My Youth Was Yours ( Completed )

5.Let's keep growing old together

( Uni )

' သူပျော်ဖို့ ငါတစ်ယောက်တည်းနဲ့ မလုံလောက်ဘူးလား ' ဆိုတဲ့ မေးခွန်းကို ဓာတ်တော်ချိုင့်က ပြန်လာကတည်းက ယံယံတစ်ချိန်လုံး တွေးနေမိသည်။

ယံယံကရော ဉာဏ်တစ်ယောက်တည်းနှင့် လုံလောက်လား။

ဉာဏ်က ယံယံ့လိုဘောလုံးကန်လေ့မရှိ ၊ အသေးစားလက်မှုပညာတွေ ဖန်တီးရတာကို စိတ်မဝင်စား ၊  အတန်းလစ်ရတာ မကြိုက်သူ။

ယံယံ့မှာလည်း ဉာဏ့်အပြင် တခြားသူငယ်ချင်းတွေရှိပါသည်။ ပြောရလျှင် ဘောလုံးအသင်း တစ်သင်းလုံး ၊ အားလပ်ချိန် Miniatureတွေ ဖန်တီးတဲ့နေရာမှာ တိုင်ပင်ဖော်တိုင်ပင်ဖက် မိန်းကလေးသူငယ်ချင်း မီမီဟန်  ၊ ယံယံ့လိုမျိုး သင်္ချာဆိုအရမ်းပျင်းသော အားမာန်နှင့် သူရိန် ။

သို့သော် ယံယံက ဉာဏ့်ကိုမြင်လျှင် ဘောလုံးသမားတွေကိုလည်း ထားခဲ့ပြီး ဉာဏ့်နောက်ကိုပဲလိုက်ခဲ့သည်။ ဉာဏ်က နေ့လယ်စာအတူစားဖို့ပြောတဲ့နေ့ဆို အားမာန်နှင့် သူရိန့်ကို ဘေးဖယ်ပြီး ဉာဏ်ရှိရာ စားပွဲမှာပဲထိုင်ခဲ့သည်။ ကျောင်းပိတ်ရက်မှာ အသေးစား လက်မှုပညာပြပွဲကိုအတူသွားဖို့ မီမီဟန်က သူ့အတွက်‌ရော လက်မှတ်ဝယ်ထားသည်ဆိုတာတောင် ဉာဏ်က ဓာတ်တော်ချိုင့်သွားဖို့ ပြောသည့်ရက်နှင့် တိုက်နေသဖြင့် မီမီဟန်နှင့်အတူမသွားခဲ့ ။

ဉာဏ်ကရော တခြားသူတွေနှင့်ယှဉ်လျှင် ယံယံ့ကိုရွေးပါ့မလား ။

ဉာဏ်က စက်ဘီးနောက်မှာ ခေါင်ထွဋ်နဲ့ ခန့်သော်ဇင်ကိုလည်း တင်စီးသည်။ သံစဉ်ချိုနဲ့ လဝန်းမေကိုလည်း မုန့်ဝယ်ကျွေး၏။  ဘယ်သူက သင်္ချာလာရှင်းပြခိုင်းခိုင်း ငြင်းဆန်လေ့မရှိ ။

တကယ်တော့ ဉာဏ်က ယံယံတစ်ယောက်တည်းတင်မဟုတ်ဘဲ သူငယ်ချင်းတိုင်းအပေါ် ဂရုစိုက်ပေးတတ်သည်ဆိုတာ သိလိုက်ရသည့်အချိန်မှာ ယံယံ့စိတ်ထဲ အနည်းငယ် ဝမ်းနည်းသွားရသည်။

" မာမား.... တက္ကသိုလ်တုန်းက မာမားနဲ့ အန်တီရတီက အချစ်ဆုံးသူငယ်ချင်းတွေလား "

" ဒါပေါ့..မာမားတို့က အိပ်တော့လဲ တစ်ခန်းတည်း...ကျောင်းမှာထိုင်တော့လဲ တစ်ခုံတည်း... ဈေးဝယ်ထွက်လဲ အတူတူ...ရုပ်ရှင်သွားကြည့်တော့လဲ အတူတူ... တက္ကသိုလ်ကျောင်းသူဘဝ တစ်လျှောက်လုံး မာမားတို့နှစ်ယောက်က တတွဲတွဲလေ "