My Youth Was Yours ( Completed )

9. How was your first date?

( Uni )

သည်ကနေ့ ယံယံက မီမီဟန်နှင့်ဒိတ်ဖို့ ချိန်းထားသည်တဲ့။

ဉာဏ် မနက်အစောကြီး အိပ်ရာနိုးနေပြီး ဘေးမှာ နှစ်နှစ်ခြိုက်ခြိုက် အိပ်ပျော်နေသည့်လူကို တိတ်တဆိတ်ကြည့်နေမိသည်။ ယံယံအခုလို အိပ်ပျော်နေချိန် ဘေးကနေ တစိမ့်စိမ့်ကြည့်နေရတာ ဉာဏ် တအားသဘောကျ၏။ အများအားဖြင့် ယံယံက ခေါင်းနှင့်ခေါင်းအုံး တခြားစီဖြစ်နေတတ်သည်။ မနက်လင်းပြီဆို တစ်ခါတရံ ဉာဏ့်ခေါင်းအုံးတစ်ခုတည်းပေါ်မှာ လာတိုးအုံးထားတတ်ပြီး တစ်ခါတရံ ဉာဏ့်ပုခုံးစွန်းကို ခေါင်းခုထားတတ်သည်။ တချို့မနက်တွေကျ ခြေထောက်ရောလက်ပါ ဉာဏ့်အပေါ်ကို ဖက်လုံးတစ်ခုလို ခွထားသည့်ပုံစံမျိုးနှင့် မြင်ရတတ်ပြီး တချို့မနက်တွေကျတော့ ကုတင်ရဲ့ တစ်ဘက်စွန်း‌ကို ရောက်နေတတ်ပြန်သည်။ ပုံစံအမျိုးမျိုးနှင့် အိပ်တတ်ပေမဲ့ အိပ်ရာကထဖို့ နှိုးပြီဆိုရင်တော့ ဆူအောင့်အောင့်ဖြင့်နိုးလာတတ်တာကတော့ တစ်ပုံစံတည်းပါ။

ဘယ်တော့မဆို ဉာဏ်ကအရင် အိပ်ရာကနိုးတတ်‌သူဖြစ်ပြီး ဉာဏ်နိုးလာတိုင်းလည်း ယံယံက အိပ်ပျော်နေဆဲ။ ခါတိုင်းဆို ဉာဏ့်ဘေးမှာအိပ်နေတဲ့ပုံစံကိုကြည့်ပြီး ဉာဏ်ပြုံးနေတတ်ပေမဲ့ သည်နေ့မနက်ကတော့ မတူ။ နောက်ထပ်နာရီအနည်းငယ်နေလျှင် ယံယံက တခြားတစ်ယောက်နှင့်  အတူရှိနေတော့မှာပါလားဟုတွေးမိသောအခါ သက်ပြင်းတွေပဲ အခါခါချနေမိသည်။

အမှန်ဆို ဉာဏ့်စိတ်ထဲမှာ ယံယံ့ကို မသွားစေချင်ပေမဲ့ သူ့မှာ တားပိုင်ခွင့်မျိုးလည်း မရှိ။ ပြီးတော့ ဒါမျိုးက တစ်ချိန်မှာ ကြုံကိုကြုံလာရမှာဆိုတာ ဉာဏ်တွေးထားပြီးသားအရာပါ။

" ပိုင်ဇေယံ....ပိုင်ဇေယံ ...ထတော့... ခုနစ်နာရီခွဲပြီးပြီ "

အိပ်ရာကနှိုးသဖြင့် ထုံးစံအတိုင်း ယံယံက မျက်လုံးတွေမဖွင့်ဘဲ ဉာဏ့်ကို ဆူအောင့်တော့သည်။

" ဟာ...လုပ်ပြီ မင်းနဲ့အိပ်ရရင် အဲ့လိုချည်းပဲ... ဘယ်တော့မှ အိပ်ရေးမဝဘူး....ကျောင်းသွားစရာလဲ မရှိဘဲနဲ့ကို တစ်ခါလောက်များ ကိုးနာရီလောက်ထိ အိပ်ပါလား... ဘာမှန်းမသိဘူး "