجلست تلف معها ونطقت بهمس : وين عقيب ؟
البندري : لا تنصدمين
الجود رفعت حاجبها وقالت : لا تخوفيني !
البندري ضحكت وقالت : طلع مهمة الصباح !!
الجود شهقت بقوة وقالت : تستهبليييييين !!!
البندري انفجرت تضحك وقالت : زوجتس وهاوشيه اذا رجع انا مالي ومالكم !؟
الجود بصدمة : مهمة ! توو رجع من وحدة اش الهوس ذا !!
ضحى بحدة : اتركوا مني عقيب وخلصوا السمبوسة !
غزيل وهي تحركّ الشوربة : خلصوا صدز !!
الميلا دخلت بالسلطات اللي انتهت من تقطيها فالصالة مع حصة ، حطتها ولفت وقالت : ياربي وش التعب ذا
ضحى ابتسمت ابتسامة عريضة وقالت : والله انا الوحيدة المبسوطة فييكم رمضان اللي فات كرفت لحالي ليّن عضيت الارض ! عقبال م يجي رمضان الجاي وانا مع زوجي
البندري بصدمة رمت السكين عليها وقالت : وييلمها !!!
غزيل انفجرت تضحك وقالت : السكييين !!
ضحى انفجرت تضحك وقالت : تبيني اموت وش الاخت العاقّه ذي !
البندري بسخرية : سكين سلطة ! م يسوي شيء انتي حتى الساطور م يقدر عليتس !!
ضحى ضحكت وقالت : شف الحيوانه !
غزيل بضحك حدّت من صوتها ونطقت : بس انتي وياها خلصوا الفطور ! ولا ناسين العدد الهائل اللي بيجي ع المغرب ؟
الميلا : سمعت ان احلام بتجي وان فهد حلف م يدخل البيت بدونها وعصب عمي ووافق
البندري بحدة : الله يجعله السلال !!
ضحى انفجرت تضحك وقالت : صااايمه !!
البندري شهقت وقالت : يووه اللهم اني صايمه
الميلا انفجرت تضحك وقالت : يخي البندري !
كملوا ع النهج ذا من سوالف وضحك ومهابد يخلصون الشغل بعد م حلفَوا ع ام فهد تجلس وترتاح هي وغالية ..
" قبل ساعات تحديدًا بعد صلاة الفجر "
نزل من سيارته ورفع جواله يشوف الساعة ، الشمس باقي م شرقت ، اتصل عليه ووصله صوته وهو يقول : هلا ضيد ؟
ضيدان ابتسم وقال : طويل العمر جاهز ؟
كان يقصد المهمة اللي طلبه عقاب يدخل اسمه فيها وقت داهموا عساف او غانم متعدد الاسماء ، وهو فعلاً دخل اسمه والمهمة ع حدود الرياض قريبة وشغل مكاتب وتدريب فقط لا غير ، حسّ ان خاطره ينشغل بشيء ثاني بعيد عنها ، م حب الضعف اللي يمر فيه ابدًا ، استحلته عقلًا وقلبًا م يقدر يفكر بشيء غيرها لمدة ثانية وحدة بس ، يعشق المهام اللي تتطلب تدريب عساكر يحب يكون مسؤول وقيّادي والكل يهابه ويسمع وينصب وينقال له لبيه وسمّ وامرك ، يكسّيه الغرور من اسفل قدميه لأعلى رأسه ، كيف لا وهو الفريق عقاب بن عايض بن مساعد ال مقّبل ، ابتسم ورد : جايك !
ضيدان : منتظرينك حضرة الفريق
قفل جواله ومشى ، اخذ دش سريع وطلع ولبس بدلته ، البريهه ، الشارات ، رش العوّد ع بدلته ومشى لها ، باس راسها ونزل لكتفها العاري وضحك بخفه وقال : اللهم اني صايم !!
مشى ولف عليها وقال : ودعناتس الله
مشى وطلع وسلم ع ابوه وباس كتفه وقال : يبه وداعتك الاهل والبنيّة انا طالع مهمة ومطول فيها
ابو فهد ابتسم وقال : مهمة تدريب ؟
هز راسه بنعم ومسكّ ابوه كتفه وقال : الله يوفقك وينور دربك يولدي ودعناك الله والاهل والبنيّة في امانة ربك ثم امانتي ليّن تحّن وترجع !
