إلى أين تصل

16

خالي ـ ابو مجتبى كلشي گلته على عيني و على راسي بس عليك ابوفاضل اكو واحد يگل لبته انتِ زايدة علية؟ البنية حساسة و ما تنسى هالكلمات يظلن جرح بگلبها ، اني رجال شكبرني من گالتلي ابوية يگلي انتِ زايدة علية انهزيت هز

سندت راسي على چتف زينب و اني اباوعله

ابوية اخذله نظرة علية يلا جر نفس و رد عليه ـ اني ما گتلها زايدة و الحچي الحچيته كله من حرگة گلبي ، ماكو ابو يزود عليه واحد من جهاله

مجتبى گال ـ خالي كلها مني هذا الولد سواني عصبي و هاي راددتني رحت كبرت السالفة يم ابوية و هي بالدراما  ما شاء الله ، خو دموعها متانيات إشارة منها

رفعت راسي عن چتف زينب و رديت عليه ـ انت اساس كل مشكلة تصيرلي ، انت يمكن بفاتحتي ترگص چوبي كلشي يصير تشمره براسي

ابتسم مجتبى بسخرية و رد علية ـ انتِ خبلة و علي ماعندچ عقل ، رجال و اخته تراسل غربة شترديني اسوي و ذاك بكل عين صلفة يحاچيني …

خالي رفع ايده سكته و سأله ـ انت شگد صارلك من رحت و تعاركت وية الولد و حرگت دفتر اختك؟ شذكرك بي؟ شجابه على عقلك؟ چا مو حقها من تگول عنك خال گورك وياها

مجتبى خلة المخدة على رجله و صار يشرحله ـ امس صعد ضغطي جيت اسوي تحليل لگيت الولد…

قاطعه خالي ـ اي و تعاركت وياه؟ شبيك خالي غير شفت محادثاتهم و الولد اعتذر و گلك ما ادري بيكم ما تقبلون ، و تعال بالله ما تخاف ربك من تسب ميت ؟ ولك الميت الة حرمة لا و منطي كليته لاختك

سكت خالي و باوع لمجتبى من فوگ لجوة يلا كمل كلامه ـ تگول اختك شايفه بحلم مدري واقع ، ما تخاف لن الله يسلبك توفيقك لان تسب ميت؟ ما تخاف يشور الولد ببتك؟

مجتبى نفخ و دار وجهه ، خالي رفعله السبحة و گله ـ الولد ملتزم و ابن عائلة ملتزمة و چان مجاهد ، ابوه گلبك بس يريد تگابله و تگعد ، زين شگال گلبك من حرگت دفتره و ابوه چان متاني اختك تخلصه و يقراه

مجتبى صار عصبي و كلما يريد يحچي خالي يسكته و يكمل ـ لا تگلي اختي حرگت روحي ، هذا الحچي ما يمشي يم الله و لا يمشي يم اهله

اشر خالي على ابوية و كمل كلامه ـ تخيل انت متت و يجون لأبوك و يگلوله نريد چبد ابنك و كليته لمرضى ، شيصير بحال ابيك و هو يدفنك مفصخ؟

تغير صوته صار يحچي و هو متأثر ـ عريس الله يرحمه ما صارله شهرين متزوج و مجاهد، واگف على الساتر حر و برد و متصوب و شايف جماعته يستشهدون عليمن؟ غير علمودك

مد ايده يعاتبه : حرگت دفتره بعصبية ليش تسبه؟ فوگاها گدام ابن عمه
هذا الولد عباس مو حقه يكرهك و إذا راد عليك حتى لو بغلط هَم حقه ، واحد يسب ابن عمي گدامي غير اخنگه

اشر علية و گله ـ دباوع حالها عليك الله ، شباقي بيها بعد سواية ابن عمك ، السحر ، المرض دشوف وجهها شوف عيونها
غلطت اي غلطت بس الصار بيها ما ينحمل وانت تجي ما مصدگ لگيتلك حجة حتى تتعارك وياها