إلى أين تصل

27

رفعت راسي على سمية وگلتلها ـ واحد سوة وياية عملية ،و يدرس وياية بالحوزة بس هيچ

گعدت گبالي غمزتلي و ردت ـ بس هيـــــــــــــــچ

خزرتها و رديت بحدة ـ ترا طوختيها سمية

أخذت ملازمي و گمت عنها ، لحگتني تمشي سريع

عثرت و زين ماوگعت وهي تگول ـ هاي شبيچ؟

رحت على طريق النادي و اني ارد عليها ـ كلشي ما بية لاتسأليني هيچ اسئلة ، اني گوة خلصت من ظافر

خلت ايدها بإيدي و ردت ـ تتدللين بس لا توگفين حياتچ على ظافر ، لاتدمرين نفسچ و مستقبلچ من ورة واحد خاين ما يستاهل

فتنا للنادي وگفنا نطلب گالت سمية ـ راح اطلب بيتزا كلش مشتهيتها

مديت ايدي بجنطتي ردت اطلع فلوس تذكرت الاختبار انو هَم لازم بالفلوس فگتلها ـ عادي تداينيني ألف ماشايله فلوس

هي بسرعة اخذت من الـ 3 الآف ألف و انطتني ، شافتني طلبت لفة كبة و عصير ابو ربع طلبت مثلي

گعدنا ناكل صفنت بوجهها معقولة ! شتعرف مني و ماتزعل مني و هالگد وتتحملني
اني و بلقيس صديقات من الابتدائية و خانتني 

دخيلك يارب الكون معقولة جاي تعوضني بس شنو مسوية و استاهل هالتعويض؟

شافتني صافنة عليها سألتني ـ شبيچ؟

ابتسمت و جاوبتها ـ أمس شيخ حوزتنا دزالنا قول للإمام الصادق و علمنا شلون تختبر صاحبك «لو تحاول تخلي يغضب ، لو تختبرة بفلوس» فسويت هالشي وياچ ، انتي ما تعرفيني و تحملتي و بقيتي ، بينما بلقيس الي من الابتدائية وياية خانتني

عافت سمية الأكل و عضت شفتها و هي ترد ـ بالله هسة ارزلچ ، افرح شلون فزت بالاختبار شسوي؟

لزمت اديها و گلتلها ـ لااا فدوة لاتزعلين و الله انتي وردة ماتتكررين

سحبت اديها مني و فتحت عصيرها و هي ترد ـ من مات والدي اسودت كل الدنيا بوجهي ، بايام الفاتحة گطعت كلشي و انغلقت على نفسي
گطعت الاكل ، الصلاة ، بس ابچي حتى فكرت بالانتحار

و بيوم الثالث جابولي اكل ، چنت كلش جوعانة
أكلت اكل دسم ، و فتت غرفتنا ثواني و صارت بطني تتگطع و اصيح بعالي صوتي ، طلع عندي زائدة دودية
الناس من تسولف بالزائدة الدودية شو يبينوها شي عادي بس و الله ألمها كارثي

نزلن دموعها مسحتهن و كملت ـ شفت بابا  الي گلي : بابا صيري مثل السيدة سكينة لا تزعلين هالگد ، اني مو احسن من أبوها

بعد ما تحسنت رجعت اصلي و اقريت قرآن لبابا ، و أول شي سويته تخلصت من عصبيتي
ما ردت بابا فد يوم يزعل مني لأن صيحت على واحد من اخواني

و رحت زيارة للإمام الحسين و گتله اريد من صبر بنتك سكينة
ادعيلي و اريد بنتك مولاتي سكينة هَم تدعيلي