ليّت اللِذي خَلق العُيون السُود ... خَلق القُلوب الخَافقات حَديد

البارت التاسع عشر

ردوا كلهم بـ " معليك زود " وكملوا سواليف ، بينما البنات انهوا كل تجهيزاتهم لليلة الحنا اللي بتكون بكره ..
" بدون احداث ليوم ليلة الحنا  "
عقاب نزل من سيارته وضيدان معه ، اسر بصوت عالي : ي جعلها ترحب ملايييين يالعضييد !!
عقاب رفع يده فالسماء وقال : الله يبقي من يرحب ارحب ي عصابة راسي !
تقدم اسر وحضن عقاب بكل قوته واثنينهم نفس الطول ، لكن وين اسر عند عُرض عقاب ، ضحك وقال : اشتقت ؟
اسر ابتسم وقال : حيوان وتسأل !
لف اسر وقال : يمرررحبااا يبن حثلييين !
ضيدان ابتسم وقال : البقى ي مرحب
تقدم ومن سلام الرجال والسؤال عن الحال ، دخلوا لخيمة الشعّر الكبيرة فالعزبة ، عقاب ابتسم وقال : نويصر بروح للبيت ابدل واجيكم
ناصر : اعجل طيب الحضور بيجون بعد شوي
رفع طرف ثوبه وركض بكل سرعته وركب الونيت وانطلق للبيت ، وصل وهو يشوف خواته وامه وزوجات اخوانه وحَرمه بينهم ، طالعين لبيت ابو فلاح مع ثامر ع الجمس ، تقدم لأمه وقال : يمرحبا ي جنتي
ام فهد رفعت راسها وقالت : ارررححبب ي عقيييب
الجود فزت اول م سمعت صوته تلقائيًا طاحت عينه بعينها وهو يسلم ع امه ، باس راسها وسلم سريع ع خواته لف بعيونه ودقق وقال : احلام ؟
احلام ضحكت وقالت : امداك تنساني يعقيب ؟
عقاب بحدة : هلا هلا
مشى ومسك ذراعها ومشى فيها داخل البيت ، الجود بهمس وتردد : عقا..
عقاب بحدة : اسكتي !
دخلوا غرفتهم هو انفتن بعيونها ومستحيل يفوته لبسها ، ابتسم بخفه وتكى ع الباب وقال : وريني لبستس
الجود ضحكت وقالت : طيب
نزلت عبايتها وشيلتها وبرقعها وقالت : خلاص ؟ لأني تأخرت وانا اخت العروس
كانت لابسة فستان مخِملي كسّاه اللون الاخضر الداكن ماسك ع جسمها يبرز مفاتنها ، متزينة بإكسسوارات باللون الذهبي ، مكياجها دفن ملامحها الطفولية كانت ملامحها حادة واه ي هي فاتنة ! كثييير ع عقاب هالملاك الناعم اللي قدامه ، ابتسم ونزل لها وتساوى بطولها طبع قُبله دافئة ع نحرها ، استنشق عطرها بكل قوته وقال : فااااتنه !
الجود بتوتر : عقاب متى جيت
رفع نفسه وهو يبتسم عارف انها في اسوء مراحل الاحراج ، كان يناظر شفايفها وهالشيء سبب رئيسي فالتوتر والخجل اللي تحس فيه ، فك ازرار ثوبه وقال : توو جيت
الجود : اطلع لك ملابسك ؟
عقاب بخبث : تعالي معي
مشت وراه فتح باب الحمام ودخل وقال : تعالي
نزلت بعيونها ليّده اللي امتدت لها ضحكت بسخرية وقالت : تستهبل ؟
عقاب هز راسه بنفي وقال : لا تعالي يدي مكسورة كيف بتروش !
الجود طارت عيونها وقالت : عقاااب !
سحبها علطول وقال : لا تطالعين وخلاص
الجود وجنتيها تحترق ، كانت تطالع فيه وقالت : طيب كيف بساعدك !؟
عقاب ضحك ونزل فلينته والسروال الطويل ، صدت بكل قوتها وشهقت وقالت : وجع يعقاب وجع !
عقاب ابتسم وتقدم وباس رقبتها من ورا وقال بهمس وانفاسه تضرب قفى رقبتها : اطلعي
م انتظرته اصلاً ركضت بالكعب وقفلت الباب ، ابتسم ودخل واخذ دش سريع وطلع وهو لاف المنشفة ع خصره ، لفت عليه وقالت : وين كنت ؟
عقاب بهدوء : فالقصور حقت جدي
الجود توسعت عيونها وقالت : ورث ؟
عقاب وهو يلبس فلينته قال : سالفة طويلة
الجود بحماس قربت وهي تساعده ، توسعت ابتسامته وسحبها مع خصرها وشّدها عليه وقال بصوته الرخّيم : نص زين الخلايق في عيونتس ! وباقي الزين في باقيتس كله
الجود وهي تعدل لبسه ابتسمت بخجل وقالت : صح لسانك ي بطلي
عقاب : يجعل بطلتس فداتس
الجود : يالله اجل خلص
لفت عنه ولبس عقاب ورجعت له وهي تساعده بثوبه والكبّك حقه ومن هالسوالف انتهت منه وقالت : شعرك مبلول
عقاب : طيب ؟
الجود : اخاف تمرض
عقاب ابتسم وقال : وان مرضت طبي وعلاجي ودواي انتي !
الجود صدت عنه وقالت : ايه وش سالفة الورث ؟ وهل هو بأسمك
عقاب قام بكل سرعته ووصل عندها باسها بخدها قريب من شفتيها بكل قوته وقال : ذكريني اقولتس الليلة
الجود بتوتر وربكة : ابش..ابشر
مشى وطلع وطلعت وراه ركبوا الونيت وصلها لبيت عمه ومشى متجهة للعزبة
" في بيت ابو فلاح "
دخلت الجود ركض والبيت كُله مليان بحريم اهل مساعد من صغيرتهم سديم لأكبرهم ام فهد ، دخلت وقالت : تأخرت
غزيل : لا معليتس
دق الباب فالحوش ومشت ضحى وقالت : مين ؟
دانه وديم بصوت واحد : حرااامي
ضحى ضحكت وفتحت لهم ودخلوا بعد سلام ، تجمعوا الكل فالصالة وبدأت ليلتهم بصوت الاغاني والنقش وريحة الحنا ، متوسطتهم ميّالة الآسر بفستانها الاسود اللي مليان ورود ، تتنقش من يدينها لأخر اصابع رجلينها ، تسولف وتضحك ميته فرحة وهي تشوف البنات كيف جميلات وكل وحدة فيهم تمدح فالثانية ، البندري بإصرار : دييم بتتحنين يعني بتتحنين !
