إلى أين تصل

22

نسيت اهلي و كلشي ، يخف الصوت ثواني و يرجع ، دخلت بشارع متروس گهاوي و مملية رياجيل

من انتبهت لنظراتهم يلا صحيت على نفسي ، گعدت على درجات بباب جامع

طلعت موبايلي من جنطتي ، دموعي يجرن و عاضة شفتي حتى ما يطلع صوتي ، ايدي ترجف و ما تسيطر تلزم الموبايل

شگد اهلي داگين علية و حتى بهالأثناء دگ اخوية مجتبى

تجاهلت الاتصال و رحت على التلي و ضغطت على رقم عباس ، و اتصلت على خطه

رن هواية ، گوة مثبته نفسي بباب الجامع
اريد اركض... اريد اصرخ...

رد عباس ـ الوو

گتله ـ عباس خلصني الله يوفقك

نز و سأل ـ خير يا الله شعندچ سكينة؟

رديت ـ عباس صوت براسي ، همت بالنجف ما اعرف حتى وين آني

خليت ايدي على راسي و كلامي گوة ينفهم بسبب نشغاتي ـ عبااااس موتني الصوت يخوف شسوي

سأل ـ يعني وحدچ ؟ دخيلك يا ابو الحسن ، شوفي وين انتي ، وين انتِ بالضبط؟

جاوبته ـ ما اريد اروحلهم اني رحتلهم و هو الصوت صار أعلى ، بس خلصني من الصوت الله يوفقك

نفخ و رد ـ خوش اسمعيني ، راح اعلمچ شنو تگولين و هَم اتصل على عمي سولفيلي وين موجودة و گولي يا الله ، اتوكلي على رب العالمين

عَلة صوته ـ سكينة ماكو قدرة گدام قدرة رب العالمين ، لا شعوذة لا وسوسة و لا سحر گولي يا رب و اتوكلي عليه ، فوضي كل امرچ لله و اقري وياية سور الـ"قل"

هدئ نبرة صوته و هو يگول ـ يلاااا فوضي كل امرج لله ، ماكو غيره يخلصچ ، اني ما افيدچ اذا ما تتوكلين عليه

رفعت راسي چان اكو نجمة كلش حلوة ، بچيت و فوضت امري لرب العالمين
لان صدگ ما بقالي احد و صرت اردد اليقراه عباس ، ترتيله كلش حلو مثل ذولي الي نسمعهم يقرون قرآن بالتلفزيون

گال ـ يلا رددي وياية
بِسْمِ اللَّهِ الرَّحْمَنِ الرَّحِيمِ
قُلْ هُوَ اللَّهُ أَحَدٌ (1) اللَّهُ الصَّمَدُ (2) لَمْ يَلِدْ وَلَمْ يُولَدْ (3) وَلَمْ يَكُنْ لَهُ كُفُوًا أَحَدٌ
بِسْمِ اللَّهِ الرَّحْمَنِ الرَّحِيمِ
قُلْ أَعُوذُ بِرَبِّ الْفَلَقِ (1) مِنْ شَرِّ مَا خَلَقَ (2) وَمِنْ شَرِّ غَاسِقٍ إِذَا وَقَبَ (3) وَمِنْ شَرِّ النَّفَّاثَاتِ فِي الْعُقَدِ (4) وَمِنْ شَرِّ حَاسِدٍ إِذَا حَسَدَ
بِسْمِ اللَّهِ الرَّحْمَنِ الرَّحِيمِ
قُلْ أَعُوذُ بِرَبِّ النَّاسِ (1) مَلِكِ النَّاسِ (2) إِلَهِ النَّاسِ (3) مِنْ شَرِّ الْوَسْوَاسِ الْخَنَّاسِ (4) الَّذِي يُوَسْوِسُ فِي صُدُورِ النَّاسِ (5) مِنَ الْجِنَّةِ وَالنَّاسِ
بِسْمِ اللَّهِ الرَّحْمَنِ الرَّحِيمِ
قُلْ يَا أَيُّهَا الْكَافِرُونَ (1) لَا أَعْبُدُ مَا تَعْبُدُونَ (2) وَلَا أَنْتُمْ عَابِدُونَ مَا أَعْبُدُ (3) وَلَا أَنَا عَابِدٌ مَا عَبَدْتُمْ (4) وَلَا أَنْتُمْ عَابِدُونَ مَا أَعْبُدُ (5) لَكُمْ دِينُكُمْ وَلِيَ دِينِ