ليّت اللِذي خَلق العُيون السُود ... خَلق القُلوب الخَافقات حَديد

البارت العشرين

ومشت من قدام الجود اللي لحقتها ، طلعوا على شُرفة الجناح الغربي ، ثامر مشى وهو يترنح ويدندن : هلاااااابي
الميلا برعب : سكنهم مساكنهم !!
الجود صرخت بخوف وقالت : يمممه !!!
ثامر بحدة : خييير والصراخ تبين عمي يسمعتس ويموتني ! المهم اسمعوني بقولكم الخطة
الميلا ضحكت وقالت : للحين مصّر يعني ؟
ثامر تكى ع سُور الشُرف يشوف الخدم والناس يمشون تحت ، مشوا جنبه وقالت الجود : اسلم ؟
ثامر : بما اني صاحب الخطة الجهنمية بقولكم مكانين بس عمي عقاب مستحيل يفكر فيها
الجود : واللي هي ؟
ثامر بحماس : الجناح حقه والمخزن اللي تحت الدرج
الميلا توسعت عيونها وقالت : اما عاد طلعت بتخطفنا فالقصر نفسه وش الخطفة البايخة يبوي !
ثامر : تخيلوا اطلعكم وتضيعون صدق وابتلش !
الجود وهي تبي تتعرف ع شخصية رَجلها اكثر واكثر قالت بتمعن : وش معنى الجناح حقه والمخزن ؟
ثامر : طيب اسمعي وركزي عمي داهيييية وم تخفى عليه خافية لكن دايم يضمن اماكنه الشخصية وجناحه من ضمنها واضمن لك انه م يجي يفتش داخله ابدًا وبالنسبة للمخازن م يحبها ولا يواطنها من وانا صغير يعني اتذكر انه م كان يجيها جدي يوصي عمي اسر وعمي ناصر بداله والسبب م نعرفه للحين
الجود : طيب متى بنهرب ؟
ثامر : بعد الفطور بكره جدي سمعته يقول فطورنا جماعي
الميلا بملل : ع انه الخطة بايخة لكن تم
ثامر ابتسم وقال : اجل اشوفكم بكره
مشى نازل مع ممرات القصر الغربي ، ونزلوا البنات وراه بمّدة ، الميلا : اسر عند الخوصاء ؟
الجود وهي ماشية متجهة للقصر الرئيسي : مدري اتوقع بس عنده احد
الميلا مشت للمرّبط والجود عاكستها للقصر الرئيسي ..
" عند مرّبط مساعد "
اسر وهو انهلك من اللعب مع فّرسه : عيال نرجع ؟
فلاح بتعب : اي والله سرينا
عبدالعزيز وهو يوصل الخضراء للمساعدين قال : انتظروني
اسر مشى وفلاح وقف ينتظره ، ضربت فيه وشهقت مسكها وهو يبتسم وقال : البدر قرر ينزل من السماء لي ولا وش ؟
الميلا برعب : فجعتني !
اسر ابتسم وباس خشمها وقال : اسف
الميلا : هااه م حبييت كأنك راجع ؟
اسر مسك يدها وحطها ع قلبه وقال : تشوفين كيف يضرب يستنجد فيني ارجع ارتاح
الميلا ابتسمت بحنّية وقالت : بسم الله ع قليبك خلاص تعال
اسر شابك اصابعه باصابعها وقال : وش بخاطرتس ؟
الميلا : فكرة جهنمية
اسر : اسللم وش عندها ميالة قلبي ؟
الميلا بخجل : ابي انزف ع الفرس
اسر : الخوصاء ؟
الميلا بحماس : ايه ايه فيه غيرها اصلاً محد ماخذ قلبي الا هي
اسر ابتسم واشر بأصبعه ع خشمه وقال : ع ذا الخشم تبشرين يبنت العم
الميلا حضنته وقالت بهمس : اجل زهّب عمرك بكره يمكن تجيك جلطة من الجمال
اسر حاوط خصرها وشّدها عليه وقال بهمس : مزهّب عمري وزود انتي اللي تحتاجين التجهيز وراتس ليل طويييل معي
الميلا ابعدت تشوف وجهه لكن م تركت كتوفه وقالت : همم الحين جد م حبيت وش تقصد ؟
اسر سحبها بسرعة له وهمس وانفاسه تضرب نحرها : الدخلة بكره ي عروسي
تركها ومشى اول م سمع صوت فلاح وعبدالعزيز عند مدخل القصر ، لف لها وغمز لها ودخل معهم ، من كثر الخجل اللي فيها تحسّ جلدها يضّوي نور ، دخلت تركض وهي تتحسب عليه ..
" عند باب جناح عقاب "
مشت وهي رافعة جلابيتها ، طرف بسيط من ساقها طالع وبارز للناظرين خلخالها ، طلع من الجناح مستعجل عشان الناس اللي فالمجلس مع ابوه وعمانه ، نزلت عينه لساقها اللي طالعة مشى نحوها ، حط يده ورا خصرها ومشى معها داخل الغرفة ، الجود بتوتر : عقاب فيك شيء ؟
عقاب بحدة : الجلابية ويمين عظيم ترتفع مره ثانية م يحصل لتس طيّب !
الجود رفعت حاجبها وقالت : م كان فيه احد بلا هوس ووسوسة ؟!
عقاب بنفس الحدة : فييه الجن والعفاريت واغاار عليتس منهم !!
