إلى أين تصل

15

لفيت طرف السجادة على التربة و التفتت عليه سألته ـ هو منو؟ تعرفه لو لا؟

گعد على چربايتي مدنگ على حلقته يحركها باصبعه و رد ـ الولد الي انطاچ كليته الله يرحمه ، هسة شهيد مو شهيد يم الله بكيفه عمي يريد يصير شهيد شهيد

ابتسمت هو خزرني رفعت ايدي اهدي و سألته ـ تمام بس شنو شفت؟ يعني شي يخوفك لو شنو؟

باوع لقرآني و رد ـ هي لمحة سريعة شفته باس القران و طلع ، شلون الي إجة علية حتى لابس قميص اسود و بنطرون اسود

رفع اصبعه و گلي بحَزِم ـ و مو نايم خوش مووو نايم

رديت عليه ـ و شتريد مني جواب؟ تريدني اگلك شفت الشهيد لان حِرگت دفتره لو لان شتمته

قاطعني ـ يا شهيد شبيكم انتو شهيد شهيد مو شهيد ، غير مات بالطريق

صار يباوع منا و منا ، كأنما خايف لا يصير بي شي لان گال مو شهيد

گتله ـ هذا القرآن يمك شيگول رب العالمين ﴿مَن قَتَلَ نَفۡسَۢا بِغَيۡرِ نَفۡسٍ أَوۡ فَسَادٖ فِي ٱلۡأَرۡضِ فَكَأَنَّمَا قَتَلَ ٱلنَّاسَ جَمِيعٗا وَمَنۡ أَحۡيَاهَا فَكَأَنَّمَآ أَحۡيَا ٱلنَّاسَ جَمِيعٗا﴾

و هذا الشاب بأعضائه احيا نفسين و چان مجاهد و امنيته يكون شهيد ، ليش ما اگول عنه شهيد؟

لو ما جابوه للمستشفى بذيچ الليلة منين لگيتولي كلية؟ انت مو گلت كليتك ما متلائمة وياية و أهلي هَم ما مقبولين لان بيهم سكر ، الله دزاه رحمة الي
ليش تضوج من اذكره بلقب چان امنيته؟

قطب حواجبه و رد علية ـ اني ماعندي مشكلة وياه ، مجرد ظل ببالي ليش تسموه شهيد وگلتي احيا روحين هاي هية

كورت عيوني و سألته ـ و دفتره الي حرگته؟

صاح بية ـ من وراچ طلعتي روحي ، لو هذا الولد بعده عايش چان خليته على راسي و بنفس الوكت كسرت راس ابن عمه

رديت عليه ـ لا تحچي على الولد ما غلط

گاملي و هو ماد ايده يگلي ـ و تدافعين عنه ! موبايلچ وين؟ بعدچ تحچين وياه؟

بچيت و ابوية من جوة يصيح ـ الله اكبــر ظلو تعاركو لمن تكتلونا اني و امكم

مرأت اخوية طبت علينا و جرت ايد مجتبى تگله ـ عوفها خبلة لا تسولف وياها

دفع ايدها و رد عليها ـ اطلعي چم مرة گتلچ من احچي وية سكينة لا تتدخلين

دفعها و صاح بيها ـ اطلعـــي

مسحت دموعي و گمت اريد اكمل صلاتي لزمني من عضدي وگال ـ سؤال و سألتچ تحچين وياه لو لا؟

اريد اسحب منه ايدي ما اگدر ، ما جاوبته
ضغط على فچي و گلي ـ احچي ولچ لا تخليني اسوي موبايلچ طشار