إلى أين تصل

26

طبگت اسراء موبايلها و دنگت تاكل تلاثتنا ساكتين ، ما حسينا غير اسراء گامت و طلعت من النادي

منى سألت ـ شبيها هاي؟شفتي شلون اكلت البنية على الخط؟

گمت ورديت على منى ـ يلا نطلع احنا همين

من طلعنا لگينا اسراء گاعدة وحدها ورة الرئاسة و تبچي

گلت لاختي ـ منى تنتظرين اهنا ، ما تجين لمن تشوفيني اشرتلچ

ردت منى علية ـ و احنا شعلينا بيها يمكن عدهم مشكلة عائلية

گتلها ـ هسة انتِ ابقي هنا و خلصيني

رحت و گعدت يم اسراء ، چانت تنشغ

أشرتلها على الجسر الخشبي يم عيادات طب الاسنان و گتلها ـ حلو شكله و شگد اخذنا عليه صور

مسحت اسراء دموعها و ردت علية ـ ما واصلتله و لا شايفته

سألتها ـ انتِ تمشيتي بالجامعة؟

ردت ـ اي لكل مكان رحت ، بس ما رحت لهناك

گلتلها ـ الصور علية تطلع كلش حلوة

اشرتلي على العيادات و سألتني ـ هَم دخلتيلها؟ يگولن صديقاتي يصير تحجزين و يسوون سنونچ

جاوبتها ـ اي ، عدنا بالخط طالبة مرحلة خامسة العام نظفتلي سنوني احجزي يمها

خلت ايدها على حلگها و ردت علية ـ لاااا ما أريد ، اني عانيت وية اطباء الاسنان من چنت مخلية تقويم فما اريد اشوف شكولهم

انوب دنِگت و برطمت ، يلا كملت كلامها ـ هاي هنادي و الله ماتحب امي

شمرت موبايلها على الجنطة و گالت ـ كلها تريد تلعب علية دخلت جامعة و بعدهم يشوفوني طفلة يضحكون عليها ، هنادي لغرفة امي ما تدخل تلعب نفسها ، اذا امي بوستها تمسح خدها گدامي
تريد تسوي عباس مثل اخواني الـ ...

قاطعتها ـ ها ها ها عييب يمعودة

ردت ـ لا مو عيب ، كلهم إمسَلمين رگابهم لنسوانهم
من الصبح لليل زين واحد يطب لغرفة امي و يشوفها ، و فنة الي يگل مرته تخدم امي

صارت تنشغ و تمسح دموعها و هي تگول ـ حقراء شگد ماما تعبت عليهم و الله من يصير بابا عصبي تشمر نفسها عليهم و تتحمل الضرب عنهم
هسة اني احاول اگومها مو اجرها حيل، معصم ايدها يصير احمر من جرتي

قبضت ايدها و گالت ـ شلون اگومها ما اگدرلها ثگيلة علية ؟ عباس رجال و يگدر يشيلها اني ما اگدر إلا اسحبها و تالي تصير ايدها حمرة
من الصبح چانت تگعد تخدمهم و تنظف البيت ، تزوجو و بعدها تخدمهم و من وگعت شوفي شيسوون بيها

خليتها على صدري و صارت تنشغ

منى اجت يمنا رفعت حواجبها تسألني شكو ، و گعدت على صفحة اسراء الثانية