ديم بصدمة : لا الله يصلحتس وراي سباق اروح لهم بالنقش !
دانه وهي تتنقش : شوفيني طيب ؟
ديم بالنظرات كانت تتحلف بدانه اللي نكبتها وغصبوها تتنقش معهم ، تالين بصراخ : امااال جيييبي العود !!
امال بقلة حيلة : بجييبه بس وينه !؟
تالين : ورا البيت بغرفة فلاح
امال خزّتها ومشت ركض لغرفة فلاح اللي ورا البيت تجيب العود عشان يتبخرون ..
" فالعزبة "
عقاب نزل وشاف فرس ابيض هو متأكد ان الخوصاء في مرّبط جده دخل وسلم ع الرجال وجلس جنب اسر وقال : يالعضيد
اسر لف له وقال : لبيه ؟
عقاب : منهو فرسه اللي برا ؟
اسر ابتسم وقال : عزوز اشترى له فرس هيضتّه بالخوصاء
عقاب ابتسم وقال بصوت عالي : ماشاءالله ع البركة ي عزيز الفرس وتتربى بعزك
ضحكوا كلهم ورد عبدالعزيز وهو يبتسم وقال : خييير م قلت يبو عايض
دخل ثامر وهو متلطم وشوي ويستفرغ وبيدينه سطل حليب ابل ، دخل فهد وهو ميت ضحك وقال : الله يعوضني بولدي يرجال
انفجروا عمانه يضحكون م عادا عقاب اللي قال بحدة : صبي ! تمرجل !!
ثامر بحدة : سد حلقك لا اعطيك طول يدي !!
فهد وهو ميت ضحك : وولدد !!!
عقاب قام ومشى له وسحب بيالة وغطسها فالحليب ، فهمه اسر ومشى ومسك ثامر من وراه ، فهم خطتهم وصرخ وقال : يااااجد ععااايضض انااا فيي وجههكك من عياااالك !!
ابو فهد وهو يتبسم : والله مقدر على عقيب واسّير الا رب العالمين الله يعوضك يالحفيد
عقاب بحدة : افتح !!
اسر بخبث شّديد : افتح وش بالضبط ؟
عقاب انفجر يضحك بصوت عالي وقال : اعجل !
اسر سحب الشماغ ، طبق البيالة ع منطوق ثامر اللي غص بالحليب وهو يصارخ ، تركوه وفز وضرب السطل وطاح ع فلاح وانكب عليه ، شهق وقال : يااااربي وشدخلني انا الله لايوفقكم يعيال !
طلع فلاح وقال بقرف : يحييوان !
ثامر وهو يستفرغ وميت غثيان ، مشى فلاح وطلع اسر وهو يضحك وقال : بالعافية وانا عمك
ثامر بقرف وهو يمسح شفايفه بعنف : الله ياخذك من عم ! انت وعقيب التبن
عقاب طلع وسحبه مع اذنه وقال بحدة : تبي لك تربية ؟
ثامر ضرب يد عقاب بقوته ومشى داخل وهو كارههم وحالف ينتقم منهم ويعرف شلون ينتقم ، اسر بصوت عالي : فلييح تعال معي ثوب
فلاح وهو يركب سيارته : وفره يرجال !
شغلها ومشى وطاح اسر ع عقاب يضحك ، ابتسم بهدوء وقال : يجعله دوم يالعضيد
اسر ابتسم وباس خشم عقاب وقال : تدوم لي سند
مشوا ودخلوا داخل ، وصل فلاح للبيت وهو كان داعس ع البنزين ، كان ميت قرف من لبسه اللي يلصق بجسمه اثر الحليب ، دخل يركض وهو يفصخ بنص الحوش ! اكيد مين يلومه وغرفته منفرده بنهاية الحوش توسعت عيونه اول م شاف باب غرفته مفتوح استغرب ومشى وهو بدون فنيله تغطي صدره ، شافها تحّوس بالتسريحة حقته وتتعطر من العطور اللي تشوفها حلوه بأبتسامة عريضة ع وجهها ، م شاف وجهها وحسبها تالين مشى وهو يضحك لأنها م حست فيها حاوطها من وراها وقال بصوته الثقييل : وش تسوين ي حرامية !
شهقت امال برعب وقالت : اببعععد !!
استنكر الصوت وحس انه انصفق اول م لفت وشافها كانت ملاك النقش يزيّن قفى يدينها ممتد لكوعها ، شهقت ونزلت دموعها وقالت : صد وابعد تكفى !
تعزوت فيه ارتجف قلبه ودق لها ومنزمان م حس فلاح بالشعور ذا وبالاصح ولا عمره حس فيه ! صد اول م صفقته كف توعّيه للدنيا ابتسم بهدوء وقال : اسف والله م دريت احسبتس تالين
امال توقعت اصلاً لأن كثيرين يقولون انها تشبه تالين من ورا ركضت وقالت برجفة : حصل خير يولد الخال
طلعت ابتسم بحنّية وقال بهمس : امال !
مسك قلبه بكل قوته م عمره طاح فلاح انكسر بعد وفاة امه وترك ابوه له ، تزوج بعد وفاتها بفترة قصيرة وهو م يبي يضيع شبابه جاب خديجة للبيت وكانت سمّ لفلاح عذبته عذاب البالغ م يتحمله ، كبر ولوى ذراعها اذا مدتها صارت تخاف يقوم عليها بيموتها ، يكره الاناث لكن دخلت تالين قلبه وصارت له اخت بكل م تعنيه الاخت من معنى ، احتوته وطلعته من الطريق الغلط يالله قد ايش هي غالية ع فلاح ، والحين امال وش كثر يتمنى تكون امله هو عارف بفارق العمر بينه وبينها لكن مجرد تمنّي ..
" في بيت ابو فلاح "
الميلا لفت للجود وقالت : مستبشرة غريبة اجل جاء ؟
الجود هزت راسها بنعم وقالت : ايه جاء
الميلا بأبتسامة عريضة : يجعله دوم جنبتس اذا بشوف الابتسامة الحلوه ذي
الجود رفعت يدينها وقالت بحب : امييين ويكون دايم مثل الحال اللي كان عليه اليوم
دانه وهي تاكل ورق عنب : اميييين
الجود لفت لها وقالت : ايوه ايوه ماهر ؟ منهو ولده ذا
دانه مسكت قلبها وطاحت ع الكنب انفجروا البنات يضحكون عليها وقالوا بصوت واحد : يالخفيييييييفه !
دانه وهي تضحك قالت : ابد والله فارسّي وماهّري وحبيبي وزوجي
ديم بحب : اه يبنااات التناسق بييينهم يمووت !!!
