كابوي

البارت الثاني

البارت الثاني ..

وردة عمري.  .

#كابوي

لكيت نفسي ملطخه بدم ادمي ...ملزومه انظف نفسي ....ادا شافني علي يمكن يخترع .. بس مجان عندي الوقت ولا العقل يفكر ... طفرت من مكاني اركض ادور عليه ... من دخلت غرفته لكيت الغرفه مكلوبه كلاب حالها حال الغرف البقيه .. بحيث ماكو مكان ممكن اخلي رجلي بيه .. دورت عليه ماكو ...

مااخفي اذا كلت بذاك الوكت مااحسيت بالخزي لمن حسيت براحه لان مالكيته ...

وبين مااحنا اندور ... جوة الجربايه بين الاغراض ..  بلحظه تركيز صافيه .. انتبهت على باب الكنتور مفتوح .. فرحت عليها بلهفه ..  عبالك تحتوي علئد الحاضر والماضي والمستقبل ..

تحتوي علئد دليل حياتي كامله .. جانت خانه الكنتور واسعه .. اشترتها جميله خصيصا لعلي والالعابه ...ومرات اذا نلعب غميضان يلبد بيها .. واخرت الالعاب .. بلكي اكو شي .. بالبدايه مااظهر اي نفس يدل علئ ان اكو هنا حياه .. جان اكو فوك مثل الخانه لها باب لوحدها .. الي يشوفها يكول هاي مجرد خشبه محطوطه... دفعتهابيدي ... انفتحت ...

لكيته حاضن نفسه ....مخلي راسه بين اركبه ...والموبايل بعدة علئ اذنه .. ناديته بخفوت

ـ علي ...

رفع راسه الي ... نظرات الخوف والرعب .. تزين عيونه ....

عاصفه قويه اجتنا بليلة ظلمه .. كلبت كل حياتنا .. نمت وكعدت برمشه عين .. ضاع كلشي .. كلشي صار ضبابي بعدين .. جان اكو ناس تدخل وتطلع .. واني عبالك بغيبوبه مااذكر شي من ذاك اليوم ...الا كعدتنا اني اخويه بباب البيت علئ الرصيف برة ..  حاضنه علي حيل وعيني علئ الباب ...نرجف من البرد .. مااعرف فعلا اذا جانت باردة لو حسيننا برودة اليتم من هسه ...

صاحني ضابط التحقيق ...بعد مااخذ اقوال ابو كريمه ...كام يسأل ... وسؤال 2 سؤال حسيت نفسي متهمه مو ضحيه ...كل اسئلته عن الدم الي علئد ثيابي ... عن سبب بيتي خارج البيت بنفس الليله .. حتئ قصه موبايلي لمن كلت الهم انكسر وعفته بمكانه ...تحققوا من صحه القصه .. وراحو جابوة ...

بمعنئ اصح شردوا المجرمين ولزموا بيه اني الضحيه ...خلال هاي الفترة ... خليت علي عند بيبيته وخالته افراح ...

جان صوت بجي ام جميله واختها يوصل لمسامعي ويخترقها ....بإصعب طريقه ... يخمشن بوجوههن .. انثرن بشعورهن ....يلطمن ...

وعلي بيناتهن يبجي بمشهد يدمي كلبي لهاي الساعه ... جانت عيونه تناجيني تطلب مني الرحمه انقذة من هوة الخوف والفقد ...مااكدرت امنع نفسي ...ركضت عليه اخذته بدون حتئ مايحسن بيه ....

اول خيط الفجر من طلع ....لمن كالوا لنا البيت لازم يبقى مغلق قيد التحقيق .. وجثث ابويه وجميله راح يشرحوها  ....  قبل ساعات جانوا دا يتفرجون على التلفزيون .. منو جان يتعقد كل هذا راح يصير! ?