كابوي

البارت الخامس عشر

البارت الخامس عشر

كابوي
#وردة _عمري

ـ لا تلمسني ...

درت وجهي له اصرخ بوجهه

ـ لك شسويت ...شسويت ...ليش دا تتحكم بياتي لهاي درجه ...لا تريدني ياك ...ولا تريدني وي غيرك .. تريد تسيطر علئ كولشي ... شتريد مني ...ترة خلس صبري وصلت حدها وياك

ولزم زندي ...ابتعدت عنه ...بس هو اقترب ...

ـ لا تصيحين احنا بالشارع ....خلينا نروح لفد مكان نسولف بيه ...

ـ ماعندي شي اكوله لك ...ومااريد اسمع اي كلمه منك ...تريد تأخد كل الناس الاحبهم مني ..لهل درجه تغار مني! ?

بس هو ولا عليه ولا همه كلامي ... جرني من ايدي حيل واني احاول افلتها منه ...

ذبني بالسيارة ...ودار ...انطلق بينا ...
ضرب الستيرن حيل ...

ـ شعندج طالعه وياه ...هااا ....شعندج .. لو خذت رجلج علئ الطلعه والطبه ... اي طبعا لا اخو ولا ابو

مااتحملت ودموعي كامت تجري عشرة ...عشرة ...وشهك ..ونظرتي له خلته سكت ...

ـ .. رجعني للبيت اصلا مااطيق ابقۑ وياك بمكان واحد

ـ اذا حضرتج هيج ماطايقتني ليش ابقيتي وياي ...مارحتي وياه ...

درت وجهي له ...

ـ انته من كل عقلك عبالك اني اختاريتك عليه?  اني اجيت وياك من خوفي .. خفت لا تتهور وتروح تكتله للولد

سكت شويه ....

ـ خايفه عليه ...اويلي يابه ...اذا مااامده لج بالشارع ماتسمه كابوي ...

خفت الخوف تسلل لكلبي وعقلي ...خوف منه وعليه

ـ فدوة خليل ...الله يخليك ...الولد صديقي  ماتجمعني بيه الا الصداقه ...ساعدني .. وخفف عني هوايه امور وعمري مااحه ببالي غير اخ وصديق

كلمته حسيت بيها حزن ...

ـ لهل درجه شايفتني مو زين اسيل ...خفتي لا اكتله ...لهل درجه شايفتني ماعندي لا ذمه ولا ضمير

ماارديت عليه ...ظل يراقبتي لمدة ...حجه واحس النار تطلع من عيونه

ـ ماشي ...ماكو روحه للبيت ...راح اخذج وين مااريد اني بمزاجي اني ...ناس ماتشمي الا بالعين الحمرة  اذا واحد صار وياهم  زين يأكلونه ... سهله

ـ تعرف ...راح يجي يوم تتندم علئ هذا كوله

جانت عيونه تطلق شرارت من الغيض ...كلت له

ـ اكرهك ...انته اكثر انسان اكرهه بحياتي

ـ زين ... علئ تحسين بفد شي ناحيتي

ماجان تعليقي بمكانة ...لذلك باوعت عليه بعيني المدروسه دموع ... حسيت نظرتي هدأته ...استسلمت للصمت الطال بيناتنا ...وظل يسوق لمن ركن .. كدام مطعم .. نزل ...وجرني من ايدي ...كعدنا علۑ وحدة من الطاولات .. طلب لنفسه عصير واني مثله ...