ضحى : تحمست اشوفه
دانه بحب : العرس تشوفينه وانتي حاضرة والكل حاضر ان شاءالله
البندري : ان شاءالله نجي
الجود : يعني حب من اول نظرة ؟ يحظك تزوجتي عن حب ماشاءالله يعني
دانه : والله انتس طايحة لعقيب يعني م فيه لا تحسديني انتي تحمدين ربتس انه جاتس بدون حب حتى
البندري وهي تضحك : منجد ! اصلاً للحين ماني مستوعبة ان النتفه ذي زوجة عقاب !
دخلت امال وهي تركض وترجف ، مسحت دموعها لكن وجهها احمر دليل واضح للبكاء ، فزوا البنات لها وقالت بهدوء : شفيييكم م فيني شيء !
بيسان بحدة : امممال وشفيتس !!
الين برعب : انادي امي ؟
الجود بخوف : خيير خلاص م فيها شيء
امال جلست بهدوء ، تالين جلست وقالت : وين العودة ؟
امال بحدة : الله ياخذني من يوم رحت وياخذتس م شفتي الا انا توصينه !
ضحى بحدة وعيونها حادة : بنت ! انطقي وش جاتس ؟
دالين بصدمة : يويلي ويلاه فلاح صح
شهقوا البنات كلهم اول م هزت امال راسها بنعم ، غزيل انفجرت تضحك وقالت : زواج قريب بعد تركي وتالين
تالين توردت ملامحها وقالت : هاه !
ضحى : يوننس صدق وش صار امال ؟
امال : دخلت غرفته ..
حكت لهم كل اللي صار وانتهت وهي تقول : وطلعت وانا ميته رعب
تالين ابتسمت وقالت : ياربي احفظ قلب اخوي ! اذا شافتس كذا اسأل الله الثبات !
امال غطت وجهها بيدينها وقالت بصراخ خجول : خلاااص حتى اخوتس حلوو !
انفجروا البنات يضحكون وقالت الميلا وهي تضحك : يالله نقوم نردح لعيون فلاح واماله وتركي وتالينه
الجود بصوت عالي : واسر وميالته !
رقصوا البنات وزغرطوا بفرحة للميلا ، دخلت ام فهد بعجلة وقالت : ميلو تعالي شوي
مشت الميلا بهدوء وهي رافعة فستانها عشان نقش رجولها ، طلعت للحوش ابتسمت اول م شافته وقالت : لا يعمة خربتي المفاجأة !
اسر ابتسم وقال : م ترد لولدها شيء وبعدين وشذا الزيين ؟ نسيت العتب ونسيت اني زعلان عليتس
الميلا ضحكت وقالت : يرجال زعل جدي اللي مات ولا رضى !
اسر طارت عيونه وهو يضحك وتقدم لها وسحب اذنها وقال : تتأدبين ولا وش ؟
عقاب بصوت عالي : اسّيييير اعجل !
اسر زفر بعصبية وقال : يخوي اذلف
الميلا ضحكت بسخرية وقالت : جاي مع عقاب وتبي تتهنى ؟
اسر ابتسم وقال : حيوان وهو يتهنى وزود بعد
الميلا : م نبي نحسده زوجته وش نقول ؟
اسر ابتسم ع جنب وقال : وانتي ان شاءالله حبيبتي ؟
الميلا توردت ملامحها وقالت بخجل : هاه ؟
ضحك بصوت عالي وقال : وشفيتس اعجبتس الكلمة ي حبيبتي ؟
الميلا بحدة وهي تحس انها انخنقت ، وشو له الشعور ذا كله عشان كلمة حبيبتي هي نفسها م تدري ، نطقت وقالت : اصه لا اهفك بالحنا واعفس كشختي !
اسر حاوط خصرها وسحبها له وقال : هفيّيني يعسى محد يهفني غيرتس
الميلا : انتبه لنفسك بس
تركها وهو يضحك وقال : العرس بعد ثلاث ايام يعرب
طلع وهو يعّدل شماغه ، شلون عجّل بالزواج وبدون م يستشير احد هو عارف انه حقه عريس ويتشرط ، شهقت وقالت : ثلاااث ايااام !!
اسر من عند الباب : جاهزة صح ؟
الميلا بتوتر : اييه بس م توقعت تستعجل !!
ضحك وطلع وسكر الباب وراه ، دخلت وهي تتحسب عليه وقالت : الحمار عجل بالعرس !
دانه بصدمة : متى ؟
الجود بحدة : مو على كيفه !!
ضحى ضحكت وقالت بخبث : بعمري هو معااد يتحمل العضييد
الميلا صرخت ورمت الريموت ع ضحى وقالت : خييييير !
غزيل انفجرت تضحك وهي فهمت متأخر وقالت : م عليها شرهه اخت عقاب واسر وناصر معهم
البندري ضحكت وقالت : حمدلله اني مؤدبة طلعت ع غالية وفهد
الجود بسخرية : ههاهي ! الله يرحمني والادب
طاحوا البنات يضحكون عليها ، البندري وهي ميته ضحك : يحيييوانه وش قد شفتي مني ؟
غزيل فزت اول م سمعت ناصر ينادي ، مشت وطلعت له ..
" تخّيل بسيط لفساتين البنات "
~ الميلا : فستان اسود ملبّس بقماش مليان ورود ، رافعه نص شعرها والباقي تاركته براحته .
~ الجود : فستان مخمّل باللون الأخضر الداكن ، شعرها مجدّل من فوق والباقي ممُوج .
~ غزيل : فستان ماسك باللون الوردي ، كيرليات شعرها واضحة ومرتبة جميلة جدًا .
~ ضحى : فستان كسّاه اللون البُني الغامق ، شعرها حرير منسدل ع ظهرها .
~ البندري : فستان كسّاه اللون الاحمر قطيفة ، شعرها مجدّل بالكامل مع خصلات تاركتها ع وجهها .
~ تالين ودالين : نفس الفساتين باللون البنفسجي الغامق بس اختلاف بسيط بالتفصيل حيث تالين بدون اكمام ودالين بأكمام توصّل لفوق كوعها ، كل وحدة بتسريحة شعر غير تالين تركته منسدل ع ظهرها ، ودالين عكس شعر اختها الحرير كان ويفّي .
~ دانه : تزيّنت شيخة آل سليمان بفستان ابيض ماسك من فوق حتى خصرها ومن بعده ترك راحته وخذا مساحته ، شعرها ويّفي رافعه النص والباقي تاركته براحته .
ديم : لبست توب بدون اكمام قطيفة كحلي وجينز هاي نّيك ابيض ، شعرها قصير جدًا تحت اذنها بمسافة .
