ليّت اللِذي خَلق العُيون السُود ... خَلق القُلوب الخَافقات حَديد

البارت الرابع عشر

الميلا مشت متجهة خارج الاسطبل وقالت : الليلة خطبتي من هزاع
ووراها حّس اسر برمح ثقيل اخترق قلبه وكسر ضلوعه عجز يتكلم ويرمش حتى كان يشوفها تبتعد لين اختفت الميلا من انظاره وشّد اسر ع عقدها اللي بيده ركب سيارته تحت صدمته الكبيرة شّد بقبضته ع الدركسون وقال بحدة وعيونه تطلع شرار : وهي تحسب بخليها تروح لهزاع باردة مبردة !!
مشى بسيارته ولف وشاف اثار رجول الخوصاء ومجتمعة معها خطوات خمن اسر انها للأدهم مشى ووصل لبيت عمه سالم وقال بصوت عالي : ي فليييييح
فلاح طلع يركض من غرفته اللي فالحوش ووصل وفتح الباب وقال : اررححبب
اسر بكل صرامة : اعججل الخييوول هجت
فلاح صرخ وقال : ااايششش !!!
اسر بحدة : اعججلل
ركض فلاح وركب وقال : لحظة ! ذي سيارتك الجديدة
اسر وهو داعس يمشي مليون لف له وقال : اييه سيارتي اللي بينلعب بحسبتها فالتربان والطعوس
فلاح : وقف طيب ناخذ سيارتي
اسر : م فيه وقت
فلاح دقق بملامح اسر وقال : وبعدين انت م انت ع بعضك فيك شيء ؟
اسر لف له وكانت نظراته مرعبة ولا تدل انها نظرات اسر المعتادة وقال بصوته الرخّيم : الميلا بتنخطب اليوم وانا بسوي كل شيء اقدر عليه لو اذبح عمري ولا اشوفها تتملك ع واحد ثاني
فلاح مسك كتفه وقال : اسر اذا م كتب لك ربي نصيب وم صار شيء ينقذك فالليل يويلك تكمل وتعفس حياتها البنت بتكرهك ومستحيل تقبل فيك
اسر ابتسم ع جنب وقال : احلف ؟ عساس يهمني حبتني ولا كرهتني جايتني قبل شوي تبكي يعني ماهي موافقة !
فلاح طارت عيونه بصدمة وقال : تسستهببلل !! المييلا جااتك اجل تعزوى فيييك يبن عمها !
اسر بكل حب قال : وتبشر ميالتي وروحي فداها
فلاح ضحك وقال : حيي والله عييينك
اسر بصوت هامس : حي نباك
وصلوا لحد م انقطعت الاثار ونزلوا من السيارة تحت شمس الديرة اللي م ترحم وسط صحراء كبيرة وصاروا يلفون بعيونهم
اسر ارتفع صوته وهو ينادي والصدى يرد عليه ويقول : يالخوصاااااء
فلاح لف للجهة المعاكسة وقال بصوته الثقييل : يالااااادهمم
وفجأة وصلهم صوت صهيل حصان وخمن فلاح انه خيله وضحك وقال : وكالعادة الخوصاء واضح تبي الفكة منك
اسر : تبطي عظم انت وياها اركب
مشوا ووصلوا لمصدر الصوت وشافوا المرتجز وعقاب ينزله من الصندوق
اسر بصدمة : عقيب !
عقاب فز وقال : اررحب يالعضيد
اسر تقدم ومسك راسه وهمس بأذنه وقال : شف ي توضح لي الليلة بمساندتك لي انك اخوي وعضيدي وسندي فالايام الصعبة ولا حرام معاد يبقى بيننا شيء !
عقاب ابتسم بضيق وقال : والله ان تبشر بالخير وان كان ربي م كتب وقف تعب نفسك بنات الحلال واجد
اسر عض سفليته وقال بحدة : يخوووي افهمني بناات الحلال واجد عارفييين بس وش البناات عند الميلا ؟؟
عقاب مسك كتوفه وقال : اهجد وفكني من الضغط ع عمرك ان صار الليلة حاجة وتفركش كل شيء كان بها وخطبناها لك وان م صار كمل طريقك ولا تقعد للبنت عقدة !
فلاح ابتسم وقال : علمته لكن لخمني وقالي انها جاته فالاسطبل تبكي
عقاب توسعت عيونه وقال : تبكي ! معناته ماهي راضية وبعدين وش قالت لك بالضبط ؟
اسر شّد ع قبضته وقال بقهر : اااه تذذكرت انها خلتني اوعدها م اتدخل !!
عقاب : ووعدتها ؟!
اسر هز راسه بنعم وكمل عقاب وهو يقول : اووف صدق وش الحل الحين ؟
اسر ابتسم وقال : تستهبل ؟ الحل واضح انت وفلاح بتفركشون ام الخطبة ع ام هزاع
عقاب : وكم لي ؟
اسر : اصه باقي دين الدكان علي
عقاب طارت عيونه وهو يضحك وقال : لااا يشييخ جبت لكم عامل بفلوسي فالدكان كمم لي اعججل !
اسر : اخذك فره بسيارتي
عقاب : وفرها يبوي غيرها ؟
اسر مسك عقاب مع ياقته وقال بحدة : عقاااب نفذ دام النفس طوييلة !! مالي خلقك والله
عقاب ابتسم واشر باصبعه ع خشمه وقال : ع ذا الخشم يبو عايض
اسر تقدم وباسوا خشوم بعض وقال : يالله يعيال تكفون لا تطير مني
فلاح : لا يرجال معليك ازهلنا لكن للحين م حصلنا الخيول
عقاب قطب وقال : خيول ؟
اسر : لك ان تتخيل مع الزحمة والمشاكل الخوصاء والادهم ضايعين
عقاب رفع حاجبة وقال : كييف ؟
رفعوا فلاح واسر كتوفهم بمعنى " مدري " وكمل عقاب وهو يقول : اوووه الهنوفف !!
اسر بصدمة وعصبية قال : ااايششش !!!
فلاح بحدة : الله ياخذني م اخليها وربي
عقاب : م ظنتي ان عادها فالديار طست جعلها معاد تعود
اسر : خلاص دامني واعدن الميلا ليه اجي الليلة خلوني اروح ادور للخوصاء والادهم
فلاح : صدق والله اجل موفق
عقاب : اذا تحتاج شيء دق علي
اسر : والله لو بيدي دقيت وعرفت وش بيصير
عقاب ابتسم ومشى هو وفلاح ع سيارة عقاب ومشى اسر معاكسهم فالاتجاه ..
