သစ်ပင်အောက်မှာ မိန်းကလေးတစ်စုရပ်နေသည်ကြောင့် တိုးငယ်က ဘာဖြစ်သလဲသိချင်၍ သူတို့အနားသို့ ကပ်သွားကြည့်သည်။ အမနွေသစ်လက်ထဲမှာ လူတစ်ယောက်ထိုင်စာဒန်းလေးတစ်ခုကို တိုးငယ် တွေ့လိုက်သည်။ သစ်ပင်ကိုကြည့်လိုက် ဒန်းကိုကြည့်လိုက် လုပ်နေတာမို့ ဧကန္တ သစ်ပင်မှာ ဒန်းချိတ်ချင်လို့ အကျပ်ရိုက်နေပုံပင်။
"အမနွေသစ် ကျွန်တော်တက်ပေးရမလားဗျ"
အကူအညီပေးရမလားတောင်းဆိုတော့ အမနွေသစ်က ဆတ်ခနဲလှည့်ကြည့်လာကာ ခေါင်းညိတ်ပြသည်။
"သစ်ပင်တက်တတ်လား"
"ဟုတ် တက်တတ်တယ်၊ ခဏနော်"
တိုးငယ်က ခဏဟုလက်ကာပြခဲ့ပြီး သစ်ပင်အနောက်သို့သွားကာ ပုဆိုးကို ခါးတောင်းကျိုက်လိုက်သည်။ ပြီးလျှင် သစ်ပင်ရဲ့ပင်စည်ကိုဖက်ကာ ပင်စည်မှာထွက်နေသည့် အဖုအထစ်တွေကို ခြေနင်းလို့ သစ်ပင်ပေါ်သို့ တက်သွားလိုက်သည်။ အခုကျတော့လည်း ရွာမှာ အမေ့အတွက် မန်းကျည်းသီးခူးပေးတာတွေကို လွမ်းလာရသလို။
တိုးငယ်က မတ်တပ်ရပ်လျှက်ပင် အကိုင်းတုတ်တစ်ခုပေါ် လျှောက်သွားပြီး အတော်မာသည့်နေရာအရောက်မှာတော့ ရပ်လိုက်ကာ အကိုင်းပေါ်ထိုင်ခွ၍ အမနွေသစ်ဆီက ဒန်းကိုလှမ်းတောင်းလိုက်သည်။
"ဒန်းပေးပါဗျ အမနွေသစ်"
"သတိထားဦးနော် မောင်လေး"
"ဟုတ် ရတယ်ဗျ"
ကြိုးနှစ်ချောင်းပါသောဒန်းမို့ တစ်ချောင်းကို ခိုင်ခိုင်လေးချီပြီး သံရိုက်စရာရှိတာလည်း ရိုက်ရသည်။ မိန်းကလေးတွေပဲစီးမည့်ပုံမို့ ဒန်းကို အသေးလေးပဲ ယူလာတာထင်သည်။
ရွာမှာလည်း ကလေးတွေစီးရအောင် ကားတာယာတွေနဲ့ ဒန်းလုပ်ပေးဖူးသည်ကြောင့် အခုလိုကြိုးချီပေးရုံနှင့်တော့ ဘာမှမခက်ပေ။
"အိုးဝေ ဘာလုပ်နေတာလဲ ပြုတ်ကျအောင်လို့ ဆင်းခဲ့စမ်း အိုးဝေ "
ရှန်းဆစ်က စိတ်ပူအော်ဟစ်လျှက် သစ်ပင်အနားသို့ ပြေးလာသည်။
"ဆင်းလို့ အိုးဝေ "
အိုးဝေက သစ်ကိုင်းပေါ်ကနေ ရယ်လာပြီး....