مشى بيطلع بس استوقفته وهي تقول : تغار ؟ وانت كل ثانية برا ومشغول والو سمّ وامرك وحضرة الفريق اول وضيدان والعساكر ! والجود ؟ دايم اخر اهتماماتك اصلاً اشك اني فالقائمة حتى !
عقاب لف لها بهدوء وقال : وش بخاطرتس يبنت راشد ؟
الجود وهي تنزل شيلتها وتعلقّها : الضيوف ينتظرونك حضرة الفريق
عقاب مشى متجهة لها ، سحبها من خصرها وهو وراها ، ابتسم ونطق وهو يحسّ برجفتها : سمّي وامرك ولبيه ؟
الجود حطت يدينها ع يدينه اللي محاوطتها وقالت : الليلة نحكّي وواجد بعد
عقاب باس كتفها ولف وباس نحرها وقال : ابشري
مشى وهو يضبط جاكيته الجلد ع ثوبه الاسود ، لحقته وسكرت الباب بتوصيات منه ورجعت داخل الجناح ..
" عند الضيوف "
ابو فهد : وبكره العرس والله يحييكم جميع
اسر بهمس : ابوي بيعطبها وبيجون كلهم حتى اللي م وصلتهم الدعوة !
فلاح ابتسم وقال : يرجل اتركه يعزم فرحان فيك
عبدالعزيز : م ظنتي يمكن يبي يستعرض بقصور ابوه
ناصر : ابوي ! مستحيييييل بكره فالفطور انا كلب اذا م جاب طاري الديرة واشتياقه لها
انفجروا الاربع يضحكون ووراهم صقر وعبدالهادي يبتسمون لأنهم سمعوا السالفة ، عقاب لف لهم بحدة وعيونه تطلع شرار وقال : بس لا اقوم عليكم !!
ابو فلاح ابتسم وقال : خلهم يضحكون
اسر بحب : وربي لو من عمي سالم اثنين كان الدنيا بخيير
ابو تركي بحدة : يالخبيييث ماخذ بنتي بكره ولا تمدح فيني !
اسر طارت عيونه وقال : وشفيييكم يرجال م تعرفون عمي راشد السنافي الوافي الطحطوح المطنوخ كايد ابو الظفرات المحزم المليان طير شلوى سليل المجد والأمجاد !!
طاحوا كل من فالمجلس يضحكون ، ابو تركي بضحك : معليك زووود يبن عايض !
اسر زفر براحة وقال : الحمدلله
لف بعيونه لعيون عقاب وابتسامته العريضة لمزاح اسر ، ابتسم وارسل بوسة فالجو لأخوه ، عقاب ضحك وصد وهو يضّبط لطمته ، بعدها بدقايق طلعوا الضيوف ودقت الساعة الثانية عشر مُنتصف الليل ، كل اهل مساعد طلعوا لغُرفهم واجنحتهم ، الكل يعرف انه مع الحماس هم وين والنوم وين ؟ لكن اقلها ساعتين تشبعهم وراهم كرف ..
" فالقصر الغربي "
او القصر الوردي اللطيف النظيف المليان لطافة وريحة المسك والورود تفوح منه ، قسم حفيدات مساعد آل مقّبل ، كل وحدة اتجهت لغرفتها وهم محد متزوج منهم الا الجود اللي مضطرة تسري للقصر الرئيسي تحديدًا جناح عقاب ، دخلت ع الميلا اللي تضبط شعرها عشان تنسدح وتنام ، الجود بهمس : باقي فالخطة ولا نسحب ونجلط ثامر ؟
الميلا ابتسمت وقالت بنعاس : لا لا حرام خلينا ننصفه والله اني احبه بس اسمعي صحيني انتي اعرف اسر بيجي ويطب فالصباح
الجود ضحكت وقالت : اسكر عليتس واخذ المفتاح ؟
الميلا : ايه ايه حلو خذيه انتي خلقة عند عقاب مستحيل تطولين بالنوم ورجلتس عسكري لا وفريق بعد !
الجود : لنا الله يوخيتي
سكرت ع الميلا ومشت متجهة للقصر الرئيسي ، وصلت وكان ازعاج والعيال باقي م راحوا للقصر الشرقي ، صدت ومشت ركض مع الدرج الداخلي ، طلعت الطابق الثاني وجناح عقاب بالجهة الثانية ، زفرت بتعب وقالت : اف يكرهي !
مشت بهدوء وشافت تركي يكلم بالجوال فنص الممر ، ابتسمت وقالت : تروك وش تسوي ؟
تركي لف عليها وقال : هلا جوجو
الجود وقفت قدامه وقالت : متى ناوي تنام ؟
تركي ردًا ع الشخص اللي يكلمه : ابد عطه مضاد واموره بخير وطمني كل شوي عن حالته ...، طيب طيب ودعناك الله
سكر وقال : هلا ؟
الجود : مين تكلم عسى م شر ؟
تركي ابتسم وحطها تحت ذراعه وقال : ابد مريض عندنا فالقسم وخويي ماسك بدالي
الجود ابتسمت وقالت : متى بتنام ؟
تركي : وش بخاطرتس ؟
الجود : طيب بعد اسبوعين سباق الخيول العالمي هنا فالرياض..