عقاب ابتسم ونزل وباس ركبته وقال : ودعناكم الله
مشى وطلع من البيت ، سلم ع ضيدان وركبوا وحركوا لمكان المعسّكر اللي يبعد مئات الكيلومترات عن الديرة ..
" في بيت ابو تركي "
صحى ع صوت امه اللي تناديه ، مشى لها وقال : سمّي ؟
ام تركي ابتسمت وقالت : تالين فالصالة م ودك تسلم عليها ؟
توسعت عيونه بصدمة وقال : اسألتس بالله !!!
ام تركي ضحكت وقالت : والله جهز نفسك وتعال
تركي طار يركض لغرفته واخذ دش اسرع شيء وطلع ولبس ثوبه وركض يتعطرّ ، اخذ مسواكه واستقّر بين شفايفه ، ركض يجفف شعره ، ولد المدينة يعشق الاهتمام بنفسه ، حطّ ماسك فالحمام وانتهى منه ، حطّ كريم يرطب يدينه ولبس اساوره وساعته وخّتمه ، مشى للصالة وقال : كذا اقدر اقول بدا الشهر
قامت تالين وضحكت وقالت : تراني ثقيلة م جيت عشانك جيت بأكل لعمتي
تركي انفجر يضحك بصوت عالي وقال : والثقيلة لازم تدري ان الفطور اول يوم عند اكبر عمانها ولا ؟
ضحكت وقالت : كل عام وانت بخير ومعي بكل اعوامي تروك !
ابتسم ومشى وحضنها وقال : يارب رمضاناتي عامره بحسّتس يبعد طوايف تروك !
ضحكت وحاوطته وقال : م نسيت الهدية ؟
تركي ابتسم وقال : نسانتس موتتس م نسيت !
تالين ضحكت وقالت : خلاص ابعد رمضان رمضان !!
ضحك وابعد وجلسوا قبال بعضهم ، تعمدت ام تركي تكسر ام تالين في بنتها واتصلت عليها تطلب مساعدتها بحكم ان بناتها كلهم اعرسّوا ، ولمّا وصلت تالين علمتها ان تركي متضايق وتبيها تجلس معه ، وكل الامرين كذبة ! بس م تبيه يتضايق تخاف ع بكرها من الحزن وتعرف تركي ع طيبته اذا انكسر يعفّس الدنيا ويبعد قد م يقدر عن الناس كلهم ..
" في بيت ابو فهد "
ثامر بصراخ : شّل زييين يعم !!!
اسر بحدة : وش تشوفني اسوي ؟!
ثامر بآلم وصراخ : بطيحها وربي بطيحها !!!
اسر بصراخ : لاااا !!!
م امداه يصرخ الا وكرتون علب الفيمتو متساوي مع الارض ، اللي واضح لهم انها انكسرت اربع علب ، شهق اول م ضربه اسر ع ظهره وهو ينطق : الله..
ضحك ثامر بآلم وقال : صيام يعمي صيام
اسر بحدة : يالرخمة !!
ثامر : علمتك اني بطيحها وانت مسوي عضلات ماسكها شّل من الونيت لييّن باب المطبخ !
شهقت ضحى وقالت بحدة : يمّلا الكسر !!!
اسر اشر ع ثامر وثامر اسر ع اسر ونطقوا : هو !
ضحى بحدة : لا بالله !؟ ادخلوا نظفوه بسرعة
اسر رفع طرف ثوبه وركض وهو يقول : تعقبين !!
وثامر ضحك وقال : سييوو !!
ركض ورا عمه تحت صراخ ضحى عليهم ، مشت الميلا وشهقت تحسّبه دم نازل من ضحى ، الفيمتو تحت رجولها ، لابسة قميص روز ولا شيء واضح ، وتصارخ نطقت برعب ودموعها اخذت مجراها : ضحى !!!