" بدون احداث الساعة ٦ المغرب "
          < في بيت ابو تركي >
الميلا كانت بكامل زينتها وقاعدة بغرفتها والحزن طغى عليها وكسى ملامحها الفاتنة صار تلف بعيونها ع غرفتها وتشّد ع يدينها وقالت بصوت باكي : وش قاعدة تنتظرين ؟ م انتي خليتيه عاجز وواعدتس م يتدخل ليش قاعدة تنتظرينه ؟!
قطع حديثها مع نفسها دخول الجود وهي تقول : بنت ميلو !
الميلا رفعت عيونها وقالت : نعم ؟
الجود دخلت وسكرت الباب وجلست وقالت : شرايتس نهربتس ؟
الميلا انفجرت تضحك وقالت : اااه جود لا تخليني ابكي وش تهربيني الله يصلحتس م هقيت ان عمي عايض عنده تلفزيون لذي الدرجة طولتي عنده ولعب بإعداداتس ؟
الجود ابتسمت بفشلة وقالت : انتي الحين خليتس مني وشوفي نفستس انتي موافقة ؟
الميلا : ايه موافقة
الجود زفرت بملل وقالت : نصابة ترا ادري انتس تبين اسر
الميلا ابتسمت وقالت : م ابيه من قالتس لكن ارحمه وم ابيه ينحسر وينقهر عشاني
الجود بضحكة وهي قافطة الميلا قالت : ايه ايه كملي ! العبي ع غيري حبيبي !!
الميلا بتوتر : اف جود اطلعي من عندي اذا بتجلسين تعيدين وتزيدين بالسالفة !!
الجود قامت وقالت : بكيفتس لحد يتندم بعدين
طلعت الجود وقابلت البندري ومشوا ثنتينهم داخل ..
" عند عرساننا "
صحى ناصر وكانت غزيل بغرفة وهو بغرفة وكأي روتين طبيعي قام وصلى اللي فاته واستنكر نومته لأنه م عمره طول بالنوم بحكم ان ابوهم وراهم مشى وطلع برا الغرفة وشافها قاعدة فالصالة ابتسم وحك راسه وقال : خير ليه م صحيتيني ؟
غزيل رفعت عينها له وقالت : والله جثة دقيت الباب لين انكسرت يدي وم قمت !
ناصر : طيب وش الجدول ؟
غزيل : الميلا خطبتها الليلة
ناصر توسعت عيونه وقال : اف وسواها اسر !! وشذا انا نمت سنة عن العالم وش اللي صاير !!
غزيل : لا حبيبي اخوك رخمة م تقدم لها والحين يعض اصابع الندم
ناصر : احلفي ؟ وربي لا امسكتس
غزيل : قم قم بس
قامت وضبطت عبايتها واشرت ع القهوة اللي ع الطاولة واخذها ناصر وشربها دفعة وحدة وهو حسّ بمرارة الفراق اللي يحس فيها اسر حاليًا مشى مستعجل وطلع علطول من باب الغرفة ونزلوا بعفشهم وركبوا السيارة وطلعوا للديرة علطول ...
" في بيت ابو تركي "
الكل تجمعوا والبيت كان يعُج بالناس من كل مكان ومن كل صلة قرابة محد تخّلف عن الموعد
ام تركي بفرحة وهي جنب ام هزاع : حياكم الله ع خطوبة بنتي ع ولد اختي هزاع
الكل بصوت واحد قالوا : الله يحييتس ، ماشاءالله الله يبارك لهم ..
ام فهد تقدمت ومسكت يد ام تركي وقالت : صباح تعالي اكلمتس
ام تركي لفت لها وقالت : لبيه ؟
ام فهد : والله مدري شلون اكلمتس بموضوع زي هذا وبموقف ووقت متأخر جدًا لكن اسر وده بالميلا
ام تركي طارت عيونها بصدمة وقالت : اييش !؟
ام فهد بحزن : والله اني م قويت اخلي الليلة تمُر ولا اقولتس وان..
ام تركي قاطعتها وقالت : معليش قمراء خذيتوا احد بناتي غصبن عني وانا ماني راضية ومع احترامي لتس م احب عيالتس ولا اواطنهم ! لكن هالمرة لا وبنتي بتتزوج بالرجل اللي انا اشوفه احسن لها والاحسن ان الموضوع يتسكر !
ام فهد بجدية : بس اسر ميتن بحب بنتتس وانتي م تبين لها الا كل خير صح ؟
ام تركي زفرت بملل وقالت : صح يقمراء صح
ام فهد : طيب وش ناقصن بآسر ؟ متوظف ورجال ولا اني امدحه عشانه ولدي
ام تركي : ونعم والله فيتس وفي عيالتس والله ان شهادتنا فيهم مجروحة ونعرف م فيه احد ارجل من عيال عايض لكن بنتي لولد خالتها خلاص انتهى
مشت ام تركي متقرفة من عيال ام فهد وجلست وهي تستغفر وتدعي ان الليلة تعدي ع خير وهو صمَت اسر فيها كان اكبر تهديد انها م بتعدي ابدًا ..
" في مجلس الرجال "
دخل ناصر المجلس وقال : سلام عليكم يرجال
فزوا الكل لأنه فرد من عيال عايض وسلموا عليه السلام الواجد ومن تراحيب وتباريك لزواجه امس وردود من ناصر كانت بسيطة وقف اول م صدم في صدر عقاب وقال : امش
طلعوا اثنينهم ووقف ناصر ولف وقال : المعذرة يرجال شوي بس
ولف بعيونه وشاف ثامر وفهد جالسين ابتسم وقال بحدة : ابو ثامر تعال
فهد قطب وقام ومسك ثامر معه ومشوا وطلعوا فالحوش وكانوا فلاح وعقاب وناصر وصقر موجودين
عقاب : فهد العلم سلامت..
قاطعه فهد وقال : وين اسر ؟
عقاب : خلني اكمل لا اله الا الله !
فهد بحدة : لا تكمل فهمت وش صاير اسر يبي الميلا ؟
ناصر : ايه يبيها
فهد : بس ؟ والله ان تكتب له وتحرم ع غيره وانا اخوه
عقاب ابتسم وقال : حااااااي يبو ثااامر
فهد : امشوا الحين ندخل ونمشي الامور طبيعي وبعدها يبدأ الشغل
عقاب : ابد اضربوا الارض ولا تسمون والله ان تتفركش
دخلوا بكل قوتهم وهم مجهزين انفسهم لأي زلة من هزاع اللي متوسط المجلس ويسولف ويضحك ..