قاطعها تركي بأبتسامة وقال : ادري ازعجنا وطّق رؤوسنا اسر فيه بس شلون عرفتي ولا الميلا قالت لتس ؟
الجود شابكت يدينها ببعض وبدأت تجرح نفسها بدون م تحس وقالت : طيب شسمه ابي اروح عشان دانه
تركي : معتس تذكرة ؟
الجود هزت راسها بنعم وكمل وهو يقول : تم اجل اوديتس يعني ؟
الجود بأبتسامة عريضة قالت : اييه انت
تركي وهو عارف عقاب وتشدده قال : خلاص ابشري بس ذكريني
الجود اشرت باصبعها ع خشمها وقالت : ع ذا الخشم ابشر
تركي ابتسم وقال : علييه الشحم ي حبيبتي
تركي والجود جاهلين غضّب عقاب ع اهله اجل شلون حَرمه ، مجرد حظ اذا م قتل تركي والجود معه ، تركي مشى للقصر الشرقي بالجهة البعيدة عن قصر البنات ، وكملت مشي وهي تشوفه يدخن عند باب جناحه ووجهه ع الشباك والقمر ونورّه يضرب وجهه بارز تفاصيله القاتلة ، ابتسمت اول م وصلت وقالت : بتدخل ؟
عقاب لف لها وقال : اسبقيني
شافت السماعة بأذنه دليل انه يكلم ، مشت بملل ودخلت الغرفة او الجناح بالاصل ، مشت ودخلت الحمام نزلت اكسسواراتها ومسحت مكياجها ومن روتين وعناية للبشرة انتهت وخلصت من كل شيء فرشت اسنانها ، ابتسمت وبانت غمازتها ، تذكرت مدحته لها ضحكت وحطت مرطب شفايف ورطبت يدينها ، لبست بجامتها البيضاء قُطنية النوع ، رفعت جزء من شعرها ومسكته والباقي تركته براحته ، طلعت وهو للحين م دخل زفرت بقرف وقالت : ماهي حالة !
مشت للباب وفتحته ، توسعت عيونها اول م شافت الممر فاضي قفلت الباب بعصبية وقالت : الشرهة علي انا الحمارة اللي انتظره
انسدحت وغمضت عيونها تمثّل النوم ، الساعة وصلت ثنتين ونص والشيخ للحين مختفي ، تمثيلها صار صدق ونامت من ساعة ، دخل ع الساعة ثلاث مهُلوك شغل سكر الباب وراه ابتسم اول م شافها منسدحة قرب منها وباس راسها بقوة وقال بهمس : نمتي ؟ والحكّي اللي بيننا
الجود فتحت عيونها بصدمة وقالت : كم الساعة !
فز وهو ينزل ثوبه وقال : بسم الله الرحمن الرحيم !!
الجود تثاوبت وشافت الساعة ثلاث ضحكت بسخرية وقالت : حكّي الساعة ثلاث ي حضرة الفريق ؟ ورانا عرس لو يهمك الحكّي جيت من اول م دخلت للغرفة
عقاب وهو يلف المنشفة ع خصره بدون اي شيء تحتها ، قرب وقال : بلاش حساسية ! مشغول وش تبيني اسوي مفروض تعودتي
الجود انسدحت وغمضت عيونها وقالت : م قلنا شيء
مشى للجهة الثانية من السرير وانسدح ، غطى نفسه وسحب جواله يحط منبه للساعة خمسة ، شافته وضحكت وقالت : ودع صلاة الفجر بس اتحداك تصحى
عقاب : انتي نايمة من اول اذا صحيتي صحيني معتس عموم بحط منبه وان شاءالله يقويني ربي وم تفوتني
الجود : ارتاح بصحيك
لف عليها وهو حاط ذراعه اليسار تحت راسه وقال : اسلمي
الجود بصدمة : انخمد !
عقاب : م يهنى لي نومي وبخاطرتس حكّي
الجود مسحت خشمها بخجل وقالت : اصبر اقرب لك
عقاب ابتسم وفتح ذراعه وقال :
اقربي بين السوالف وكتفي والذراع
وانظري ليّ نظرتتس يالجود تشفي شيءٍ قديم
-
قربت منه ودخلت بحضنه ، ذراعه تحت راسها ويدها اليسار ع صدره ، تحسّست محل رصاصة سابقة ابتسمت وقالت : من ايش ؟
عقاب : انا وآثاري حكّينا ؟
هزت راسها بنعم وقالت : ابي اعرفك زين لازم اعرف مع مين اتعامل
عقاب رفع حاجبة بتعب وقال : اها وليه ان شاءالله اسمي يكفي
الجود بجدية وربكة : اسمك يخوف ويرعب وم ابي ارتعب من شخص انام فالليل بأحضانه !
عقاب مسح وجهه وشنبه وقال : بس من خاف سلّم !
الجود : م ابي اخاف طيب
عقاب غطى عيونه بيده اليمين وقال : وش تبين تعرفين يبنت راشد ؟
الجود : علامات العسكرية عليك قوية وكثيرة !
عقاب : علامات العسكرية ع العسكري شوي وخفايف
الجود ابتسمت وقالت : بتنام خوفي ازعجك
عقاب همهم لها وقال : همم ؟
الجود غمضت عينها وقالت : ارتاح يطويل العمر
عقاب : ضيدان الوحيد اللي يقولها لي خليتس ع بطلي عاجبني
الجود حاوطته وقالت : ابشر ي بطلي
عقاب لف عليها وواجه وجهها صدره ، شّدها عليه وقال بصوته الثقييل : نامي ي بطلتي المعلومات عن عقاب بتنكشف مع الوقت لا تشغلين بالتس
نامت بعد توتر ، انتظمت انفاسها ابتسم وغمض براحة ونام معها ..