لفت لها بحاجبها المرفوع ونطقت : علامتس ؟ تبكين !!
الميلا وهي تأشر وتبكي : دم دم !!
ضحى انفجرت تضحك وقالت : فيمتو الله يخلف ع زوجتس وبزّيه ثويمر !!
~ البزّيي كلمة جنوبية حبيت اضيفها تعني : ولد الاخ ، الاخت 🤣 ~
الميلا اخذت نفس طويل وزفرته وقالت : روعتووني ييمه قلبي يدق !!
ضحى ضحكت وقالت : بسم الله عليتس سمّي بالله كنت بقولتس اشربي ماء بس صيام
ضحكت الميلا وهي تمسح دموعها بعنّف وقالت : بموته اسر ذا بموته !!
ضحى : اييه الله يرحمني تعالي بس ننظف
الميلا مشت وبدت تمسح مع ضحى الاربع علب والباقية نجتّ بأعجوبة من يدين ثامر واسر ..
" فالمعسّكر "
وصلوا ع اذان الظهر ومشى وطلع ع العتبة العريضة ونطق بحدة صوته الجهورّي : ي عسكر ! استعداد !!
ضربوا التحية لعقاب وتكلم معهم عن طريقة التدريب اللي بيبدأ من بعد الفطور بساعة وينتهي قبل السحور ، وكان منهم الايجاب اجبارًا م عندهم حلّ ثاني ، مشى للمكتب حقه ودخل وقال : من الافرقة اللي موجودين ؟
ضيدان : محد بس انت الفريق الوحيد والقريق اول مهُاب بيجي بعد شوي يقول يبي يكلمك بموضوع خاص وضروري
عقاب هز راسه بمعنى " فهمت " وبدأ بالاوراق والمعاملات اللي عنده يبي يخلص قبل الفطور وقبل يحضر مهُاب ..
" بعد عشرين دقيقة "
دخل مهُاب للمكتب وابتسم وقال : الشهر عليك مبارك !
عقاب ابتسم وضرب تحية لمهُاب وقال : علينا وعليكم مبارك !
تقدم مهُاب وسلموا ع بعض " سلام الرجال " وجلسوا ونطق مهُاب : مالك فالطويلة انا طامع في نسبكم يعقاب !
عقاب عقّد حواجبه ونطق : والله ونعم حضرة الفريق !!
مهُاب ابتسم وقال : معليك زود وسمعت ان عندكم بنات وانا والله ابي اكمل نص ديني
عقاب ابتسم وقال : كلام ؟ مقدر اعطيك كلام الشيبه حيّ والله يطول بعمره خلها بعد رمضان متى م انتهت المهمة نمشي سوا ونكلمه وشرايك ؟
مهُاب : ابد يناسبني ولاني مستعجل
عقاب : تمام اجل اشوفك ع خير يبو عبدالرحمن
طلع مهُاب من المكتب وهو ناوي يتمّم عند اهل مساعد ال مقّبل ، بياخذ البندري بعد م سمع من العيال ان سهم تقدم للكبيرة ، م يهمه فارق العمر او الحب والكلام الفاضي يبي مرأة تسانده بحياته ويساندها هو رجال ورتبته وسمعته سابقته ، ضامن نفسه عند عقاب وهالشيء مطمنه ..
" في بيت ابو فلاح "
صقر طلع يركض بعد م اتصل عليه ابو فهد يجيه يساعد اسر وناصر بحكّم ان فلاح منخمد وم يرد ، لبس جزمته وصرخت امه من وراه : ع وييين ؟!
صقر زفر بعصبية واستغفر ومشى يطلع من الباب ، ركض ووصل لنصّ الديرة يمشي ويشوف الناس وطالعين داخلين وريحة الاكل تعجّ بالجو والاجواء الرمضانية من الانوار اللي متعلّقه فأسقف البيوت ، ابتسم ومشى هو يدري وش السبب الرئيسي اللي خلاه يركض لبيت عمه ويفزّ من نومته يركض والسبب الاول والاخير هي البندري ، مشى ووصل للبيت ورفع صوته وهو يقول : يوولدد طررييقق !
