30 Days with Mr. T (Published under PSICOM Publishing Inc.)

Chapter 36

Nalalapit na ang SPG.
Ang sumusunod na kabanata ay may salitang hindi masyadong angkop sa mga bata. Pang-isip bata lang. Patnubay ng magulang ang kailangan.

Tumaas ang dalawang kamay ni Sir Apolonio. Para siyang nasa giyera at ngayon ay sumu-surrender na. Nabitiwan tuloy niya ang pagkahawak sa kamay ko, na inagaw naman agad ng principal.

"Brixander Talaserna. Long time, no see. Akala ko, hindi na tayo magkikitang muli." Sabi ni Sir Apolonio na ibinaba na ang mga kamay at inayos pa ang nagulong makapal na buhok.

"What are you doing here? Sino ang nagpapasok sayo?" Medyo galit yata si principal. Humigpit din ang pagkakahawak niya sa kamay ko. Parang ayaw niyang nandito ang tutor ko.

"Ako!" boses mula sa may pintuan ng library. "Ako ang nag-imbita rito kay Apolonio." Si lolo pogi na naka-bathrobe lang. Feeling niya isa siyang bold star. "Lumabas ka na, Brixander. Iwan mo si Mayumi rito kay Pol."

"What?" hindi makapaniwalang tanong ni Brix sa lolo niya. Bakit? Hindi ba kapani-paniwala na gusto ko ring tumalino kagaya niya?

"Lumabas ka na lang, Brix." Sabi ko at bumitiw sa kamay niya. Masarap mang hawakan ang malambot niyang kamay, kailangan kong pigilin ang aking nararamdaman dahil gusto ko talagang ma-memorize si webster. Dabalyu-ihhh-biii-easter, webster!

"Isa ka pa!" reklamo niya sa akin. Tinitigan din niya ng masama si Sir Apol. Ngumisi lang ang teacher sa kanya.

"Labas na, Brixander." Utos ng bold star na kulay pink ang bathrobe. "We will also discuss something about your wedding. I'm reminding you, you and Mayumi will get married two weeks from now. Kahit inaasikaso naman iyon nina Arman at Lily."

Napaangat ang mga mata ko. "Lily?" lumabas sa bibig ko.

"Si Lily, hija. Kaya nga namalagi muna siya rito pansamantala para maging maayos ang kasal nyo. Bukod sa mahusay sa negosyo ang batang iyon, marami pa pala siyang nalalaman tungkol sa ganitong bagay." Paliwanag ni lolo na itinali ang roba niya kasi lumilitaw na ang abs niya.

Kaya pala parang dito na nakatira si Lily. Simula noong party, palagi na lang siyang sumusulpot sa paningin ko. Sigurado ako, alam niya ang set up namin ni Brix.

"My fiancee likewise has the right to know all about our wedding. Dapat kasama ko siya." Napalunok ako nang hapitin ako sa bewang ni Brix. Napasandig tuloy ang katawan ko sa kanya. Namaaan!Bakit ang tigas kasi!?

"That is why Pol is here to teach her. Everything, apo. Trust me." Lumapad naman ang dibdib ni Pol. "Kaya labas na, Brixander!"

Parang nag-atubili pa si Brix nang pakawalan ako. Sarado ang mga kamao niya na inis na lumabas ng library. Takot niya lang kay lolo.

Tinapik ni lolo si Sir Apol. "Pagpasensiyahan mo na ang apo ko, Pol. Hindi pa rin siguro niya makalimutan na ikaw ang nakatalo sa kanya sa regional division." Hmm, regional division? Naglaban kaya sila? Sa isang quiz bee? At natalo ni Sir Apol si Mr. T? Ting! Sabi ng bombilya sa ibabaw ng ulo ko.

"Wala po iyon, Don Emilio." Ngumiti siya at lumitaw na naman ang mga ngipin. "Malapit na po pala ang engrandeng kasalan?"

"Tama ka, hijo. Pero civil wedding lang. Ewan ko ba sa batang 'yun at ayaw sa simbahan." Eh kasi baka raw masunog siya. Sabi ulit ng bombilya. "Kaya nga gusto kong mag-refresher itong si Mayumi. Para kasing kinakalawang na ang utak niya."