إلى أين تصل

3

فتحت عيوني ، الدنيا ليل فالغرفة ظلمة
شفت ممرضة دخلت تتطمن علية

حاچيتها ـ خيتي فدوة

نزت و إجت سألتني ـ ها شلونچ؟

جاوبتها ـ فدوة گوميني مختنگة طلعيني منا

باوعت حواليها يلا هزت راسها بالرضا
خلت مخدة على صدري و تچتني عليها حتى اگوم ، تمشت وياية بالممر و رجعتني

من صرنا قريبين على غرفة المريض
" عباس " شفت يمه ثنين شباب و جاي يصلون صلاة الصبح

رجعت لغرفتي ، أمي بايته يمي فمن گاعدة للصلاة و ما محصلتني طالعة تدور علية

اتطمنت علية و راحت تصلي

اني دوم اغلس على صلاة الصبح حتى لو فزيت ارد انام
فرجعت تمددت، بس غمضت عيوني سمعت ـ ﴿فَخَلَفَ مِن بَعْدِهِمْ خَلْفٌ أَضَاعُوا الصَّلَاةَ وَاتَّبَعُوا الشَّهَوَاتِ ۖ فَسَوْفَ يَلْقَوْنَ غَيًّا﴾

فزيت و نشغت ، امي طفرت من سجادتها و سبحتها بإيدها

عدِلت المخدة الجوة راسي و هي تگلي ـ شبيچ شنو جيثوم؟ خاف من نومتج هاي لا انتِ على ظهرج و لا انتِ على وجهچ

رادتني انام ما قبلت و طلبت ماي اتوضئ
جابتلي اتوضيت و صليت

اخذت امي التربة مني و غطتني و هي رجعت نامت بفراشها

ما اجاني نوم بقيت اتصفح الموبايل

شفت وحدة من الممرضات دخلت و صارت تباوع بالأجهزة و هي مبتسمة بعدين خلت عينها بعيني و گلتلي ـ كليتچ اليمنى متحسنة و اليسرى خوش تشتغل ، بس هاليومين تحملينا

رديت عليها ـ اليمنى شبيها غير اليسرى فشلت ؟

جاوبتني ـ اليمنى هم تضررت بس شي قليل ، و لمن فشلت اليسرى صار كلشي عليها فتقريباً انتهت ، لوما سوينالچ الزرع و اليسرى شالت الشغل چان هسة بقيتي بكلية وحدة و تعبانة

نزلت دمعتي و درت وجهي عنها
إدنت و گلتلي ـ لا تزعلين خلصتي الحمد لله ، جاي اسولفلچ لان انتِ دارسة و متعلمة و ردتچ تفهمين حالتچ المرضية

عافتني و طلعت

الصبح اجو ابوية و اخوية جابو لأمي ريوگ
آني هَم وصل أكلي

امي گعدت على كرسي گبالي تريد توكلني
كابرت و صرت آكل بنفسي لإن كلش تعبت وياية

اكلت شوية و تمددت رادوا آكل بعد
گلتلهم ما أريد

عيني ظلت على الباب شفت واحد من مرافقين المريض عباس واگف گبال بابنا
اتلگه شاب بايده علاگة و سلم عليه

طاح گلبي من سمعت صوت الشاب الوصل
هو نفس الصوت الي سمعته يردد قرآن وية صلاة الصبح

حسيت روحي تريد تطلع ، الكل صار يباوع علية