" فالصباح المنتظر يوم زواج آسر بالميّلا "
القصور الثلاث تضُج بصراخ وازعاج واوامر سُكانها ، البنات فالقصر الغربي يختارون فساتينهم ونوع مكياجهم ، والعيال بالقصر الشرقي يتهاوشون ع الغتر والعُقل ، ركض من القصر الشرقي وهو يشوف عقاب فالحوش مع ضيدان ، زفر براحة ووصل للقصر الرئيسي وقال : يالله بعد ساعة تجون للمخزن
الميلا والجود : تمام
ثامر مشى للطاولة وسحب كرسيه جنب حصة وقال : هلا حصيص
حصة ابتسمت وقالت : هلا بأخوي اللي معاد صرت اشوفه
ثامر : وش تبين فيني بعد ؟
ابو فهد بصوت عالي : العمووووم يجووون !
اسر وهو يركض : تليموا واقربوا حول الطاولة الشيخ عايض بن مساعد بيقول كلمته
ابو فهد بحسرة : وربي لو م انت عريس وش يفكك مني
ام فهد ضحكت وقالت : خله يناديهم
ابو فهد عض اصبعه بقهر وقال : م لوى ذراعي منه الا انتي
اسر انفجر يضحك وقال : حاااااااي ي قمراء !!
ام فهد توسعت عيونها وضحكت بكل قوتها ، معاد تحمل ورفع عقاله ورماه وضرب بكتف اسر ، شهق بآلم وقال : يبه عريس عرريسس
ابو فهد بحدة : صببي !! والله ي اسيّيير اني لا اقوم ها شوفني حلفت !!
اسر تقدم وباس راس ابوه ولبسه العقال وقال : شدعوة يالغالي
جلس جنب العيال اللي نهايتهم ثامر وبعده حصة ويبدؤون البنات من عندها ، الجود دارت بعيونها وم شافته زفرت بملل وقالت بهمس للبندري : وين عقاب ؟
البندري : كان فالحوش بس مدري اذا طلع ولا بيرجع يفطر
الجود قامت وهي طفح الكيل معها كفاية انها صحت تبي تصحيه وم حصلته جنبها م تدري شلون صحى وهو م شبع نوم ع انها صحت قبل المنبه ، مشت للخارج وكان واقف وضيدان معه ، صد علطول اول م لمح طيف وقال : طال عمرك
عقاب رفع عينه من الاوراق اللي بين يدينه لضيدان اللي صاد بأنظاره وقال : علامك ؟
ضيدان كان بيتكلم بس تكلمت وقالت : عقاب
غمض عيونه بغّيرة احرقته علطول ، لف ومشى نحوها كانت واقفة بثبات ع الدرج ، وصل عندها وقال بحدة : خييير !! وش مطلعتس عندي ؟
الجود بكل قوتها سحبته مع يده وراها ، هو م يدري شلون ترك ضيدان والاوراق غاية الاهمية ومشى ورا العشرينية ، دخلوا قدام العايلة كاملة واشرت ع الطاولة وقالت بحدة : شاييف الفطور ؟! ولا لازم لك استدعاء خاص حضرة الفريق !
عقاب نزل بعينه ليدها اللي للحين ماسكته تارة يحسها كأنها تخافه يهرب منها وتارة كأنها خايفة منه وودها تتركه ، مشى قدام الكل وهو يسحبها وراه متجاهل نظرات اهله كلهم هو عارف انه غلط يسوي كذا لكن جبّرته ، دخلوا جناحهم ودفعها قدامه وسكر الباب وراه ، لف لها بأندفاع سحب برقعها وقبّلها بكل قوته قطع انفاسها بحركته ، حط يده ورا خصرها ورفعها له ، حسّت بحرارة من اسفل رجولها لجبهتها ، دفعته طالبته النفس ابعد وحط خشمه ع خشمها ، انفاسهم متلخبطة محد فيهم كان جاهز للثاني رفعت عيونها له كانت كل خلية فيها ترجف ، ابتسم بهدوء وقال : تجذبيني وتناظريني نظرات البريئة اه ي المجرمة !
الجود بعدته وقالت : وسخ وسخ !
مشت وهي تعدل شيلتها عليها لفها عليه وقال : وذا ؟
طالعت بشفايفه اللي تحّولت للون الأحمر اثر روجها ، ضحكت بسخرية وقالت : تصرف ! مالي دخل
طلعت وهي ترجف وتترنح عجزت توقف بثبات وقفت بنص الممر وقالت بنفسها ( اهدي وامشي برزانة ! ) مشت وارتعشت اول م حسّت بيده ع خصرها ابتسم وهمس وقال : اهدا حبيبي اهدا اللي يشوفتس يقول طلبت وصلتس وعطيتيني !
الجود بقرف : مره م تساعدني !
عقاب ضحك وقال بصوت عالي : معليش اعذرونا نقاشات عائلية وحليناها
جلس بين ناصر واسر وشافها تمشي وجلست جنب دالين والبندري ، اسر بهمس وبخبث : فيه اثار شيء احمر حول شنبك يعني حتى اخفاء الجريمة م تعرف ! متأكد انك فريق
ناصر غص بالعصير وكح ع جهة اسر وعقاب ، فزوا بقرف وانفجر اسر يضحك وناصر معه ، عقاب بقرف : وجعاااه لك وله !
مسح دموعه وقال : الله حسيبك ي اسر !!
اسر وهو ميت ضحك قال : اني صادز !
عقاب جلس وهو يمسح شنبه وشاف يده كانت حمراء تفشل وحمّرت ملامحه وجدًا ، لدرجة ان بقايا الروج اختفت ! رفع عينه وفز وقال : نويصر خشمك !