" فالصحراء "
ارتفع صوته اللي تقطع من الصراخ وقال : ياللخوووصااااااء
صهلت الخوصاء بأعلى صوتها وضربت البيداء وشقتها بركضها والآدهم وراها وابتسم اسر براحة وقال : ارررححبييي
نقز من الارض وركب عليها ومسك لجام الادهم وضرب بخلفيتها وانطلقت والادهم وراهم ووقف اول م شاف سيارته ونزل وركب سيارته وقال بصوته الرخّيم : يالخووصاااء اممشي وانا ابوتس امششي
ركضت الخوصاء تلاحق اسر والادهم يمشي وينافسها ووصلهم للإسطبل وعرفوا مكانهم ودخلوا وشافوا المرتجز داخل ابتسم اسر وتقدم وحط راسه ع راس الفرس حقته وقال : يااارب تكتبها من نصيبي
باس مكان بوسة الميلا اللي للحين واضحة في الخوصاء ومشى وهو تذكر انحناءات خصرها وقال :
مبسمّتس خمر معتق وفي جسِمتس نحول
‏وعود خصّرتس لا تمايل على قلبي زمىّ
-
ركب سيارته بعد م سكر بوابات الإسطبل وانطلق لبيتهم ووصل وركض داخل ولبس ثوبه وركض بكل سرعته لبيت عمه راشد وهو يضبط شماغه ووصل ودخل وضرب الباب بيده وقال : سلاااام عليييكم يرججاااال
والكل وقفوا وطاحت عيونه بعيون هزاع اللي ارتعد من دخولية اسر للمجلس وقال بصوته الثقييل والعالي : اول شيء وين عمي ؟
ابو تركي وقف وقال : ارحب يالآسر
ابو هزاع قطب وقال : راشد ذا اخر عيال عايض ؟
ابو تركي ابتسم وقال : ايه هو
ابو هزاع كان مصدوم من هيبته وطوله وعرضه ومشيته وسلاحه اللي توسط حزامه اللي شّاد ع ظهره دخل وسلم ع عمه وقال : مبروك والله يتمم ع خير
ولف لأبو هزاع وقال : سلام علييك يعم
ابو هزاع ابتسم بقرف وقال بتبلد : علييك السلام ارحب يالآسر
مشى اسر وسحب عليه ووصل لهزاع اللي كان واقف ينتظره يجي له ابتسم وسلم خدادي وشّد ع يد هزاع وقال : ان خذيتها زوجة لك والله م يطلع احد فينا الليلة حي سامع ؟
هزاع انتفض برعب وقال بحدة : وش تقول انت !!
اسر : العلم سلامتك
مشى اسر وجلس بين اخوانه وكلهم يناظرون هزاع بشكل مرعب
*تعريف بسيط*
ابو هزاع ( مبارك )
رجال كبير فالسن ضعيف حاله حال نفسه لكن يبغض الغرباء ولا يحب احد يتقرب منه ومن اهله
ام هزاع ( نوال )
اكثر امراة خبيثة وانانية تمشي قراراتها ع زوجها وعيالها كلهم وتحب نفسها واي شيء تبيه لازم يصير
هزاع ( البكر )
مقدم فالعسكرية نحيل الجسد متوسط القامة مدلل الام والاب الكل ينفذ رغباته ولد المدن وترعرع فيها عمره " ٣٠ "
رنا
اخت هزاع الوحيدة واكثر انسانه بغيضة ولسانها قذر ولا احد يسلم منه محد رافع خشمها الا امها وبنات خالاتها عمرها " ٢٧ "
زابن
اخر عنقود بيت ابو هزاع انسان يمشي تحت قرارات اخوه الكبير ولا له اي شخصية لكن تحت صمته خبث غير طبيعي للي يفكرون يأذونه عمره " ٢٦ "
-
عقاب ابتسم وقال : عيال وربي م يبي لها ذا كله هذا احشره فالزاوية وينتهي امره
اسر كانت يده ع سلاحه ويطالع بعيون هزاع بشكل مرعب ولا ارمش حتى ولف اول م انمسكت يده من ناصر وقال : اهدا يبو عايض ما حن ناقصين نلاحقك من سجن للثاني شف مني والله م تنكتب الميلا له !
اسر فز وباسوا خشوم بعض وقال : حيي والله عيينكم يخواني
فهد ابتسم وقال : اعنبو غييرك احتزم وانت قايدنا الليلة
اسر باس راس اخوه الكبير وقال بضحك : م عرفتك ي استوود البدنية ولا توقعت تفزع معي
فهد ابتسم وقال : والحين بس نبي نشوف الزلة ومتى بتصير
اسر : اي زلة ؟
عقاب : والله م ظنتي بتصير زلة لازم نخليها تصير
اسر : لحظة لحظة وش العلم اشرحوا لي
عقاب : اطلع منها انت
قام عقاب وتقدم وجلس جنب عمه وابوه
ابو تركي ابتسم وقال : يهلا بعقاب
عقاب ابتسم وقال : زعلان عليك يعمي ذبحت لك وجهزت وتكنسلها عشان هزيع ؟!
ابو فهد فز وقال : لييه ذبحت !!
عقاب : وشدراني احسب انكم بتجون للغداء اللي قلته
ابو فهد بحدة : اي غداء يصبي !؟
ابو تركي : عايض ولدك عازمني رضاوة لي
ابو فهد : ايييه اجل حرام نسحب ونخلي عقاب عشان ذا !
ابو تركي : اي والله انه حرام في حقك يعقيب لكن ابشر بالعوض
عقاب قام وقال : العوض راسك يعمي
مشى وطلع برا واشر لآسر يجي معه وفعلاً قام اسر معه ..
" عند البنات "
دخلت غزيل بكل قوتها وقالت بحدة : فيييه وحدة تبيني اشق وجهها !!
الميلا فزت وقالت : ييمه وشفييها ذي !
غزيل تقدمت ومسكت شعرها وقالت وهي تصّر ع اسنانها : خييير ان شاءالله ناويية تتزوجين بولد مديينة خكرري وتخليين ولد عمتس الشهم الشجااع السنافي الوافي الطحطوح !