آمال : فستانها اصفر مريح للعين بفتحة ظهر واسعة ماسك ع خصرها ومن بعده تارك ، شعرها يلامس نهاية ظهرها تاركته براحته حرير وكثيف .
-الباقيين مو مهم-
طلعت تركض وقالت : جيت جيت
ناصر لف لها وهو متلطم وقال : تعالي
غزيل قربت وقالت : شفيك ؟
ناصر مسك ذراعها وقال : لا تخافين
غزيل برعب : نويصر فيك شيء ؟!
ناصر فك لطمّته وسال الدم من خشمه بكل غزارة ، شهقت برعب وقالت : ييمه بسم الله عليييك !!
ناصر ابتسم وهو يحّس بيدوخ م يدري ليه صاير ينزف كثير خوفه كثير من مرض خطير ، تكلم بصعوبة وقال : بتقدرين تمسكيني ي بنت عبدالملك ؟
غزيل جلسته وجلست جنبه ومعها قماش حطته ع خشمه ونزلت راسه بهدوء وقالت بربكة ويدينها ترجف : م فيك الا العافية
ناصر ابتسم لها يشوف توترها ويحّس برجفتها لكن م تركته ولا تركت دموعها تنزل ، تلاقت عيونهم وقالت : اول مره ؟
هز راسه بنفي ، عضّت شفايفها بحزن وقالت : ليه م قلت لي !
ناصر حاوط خصرها وشّدها له وقال : م نبي نخوفتس ي أمي
غزيل ابعدت القماش وزفرت براحة اول م وقف النزيف ، نزلتها جنبها وتقدمت وباست خشمه وقالت : اخر مره ان شاءالله
ناصر ابتسم وقال : بكسره اذا نزف بعد البوسة ذي !
غزيل ضحكت وقالت : قسم بالله اني ارجف
ناصر بأستلطاف : يوونه حبيبي انا تعالي ادفيتس
غزيل بحدة : ارفع علومك يولد الخال ! رجفة خوف
ناصر انفجر يضحك وقال : الحضن للدفئ والامان تعالي وبس
غزيل ضحكت وحضنته بكل قوتها ، ابتسم وقال : هذي كل قوتتس ؟
غزيل بشّك : ايه اوجعتك !
ناصر باس كتفها وقال : ادخلي من البرد يالدنيا
قام وقامت معه ، طلع وهو يسمعها تقول : انتبه لنفسك
ناصر : وانتي بعد يالصغيرة !
*تعريف بسيط*
ابو غزيل ( عبدالملك )
متوفي
ام غزيل ( نوره )
متوفية
غزيل ( البكر ) ووحيّدتهم
صاحبة قلب ابيض ولسان يعاكس قلبها وحنّيتها مستحيل ترضى احد يغلط عليها او على احد هي تحبه انسانه تهبل وونيسّة للي يجلسون معها محد يكرهها الا الغبي ! ولا احد يقوى ع غزيل ، حَرم ناصر تبلغ من العمر " ٢٧ "
-
انتهت ليلة الحنا بسلام والكل توجه لبيته ، ثامر وهو واقف عند الباب شاف الميلا والجود يسولفون ابتسم وقرب منهم وقال : هلابي يبنات جدي
الجود لفت له وقالت : هلا ثامر شبغيت ؟
الميلا ابتسمت وقالت : عادي اقرص خدك ؟
ثامر بحدة : اقلّها احترمي شنبي وطولي ! قلة ادب اصلاً وش انتظر وانتوا حَرم الزفت اسر والتبن عقيب !
الجود ضحكت وقالت : شكلهم رافعين ضغطك
ثامر : اي بالله ي جود تكفيين افزعي لي انتي وميلو
الميلا ابتسمت وقالت : احتزم وش نسوي ؟
ثامر بكل برود قال : بخطفكم
شهقوا الثنتين وضحكوا وقالت الجود : نسيت انه حضرة الفريق ؟
ثامر : ايه بس الحمار مستحيل يخمن المكان اللي بتكونون فيه
الميلا : ابد ازهلنا متى ؟
ثامر : بعد يومين الليلة اللي تسبق العرس
الجود ابتسمت وقالت : خلاص تم
ثامر بحماس : ودي اضمكم لكن الدين والعادات م تسمح
مشى وهو يرسل بوسات لهم ، شهق اول م انسحب مع اذنيه كلها يمينه اسر ويساره عقاب ، ثامر : ماهو لهم تخيلوا بس !
عقاب : لا يشيخ لمين اجل ؟
اسر بحدة : انطق وش تسوي عندهم ؟!
ثامر بصوت عالي : سامحيين لي صح
الجود والميلا بصوت عالي قالوا : اييييه
ثامر وهو يضحك : خرفنت حريمكم يمهطف !
ركض وعقاب سحب زبيريته من رجله ورماها وصابت راس ثامر وقال : الله لايسلم من اسلمك !
اسر مشى لهم وقال : خير ان شاءالله !؟
الميلا : وش بتغار من ولد اخوك ؟
اسر بحدة : لا تنعاد بس !
عقاب تقدم وقال : عاجبكم الوضع اشوف
الميلا وزّت نفسها ورا الجود برعب ، الجود شهقت وقالت : خير انا اللي مفروض اختفي وراتس !
عقاب صد يخفي ابتسامته للدرجة ذي خايفين منه ، نطق بحدة هزّ ارواحهم فيها : لا اشوفكم تتبعون الورع ذاك قسم بالله م يبقى فيكم عظم صاحي !!
تقدم وسحب الجود ومشى وهي وراه ، اسر حضن الميلا وقال : تخافين منه ؟ اللي محتويتس الحين اسوء منه اذا عصب عشان كذا اتقي شر اسر اذا غضب
الميلا وهي تحاوطه : ابشر ابشر ي الحليم
اسر باس راسها وقال : يخسى يجيتس وانتي ع ذمتي
الميلا : عقاب ! ماش م اضمنك
اسر ضحك ومشى وقال : جهزي نفستس بس
مشت لتركي اللي ينتظرها ، ركبت معه وانطلقوا لبيتهم وهو يهوجس ، ضحكت وقالت : مين ماخذه عقل حبيبي ؟
تركي ابتسم وقال : يجعلني فدوة ي ميلو
الميلا : يحبيبي والله اييه مين ؟
تركي : بحرف التاء
الميلا بضحك : ايه اول حرف من اسمها تالين ؟
تركي وهو يبعّد الشكوك : يمكنه انا ؟ ناسية اني نرجسي
الميلا انفجرت تضحك هي م توقعت ترقيعته تكون فاشلة كذا ، ضحك بصوت عالي معها وقال : خلاص يحيوانه لا تفضحيني
الميلا وهي تحاول تسكت نفسها : افا علييك بس
وصلوا للبيت ودخلوا ..