ناصر نزل بعيونه ع ثوبه اللي كساه اللون الاحمر ، ركض للمغاسل وعقاب واسر وثامر وراه ، غزيل فزت برعب وقالت بصوت هامس : لا ياربي !
مشت والبنات يطالعون فيها ، فزت ضحى وراها تعرفها مستحيل تروح بين اخوانها عشان رَجلها ، مسكت يدها وقالت : غزل تعالي معي
غزيل شّدت ع قبضة ضحى ومشت معها ، وصلوا للمغاسل والدم ماهو راضي يوقف ، اسر برعب : ولد فييك شيء ؟!
عقاب بحدة اول م شاف نظرات القلق ع غزيل قال : مابه الا العافيية وشفيه !
ناصر ابتسم بهدوء وقال : بخير بخير بس بكسر خشمي واجيكم
ابتسمت وهي فهمت قصده قربت وابعدوا وعطوها مساحتها ، ضربت ظهر بخفه عدّة مرات متتالية وقالت : خطاك الشر يعيوني ومعليه خفايف يمكن دم فاسد
ضحى بفهاوة : ليه دورة شهرية ؟
كحت غزيل بكل قوتها وقالت : ضحى !!!!
ضحى لفت لأخوانها اللي تبدّلت ملامحهم تقول متصفقين من قوة اللون الاحمر اللي تشوفه ، شهقت ورفعت طرف جلابيتها وقالت : يويييللييي
ركضت واختفت من انظارهم ، تنحنح عقاب ومشى ولحقه اسر وهم م يحسون انفسهم طبيعين ، ناصر ابتسم وقال : فجرتها بنت عايض
غزيل بخجل بنّية تغيير الموضوع : متى بدأت ؟
ناصر : خشمي والرعاف ؟
غزيل هزت راسها بنعم وقالت : ايه
ناصر : من مدة والله بس م ابي احلّل واوسوس طول عمري
غزيل : روح والعن ابليس يمكن شيء خفيف
ناصر ابتسم وقال : فقّر دم وانا بالجسد ذا كله م اظن عشان كذا م فيه الا الاسباب الخطيرة وم ابي اشوفها ولا اعرف عنها اشيين شيء الوسوسة ي غزلي
غزيل مسكت كتوفه ورفعت نفسها وباست خشمه وقالت : الحين انا اللي بكسره اذا ارعف من جديد !
ناصر : فداتس ي أمي
مشى ومشت وراه للطاولة ، ام فهد فزت وقالت : علامك ! وشفيهم اخوانك طلعوا ورا ضحى ؟
ناصر انفجر يضحك وقال : اوهوو الله يرحمها
فهد : علمتتس يمه انهم متضاربين ولا هي الملسونة قايلة لهم شيء
ام فهد ابتسمت وقالت : اييه زين زيين احسب فيه شيء
جلسوا يكملون الفطور ، الكل انتهوا من الاكل وقاموا لفت بعينها وغمز لها ، ردت الغمزة وقامت وقام معها ، سحبت الجود ومشوا تحت الدرج نطق وقال : بروح اغسل هذا هو باب المخزن ادخلوا معه
الميلا بضحك : ومتى اجهز اليوم عرسي !
ثامر ابتسم وقال : معليه يعروستنا يمديتس بس بطير عقولهم وبعدها اطلعوا طيب ؟
الجود اشرت بمعنى " تمام " مشى وطلع مع الرجال برا ، فتحوا باب المخزن وطار عليهم صرصور ، صرخوا بكل رعب والجود وصرختها المدوّية بالقصر كامل ، محد فاضي لهم وتجاهلوا الصوت ، الميلا برعب : وييينهه !!
الجود وقلبها طار : ممدررري الجنااح انظف امششي
طلعوا يركضون للجناح عقاب " المكان الاول اللي اقترحه ثامر " دخلت الجود ووقفت الميلا واشرت للمساعدات والكوفيرة والميكب ارتست يجوون دخلوا كلهم وقفلوا الباب بالمفتاح ..
" الساعة الرابعة مساءً "
جالس بمكتبه وضيدان معه ، لف لآسر اللي يضبط شكله كل عشر ثواني ، ابتسم وقال : زييين يبن عايض زييين م يحتاج
اسر : الزييين انت وشرواك يالعضيد
عقاب قام وقال : تعال نشّيك ع اللي برا
ناصر : لا تطولون ابوي حالف محد من العيال يطلع من المكتب
صقر وهو يدخن عند الشباك انضرب من هيثم اللي صرخ وقال : ماله لزوم والقرار ذا كتمنا صقر الله يكتمه
عقاب : بلا دلع افتح الشبابيك وانتهينا
صقر دق تحية لعقاب والسيجارة بين شفايفه ، ضحك عقاب وقال : استريح
مشى هو واسر وطلعوا من المكتب والدور هادئ ، اسر قطب بحواجبه وقال : ماش وش الهدوء ذا ؟
عقاب : الله يستر
مشوا وطلعت تالين تركض بجلابيتها الوردية وقالت : يعرريس !!
اسر لف بكل قوته وقال : وش العلم !
عقاب بحدة : فلااااح
فلاح طلع يركض من المكتب وقال : سمّ علااامك !؟
عقاب وهو صاد : كلم اختك
فلاح تقدم وقال : وشو ؟
تالين برعب : العروس مختفية والجود معها !
عقاب طارت عيونه وقال : نعمم !!!
اسر واقف بصدمة ، عروقه بارزه ، صرخ فيها وقال : شللوون م هي موجووودة !!!