الجود انفجرت تضحك وانضربت من ضحى اللي قالت : وهي صادزة !!
الجود ابتسمت وقالت : سموا
الميلا : وش تبيني اسوي !!
غزيل بحدة وصراخ : هييييه ميلااا !! لاتمثلييين الضعف وانتي العن خلييقة ربي !!
ضحى تقدمت وقالت : وان كان قلبتس م حب اسر متأكدة ان عقلتس م بينسى حبه لتس
الميلا بحدة : تستهبلين انتي وياها ؟! ارفض يعني قدام الخليقة كلها !! وشكلكم م تدرون ان الكلام كثر فيني واني للحين م اعرست والحين يوم جاوا كلهم ارفض !!
البندري : وخير يطير ؟ محد بيموت اسر بيتقدم لتس بعدها وتفلحين الا ان كانتس م تبينه عاد هذا شيء ثاني
الميلا بقوة عين ودعست ع مشاعرها وقالت بكل برود : تبون تسمعونها ؟ ايييه اخوكم م ابيه يخي افهموا م ابييه اسر م ابيه زوج لي يقرف يخي م ابيي !! يتلصق فيني وتراني متحملته وساكته عشانكم !!
ضحى ابتسمت بحسرة ومشت وسحبت البندري وطلعوا من عندها وخسرت الميلا علاقتها بضحى اللي مستحيل ترضى شيء ع اخوانها
غزيل بقرف : حسافة فيتس كل شيء والله يوفقتس
مشت وطلعت والجود معهم وتركوها وراهم قطرت دموعها بحرقة وقالت بنفسها ( اااه لو تدرون بس وش بداخلي ) غمضت عيونها بكل قهر تتمنى الليلة تعدي ويصير اللي يصير ماهي فارقة معها طلعت وشافت الحضور الكبير مع الدرج الخارجي للبيت ..
" عند الرجال "
طلعوا اثنينهم برا ودف عقاب اسر وطلعه برا البيت وقال : اسمعني
اسر : اسلم
عقاب : الشيخ بيوصل وهو اول حل جاء ببالي
اسر قطب وقال : م فهمت اشرح لو سمحت وشدخل الشيخ
عقاب ضرب راسه بقوة وقال : ركز يالسبيكة ! الشيخ اذا م جاء مستحيل تتم الخطوبة
اسر صرخ وقال بحدة : حاااااااااايي يععققاااابب
عقاب ابتسم وقال بصوته الثقييل والعالي : اححتتززززممم
فزوا الرجال داخل المجلس ودخلوا اثنينهم وجلس اسر جنب فلاح وقال : قرب
قرب فلاح اذنه وشرح له اسر اللي بيصير تحت صدمته من عقل وتفكير عقاب الداهية وبالجهة الثانية نقل الخطة عقاب لفهد وصقر وثامر وناصر
ناصر ابتسم وقال : حيي والله عييينك يعقيييب
عقاب : حي نبااااك يالذيب
لف عقاب لثامر وقال : يالله اسمع كلام عمك واطلع وخلك عند الباب اول م يوصل تعال وعلمني
ثامر فز وقال : ع خشمي يعم
طلع يركض ووقف مثل م وصاه عقاب ولا ارمش حتى منتظر قدوم الشيخ ..
" فالرياض "
دانه انسدحت ع سريرها وفزت اول م دق جوالها ابتسمت وقالت : اكيد ماهر
ورفعت جوالها وشافت رقمه واسمه " ماهر الفيصل " ابتسمت وردت وقالت : هلا ؟
ماهر ابتسم وقال : يحيي والله هالصوووت
دانه : حي نباك ماهر
ماهر : اسمعي ترانا تملكنا
دانه انفجرت تضحك وقالت : ادري طيب !
ماهر ابتسم بفشلة وقال وهو يحك راسه : احم طيب معلينا بكره وش خططتس ؟
دانه : وش بروح للإسطبل م فيه شيء جديد نفس الروتين
ماهر : محكور [ ممتاز ]
دانه ابتسمت وقالت : ماهر م ابي اجرحك لكن معي لا تتكلم حايلي م افهم كثير
ماهر فز وقال : ابشري اسف والله
دانه : يووه شدعوة !
ماهر : اسمعي بسكر
دانه : الله معك
سكر ماهر وابتسمت وقالت : قهرر م سألته متى العرس !
انسدحت وصارت تفر اصبعها تشوف الفساتين وقالت بنفسها ( جودي كيف اقولها الحين ؟ ) طلعت من الموقع ودقت ع الميلا وكان جوالها مشغول سكرت جوالها وعدلت سدحتها معلنة استسلامها للنوم ..
" عند باب بيت ابو تركي "
وصل الشيخ ومشى للباب وقال : سلام عليكم
ثامر لف ومثّل الغباء وقال : عليكم السلام ؟
الشيخ : بيت راشد بن مساعد ال مقبل ؟
ثامر ابتسم وقال : لا يعمي مضيع
الشيخ شك وقال : كيف ؟
ثامر زفر بعصبية وقال : وش اللي كيف اقولك مضيع
الشيخ : الموقع جابني هنا والبيت مليان ناس معناته فيه مناسبة
ثامر عبس بوجهه وقال : اييه مناسبة !! يعمي ابوي مات
وطاح ع الشيخ بشكل درامي يبكي والشيخ طار عقله وقال : لا حول ولا قوة الا بالله يولدي تصبرر تصبر واعذرني والله م دريت
ثامر ببكى هستيري وهو كان اجرمهم فالتمثيل واقواهم وقال وسط شهقاته : اااه يعمي راااح ابووي
طلع فهد وقال : وولدد ؟!
ثامر لف لأبوه وقال : عميي ابووي ماات
فهد بحدة : وجع جعلك الوجع !!!
فز ثامر وحضن ابوه وقال : يبه مثل بسرعة ذا الشيخ يبه تكفى !!
فهد : اسف يبوي لكن ولد اخوي مقدر يتخطى وينسى والمصيبة اننا اول يوم
الشيخ : احسن الله عزاكم وودعناكم الله
مشى الشيخ وركب سيارته وطلع من الديرة وانصفق ثامر ع رقبته من ابوه وقال : تدعي علي يالكلب ؟!
ثامر انفجر يضحك وصار يناقز وقال : نجحتت خططتتيي لاززم اصيير ممثل !!
