အချစ်ဆိုတာဘယ်လိုမျိုးလဲ။
ကြိုက်တယ် ဆိုတာက ချစ်ခြင်းနဲ့ဆိုင်သလား။
စိတ်၀င်စားတာကရော ချစ်ခြင်းရဲ့ အစလား။
ဒါဆို ရင်ခုန်တာကရော အချစ်ထဲမှာ ပါ၀င်သလား။
တိုက်ဆိုင်မှု မရှိပါပဲနဲ့တောင် သတိရ နေတာကရော ချစ်နေလို့များလား။
တစ်စုံတစ်ယောက်ရဲ့အလင်းလေးကို ချစ်မိရင် ထိုလူသားရဲ့ အမှောင်ဘက်ခြမ်းကို မြင်ရတဲ့အခါမှာ အချစ်တွေဟာပြောင်းလဲကြသလား။
ချစ်ပြီဆိုမှတော့ ချစ်စရာကောင်းသော၊ လှသော တစ်စုံတစ်ခုကို မြင်တွေ့ရလို့ပဲမလားလေ။
မျက်နှာလေးလှလို့ ၊ ခန္ဓာကိုယ်လေးမိုက်လို့၊ စိတ်ထားကောင်းလို့ စတဲ့ချစ်စရာလေးတွေကို မြင်မြင်ချင်း ရင်ခုန်စိတ်၀င်စားမိကြတယ်ထင်တယ်။
ကျွန်တော်လည်း ဒီအရွယ်ရောက်ပြီပဲ ။
အချစ်ကို သေချာမသိ၊ မကြုံဖူးပေမဲ့
စိတ်၀င်စားဖူးတဲ့ မိန်းကလေးတွေ ရှိခဲ့ပါတယ်။
8_ 9 _10 စတဲ့အတန်းတိုင်းမှာ ကျွန်တော် သဘောကျခဲ့တဲ့ မိန်းကလေးတွေ တွေ့ခဲ့တယ်။
ကြိုက်ပါတယ် ၊ ချစ်ပါတယ် လို့တော့ ဖွင့်မပြောဖူးဘူး။ ဘာလို့လဲ ။ သူတို့နဲ့ စကားပြောရမှာ ကြောက်လို့ထင်တယ် ။ မဟုတ်သေးဘူး ။ မပြောချင်တာ များလား။
အဝေးကနေ လှမ်းငေးတဲ့အခါ သိပ်လှနေတဲ့ ပန်းပွင့်လေးဟာ အနီးကပ် သွားနမ်းတဲ့အခါကျတော့ သိမ်မွှေးအီနေမှာပေါ့။
အီလွန်းရင် မူးတတ်တယ်မလား။အဲ့ပန်းလေးတွေကို ပိုင်ဆိုင်ချင်စိတ်လည်း နည်းခဲ့တာကြောင့် ရှေ့တိုးလို့ မခူးခဲ့ဖူးဘူး။
အခု အလှအေးချမ်းရာလေး။ တိုက်ဆိုင်မှုဆိုလို့ ကော်ဖီ လေးနဲ့ ရခိုင်မယ်ဆိုင်။ နောက် စာကြည့်တိုက် ။ ဒါလေးရှိတာကို ဘာတွေများ ဒီလောက် တမ်းတမ်းတတ လွမ်းနေမိပါလိမ့်။
အလှကို စွဲတာလားဆိုတော့ ကျွန်တော်လည်း လူသားပဲ ၊အလှကြိုက်တာပေါ့ ။ လှတာချောတာလေးတွေဆို ကြိုက်ကြတာ မထူးဆန်းဘူး ထင်ပါတယ်။ သူမ လှပုံလေးက တမူထူးခြားလေး။ ကျော်စွာကတော့ ပြောတယ် ။ မင့် မမ က သာမန်ပါပဲတဲ့ ရုပ်တည်ကြီးနဲ့တဲ့။
ကျွန်တော့်ရင်ထဲ စွဲနေတဲ့ ရယ်သံလေးနဲ့ သွားချွန်လေးတွေကို အဲ့ကောင်မှ မမြင်ဖူးပဲ ။
ဒါလည်းကောင်းပါတယ်။ ခြူချင်သူတွေ များတဲ့ ပန်းလေးဖြစ်ရင် ချစ်စစ်ပွဲတွေကိုမကြောက်မရွံ ရင်ဆိုင်၀င်နွှဲရမှာပေါ့ ။
ဟောဒီ အေးချမ်းရာ" မီ "ဆိုတဲ့ ပန်းဝါဝါလေးကိုမှ ပန်းခူးပျင်းခဲ့တဲ့ကောင်က သိပ်ကို ပိုင်ဆိုင်ချင်နေတာကိုးဗျ။ တွေးရင်းတွေးရင်း မျက်နှာဝိုင်းနုနုလေးကို သတိတွေရလာပြန်ပြီ။
ညနေကျောင်းဆင်းမှာ မတွေ့တွေ့အောင် စောင့်ကြည့်ပြီးမှ ပြန်လာတယ်လေ။ ခု လွမ်းလာပြန်ပြီကွာ။
အလှလေးကို တွေ့လို့တွေ့ငြား သူတို့အဆောင်ရှေ့က ပတ်ပြီး ဆိုင်ကယ်ပတ်စီးရမယ်။
ကံလေးရယ် ကျေးဇူးပြုပြီး တစ်သက်မှာ တစ်ခါတော့ ကောင်းပေးစမ်းပါကွာ။ တကယ်ကို
သတိရနေလို့ပါ။
