عاشق المجهول (حب لا تراه الشمس)

الفصل التاسع والعشرين

فى البداية عايزة اقول ع حاجة ،الناس اللي بتقول خالد هيعرف بحب فاطمة وايه لزمة الرواية، مش ضرورى كل الروايات البطل يحب البطلة ويتجوزها ع تانى حلقة ويقعدوا باقي الرواية يحبوا بعض
رواية عاشق المجهول منقسمة جزئين او ماشية فى اتجاهين ،اتجاه عاشق المجهول وهو خالد ، واتجاه حب لا  تراه الشمس وهو حب فاطمة
وفى الاخر الاتجاهين لازم هيتقابلوا

 
رب اشرح لى صدرى ويسر لى امرى واحلل عقدة من لسانى يفقهوا قولى
الفصل التاسع والعشرون

فى شركة البدر:

يجلس فى غرفة مكتبه شارداً يتذكر كلمات حنين معه

" حنين: الله ، مشهد رومانسى مؤثر جدا

خالد: حنين ! إيه اللي جابك هنا؟

حنين: من حظى يا بشمهندس ، عشان أتفرج على الفيلم الرومانسى ده ، فعلا ولا أفلام الأبيض واسود ، البطل يسيب البطلة ويتجوز ، ويا عينى البطلة تطلق ، فترجع لحبيبها الأولانى تانى ، إيه رأيك فيلم رائع مش كده

خالد: إنتى أتجننتى يا حنين ، إنتى فهمتى إيه ، دى غادة....

حنين: أنا فهمت صح يا بشمهندس ، فهمت أنت ليه كنت بعيد عنى طول الفترة اللي فاتت ، فهمت مين اللي شاغل تفكيرك وعقلك عنى ، بس للاسف فهمت متأخر أوى

وتهمّ حنين أن تغادر ، ولكن يوقفها صوت خالد قائلاً: رايحة فين؟

حنين: رايحة لبيتى ، ياريت ورقة طلاقى توصلنى "

وهنا يضع خالد يده على وجهه فى حزن وىسي ، تدخل عليه فاطمة فتنظر له فى شفقة على حاله قائلة: وبعدهالك يا أبيه ، هتفضل كده لحد إمتى ؟

ينظر لها خالد فى حزن قائلاً: مش قادر أنساها يا فاطمة ، مش متخيل إنها راحت وسابتنى ، ماتت وهى فاكرانى بخونها ، ماتت وهى زعلانة منى يا فاطمة

فاطمة: لا يا أبيه ، أكيد هى حاسة بينا دلوقتى ، وعرفت أنت بتحبها قد إيه ، وإنك عمرك ما فكرت تخونها

خالد: صورتها مش عايزة تفارق خيالى يا فاطمة، إحساسي إن أنا السبب فى اللي حصلها مموتنى ، مخلينى مش قادر أكمل الحياة

تقترب منه فاطمة فى حنان قائلة: لو كل واحد مات له حد عزيز عليه وقف الحياة بعده ، حياتنا كلها هتوقف يا أبيه ، أنا كمان حسيت نفس إحساسك لما ماتت أمى وسابتنى لوحدى، بس كملت حياتى ، مش معنى كده إنى نسيتها ، فى أشخاص فى حياتنا مينفعش يتنسوا مهما كان مش موجودين ، بس الحياة لازم تمشى زى ما ربنا كاتبلها تمشى ناس ماتت وناس لسه هتموت ، نزعل على فراقهم ، بس يفضل جوانا الأمل إن ربنا هيجمعنا بيهم على خير ، هى دى سنة الحياة ، وحنين كان مكتوبلها عمرها ينتهى فى الوقت ده ، حتى لو مكنش كل ده حصل ، كانت برضه هتموت ، حتى لو كانت فى بيتها على سريرها ، وكفاية إنها جبتلك اجمل هدية قبل ما تموت ، بنتك فاطمة