" عند باب بيت ابو فهد "
ضيدان وهو يسولف مع اسر وسهم لف بعيونه وشاف عقاب ومعه زوجته هو عرف انها حَرم عقاب ابتسم وهو يشوف فرق الحجم بينهم وفارق بشكل مرعب ، رفع صوته وقال : طوييل العمر
فزت من قوة الصوت ، شّد ع يدينها اللي مشابكة يدينه وقال : بسم الله عليتس
ولف لضيدان وقال : ارحب يبن حثلين
مشت ركض ودخلت ومشى عقاب لضيدان ، سهم : اجل حن نستأذن وعسى افراحكم ي اهل مساعد دايمة
اسر ابتسم وشّد ع كتف سهم وقال : الله يستر عليكم وابد لنا لقاء بالزواج بعد يومين بأذن الواحد الاحد
ضيدان : تبي شيء توصي ؟
عقاب همس بأذنه وقال : القصور بأمانتك
ضيدان اشر بأصبعه ع خشمه وقال : ع ذا الخشم يبو عايض
عقاب ابتسم وباسوا خشوم بعض " سلام الرجال " ومشوا سهم وضيدان بسيارة سهم ، دخلوا اسر وعقاب وقال اسر : لك حيلة للسمرة ؟
عقاب عقله موافق ع فكرة اسر وقلبه يضرب وينسف بأسم " الجُّود " ابتسم وقال : تم
اسر : وين ناصر ؟
عقاب : سحرته بنت العمة
ضحك اسر وقال : اووهوو فاااتك اصلاً
عقاب جلس فنص الحوش وقال : اجل بس عندي الحل
اسر وهو واقف انحنى وحّط يدينه ع ركبه وقال : وش ؟
عقاب : وضيحي
اسر انفجر يضحك وقال : انشهد بالله انك جبتها !
مشى ودخل يركض وصدم بصدر ابوه ، ابو فهد بحدة : اعنبوك وش عاد مصحّيك يالحيوان !!
اسر ابتسم وباس راس ابوه وقال : يبه توو اشوف عقاب خلني اسولف معه
عقاب دخل وقال : ايه يابه خلنا
ابو فهد بحدة : لا تطولون وربي لا اسمع حسك انت وياه !
ضحى طلعت ودخلت بسرعة وعقاب عطاها نظرة مرعبة فهمتها علطول ، دخل ابو فهد وطلعت وهي تبتسم وقالت : جيت اخذ ماء شكلكم ناوينها سمرة ؟
عقاب ابتسم وقال : ايه اشتقنا نهبدتس
اسر ابتسم وحطها تحت ذراعه وقال : وجدًا !
ناصر طلع وقال بحدة : وجع انت وياها وش الصوت ذا اذلفوا امسوا !
عقاب سحبه وقال : تعال اسمر معنا
ناصر ابتسم وقال : والله ؟
اسر ضحك وقال : جبنا راسه
البندري طلعت وقالت : افا سمرة وبدوني !
عقاب ضحك وقال : اجل انا انسحب وشذا العدد ي رجل !
طلعوا كلهم للحوش ، عقاب لف لغرفته وقال : ابدل واجي وضيحي نبي اطلق براد شاهي
اسر : اذا ع كذا ببدل واجي بعد
البندري وناصر طلعوا للحوش ودخلوا اسر وضحى للبيت ومشى عقاب لغرفته ، دخل وقال : نمتي ؟
الجود وهي ترجع الروب عليها برعب : لا
مشى وطلع راسه مع المدخل وقال بشّك : وش تسوين ؟
نزلت عيونه للبجامة الحرير اللي الجود لابستها ، شورت فوق فخوذها ، وبلوزة بدون اكمام ، شعرها الطويل تاركته ياخذ راحته بعد الجدّيلة ، ربطت الحزام ع خصرها وقالت : ولا شيء وش بتسوي انت ؟
عقاب حك شنبه وقال بتخدر : هلا ؟
الجود ابتسمت وقالت : صحصح وش بتسوي ؟
عقاب : سامرين برا العيال وخواتي وبروح اجلس معهم
الجود وهي تبي تشوف كمية تأثيرها عليه : اوه بتطول اجل بنام
عقاب وهو للحين صامل ع الثقل : يعني ممكن اطول وممكن لا خذي راحتتس لا تنتظرين
دخل للحمام وبدل وطلع ببجامة اول مره تشوفه بدون ثوب او بدلته العسكرية ، ضحكت وقالت : يووه لطيييف !!
عقاب طارت عيونه وقال : ان شاءالله تقصدين انعكاستس فالمراية !
الجود وهي تضحك : لا انت
كان هيبة بالرغم من البجامة اللي من القماش مصنوعة سوداء بالكامل وتطريز انكتب عليه ، الفريق عقاب باللون الاحمر عند صدره فوق قلبه بالضبط ، صد عنها وقال : الله اكبر يبو عايض الحين النتفه ذي تقولك لطيف راحت الهيبة
الجود ابتسمت وقالت : اطلع بسرعة نبي ناخذ راحتنا
لبس فروته وطلع ، نزلت الروب ودخلت يركض ، شهقت اول م شالها بين يدينه ابتسم وقال : م يفوتني الزييين م يفوتني
الجود صرخت برعب وقالت : الله يفجع العدو !!
عقاب ابتسم وباس خدها وقال : ليه البريكات عند شوفتتس معدومة !؟
الجود وهي تلعب بشعرها : الجود انا متوقع تتحملني ؟
عقاب باس نحرها وهو يبتسم ، تحس بأنفاسه تضربها ، احتّرت وبقوة مسكت وجهه بيدينها وقالت : اخوانك وخواتك ينتظرون
عقاب ابتسم وحط خشمه ع خشمها وقال : لاتنامين باقي م قلت لتس سالفة الورث
الجود وهو ضرّب بالوتر الحساس " الفضول " فزت بحماس ولامست شفايفه بشفايفها ، صرخت وابعدت منه وقالت برعب : اسفه !!
عقاب وهو يلامس شفايفه : شدعوة ؟
طلع ودفنت وجهها فالمخدة ، ياه والفشلة اللي تحس فيها قلبها يدق ثاني مره تلامس شفايفه ، طلع وجلس بالجلسة وهو يحاول يخفي رغبته فيها ، اسر بشّك : يالعضيد وراك مختبص !