ثامر ضحك وهو يشوفهم من فوق ، انسدح ع السطح وقال : هيا القموا قال ايش قال يشربوني حليب وانا م ادانيه واسكت لا بالله وانا ولد فهد !
عقاب بصراخ : حسييييين !
حسين طلع الدرج بعصاته وقال : امر ؟
عقاب وهو يحسّ كل عرق فيه بينطق من العصبية والخوف عليها نطق وهز القصر بصوته وقال : حَرمي وحَرم اسر يطلعون معك ساعة وحدة انت واللي بالقصر كلهم !!
ابو تركي دخل يركض وقال : وشش العللمم !!
تركي بصدمة : خوواتي !!
ابو تركي طارت عيونه بصدمة وقال : بسسم الله فيييه شيء وييين بناااتي
عقاب بحدة : ابعدوا مني !
طلع يركض واسر ولعّ بأهله كلهم صراخ وعصبية ، شهق وزفر بعصبية وقال بصراخ : ثاااااااممممررر !!!!
ثامر فز من نبرة صوت اسر اللي تغيرت بلع ريقه بخوف ونزل وقال : بسم الله هلا ؟
اسر طار له وخنقه بيدينه وقال بصراخ : تحسسبننيي بغففلل عننكك وييين ميييلااا !!!
ثامر برعب يحلّف يمين ان اللي قدامه اسوء من عقاب واستحالة يكون عمه اسر ، شهق وقال : بعلمك يعمي والله بعلمك
دخل عقاب يركض وقال : الكلب !!
ثامر بصراخ : خلاااص بقووولكمم
عقاب سحبه مع اذنه ونزل مع الدرج وقال بصراخ : وييينهم !
ثامر فتح المخزن وطار عقله اول م شافه فاضي فيه كراتين واشياء تخزين فقط لا غير ، شهق اول م انصفق ع وجهه من اسر وقال بصراخ : ووييين عرروستي ؟!!
انفجر يبكي برعب وقال : ويييميين بالله قلت لهم يجلسوون هنا والله يعممي تكفى خلاااص صرت تخووف ااسفف يعمي
اسر مسح وجهه وشنبه واستغفر وقال : تحّدني اوجعك وبعدها توجع قلبي علييك !
ثامر انهار بحضن ابوه يبكي ابتسم فهد بحنّية وقال : حسيبكم ربي انتوا وحَرمكم ! زعلتوا بكّري
عقاب بصراخ : انا ماااني مثلل اسر اعججل طلعهم لا انهييك انت وبكّرك !!
اسر جلس وهو يرجف من العصبية والمثل عند عقاب اللي جنون الارض فوق راسه كان واقف بعييد كل البعد عن باب المخزن ، قشّعر بدنه اول م جاء الموقف بباله
< قبل سنتين >
في مهمة سرية ، دخل هو وضيدان وكايد لمخازن العدو ، موقع مليان متفجرات واسلحة ، انفجر فيهم ونجى عقاب بصعوبة بحكم انه كان عند الباب ، وضيدان فالخارج م جاه الا شظايا حُطام ، لكن فقدوا كايد داخل التفجير احترق وتفحّم وقتها م حصلوا حتى رماده كان كميّن خالي من الانسانية ولا يمسّها بتاتًا البتة ..
-
صد وقال بحدة وهو يناظر بآسر : بنحصلهم تطمن دوروا بكل انش فالقصور الثلاث وانا بشيّك ع البوابات
ثامر تقدم وحضن اسر وباس راسه وقال : اسف يعمي
اسر حاوطه بيد وحده وهو منهّد حيله ولا يطّيق يعصب ليه يجبرونه وهالشيء يهلكه ببطىء ، قام وطلعوا وطلع ثامر الدرج ومشى وهو طاير عقله وين اختفوا بنات راشد م يدري هو من الخوف نسى الموقع الاول اللي حدده لهم ، مر من باب جناح عقاب وشاف الجود ضحكت له وقالت : احنا هنا
ابتسم لها وقال : اييه زين خلوكم فيه شوي بدأت عقولهم تطير
الجود : وشفيك كأنك تبكي
ثامر ضحك وقال : م تدرين اني ممثل ؟
مشى للسطح مكانه من اول م جاء للقصور ، دخلت وسكرت الباب وشافت الميلا بكامل جمالها ابتسمت بحنّية وقالت : يالله سبحانك م احسن صنعك بسم الله علييها الرحمن الرحيم
تقدمت وباست خدها بهدوء وقالت : يحبيبي ي ميلو الله يقويه الليلة
الميلا صرخت بخجل وقالت : هااااه لا استغفري بسرعة !!
الجود ببراءة : وشوو ادعي له !! ليه استغفر ؟
الميلا بحدة : استغفري !!!
الجود : استغفرك ربي الله يرزقها عقل
مشت وجلست وكملوا شغلهم ع الجود بحكم انها اخت العروس وبكل روقان جاهلين الحريق والبراكين داخل رجالهم ..
" دقت ساعة الجدار معلنّة دخول الساعة السابعة مساءً "
وللحين الجود والعروس الميلا مالهم حسّ ، وهيهاه لقلب اسر وعقل عقاب طارت ولا بقى الا السلامة ، انسدح ع كنب المكتب ورمى شماغه وقال : العن ابوهم وين اندفنوا !!
عقاب بحدة : حرام اني م اعلم !!!
ضيدان : اهدوا طيب انا مت اهدي فطويل العمر وطلعت اسوء منه !
اسر بحدة : يبن حثلييين يرحم جدانك الضيوف بأي لحظة بيوصلون..
