فريسة غلبت الصياد ©️ - الجزء الثاني - كاملة ✅

الفصل الحادي والعشرون

الحلقة الحادية والعشرون :

في منزل كارما هاشم ،،،

توجست صفاء خيفة مما يريد رأفت طلبه ، فهي تظن أنه يضمر في نفسه شيئاً ما تجاه ابنتها ، اضطرب قلبها ، وبدأت علامات القلق في الظهور جلياً على ملامحها ..

عقدت صفاء حاجبيها في دهشة ، ثم نظرت إلى رأفت في توجس و..

-رأفت بنبرة واثقة : أنا عاوز أتجوز السيدة الفاضلة صفاء هانم .. والدتكم ...!

-كارما وكنزي بأعين مشدوهة : ميييين ؟؟؟؟

-رأفت مكملاً بثقة : صفاء هانم ..

-صفاء فاغرة شفتيها : هـــاه .. حضرتك واعي للي انت بتقوله !

-رأفت : ايوه ، واعي جداً

-كارما بعدم تصديق : مش ممكن

-كنزي : ده .. ده مستحيل يحصل

اعترضت الفتاتين بشدة على طلب رأفت للزواج من والدتهما ، ولكنه حاول باللين إقناعهما وتوضيح أسباب طلبه هذا ...

-رأفت بنبرةهادئة : أنا عارف ان طلبي ده غريب ومفاجيء ليكم ، بس أنا فعلا حبيت صفاء هانم من قلبي ، ولأول مرة احس بالمشاعر دي

-كارما بنظرات مصدومة : طب ازاي

نظرت كنزي إلى والدتها ، ورمقتها بنظرات حـــادة وكأنها تعاتبها على تساهلها في الرد على المهندس رأفت ، ولكن كانت المفاجأة أقوى من صفاء و...

-صفاء بتردد : يا رأفت بيه انت .. انت آآآ

-رأفت مقاطعاً وهو يشير بيده : أنا حاسس بجو الأسرة معاكو ، حاسس انكم مسؤلين مني ، أنا طبعاً استحالة أخد مكان المرحوم هاشم الله يرحمه ، لكن مش هاقدر تحت أي حــال أسيبكم لوحدكم ، حتى لو رفضتي يا صفاء هانم عرضي للزواج ، فانتم برضوه ملزمين مني

-كنزي بحدة : احنا نقدر نعتمد على نفسنا ، مش منتظرين مساعدة ولا شفقة من حد

-رأفت : يا بنتي أنا مقصدش كده ، أنا مش عاوز حد يسيء ليكم ولو بالكلمة حتى .. أنا طلبي للجواز من مامتك حماية ليكم قبل ما يكون مساعدة زي ما انتي مفكرة ، انتو بنتين لوحدكم ووالدتكم ربنا يديها الصحة محتاجة اهتمام زي ما انتو الاتنين محتاجين ده .. وبدون راجل معاكو فأنتم آآآ...

-كنزي مقاطعة بنبرة غاضبة : احنا مش محتاجين راجل ، احنا نقدر نحمي نفسنا كويس

-كارما وهي تهز رأسها باضطراب : أنا مش عارفة أقول ايه

صمتت صفاء قليلاً لكي تفكر فيما قاله رأفت ، فإن كان عرضة للزواج غير ملائم بالنسبة لها ، ولكنه في نفس الوقت وسيلة لضمــان رعايته للفتاتين ، هي تخشى عليهما أن يصيبها مكروه وتتركهما دون حماية أو من تعتمدان عليه ..