إلى أين تصل

8

فتحت الدفتر للصفحة الي وصلتلها چان مكتوب بيها فوگ 📓: بسم الله الرحمن الرحيم
الزمن 2015/12/12 يوم السبت

السلام عليكم ، شلون ك/چ اليوم اريد اختم وياك المرحلة الاولى بكلشي يخصها
مرحلة الدگاگ او الدگ بين قوسين و بالفصيح "الوَسواس"

اني عايشت هاي المرحلة من بلشت بشغلي بالجيش و ساعدني بيها عباس و مؤمل ، مؤمل عاش لحظاتها لحظة لحظة وياية...

"قصده الشهيد الي شفته بالحلم و ناشر عليه منشور "

بس أكو هواي لحظات تركوني حتى اتعلم
ركز و احفظ كل كلمة لإن هاللحظات راح تلاگيك و تعيشها

شنو هو الوسواس؟
هذا عالِم الشياطيين و من كبارهم و إلة إسم ثاني و هو الخناس

وسوسة الشيطان تصير للانسان بطريقتين الاولى : التزيين يعني يجمل الشيطان العمل السيئ للإنسان فيصدگه
مثلاً "تعال يا انسان هذا صاحبك مايحب فلان فتعال اغتاب فلان ، عيّب على شكل فلان و ضَحِّك الناس عليه فصاحبك يحبك "

" تعال بوگ هالفلوس و عيش حياتك حالك حال باقي الناس "
"تعال إسمع اغاني شگد حلوة شكو بيها"

اما الطريقة الثانية "الوسوسة" : تكون عن طريق التبرير و خاصة بالامور الدينية

كل إنسان موكل بي شيطان معين، لمن يقرر هالانسان يتقرب لله يحاول هالشيطان يثنيه

و لما الشيطان ما يگدر ، يحل محلة شيطان "الوسواس"
يبدي الوسواس وية الانسان من بعض الثغور الي يلاگيها بروحه

و هذي الثغور تصير بسبب عدم المعرفة الكافية عند الانسان

و من أهم الوساوس و اكثرها شيوعاً : هو وسواس الطهارة

كلهن 40 يوم
اي راح تبچي ، راح تكره روحك ، ادري بس قاوم الوسواس
و اذا وگعت بشباكة مرة مرتين لا تستسلم گوم و كمل طريقك

اتخيل الجاي :
" انت بطريق وعِر تمشي و توگع من دَگ الوسواس
اني اشبهه بالدَگ لإن يأذي عبالك شي يضرب مخك

فتظل تحاول مهما وگعت لحدما تخلص منه
بس لا تتصور هالشي يمر مرور الكرام
لا أبد، راح تتعلم هواية من هالمرحلة و راح توصل لربك

تذكر دوم انت مو وحدك وية الوسواس بهذا الطريق

وياك شخص ، شخص الوسواس يباوعله بكل حذر و خوف
خايف لا هذا الشخص يرفع ايده بالدعاء

شايف هاي اللحظات الي بچيت بيهن من نفسك لإن وگعت بحبال ابليس و اطعته بالوسوسة

الغالي چان يراقبك و حتى نزلت دموعه عليك و متدري يمتى يرفع ايده و يدعيلك
الغالي وياك انت مو وحدك"

فتحت الورقة الثانية مكتوب : إذا انت دورت عن الموضوع راح تگلي اكو ناس هواية صاير بيهم و لزگ بيهم أكثر من اربعين يوم