تركي دخل وقاطع حديثهم وقال : او بالاحرى وصلوا !
عقاب : مشينا لازم توقف قدامهم ياعريس
طلعوا واسر يعّدل شماغه ويكرر داخله ( اللهم رب الضالة هادي الضالة ، تهدي من الضلالة رد علي ميالتي بقدرتك وسلطانك فإنها من عطائك وفضلك ) وعقاب كان يحّوقل ويطالع بكل زاوية ..
" في جناح عقاب "
طلعت بالفستان الابيض من يشوفها بيظنها ملاك ، ركضت وصوت كعبها دّوى بكل الممرات ، وصلت للجناح الغربي ، صرخوا تالين وامال وقالوا : ميييلا !!!
الميلا ضحكت وكملت ركض للجناح حقها وهم يركضون وراها ، والجود اتجهت للتسريحة وفتحت صندوق اكسسواراتها تتجهز
" عند العيال "
عقاب من التوتر نسى البشت وقال : اسبقوني بجيب بشّتي واجيكم
دخل يركض مع الدرج ووصل لباب جناحه ، فتحه ودخل مستعجل لفت عيونه للبشت وقال : ويينه ذا !
طاحت عينه عليها وهي تعدّل حلقها بأذنها نطق بكل قوته وعصبيته وقال : هّين هّين !!
سحب البشت من ع التسريحة وهو محاصرها بذراعه
خذاه بكل عنف طلع وهو عرف خطتهم مع ثامر ويويلهم منه وعّيد لهم من ثامر للجود ثم الميلا لبس بشته وقال بحدة هز روحها بكلامه : ليلنا طويل يبنت راشد !!
ابتسمت برعب وهي م فهمت معناه كامل الفهم لكن حسّت انه شيء خطير بالنسبة لها ، خلصت وتجهزت وطلعت للحضور ..
" في سيارة ماهر "
نزل وقال : ذا القصر ؟
هتان هز راسه بنعم وقال بصدمة : ايه ماشاءالله !!
ماهر : اجل لحقنا الرجال
دخلوا مع الرجال اللي يدخلون ، ابتسم اول م شاف ملامح رجال تشابه ملامح اسر وفلاح ، كانوا صقر وهيثم وعبدالعزيز وعبدالهادي وثامر ، ابتسم وتقدم لهم وسلم عليهم كانوا نفس الاصوات عالية وضخمة دليل كبير انهم احفاد مساعد ، ماهر بأبتسامة عريضة : اررحبب فلاااح يواحششنيي
فلاح ضحك وقال : البقى ي الفيصل
سلم ع ماهر ومن سوالف كمل ماهر ، وسلم هتان ع فلاح ، ماهر ضحك وقال : عريسسسنا شخببباااارك
اسر ابتسم بكلافة وقال : هلا هلا بالماهر ولد الفيصل
ماهر : هلابك يحبيبي
سلم عليه وعطاه المعونة وكانت مبلغ وقدره ، ابتسم وقال : كأنك م انت ع بعضك ؟
عقاب علطول تدارك الوضع وقال : متوتر
ماهر ابتسم وقال : اهااا معك واحد بس شهرين بيحسّ مثلك
اسر ابتسم وقال : ماشاءالله ماشاءالله تبارك الرحمن ابشر والله بالحضور يولد الفيصل
ماهر : تبشر بالجنة م جاء منكم قصور وافيين ي آل مقّبل
مشى وسلم ع عقاب وكان صّلب مرعب مهُيب ، ابتسم بخوف وقال : وانت الفريق ؟
عقاب ابتسم وقال : ايه نعم
ماهر ابتسم وقال : ماشاءالله عقبالك
ضحك عقاب من ضحك العيال ، ماهر قطب وقال : جبت العيد صح ؟
عقاب : متزوج يولد الفيصل متزوج
ماهر حكّ راسه وقال : والله معليش اجل عقبال الذرية يبو عايض
عقاب : اميين اميين
اسر وهو ميت ضحك قال : وش النبرة بأمييين ذي كأنه ودك
عقاب : احااااه ي اسيّييير ودي وجدًا
اسر طاح يضحك وعقاب معه ، رفع نفسه ورفع اخوه وقال : بس خلاص !
اسر ابتسم وقال : مروق شكلك حصلتهم طمني ؟
عقاب هز راسه بنعم وقال : ابشرك
عقاب م شاف الميلا لكنه متأكد مثل اسمه انها مع الجود وتووها طالعه من جناحه ، اسر ابتسم وقال : الحيين نضضحك ونوري الكل الاثنين وثلاثييين سّن !!!
عقاب ضرب كتفه وقال : ايييه شّد حزامك يخوي
بدأ الحضور يكثُر وبشكل مرعب والسلام م انقطع والعيال واقفين لهم ساعة ! وبالمثل واسوء عند الحريم اللي جايين ببناتهم وعيالهم الصغار والقصور تعُج بالبزارين ع انه بالدعوة كان مكتوب بالخّط العريض " جنة الاطفال منازلهم " لكن المشكى ع الله ، ضحى سحبت العصا وقالت بصراخ : يووررعااااان برررراااا ؟!!!
البندري : عززز ي اختتتي تكفييين عليتس فيييهم
وفعلاً اخذت ثلاث دقايق بس والقصر فاضي من البزران اللي طلعوا للمزرعة والخيول ، ضحى بتعب : الله لا يشغلنا الا بطاعته !!