فهد سحبه مع ياقته وقال : امش امش يولدي الله يعوضني بس
دخلوا وثامر ميت يضحك وابوه متفشل منه وجلس وقال عقاب : وشبلاك انت !
ثامر حكى القصة عليهم وطاحوا اسر وناصر وفلاح وصقر وهيثم يضحكون وعقاب عيونه طايرة وشوي وتطلع من محلها وقال بحدة : كييف تفاؤل ع ابوك كذا !
ثامر بضحك : يرجال اهم شيء طار الشيخ
اسر قام ومسح وجهه وشنبه وقال : يرجال طولنا وين الشيخ لا يكون سحب علينا يعمي !
ابو تركي بعصبية : شكله والله اسود الوجه !!
عقاب صد وقال لناصر : يووه ي اسر طوييل وجه
ناصر غص بالقهوة وكح بكل قوته ع عقاب وعلى وجهه فز عقاب وقال : وجععع الله يمغصصصك !!
وصار يمسح وجهه وناصر ميت ضحك رفسه عقاب وطلع يغسل وجهه ومشى للمغسلة وكان ثوبه مليان زفر بقرف ومشى وضرب الباب بكل قوته وقال بصوته الرخّيم : يالجووود
الجود قامت برعب وقالت : الله يستر
مشت تركض ووصلت له ودققت بشكله وانفجرت تضحك عليه وقالت : وشذا لا يكون الترمس انفجر عليك !
عقاب : يوه مسوية تنكتين الحين ؟ عطيني ثوب من عند تركي
الجود : اذا قلت لي اعطيك ثوب من عند تركي لآسر ممكن لكن لك انت ! كييف بيدخل
عقاب مسك فكها وقال : وشرايتس تجيبينه وانتي ساكته ؟
الجود ضحكت وقالت : جبت لك ثوب اصلاً انتظر
دخلت وعقاب عند الباب ينتظرها ولف بعيونه وراه وكان ابو هزاع وابو تركي يتهامسون صد عنهم وقال بنفسه ( والله ان تبطون عظم تكتبون عقد وهي بخاطر اسر ! ) ابتسم وجلس ينتظر الجود تجيه وفعلاً طلعت تركض وقالت : امسك
عقاب سحب حزامه ونزله ع الطاولة وسلاحه فيه والرصاص اللي عبى فراغاته ونزل ثوبه قدامها وهي تطالع ابتسمت وقالت : بسم الله عليك الرحمن الرحيم اللهم اني استودعتك زوجي
عقاب ابتسم ومشى لها وباس خدها بهدوء وقال :
من وَبل عينتس وغِيم اهدابتس الهادي
‏وش يمنع الورد ما ينبت على خدتس ؟
-
ابتسمت بخجل وقالت : يحلونا خلنا كذا دايم وبعدين صح لسااانك ومنطوقك ي شاعري وبطلي
عقاب ابتسم ولبس ثوبه وعدل شماغه وقال : صح بدنتس يالجود
لبس حزامه وضبطه ومشى طالع تاركه وراه ضحكت وقالت : يمه يع وشذا شفيني خفيفة كذا !!
دخلت وسكرت الباب وراها ومشت للصالة وشافت الميلا تناظرهم ابتسمت واشرت لها تنزل ورفضت الميلا ودخلت علطول ميلت مبسمها بحزن ع اختها وقالت بترجي وبنفسها ( يااارب م تتم يارب م تمم ) جلست جنب بنات عمانها ولفت وقالت : تاليني اللي قدامتس ترمس شاهي ؟
تالين هزت راسها بنعم وقالت : ايه يحبيبي
الجود : طيب تكفين قومي جيبي لي كاسه وتعالي
تالين ابتسمت وقامت وقالت : ع انتس اصغر مني لكن تم
الجود بكل حنية ارسلت لها قبلة فالسماء واستقبلتها تالين وحطتها ع خدها ودخلت المطبخ وشهقت اول م شافت تركي واقف قدامها ابتسم وقال : تاليين ؟
تالين صدت علطول ولفت وضرب راسها فالباب وطاحت ضحك بخفه عشان م يحرجها وتقدم ومد يده لها ناوي يساعدها توقف لكن لخمته دموعها اللي نزلت وقالت بهدوء وبصوتها الطاغي : تركي وخر وخر
تركي صد وقال : ابشري خلاص ليه الدموع !
طلع تركي من الباب اللي ورا ودخلت تالين وهي ترجف للمطبخ تدور كاسة للجود وهي م نوت تروح لهم ويدينها فاضية ويستلمونها اخذت الكاسه ولفت بهدوء وراها وكان تركي تاكي ع الباب ويتأملها طارت عيونها وسحبت شيلتها ع راسها وقالت : وشش باقي تشووي هنا !!
تركي ابتسم وقال : مالي فالديرة وبناتها الله حسيبتس وش سويتي فيني !
تالين ضحكت بسخرية وقالت : مالك فيهم وتطالع !
تركي : تاليني غييير
تالين حمّرت وجنتيها وطلعت علطول وضحك تركي ورجع للرجال وداخله يتراعد من جمالها ولطافتها ..
" عند ابو تركي وابو هزاع "
ابو تركي بحدة : وش تقول انت !! مستحيل اعطيك بنتي بدون كتب كتاب !!
ابو هزاع بهدوء : يخوي محد درا الكتاب داخل وبنجيب احد من المطاوعة فديرتكم وافلحنا !
ابو تركي لف لأبو فلاح وقال : سويلم تعال
ابو فلاح تقدم وهو يسّوك اسنانه وقال : سم ؟
ابو تركي مسكه وهمس بأذنه كل اللي دار بينه وبين ابو هزاع وطارت عيون ابو فلاح وقال بحدة : خخييير ويين عايششين !
ابو تركي : علمتته م يفهم !
