"ဘုန်း"
ခန္ဓာကိုယ်တစ်ခုလုံး တစ်ပတ်လည်ကာ dojo mat ပေါ် ကျောဖြင့် ပြန်ကျတာမို့ ဇေရှိန်ဟန့်မျက်နှာ ရှုံ့မဲ့သွားရ၏။
"အွတ်"
ဒါနဲ့ဆို ကိုစိုင်းမာန် သူ့ကို ကိုင်ပေါက်တာ သုံးကြိမ်မြှောက် ရှိပြီဖြစ်သည်။
"ထနိုင်သေးတယ်မလား...မရတော့ရင် လက်ပုတ်လိုက်"
သူ့မှာလည်း မာနရှိသေးတာမို့ ဇေရှိန်ဟန် ချက်ချင်း ပြန်ထပြီး ဂျူဒို အင်္ကျီခါးစည်းကြိုးကို မြဲအောင် ပြန်ချည်လိုက်၏။
"မင်း ကျွမ်းကျင်တဲ့ Wrestling ကိုသုံးပြီး ပြန်တိုက်လေ ရှိန်ဇေ"
ကိုစိုင်းမာန်နှင့်သူက ခန္ဓာကိုယ်အရွယ်အစားချင်း သိပ်မကွာသလို အရပ်ချင်းလည်း မတိမ်းမယိမ်းဆိုပေမယ့် သူ့ဘက်က ပုံမှန်လုပ်နိုင်စွမ်းထက် တမင်အားလျှော့ထားတာကို သိသော ကိုစိုင်းမာန်က ကျေနပ်ပုံမရပေ။
Judo နဲ့ Wrestling နှစ်ခုလုံးက လုံးထွေးသတ်ပုတ်ရသည့် ကိုယ်ခံပညာတွေ ဖြစ်ပြီး အနိုင်ရဖို့ နည်းလမ်းတွေလည်း တော်တော်များများ ဆင်တူကြသည်။
သို့သော်လည်း ကိုစိုင်းမာန်က Judoမှာ ခါးပတ်နက်ရထားသော Pro ကစားသမားဖြစ်ပြီး ဇေရှိန်ဟန်က ကျောင်းပွဲတွေမှာ Wrestling ကို အပျော်တမ်း ကစားခဲ့သော Freestyle wrestler မို့ ကွာတာကတော့ ကွာတာပဲ ဖြစ်သည်။
နောက်တစ်ချက်က ကိုစိုင်းမာန်နေရာမှာ တခြားလူသာဆို ဇေရှိန်ဟန် အနိုင်ရဖို့အတွက် ရေကုန်ရေခမ်း ပြန်ချမှာဖြစ်ပေမယ့် ကိုစိုင်းမာန်ဟာ သူ့ရည်းစားရဲ့အစ်ကိုကြီး ဟူသည့် အရှိန်က သူ့ကို သိပ်မလှုပ်သာစေ။
"ကိုမာန် ကစားချင်တဲ့အချိန်အထိ ကစားပါ...တစ်ညလုံးဆိုလည်း ကျွန်တော် ပြန်ထနိုင်တယ်"
ဇေရှိန်ဟန် သူ့ယောက်ဖလောင်းကို အနိုင်ယူဖို့ ကြိုးစားမှာမဟုတ်သလို လွယ်လွယ်ဖြင့် အရှုံးပေးမှာလည်း မဟုတ်ချေ။
"ဘုန်း"
"အ!"
ဒီတစ်ခါတော့ ကိုစိုင်းမာန်က သူ့ကို ကိုင်ပေါက်ရုံတင်မက သူ့လည်ပင်းကိုပါ လက်မောင်းနှင့်ချုပ်ပစ်လိုက်တာပင်။