اسر ابتسم وقال : جااابك الله اقلط
صقر دخل وهو يضحك وقال : جابني الله ثم عمي اللي متصل علي
ثامر : والله لو م قلت له م يدق ونلقم
صقر : يالله مشينا نخلص وش السالفة ؟
ناصر زفر بتعب وقال : نشيل مقاضي رمضان اللي تكفي الديرة كلها وندخلها للمطبخ
اسر صفق بحماس وقال : سمّوا بالله واحتسبوا الاجر
صقر ابتسم وشال اكياس بيدينه ونطق : به احد قدامي ؟
ثامر رفع كتوفه بعدم معرفة وقال : نزلها عند عتبة الباب وافلحنا
صقر ضحك بخفه ومشى هو ميت حُب فيها ويدري بهالشيء وعاجبه بعد بس يكابر وقت م يشوف عيونها ، نزل الاكياس ونطق ثامر : يولد الاغراض
البندري لفت وقالت : جايه جايه
ثامر : لا تطلعين صقر معنا
البندري ابتسمت من سمعت طاريه ، مثل م شقّت وجهه ابتسامته من سمع صوتها ، اسر نزل الاكياس ورفع جواله من وصله اتصال من عقاب ونطق : ارحب !
عقاب ابتسم وقال : البقى ي مرحب
اسر ابتسم وقال : وشخبارك ؟
عقاب : بخير جعلك بخير انت وش وقعك وش وقع اللي عندك كلهم ؟
اسر : كلن بخير ونسلم عليك فقيدة من اول يوم يبو تميّم !
عقاب حكّ راسه وضحك بخفه ونطق : جعلني فداك يالعضيد اسمع !
اسر : مجار سمّ ؟
عقاب : برجع فالعشر الاواخر ومعي خُطاب !
اسر توسعت عيونه وقال بهمس : سهم ؟
عقاب بشبه حدّة : يرجال محد ضامن سهم يتكلم عند العربان والرجال انه يبي وضيح ولا جاء يتقدم !
اسر : لا يعقيب كل شيء بكفه وسهم قلبي بكفه ! وجاء وتعنى وخطب لحاله بدون اهله وعارضه الشيبه بدون سبب !! والله لا يجي ان اوافق عليه وان اخليه يملّك ع وضيحي ولا علي بأطلق شارب !!
عقاب : مهُاب
اسر كح بصدمة ونطق : لمين غالية !! بشرني
عقاب : مدري م حدد بس مستحيل اعطيه بندري وانت مستحيل تعطيه ضحى والرجال كبير يناسب لغالية يمكن ربي كتب لها نصيب بعد هالسنين
اسر ابتسم وقال : الله يجيب الخير
عقاب وهو يسمع ضيدان يناديه : اجل اشوفكم ع خير
اسر : وداعتك نفسك
سكر وكتمّ الموضوع هو وعقاب متفقين انه يكون مهُاب لغالية كبيرتهم ذات الاربعين سنة ومهُاب ستة واربعين ، يناسب وجدًا ..
" في بيت ماهر واهله بحايل "
دخل الغرفة مكسور الظهر ، اللي خاف منه حصل وتوفت مزون وتركتهم بكسّر م يجبر ابدًا ، انتهى العزاء الصعب ع بيت ماهر واهله ومحد طايق الثاني ، مقدر يكلمها ابدًا من سوء النت في حايل وخصوصًا في بيتهم القديم اللي رجعهم عمهم له بعد م طردهم من بيتهم الكبير ، تحت شرط موجع يسمى " صك بيت بأسم ابو خالد " الدنيا تسكرت بوجيههم بالمعنى الحرفي ، سكر باب الغرفة عليه اخر عنقودهم توفت بأثر سكتة قلبية بعد م شافت عمها والسبب بصمّها وبكّمها م تحمل قلبها الرقيق المنظر وطاحت عليهم ، ركضوا فيها للمستشفى لكن صدمهم الدكتور من نطق بـ " ان لله وانا اليه راجعون عظم الله اجركم في بنتكم " ..