ضحى وهي تصّب لعقاب بيالة شاهي ضحكت بسخرية وقالت : شكله كان ناوي وكنسل عشاننا ولقم
البندري بصراخ : يحميييير اصه !!
ناصر ابتسم وقال : اخبث ثلاثة ع وجه الكرة الارضية اسر وعقاب وضحى !
عقاب ابتسم ووجه احمر وعروق وجهه بارزة ويدينه اسوء ، مسح وجهه وشنبه وقال : لا طيبين معليكم
اسر انفجر يضحك وقال : والله م ظنتي
ضحى ضحكت وقالت : خلاص يحيوان
البندري تثائبت وقالت : نعست وسوالفكم بيض
قامت وقام ناصر معها وقال : تمسوا ع خير لاتطولون
عقاب : مسرى الخير لاحقينكم بعد شوي
ضحى : مع الشاهي ظنتي بيصفقنا ابوي ع اذان الفجر
اسر ابتسم وهو يطالع النجوم ، لف لعقاب وقال : ايه يالشيخ يومين وين كنت فيها ووين الخوصاء ؟
ضحى بحدة : منجد انطق وراك بلاء صح !
عقاب ابتسم وهو يحب تحليلاتهم : زي ؟
اسر بصدمة : معرس بالثانية ؟!
عقاب : واخلي الجود صاحي انت !
ضحى : اعجل تكلم !!
عقاب : اقولها وبعدين اقولكم
ضحى : بناديها طيب
عقاب هز راسه بنفي وهو عارف لبسها ولا وده انها تبّدل وقال : نامت خليها
اسر ضربه بقوة ع فخذه وقال : احك !!
عقاب : ورث
ضحى صرخت بكتمة وقالت : وررث ووشش !!؟ بنصير اثرياء ؟
اسر بصدمة : ووش !!
عقاب : سالفة طويلة عرسك فيه يالشيخ وبتشوف كل شيء وقتها
ضحى : خلونا نمشي من بكره ومنها نجهز فيه وكذا
اسر : وشهو اللي نجهز فيه وعرسي ليه فيه !؟
عقاب : قصور ي اسر قصور
ضحى انفجر راسها من الصدمة وقالت : بعد مو قصر واحد !
الجود من وراهم : افا صدق علمتهم قبلي !؟
عقاب ابتسم وقال : ضغطوا علي
ضحى بحدة : يالساحرة وش تبين بأخوي !!
الجود : حييواانه !!
اسر ابتسم وقال : وليه تبينه يعلمتس قبلنا وش الانانيييية ذي !
الجود جلست جنب عقاب وقالت : مو مقصد بس انا غيير الحين
ضحى وهي تشّد شعرها قالت : بقوووم علييها !!
اسر انفجر يضحك وقال : قوومي وانا معتس يأخت الآسر !
الجود تخصرت وقالت : ماشاءالله ووين عقاب ؟
عقاب وهو متكي ع المركى ابتسم وم رد ، ضحى فزت عليها وصرخت الجود ، هو م يدري كيف طارت يده اليسار وسحب ضحى لحضنه وقال : انتبهي !! تصحين م تحصلين عظمة فيتس صاحية !
ضحى انفجرت تضحك وقالت : لا الرجال ضايع
اسر : قوموا طولنا
ضحى : هو ماهو حبن فالنوم كثر ماهو شوق للميلا ينتظر الصبح عشان يشوفها ماهي بصوبك يالحلو
الجود ابتسمت وقالت : منجد !
عقاب : سرينا سرينا
دخلوا ضحى واسر للبيت ، مشى وقال : جهزي لتس كم لبسة ذوقي زيرو بتجهيزات الحريم وبتساعديني
الجود قطبت وقالت : بنروح للقصور ؟
عقاب هز راسه بنعم وكمل وهو يقول : خلصيني
دخل للغرفة لبس ثوبه وشافها تركض بحماس وهي م تدري شلون خلصت كل شيء بثواني ، ركضت لشماعة واخذت عبايتها وبرقعها وشيلتها لبست وقالت : مشينا ؟
استوعبت ان وراهم خّط طويل ركضت تجيب البراد وكاستين معه طلعت وقالت : يالله ؟
عقاب ابتسم انها فاهمته وشال الشنطة ومشى فيها للونيت ، طمرها فالصندوق وقال : اركبي
الجود مشت وركبت الغمارة ، ركب جنبها وقال : تراني انعس انتبهي للطريق وانتبهي لي قبله
الجود بتوتر : لا تسرع عندي فوبيا وابشر
عقاب : تبينا نوصل الشيخة بعد يومين !
دعس ومسك الخط معها ولأول مره ، شّدت ع يده اللي ع القير وقالت : لا تسرع !
عقاب قلب يده وشدّ ع قبضتها وقال : معي يبنتي معي
الجود قربت وحطت راسها ع كتفه وقالت : القمراء شوي وتكتمل يعني بعد يومين بيكون بدر كامل يالله انك توفقهم وتتمم ع خير
عقاب ابتسم وقال : يقولون أهل الهواء لا هوّد الليل يسرون تغويهم القمراء بذكر الحبايب ؟
الجود ابتسمت وقالت : بعد يقولون غلبني الهوى وانا ادري ان الهوى غلاب معي راعي اسلوبٍ خذا القلب باسلوبه !
عقاب ابتسم وباس راسها بقوة وقال :
اتركي الاسلوب بعيييد عن فكرنا ي عذّية
مو بس الهوى غلاب حتى غمازتتس غلّابة !
الجود ضحكت وبانت غمازتها ، شافها بأنعكاس المراية ابتسم وقال : اول انهزام لعقاب بن عايض !
الجود : وشهو ؟
عقاب بحب عظيم : اول انهزام لـ قلبي كان غمازة !
الجود ابتسمت ورفعت راسها وباست خده بحب وقالت : يحبيبي انت تفداك الغمازة وراعيتها !
عقاب ابتسم وقال : مجاره اعنبو حيّها !
كملوا ع هالموال بكاستين شاهي وبوكيت دخان عقاب ، خطٍ طويل ، قمراء واثنينهم ميتين بحُب بعضهم ، صح يكابرون وبقوة لكن يطيحون وبقوة بلحظة !
" في بيت ابو فلاح "
دخل فلاح ومشى لغرفته ، استوقفه صوتها وهي تقول : فلييح
لف لتالين وقال : ارحبي
تالين ابتسمت وسحبت دالين وراها ، مشت ورا تالين برعب وخوف من فلاح اللي م تعرف عنه الا كلمة اخوها البكر ! ابتسم وهو يشوفهم جايين ، تالين ضحكت بسخرية وقالت : م يعّض ترا امشي !
