إلى أين تصل

18

اليوم الثاني

كملت الإيكو و گعدت ادگم قميصي و اباوع للدكتورة منتظرة ردها على النتيجة
چانت طابگة حواجبها و مركزة بشاشة الحاسبة

انتبهت لنظراتي فالتفتت و سألتني ـ عمرچ بالعشرين ليش هيچ؟

رديت عليها ـ ليش شكو شبية؟

جاوبت ـ الطبيب يفهمچ ، حبيبتي اتركي التوتر ماكو شي يسوة گدام صحتچ

لبست عباتي انطتني الورقة مال التحليل و اطلعت ، اخوية واگف گبال غرفة الإيكو و يسولف وية شخص

رحت عليه أشر باصبعه علية و گل للرجال ـ هاي اختي

اخذ ايدي و كملنا طريقنا و هو يگول ـ لزگ الموظف ، و الله شكو واگف گبال غرفة النسوان ادري حمامات هي !

ابتسمت ابتسامة خفيفة و ما رديت عليه

اخذ فايل الايكو و سألني ـ شگالت الدكتورة؟

رديت ـ ما اعرف بس گلتلي اتركي التوتر
غلس مارد حتى ميخوفني

العصر اخذني لشارع الاطباء حتى طبيبي يشوف التحاليل ، عاد نفس الكلام ابتعدي عن التوتر و انطانة علاج لكليتي اليمنى

طلعنا اني و مجتبى للصيدلية ، مجتبى انطه الصيدلاني الوصفة

شفت مرطب الوجه جريت ايد مجتبى ، التفت و سألني ـ ها؟

اشرتله على المرطب و گتله ـ فدوة اريد المرطب من زمان خلص و نسيته

اشر للصيدلاني علية و گله ـ خويي انطيني هذا

اشر الموظف على المرطب و سأله ـ هذا المرطب؟

التفت مجتبى يسألني گتله ـ اي هو هذل

رد الرجال ـ بـ 15 الف

گله مجتبى يخلي وية علاگة الدوة و هو التفت يسألني ـ مرطب بـ 15 شالقضية؟

اكو طبيب طلع من مجمع قريب من الصيدلية
سلم على مجتبى ، و گله ـ چا بس المرطب بعد الواقي و الغسول

اخذ تحاليلي من مجتبى و صار يحچي وياه على كليتي

فجأة سمعنا واحد صاح ـ عبااااس بسرعة الاوڤن يمعوووود

الدكتور صاحب مجتبى التفت لورة
طلع عباس من البناية و گدامه ولد شايل فرن كهربائي وداه لهذا اليصيح

الطبيب صاحب مجتبى سأل عباس ـ يمعود بيش تشتغلون ليش تنطيهيا شالقضيتك ؟

رد عباس ـ خطية عدهم هواية مراجعين

انتبهلنا عباس ، چان كلش متردد بس إجة و گال ـ السلام عليكم

ردينا السلام

باوع لمجتبى بعتب و گله ـ ترى هذا مكان شغلي

رد مجتبى ـ و اني شمسويلك ، الدكتور من معارفي و چان يباوع لتحاليل اختي اغلب الاجهزة الطبية يوصيها الدكتور يمي