ابو فلاح ابتسم وهو فهم كل شيء وليه الشيخ م جاء وان عيال وحفيد اخوه عايض لهم يد فالموضوع رفع عيونه لهم وقال : والله اني قد حسيت
ابو هزاع بملل : وش ؟
ابو تركي لف لأخوه بكل حواسه وقال : وش يسويلم ؟
ابو فلاح بملامح حزينة : ماله نصيب هزاع عندنا
ابو تركي : وانت صادز
ابو هزاع طارت عيونه وهو تذكر اصرار زوجته ع الزواج وقال بحدة : سلامات وش الاحساس ذا الا ان شاءالله فيه نصيب والبنت لولد خالتها
ابو فلاح ضحك ولف وراه وشاف اسر وسحبه مع ذراعه وقال : البنت لولد عمها وانت الصادز
ابو تركي ابتسم وهو يشوف هيبة اسر ونظراته لأبو هزاع وقال بكل راحة : بناتي لعيال اخوي ؟
اسر ابتسم وقال : والله ان تبششر بي يعمي
هزاع من وراهم ضحك وقال : ليه سبقتوا بالاحداث ؟
لفوا كلهم وكان هو وزابن ماسكين ثامر وضاربينه ليين اعترف كان خشمه ينزف وعينه مورمه والشيخ داخل من وراهم
الشيخ بحدة : اسف يبو تركي لكن هذا الهلامة هو اللي اخرني
ابو تركي شّد بقبضته وقال : تفضل تفضل
ابو هزاع ابتسم بنصّر وقال : يالله ع البركة
فز اسر وسحب سلاحه من محله ورفعه فالسماء واطلق النار وطلعوا الرجال كلهم من المجلس واخوانه منهم وقال : ماهو انت وياه واشكالكم اللي تضربون ثامر وتفلتون منها وانا عمه !
ثامر بكى علطول وقال : يعمي اسسف والله اني م قصدت
عقاب طار له وقال بعصبية : اعنبوك وش علمك !!!
ثامر اشر ع هزاع وزابن وقال : ضربوووني يعماااني ويجدي وي ابووي ضربووني وتبوون تزوجونهم من عندنا !!
ابو فهد بحدة : مباااارك م تشوف عوووالك !!!
عقاب سحب يده وضربها بخشم زابن وقال بكل صراخ وكان اقل م يقال عن عقاب اذا غضب وحش : يحثااالة م تممد يددك عليييه جعلها كسسسر م يجببرر !!
اسر تقدم وضرب هزاع بكل قوته وهو حط حسّرة الميلا وثامر والشيخ فيه وطار هزاع ع الباب وتقدموا ناصر وفهد وفلاح وتركي وصقر وهيثم قدام اسر وعقاب وقال ناصر لهزاع اللي فز من طيحته : مد يدك والله م تطلع حي !
فهد ابتسم وسحب ولده وقال : وزوواااج م فيييه !!
الشيخ ضحك بسخرية وقال : ابي افهم وشدخل مشاكلكم بالزواج ؟
ابو هزاع : وهو صادز راشد تكلم !
ابو تركي لف لأخوانه وكان ابو فهد ميت عصبية ويفور وابو فلاح يأشر له يرفض صد وقال : يعيال !
لفوا عيال اخوانه وولده وحفيده له وقال عقاب : سم يعمي ؟
ابو تركي مشى وقال بعصبية : الحقوني !
اسر بحدة وصدره يرتفع وينزل من الغضب اللي انصب عليه قال : وحرام حرم الدم لا يزوجه اني لا اذبحه !
عقاب بحدة : يخسى هزاع ياخذها امش
طلعوا كلهم وقال تركي : يبه الموضوع يخوف والله اخذ نفس وبعدها عطنا اجابتك
ابو تركي بحدة : انتوا م فيكم حيا فشلتوني !!
فلاح قبص ثامر بكل قوته وقال بحدة وهو يهمس : اببك اببك
ثامر انفجر يبكي وقال : بسس يجدي فقعوا رااسي وضربوا عييني م اشووف بها ليييه تررضى علي !!
ابو تركي طار عقله من صراخ ثامر وفز له وحضنه وقال : بس بس يثويمر مافيك الا كل خير ان شاءالله والحين انا بموضوع مهم وهو اني ازوج بنتي ولد خالتها خلونا من مشاكلكم شوي !
عقاب تقدم وقال : تبيها من الاخر ؟
ابو تركي ترك ثامر يرجع لأبوه ولف لعقاب وقال : سم يعقيب لبيه ؟
عقاب : اسر يبي الميلا وشاريها !
لف ابو تركي علطول لآسر اللي كان يشّد حزامه عليه ويسولف مع فلاح كتم غضبه وقال بحدة : اسر
اسر لف لعمه وقال ؛ لبيه يعمي ؟
ابو تركي : تبيها بعد م خطبوها الناس ؟
اسر تقدم وقال : م قد صار شيء رسمي صح ؟
ابو تركي : تستهبل انت ! معاد معك عقل
اسر بقلة حيلة قال : والله الشور شورك يعمي والله معاد اتدخل بشيء انا ابي بنتك وشاريها وابيها بحلال الله عن حرامه
ابو تركي : لعاد احد يتدخل فيني وفي قرارتي والميلا لهزاع
دخل ابو تركي ولفوا العيال بصدمة لآسر اللي اخذ نفس عمييييق وزفره بكل عصبية وقال : ترركي !
تركي فز برعب من نبرة اسر وقال : سم لبيه ؟
اسر بحدة : طلع لي الميلا الاااان !!
تركي طارت عيونه وقال : هاااااه !!!
اسر لف له وقال بحدة وهو يصر ع اسنانه : ويييمين عظييم اذا م طلعت لي اني لا ادخل عليهم داخل
تركي لف للعيال وقال فلاح : لو تكلمه من ورا الباب اعجل !
تركي رفع طرف ثوبه وركض بكل سرعته ودخل من ورا البيت ورقى الدرج وفتح الباب وقال : ميلو !
الميلا صرخت برعب وقالت : وجععع ي تررركي !!
تركي سحبها مع يدها وطلع وهي تركض وراه وتقول : هيييه وش العلم وقف !!
تركي وقف قدام الباب وطلع وقال : شفها عند الباب كلمها
اسر اشر لتركي يروح وفعلاً كان تركي واثق بعيال عمه ومشى وراح للعيال فالجهة الثانية ..
" عند البنات "
الجود لفت بهدوء لضحى وقالت : وضوح تكفين انا طالبتتس م تشيلين بخاطرتس ع الميلا محد يدري وش تفكر فيه ووش الضغوطات اللي تجري داخلها
ضحى ضحكت بسخرية وقالت : معليش بس من هي الميلا ؟
البندري بحدة : وضحى صادزة شفتي كيف تكلمت عن اطيب قلب في بيتنا !