" قبل ثلاث ليالي "
ماهر بكل خلية ترجف فيه يركض بممرات المستشفى ويصارخ بكل قوته : الحقووونااا اوخييتيي لا ترروح !!
فزّوا الطاقم الطبي يركضون لهم ، كانت عيونه متوسعة بصدمة خالية من الحياة ، تغيّير كثير عن شكله وقت م كان بين احضانها في بيتهم ، وم زاد هلاكه الا خروج الدكتور فورًا ونطق بكلمته وضاف اليها " توفت قبل اربعين دقيقة !! "..
" نرجع لماهر "
انسدح وفتح ازرار ثوبه بضيقة صدر مهلكة ، عجز يقابل عبير اللي رّبت مزون من وهي صغيرة ، عجز يشوف امه اللي مكسورة شدّيد الكسر ع بنتها واخر عنقودها ، حبيبتها الصغيرة ، الملاك اللي جبّرهم يتكلمون بلغة الاشارة ويتعلمونها بكل حب وشغف ، صرخ بكل حرقة وبكى ، انهار ماهر بعد صمود اسبوع وزيادة من فرقاها ، بعد ثلاث ايام من وفاة اخته ، بكى وسحب جواله م يشوف الشاشة من دموعه ، ضغط ع رقمها ، عضّ شفايفه بحرقة يكتم شهقاته ، ووصله صوتها وهي تقول : ماهري !
ماهر شهق بكل قوته وقال : انا معادني قادر !!
شهقت ونزلت دموعها وقالت : يمه بسم الله ماهر وشفيك ! تعوذ من ابليس بسم الله
ماهر ببكي ومشاهق وحرقة قلب : توفت مزون وخلتني وخلت امي وعبير وسابر وراها توفت من شافته اسود الوجه توفت وانطردنا من بيتنا !! اه ي دانتي تكفيين معادني قادر !!
دانه طاحت بطولها تبكي بحرقة وقالت : ياررربي وش اقول ووش اخلي !! ماهر تعوذ من ابليس تكفى خلاص تجبّر بربي وبكلم اهلي بجيكم والله م اخليك لوحدك
ماهر هز راسه بنفي وهو يضرب راسه بالارض بخفه وينطق بحرقة : مابي اشوفتس لا تجين ! بيوجعونتس فيني وبيوجعوني فيتس !
دانه بصراخ : مابي حتى انا !! بجيك غصب !!!
ماهر رفع نفسه واخذ نفس عميق وزفره ، مسح وجهه وشنبه وقال بحرقة :
سلكت اللي سلكته في دروبتس ليين بان النور
‏معتس بالذات ؟ماخفت الدروب لوين ترميني
هويتتس والهوى في سلم أهلنا عادته محضور
‏و جابهت المخاوف .. والسلوم بكلَّ ما فيني !
وغرس ناب القدر في داخلي جرح وحزن وقبور
‏و لا لي قـدرةٍ في ردَّ حـكمٍ عنتس ي دانتي ينفيني !!
-
دانه بكت بكل حرقة من فهمت الابيات ، بكت وبكت وانهارت ونطقت : تكفى لا تكفى لا تخلييني !!
ماهر : ودعناتس الله ي دانتي والله اني ماني راضي عن اللي بيصير بس ظروف الوقت حكمت وظروفنا قاسية م ترحم ودعاتتس قلبتس لا تنسيني !
سكر علطول ورمى جواله ، طاح يبكي بكل حرقة فيه ، بكى بكى ليّن داخ ونام ..
" في بيت ابو دانه "
دخلت امها من سمعتها تصارخ وتشاهق ، ترمي كل م تطيح عينها عليه ، من جوائز وهدايا وعطور ، ركضت وقالت : يمه يبنتي علامتس يدانه !!
دانه بصراخ مرعب : يممه تركني وراه !! يمه تركني وراح راح وهو مجروح ومنكسر سمعته يبكي لأول مره !! سمعت شهقاته وانهياره ! ماتت مزون يمه تكفييين يمه وديني له تكفيين خليني اشوفه تكفييين يمه
ام دانه بكت علطول وقالت : بسم الله يارب ! انا لله وانا اليه راجعون يارب صبرهم ويارب ارحمها واغفر لها وغمد روحها الجنة ! بس دانه ابوتس وش بيقول والله بيرفض !!