دالين بخوف : انكتمي م اعرف عنه شيء
وقفوا قدامه وقال : وش عندكم ؟ ناقصكم شيء محتاجين حاجة ؟!
تالين حضنته وحاوطها وهو مبتسم ، ابتسمت له وقالت : شدعوة جايين نسولف معك عن البنت اللي شفتها
فلاح : م صار الا كل خير وش تبون تعرفون
دالين بتوتر : فلاح اسفه
فلاح : ع ايش ؟
دالين تقدمت وباست راسه وقالت : كل شيء
فلاح ابتسم وباس خدها وقال : يوسخة تمونين ع رقبتي اخوتس الكبير تتوقعين اخذ بخاطري عليتس ؟
دالين حضنته وهي ترجف ، حسّ برجفتها حاوطها وهداها وقال : اهدا ي دالين اهدا
صقر مشى والدخان مستقر بين شفايفه ضحك وقال : وش الاحضان ذي ؟ مالي نصيب
تالين ضحكت وقالت : وش تبي لا !
صقر ابتسم وشالها بين يدينه وقال : هذا ابسسط احلام تركي
فلاح وهو حاط دالين تحت ذراعه : انشهد بالله
تالين : وش جاب الطاري الحين له !؟
صقر نزلها وقال : وافقي واكسبي فينا الاجر !
دالين : اذا م تبيه لا توافق !
فلاح : اكيد م نجبرها الا دالين انتي تدرسين ؟
دالين هزت راسها بنعم وقالت : ايه بالسنة الثانية
فلاح : وش ؟
دالين : ادارة اعمال
فلاح باس راسها وقال : انتبهي لعمرتس تكفين
دالين فهمته وقالت : عن بعد يحبيبي لا تخاف
مشوا داخل البيت وصلهم وقال : عاد انا استاذنكم
مشى لغرفته وهو ممنوع عليه من زمن بعيد جدًا ، وقتها حلف فلاح يدخل مكان فيه خديجة وفعلاً للحين وافي بالحلف ..
" في قصور مساعد "
انفتحت البوابات اول م شافوا عقاب وعرفوه من الونيت حقه ، تثاوب وقال بنعاس : بنبدأ شغل من بدري الحين ننام
الجود بحدة : اكيد بس نوم بأدب لا اهبدك !
عقاب ابتسم وقال : انا والادب ماشين صح بس اذا شفتتس م اعرفه ولا يعرفني !
دخلوا ونزل عقاب ، شهقت وقالت : هذا كله لنا ؟؟
عقاب هز راسه بنعم وهو يدخل لداخل القصر ، وقفت بصدمة وهي تشوف الخدم يفتحون له البيبان ، حرفيًا م يحتاج تستخدم يدينك مشت وراه وسط الترحيب ، قابلت حسين اللي واقف جنب عقاب شخص كبير بالسن تعطيه بعُمر ابوها لكن له سيادة وقوة وسيطرة خمنت انه سيّد الخدم ، ابتسمت اول م سمعته يرحب فيها ويقول : مرحبًا الف ي انستي
ضحكت وقالت : البقى
عقاب طارت عيونه ، برزت عروقه ، احترق جوفه وقال بحدة : بس اتوقع كذا انتهينا !
مشى وهو ماسكها وراه ، ضحك حسين وقال : اشوفها مثل بنتي يعقاب ! ومبروك زواجكم ليتني كنت حاضر لازم تعيد الكرّه فالبيت
عقاب وهو ضاغط ع ذراعها بغّيرة : اسر وزواجه يكفيك !
حسين ضحك بسخرية وقال : بشويش عليها حضرة الفريق
الجود برعب : شفييك انت ! واضح انه م يقصد شيء !
دفها داخل جناحه وسكر الباب وراه ، مشى وهو يفك ازرار ثوبه سحبه ورماه ع الكنبه ، شهقت اول م نزل فنيلته وصدت عنه مشت للإطلالة نزلت عبايتها بهدوء وحطتها ع قطعة كنب صغيرة ، اضاءة القمر كانت عليها وبقوة مبرزه ابسط تفاصيلها ، مشى عندها وباس كتفها بهدوء وقال : تعالي ننام
الجود لفت له كان لاف منشفة ع خصره حطت يدينها ع صدره تبعّده منها وقالت : بشرط ننام مؤدبين !
عقاب بحدة : شرايتس تحطين سلاحي بيننا !؟
الجود ابتسمت تخفي التوتر : حلوه وينه ؟
عقاب مسكها مع يدها ومشى فيها للسرير وقال : هذا اللي ناقص !
انسدح بحضنها وراسه ع صدرها ، غطى نفسه وغطاها معه رفع راسه وباس فكها بكل قوته وقال : اتركي !
الجود خلخلت اصابعها بشعره وقالت : م بترك الحين
عقاب : الاسباب ؟
الجود : صغيرة ع الامومة ! ماني مستعدة لك ابدًا
عقاب ابتسم وهو يلامس بطنها بيده وقال : شدعوة محد صغير ع الامومة ! امهاتنا..
قاطعته وهي تقول : جيل غيير عن جيل !
عقاب حاوط خصرها وشّدها عليه وقال بصوته الثقييل : اجل لا اسمع نفس نامي
الجود لفت وعطته ظهرها ، حط راسه ع كتفها خده يلامس خدها ، تحّس بكل تحركاته ميته حرارة منه تتمنى لو يبعد شوي ، ارتخت يده وانتظمت انفاسه دليل نومه ، ابعدت بهدوء وحطت بينهم وسادة طويلة ، نامت بعد مدة وهي كانت خايفة يصحى لكنه غلبه النوم اثر التعب ..
" بدون احداث بعد يوم "
تحديدًا الليلة اللي تسبّق العرس ، الكل مستنفر في بيت ابو فهد ركبوا الجمس ومشوا للموقع اللي مرسله عقاب للعريس اسر ، ابو فلاح وابو تركي وراهم ، ابو عبدالعزيز واهله بعد معهم وجميع الحضور الباقيين ..
" فالقصر فالليل الساعة ٧ "
عقاب : خلصتوا ؟
حسين وهو برا البيت بحكم ان الجود موجودة محد يدخل من الخدم الذكور ابدًا ، ابتسم وقال : اتوقع ادخل وشوف حَرمك
مشى عقاب وضيدان معه دخلوا للمكتب ، هو خلع الجبّيرة ، صح فيه آلم لكن هو عقاب فالنهاية ..
" في مرّبط مساعد "
الجود برعب وهي تشوف كيف المرتجز ضخم ، ركبت بهدوء ومشت فيه انسدحت ع ظهره ، كان يكلم ضيدان فالمكتب يعلمه اخر التغييرات بالشغل ، طلع مع الشرفة شاف شعرها يلامس نص ساق المرتجز ويدينها مرفوعة للسماء بشكل مُغري وفاتن ، ضحك وقال : عمرك غرت من خيل ؟
ضيدان وهو ضايع بين الاوراق : ايش !