غزيل : والله مدري وش اسوي لها عجزت افهمها شكلها تبيني اسوي فيها سواتي بالهنوف
الجود نزلت دموعها بحرقة ع اختها وقالت : بنات ! لييه كذا قلبتوا عليها وانتوا عارفين الميلا زيين
ضحى : معاد صرت اعرفها
قامت ضحى وطلعت لدورة المياة والبندري صدت وصارت تسولف مع حصة
الجود شّدت ع يدينها وتجرحت وبقوة وقامت ودخلت المطبخ وشهقت وبكت وقالت : اااه ياارب م يتم ياارب يصير شيء !!
وكان عقاب ورا البيت يدخن وسمع صوتها وركض علطول ودخل المطبخ وقال : يولد فييه احد ؟
الجود لفت بسرعة ومسحت دموعها وقالت بصوت باكي : عقاب ؟ لا ادخل
عقاب دخل ودخانه بين شفايفه تقدم وقال : اعنبوتس ليه تبكين !! لييه تزعلين ملامحتس وتغرقيين جفونتس !
الجود رفعت رجولها وحاوطت رقبته وارتخت عليه تبكي مشى عقاب فيها ورمى سيجارته فالحوش وحاوط خصرها وشّدها عليه وقال بصوته الرخّيم وهو يهمس : جودي وشفيتس ؟ عطيني حرف وربي لا احرقهم كلهم
الجود شّدت عليه وقالت : خواتك
عقاب توسعت عيونه وقال : وش سووا لتس !!؟
الجود : زعلانين علي انا والميلا عشان ميلو رفضت تقبل بآسر طيب لييه وشفيهم قلبوا علينا
عقاب ابتسم وباس راسها بقوة وقال : خلاص انتهى اصلاً الميلا تكلم اسر الحين وان شاءالله تستوعب وان كانها حمارة وخذت هزاع الله يوفقهم وبنحصل غيرها ملايين لولدنا
الجود بعدت وقالت : خير كأنك تسبها عندي ؟
عقاب سحب خدودها وقال : اييه اسبها وش بتسوين يالنتفه ؟
الجود ضحكت وكمل عقاب وهو يقول :
تزعلين وانتي ضحكتنس اجمل من الغيم
‏علميني وقولي وشلون لايق فيتس الزعل ؟
-
الجود ابتسمت وقالت : انت الرضى وشلون بزعل وانت معي ؟
عقاب ابتسم ونزل لها وتساوى بطولها وقال :
وان بانت حدود الحزن في ملامحتس
‏سرقت لتس من وجه الايام ضحكه
-
وقرب اكثر ناوي مبسمها وضحكت بخجل وبعدته وقالت : بس نكتفي بهالرضى لليوم ذا
عقاب ضحك وقال :
يالجُّود ‌مبسّمتس وش ‌كثر يذبح
والسّارح في مَبسمتس ماله ملام !
-
ضحكت بخجل ووردت وجنتيها وقالت بصوت خجول : منك لله يعقيب ناوي تجيب راسي !
عقاب طلع وقال : متأكدة باقي م جبته ؟
ضحك وطلع وابتسمت برضى ودخلت داخل ..
" عند الميلا والآسر "
اسر تقدم ومسك طرف الباب وقال : ميالتي
الميلا فزت بكل رعب وهي م توقعت ان اسر بيجي وقالت : اسر ؟
اسر ابتسم اول م سمع صوتها وقال : لبيه ي عروق قلبي سمّي ؟
الميلا ابتسمت وقالت : لبيت حاج
اسر : وعدتتس م اسوي شيء لكن والله ان يخان وعدي ولا تروحين لغيري !
الميلا بخوف : اسر تكفى لا تسوي شيء يوجعني فيك
اسر مد يده من ورا الباب وقال : امسكي طرف كُمي
الميلا تقدمت ومسكت طرف كُمه وقالت : سم ؟
اسر لف بكل قوته وراه ع صوت هزاع المرتفع وهو يقول : تحسسبب بخليييك تتهنى فييييها !!!
واخوان اسر وعيال عمه يركضون ويصارخون ويقولون : عطططاااك المييييلا يالآسسسر ..
" نرجع شوي بالاحداث "
تقدم ابو تركي وقال : صباح ؟
ام تركي برعب : اسمع ! لا تعطي الميلا لهزاع
ابو تركي ابتسم وقال : كويس اتفقنا بشيء خلاص ارتاحي
ام تركي لف وهي شافت وسمعت رنا وامها يخططون ع الميلا وانهم بيعفسون حياتها معهم وام تركي طار قلبها ع بنتها ودخلت وهي مرتاحة ومسكت يد ام فهد وقالت : يقمراء
ام فهد بحنية : لبيه ؟
ام تركي ابتسمت وباست راسها وقالت : الف مبروك لولدتس اسر وبنتي الميلا
قامت ام فهد بفرحة وزغرطت بأعلى صوتها وقالت : الله يتمم ع خيير ومبروك لولدي الآسر ملكته ع بنتي الميلا
فزوا البنات كلهم وصرخت ضحى وقالت : حاااااي يالآسر !!
الجود ضحكت ودموعها اخذت مجراها وقالت : يالله يارب لك الحمد
ولفت للبندري وحضنتها والكل قاموا يزغرطون ويباركون ونسوا من ام هزاع اللي الصدمة اعتلت ملامحها ورنا م هي اهون منها ..
" فالمجلس "
دخل ابو تركي وقال : مبروك خطوبة وملكة بنتي ع ولد اخوي الاسر
ابو فهد فز وقال : وش العلم !
ابو فلاح قام بفرحة وقال : مبروك ويستاهل الشيخ
الكل فزوا وبدأت التباريك والعزمّي بين الرجال وكل واحد يحلف ع الثاني ان عزيمته لآسر وابو فهد قبل الثاني ..
" نرجع للحاضر "
اسر طارت عيونه بفرحة وقال : عيياااال وش تقووولون !!
عقاب طار يركض وشال اسر بين يدينه وركض فيه وهو يضحك ويقول : جاااتك الميلا يبو عاايض !
