إلى أين تصل

23

حسيت على مسحة ايد فوگ راسي و اكو ثگل على چربايتي ، فتحت عيوني تبارك و مناوي گاعدات بالگاع وابوية يمسح على راسي

بس انداريت حاچاني ـ شبيچ؟ عندچ ألم؟ ليش تونين؟

چان كاسر المخدة و منتچي عليها
خلة ايده على خدي و گلي ـ يابة و الله دموعچ يحرگن گلبي و حالچ كاسر ظهري ، بس شبيدي الناس ما تخاف الله

اختي الزغيرة "تبارك" علگت عدها الغيرة و گالت ـ لاااا انت تخاف الله؟؟ تسوي روحك تتعارك وياها و انت چذب تحبها و تنيمها بحضنك

اجتي سحبت ايدي بكل قوتها و من كل عقلها تحاچي ابوية ـ جواز سويتلها و خذتها وياك لإيران و للشمال ، انت تحبها اكثر منا

اكلته اكل بلسانها و طلعت
گام وراها يصيح ـ سويتلچ واحد و الله لو ما وگعتها چا خذتكم ، بس تانيني هاي العطلة إن شاء الله

و هي ترد ـ اي اي مو جهال و تقشمر علينا

طب مجتبى مبتسم سألنا ـ شبيها هاي

گتله ـ غارت لإن شافت ابوية متمدد يمي و يسولف وياي

هز ايدة و رد ـ ذني عمات بتي صدگ چذب

امي دخلت و صاحتني ـ ها سكينة گعدتي ، تعاي اكليلچ لگمة

گمت بدلت و طلعت للمطبخ غسلت وجهي على السنگ و رحت يمهم
سلمت و گعدت وياهم

اول واحد حِچة هو مجتبى گلي ـ بس نرجع گلبي غراضچ و اني اگلب البيت گلاب ، خل نشوف شمخلية هاي ال#*#*

التفت على ابوية و خالي و گلهم ـ من هسة أبلغكم إذا طلعو وراها الا اسحگهم سَحگ

خالي رد عليه ـ لا بوية مو هيچي لازم ناخذ گرايبنا و ندز على الشيخ ، بس الله أكبر بعمرنا ما عرفنا السحر شجاها هاي المرة

برير گال ـ بوية هذا حسين عَجِينة گبل فترة يگول : اخوه ابو التكسي مصعدلة مرأة منطيته 30 الف علمود ياخذها للمستشفى ، رايحة مسولفة وية دكتورة و بعدين رايحة لبيت

شغل السبلت و كمل ـ يگول الرجال طلعت تتختل من البيت ، انوب گالتلي اخذني للمقبرة فمحلفها الرجال و سآئلها شتسوين
گايلتله اريد اسوي سحر لرجل دكتورة و هي موصيتني ، دكتورة دارسة و تعبانة تسوي سحر لرجلها ! الناس تدمرت و صارت جهلة

رديت عليه ـ ناس أفعال بدون كَيان
هيچي يگول شيخ محسن بالفلم

شرب رشفة من چاية و سألني ـ شيخ محسن نفسه شيخ حوزتكم؟

جاوبته ـ لا ، بفلم 313 شفته

فسأل ـ شنو هذا الفلم؟

دنگت أصب لنفسي چاي و اني ارد عليه ـ فلم ، شوفة برير خو ما احرگة الك

گلب خلقته و عوج حلگة و هو يگول ـ صحيتي ...رجع النكد ...بالعافية عليچ

حضرنا غراضنا حتى نطلع ، گعدت على الدرج البس حذائي