غزيل مشت وقالت : جيت اساعدتس
ضحى بضحك : انتي عليتس بالكبار
انفجروا يضحكون ومشوا للمعازيم ، دانه وديم وام دانه واهل ديم دخلوا مع باب الحريم ، دانه بصدمة : يهووه وش الزحمة ذي !!
ديم : كل البشرية هنا الليلة !
ام دانه : بس يبنات ! عيب تحسدونهم ع الحب
دانه ابتسمت وقالت : هذا مو حب هذا حوبة والله فالقصور !
مشت وسلموا ع امال اللي تبخرهم بالبداية والين جنبها وبعدهم ضحى والبندري ، ضحى بأبتسامة : ي هلا بآل سليمان وآل محمد ارحبوا
ام دانه ابتسمت وقالت : البقى ي آل مقّبل !
ام ديم ضحكت بحب وقالت : الله يبقيكم ويعزكم ي آل مقّبل
سلموا وجلسوا ع الطاولات الجاهزة للحضور ، دانه بحماس : نوني
البندري لفت لها وقالت : لبيه ؟
دانه وهي تسحب ديم معها : وين الميلا ؟
البندري ابتسمت وقالت : والله محد يجيها الحين
دانه تفشلت انها طلبت وقالت : اوه طيب جودي ؟
البندري اشرت باصبعها ع مكان الجود وقالت : هذيك هي مع دالين
دانه مشت لها وقالت : جوووودي !!!
الجود لفت وقالت : ارررحبيي ي شييخة آل سليمان !! ارحبي ي دنووستي
دانه ضحكت وحضنتها بكل حب وقالت : وحششتيينيي
الجود بحب حاوطتها وقالت : م يوحشتس غالي
دانه بعدت وقالت : هذي ديم
الجود ابتسمت وقالت : هلا والله
ديم سلمت ببرود وهي من نوع الصديقات الغّيورات ع صديقاتهم ، وقالت : اهلين
الجود م حبت سلامها وتأكدت ان فيها شيء بس تجاهلت وقالت : ارتاحوا
دانه رفعت راسها وشافت اللوحة اللي مطرزة بالذهّب والورد بأسم " الميلا والآسر " متداخلة ببعض بطريقة جميلة توضح للكل ان اسر ملكّ الميلا بالحُب ، ودهم يصورون لكن بحكم ان الجوالات ممنوعة اكتفوا بالنظر ، احلام مشت تركض وقالت : حصة تعالي بسرعة ! ونادي البنات
حصة هزت بمعنى " فهمت " وقالت : ابشري يمه
ركضت وقالت : بنااات من لها فالخّيل ؟
دانه وديم رفعوا يدينهم ، ابتسمت وقالت : تعالوا
ضحى والبندري كملوا بدال امال والين والجود مشت مع دانه وديم ووصلوا للخوصاء اللي مستنفرة وم تبي تدخل ، دانه بصراخ : ااششش يالخوصااااء حااااايي
الخوصاء وقفت ع خلفيتها وصهّلت بكل قوتها ، ديم تقدمت بحكم انها لابسة " بدلة رسمية " وركبت الخوصاء وشدّت اللجام وقالت : وين اقودها ؟
حصة : داخل عند المدخل
دانه بحماس : تكفون قولوا لي انكم بتزفون الميلا عليها ؟
حصة : ايه فكرتها اصلاً
ديم ضحكت بسخرية وقالت : وميلا تعرف تتعامل مع الخوصاء ؟
حصة ابتسمت وقالت : الميلا م تحتاج تتعامل معها عشيقة الآسر والخوصاء تعرف
ديم انفجرت تضحك وقالت : الله يقويكم
مشت بالخوصاء بصعوبة بالغة قاعدة تحاول لكن الخوصاء رافضة تتحرك ، ضربت قفاها لكن رافضة ، دانه : اف والله البلشة وش نسوي الحين ؟
حصة : مدري والله ننادي عمي اسر ؟
دانه ضحكت وقالت : تسأليننا ؟ بكيفكم
احلام طارت عيونها وقالت : تستهبلين عمتس عريس ! مستحيل يجي عشان خيل نادوا فلاح ولا عزوز
حصة : اجل تم
مسكت سديم ووصتّها وانطلقت تنادي فلاح ، وصلت وقالت : فلاح
فلاح لف وقال : لبيه ي الاميرة ؟
سديم اشرت له يجي وتقدم فلاح ومشى وراها ، وبحكم ان حصة صغيرة كانت تتحجب من فلاح ، ابتسمت وقالت : تعال اسعفنا
فلاح ضحك وقال : رفضت تدخل ؟
حصة هزت راسها بنعم وقالت : اييه
فلاح طق بإصبعه وقال بصوت عالي : حااااااي يالخوصاء
ركضت له ووقفت ع خلفيتها وصهّلت ابتسم وركبها ومشى فيها ودخلها داخل وربط لجامها ع المدخل ، لف لحصة وقال بدون م يطالع وجهها : حصيص اذا بتزفون نادونا
حصة بصدمة : شلون !
فلاح : اقصد نضبط وقفتها ويجي اسر ويساعد الميلا تركب
حصة : اها معليك ابشر
طلع ودخلت حصة للصالة القصر ..
:::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( عُدنا والعُود حمييييدٌ ! وحشتوووني ي اهل الواتباد م قطعنا واجد بس يوم ونص احبكم جدًا ع التفاعل لا تنسون النجمة انا فداكم ، ودعناكم الله ونلاقيكم ببارت جديد ادعموا لا اوصيكم ، وتعالوا انستا اذا تبون تشوفون البارتات قبل اهل الواتباد Jwuiri 🫦 )