اسر بفرحة كبيرة قال : يالبييييه يعقيييب تقوله صاادز
عقاب ابتسم وقال : اي والله تعال وقع
ناصر ركض والعيال معه وشالوا اسر وصاروا يطيرونه فالسماء وهو يضحك والفرحة اكلت قلبه اكل ومن ورا الباب كانت الميلا تتأمل فرحته ابتسمت بحب وقالت : دامها جات من ابوي ف مبروك عليك يالآسر خذيت لك قمر
ضحكت بنرجسية جميلة وثقة كانت بمحلها وكانت تتأملهم وعيونها تتلألأ من جمال فرحتهم
ومشى اسر ووقع بعد توقيع الميلا وانكتبت زوجة له بعد صراع دام شهرين ابتسم وطلع برا يرقص وفرحان وهي مع الدرجة تتأمله وفلاح كان ماسك هزاع ويطقطق عليه وانفلت هزاع من يدينه وركض وسحب الخنجر من محله وانحط بين ضلوع اسر وطار اسر مطعون بخنجر زابن اخو هزاع واللي طعنه هزاع ونط فوقه وقال بحدة : تخخسيي تاااخذهاا والله لا اذببحكك
اسر بكل ضعف وبجسمه الهزيل سحب مسدسه وطلق ع هزاع وطار هزاع متصاوب من اسر وكل شيء صار تحت صدمة العيال والشيبان اللي طلعوا يشوفون فرحة عيال عايض شهقت وهي تشوف جسمه طايح والخنجر واقفة في صدره وركضت الميلا بكل سرعتها ودموعها سبقتها واخذت مجراها ووصلت له ورفعت راسه ع فخوذها وقالت ببكي : اسسرر اسسر لا تككفى لا ترووح !!
اسر ابتسم وعيونه تغورقت بدموعه وقال : ميالتي انتي لي وذا المهم وتفداتس روحي ودنيتي كلها
غمض اسر عيونه وطاحت الميلا تصارخ وتبكي وفز عقاب وقال برعب : اااسسسررر !!! تكففىى يعضييدي لا ترووح ااه الله ياخخذكم ااسر لا يرووح
ومد يده ورا اسر ناوي يشيله وبكت الميلا وقالت : تكفى خله ونادوا الاسعاف تكفى يعقاب
طاروا تركي وناصر للآسر وقال ناصر : لا تسحب الخنجر عشانها حاجزة الدم الحين
تركي ابتسم يخفف التوتر وقال : ادري يحلو
ناصر ضغط ع صدر اسر وقال برعب : تكفى يخوي تكفى لل تخليينا وتخليها وتروح
تركي بتوتر ويدينه ترجف : نويصر يرحم امك خلاص
ولف بعيونه للميلا اللي متلثمه بشيلتها وابتسم وقال : ميلو تدخلين يعيوني ؟
الميلا هزت راسها بنفي وقالت بصوت باكي : لا خلوني عنده ارد له جميله والاشياء اللي سواها لي
تركي تقدم وباس راسها بقوة وقال : م بيصير له الا كل طيب
الميلا شهقت بقوة وحطت جبينها ع جبينه ونزلت دموعها ع عيونه وقالت بكل حزن وهي تهمس له : ان رحت خذني معك لا تخليني لحالي ارمله في اول دقايق من عقد قرآنها
رفعت راسها اول م وصلوا الاسعاف وشالوا اسر من بين احضانها وطاح عقّدها من جيبه ع التراب قدامه ولفت بنظرها لصوت العقد وسحبته وانهارت تبكي وقالت بنفسها ( طلع عقدي معك اااخ يارب ترجع بخير وسالم ! ) قامت مع تركي ودخلوها تحت صدمتها وبكائها وعرفت ان قدامها اكبر واصعب جزء وهي انها تدخل وتشوف اهل زوجها منهارين ..
" في اسطبل الصقلاوية "
دخلت دانه وهي ماسكه يد ديم وقالت : اف اشتقت للمهرة امشي نشوفها
ديم : بروح داخل ابدل واجيتس
مشت دانه وشافت هتان ابتسمت وقالت : يهلا بهتاااني
هتان ابتسم وقال : يهلاا بدانتي ومبروك ملكتك من الماهر طلع بعد الكره حب ؟
دانه ضحكت بخجل وقالت : تقدر تقول
مشت وركضت للعيادة وفتحت الباب بهدوء وفزت المهرة ع خلفيتها وطلعت تركض وصرخت دانه وقالت : يوييلليي مهرررتتي !!!
وفزت وركبتها وركضت المهرة بكل سرعتها وقوتها ضحكت وقالت : حاااااااي يمهرتتي
وقفت قدام الميدان ونزلت دانه وحضنتها بكل حب وقالت : تعالي يروح دانتتس تعالي اصورتس
مشت دانه ومهرتها وراها ووصلت تحت احد الاكباس الكبيرة
[ كبس = اللمبات الكبيرة ]
ولفت وشافت ديم تطلع من الاسطبل وهي تقول : دانه امي تبيني برجع للبيت
دانه بصوت عالي ردت عليها وقالت : خلاااص حبيبي اصلاً الوقت تأخر
ديم ابتسمت وقالت بصوت عالي : تمااام عيوني ويهنيتس سلامة مهرتتس
دانه حضنت المهرة وقالت : الله يسلمتس
ولفت بعيونها وتسكرت البوابة بعد ديم معلنة طلوع الكل ابتسمت وشالت نقابها وافلتت شعرها يداعبه الهواء وصورت كم صورة للمهرة ولها وصارت تخاطب المهرة وهي منهارة عليها ومشتاقة وفجأة شهقت اول م ارتفعت من الارض وكان ماهر جاي من وراها ومتفق مع الكل يطلعون اذا جات دانه وتقدم من وراها وشالها ويدينه محاوطه خصرها ضحك وقال بصوته الرخّيم : تسولفين للفرس وماهرتس عندتس ؟
دانه ضحكت بخجل وقالت : مااااااهري
ماهر ضحك وهو حّس ان روحه رَدت وقالت بكل حب : يروحه وعيونه يالبييييه ي دانتي
لفت دانه له وشاف وجهها من قريب ابتسم وقال : سبحان اللي سواتس وابدع خلقتس اشهد بالله انتس مزييييونة
ضحكت دانه وحضنته وحاوطها ماهر بكل حب وقال : امشي ندرب فرستس شوي
مشت دانه مع وركبوا اثنينهم وكان ماهر ماسك خصرها ودانه متمسكة باللجام وصاروا اثنينهم يلاعبون المهرة ..
:::::::::::::::::::::::::::::::::::::::::::
( ارحبوا يحباااااني رجعنا ببارت جديد ادري اشتقتوا لكن صرنا ننزل انستا واذا اكتمل جيناكم ، اللي م يقدر يصبر يجي هناك يوزري [ Jwuiri ] استمتعوا بالبارت وادري انه يحزن لكن المشكى ع الله 😭 ، لاتنسون النجمة ولا والله لا اسحب عليكم للأبد ! )