عقاب ابتسم وقال : انسى
بدأ يشتغل مع ضيدان وبعدها بساعة سمع اصوات اهله فالحوش طلع وشافها تعلق اسم اختها متداخّل بأسم اخوه فوق الدرج بشكل جميل جدًا ، رفع صوته وقال : عساتس ع القوة
الجود لفت له وقالت : وياك يعيونها خلصت ؟
عقاب وهو يحرّك يده اليمين قال : خلصت اهم شيء
الجود مشت مع الدرج واتجهت له وقالت : اوه يدك حمدلله ع السلامة ي بطلي
رفعت يده وكانت بتبوسها الا انه سحب يدها اللي ماسكه يده وباسها وقال : الله يسلمتس يالله ترا جايين البسي وتعالي
الجود ضحكت بخجل وقالت : الان !
مشت ومشى عقاب اول م سمع اصواتهم ، كانت الصدمة معتّريتهم اولهم ابو فهد واخرهم ام عبدالعزيز ، تقدم وقال : ارحبوا في محلكم يالله م فيه وقت الحضور بيجون قريب
ابو فهد بصدمة : البقى ي مرحب لكن يلعن ابوك ان اسلمتك يكلب !!
عقاب ابتسم وقال : يحق لك واسف اني خبّيت ذا كله عنكم
اسر بصدمة : ماشاءالله ماشاءالله يبه تكفى عليك به
انفجروا العيال كلهم يضحكون وقال عبدالعزيز : وين المربّط
حسين تقدم من ورا عقاب وقال : عايض !
ابو فهد وابو تركي وابو فلاح بصدمة : حسين !!
حسين نزلت دموعه بحرقة وتقدم وسلم عليهم السلام الحار هم يتذكرونه وزييين بعد ، ابو فهد : شفع لك شوفة حسين ي عقيب ولا والله م يفكك مني الا الموت
عقاب : تمون يالغالي امشوا داخل
عبدالعزيز ركب الفرس حقه وركض فيها اول م عرف محل المرّبط من احد الخدم ، وصله واسر وفلاح يركضون وراه ارتفع صوته وهو يقول : يالخوصااااااااء !
تركوها تركض له ، كم صار لها منه فوق الاربع اشهر من طاح فالعناية م جاها ولا شافته ، كيف له يخون عشرتها هي اولى الاناث بحياته ، استقبلها بحضن وصهّلت بشوقها له ، ابتسم وركبها وقال : وحشتييييييني اكثر
وقفت ع خلفيتها ، هو يحّسها صارت اثقل ، اكيد تدريب ابتسم وركض فيها كانت سريعة جدًا وده يلحق الميلا عارفها تعشق الخوصاء ، وصل لكن للاسف دخلت داخل احد القصور الثلاث تحت تجهيزات العرس بكره ، رجع بالخوصاء وصار يلاعبها وقته كله ، وفلاح اسوء منه مع الادهم وعبدالعزيز وفرّسه الخضراء بحكم عيونها الخُضر ولونها الابيض جميلة جدًا ، صاروا يلعبون حتى غابت الشمس ..
" فالقصر الثاني "
البنات منتشرين من صراخ وحماس ، البندري بحماس : اخيييييييرًا حييييييياة الاغنيييييييياء !
مشت بين الاسياب الوسيعة تركض بحماس وتلاعب شعرها مع ركضها ، صدمت فيه وهو طالع بعد م كان يدخّن بأحد الممرات اللي تشرُك القصور ببعضها ، صقر بخرشة : بنت !
البندري شهقت برعب وبرّدت اطرافها عجزت تتحرك ، ابتسم وقال : بندري
البندري برعب همهمت له وقالت : همم ؟
صقر : صغيرة فالسن وفاتنة تكبر ويكّبر زينها معها !
البندري لفت علطول وسحبها صقر له وقال : يالبندري ارفقي بحالي ! من اول لقى م طلعتي من راسي انا شاريتس والله بس لا تلويين ذراعي فيتس
تركت يدها منه وركضت وهي ميته احراج نزلت مع درج تدري لوين يوديها ، شهقت برعب وقالت : يييمه !!
ضيدان وهو يكلم الفريق راضي لف بكل قوته وقال : ابشر طال عمرك !
سكر ونزل السماعة وقال : مييين هنا !؟!
البندري صدت عنه تأكدت انه م شافها بس هي شافته طلعت الدرج ، صد بقرف ومشى من ورا الدرج ، شافت دالين نازلة ولا حذرتها هي متأكدة انها ماهي فالمقدرة ابدًا ، دالين نزلت وشافت الحديقة ابتسمت وقالت : يالله يارب نعيش هنا دايم
لفت بعيونها وشافت سماعة ع السور ، سحبتها وحطتها بأذنها فزت برعب من قوة الصوت اللي طلع من وراها وهو يقول : رجعيها !
دالين لفت وهي ترجف برعب شافت ضيدان واقف بكب هيبته ، هي تحلف اذا م كانت تعرف عقاب واخوانه بتحسبه توأمه ، مدت السماعة برعب ، سحبها ولبسها وقال : اطلعي فوق لحد يشوفك هنّيا
مشت وهي تحس ان روحها غادرت جسدها ، استوطنها وسكنّ بروحها ، صوته مرعب لكن بالوقت نفسه كان مريح لها ، عشقته وهي جاهلة بالعشق ، كانت تناظر فيه من بعيد ، نظراته الطاهرة لها اخذتها لبعيد ، دالين خفيفة وجدًا لكن م عمرها طاحت ع احد والحين حضرة اللواء ضيدان آل حثلين بنفسه ويينها ووين الثقل..
" فالليل الساعة ١٠ "
الميلا وهي انتهت رسميًا من التجهيزات لفت للجود وقالت : ايه ؟
الجود : بسم الله اللهم اجعله خير
الميلا ضحكت بسخرية وقالت : خلصيني قرب منتس ؟
الجود طارت عيونها وقالت : لاا !
الميلا : تمام
ومشت من قدام الجود اللي لحقتها ..
::::::::::::::::::::::::::::::::::::::::::
انتهى البارت ادعموني بنجمة وكومنت عشان اتحفز اكملكم ❤️
( يمرحبًا ملايييييين ، عُدنا والعُود حميييد ، وحشتوني فجروه نجوم وكومنتات ابي اشوف حماسكم للزواج 🥹 ، ودعناكم الله ببارت جديد ❤️ )