دانه بصدمة وصراخ : مسستحيييل اتركه ولو تركني والله م اخلييه ودووني !!
ام دانه حضنت بنتها وبكت بحرقة عليها ، تشوف وحيدتها تنهلك قدامها بكل انكسار ع زوجها اللي م تمّت الامور بينهم ، صدّت اول م طاحت بين يدينها منهلكة ومغمى عليها ، شالتها بهدوء للسرير وشغلت التكيف وطفت الانوار وطلعت وهي م تقدر ابدًا تخليها كذا او تكلم زوجها بالموضوع وهي تخبّر ملهم اذا قال كلمة م يرجع عنها ابدًا ..
" في غرفة عقاب "
دخلت بالغسيل وشغلت الكوّاية ، بدأت تكوّي ملابسه او ثيابه بالاحرى ، ثيابه الضخمة بالنسبة لها ، فزّت من احترقت يدها وصرخت بخفه ونطقت : اح !!! الله حسيب العدو !
مشت للتسريحة تدور كريم الحروق بشنطة الاسعافات ، سحبته من حصلته وحطته ع يدها ومشت تكمل الكوّي ، زفرت بضيق وقالت : ليه احسني اتذكر اني سمعت صوته ! ليه احس انه باس كتفي !! يالله ليته صحاني مسوي م اتحمل الموادع الجدار عديم المشاعر والاحاسيس !!
سكرت الكوّاية من انتهت وعلقتها وطلعت قرآنها وبدأت تقرأ ورد اليوم ، لفت من دخلت الميلا وهي تقول : جودي تجين تساعدينا ؟
الجود : تمام باقي لي صفحة واجي
الميلا تقدمت وقالت : اممم ريحة كويّ !
ضحكت وقالت : الله يشفيتس قلنا نجوع بس مو للدرجة ذي تشتهين كويّ !
ضحكت بسخرية وقالت : تنكتين ؟ امشي بس
طلعت الميلا وضحكت الجود ولفت تكمل الصفحة الاخيرة ..
" فالمطبخ "
غزيل لفت وقال : يهلا باللي له الخافق يهلّي هلا باللي تحبه كل اسبابي يهلا باللي عجزت القى عذاريبه !!!
ناصر ابتسم بوسع ثغره ونطق : يالبى المرحب والمهلّل يالله عسى يومي قبل يومها !
غزيل ضحكت وتقدمت ورفعت غطّوتها وباست راسه وقالت : الشهر عليك مبارك ي ابوي انت !
ناصر ابتسم وباس نحرها ونطق : علينا وعليتس مبارك والله يتمّم صيامي يارب اللهم اني لك صايم !!
ضحكت وقالت : تستاهل انت اللي تبوسّ بأماكن غبية !
ناصر : لأنتس م تتفوتين ولا يُكتفى منتس !
غزيل : صايم ؟
ناصر صغّر نظرته وانفجرت تضحك قدامه ، مشى طالع من المطبخ وقال : انتبهي لصينية الفرن ترا ريحتها طلعت
شهقت وركضت لها وفعلاً هي نسّت منها ، ضحكت بحُب من ذكرها بأكلها وانقذتها من انها تحترق ، لفت لحصة اللي دخلت بوجهها الذابل ونطقت : فيتس شيء ؟
حصة لفت لها وقالت بقرف : وجهتس طويل تدرين ؟!
استحقرت غزيل وطلعت من المطبخ ، ضحكت بسخرية وقالت : يملَا المسرع !
صدت تكمل شغلها هي تدري وزين ان حصة حاقده من سالفة امها اللي صارت وكملت بهدوء تنتظر ضحى تجي ..
::::::::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( ارحبوا يحباااااني رجعنا ببارت جديد ! م طولنا اظن ورجعت ببارت طوييل برضو صايرة ادلعكم عشان كذا دلعوني بالنجمة ولا تبخلون ، ودعناكم الله وعطوها حقها 💓💓! )