တည်

အခန်း - ၃၀

Unicode//

ဆက်ခံသူနန်းဆောင်ဟူသည့်အဓိပ္ပါယ်ကို ရှမ်းဘာသာစကားဖြင့်ရေးထိုးထားသော ဆိုင်းဘုတ်တင်ထားသည့်နန်းဆောင်အတွင်းသို့ သူရောက်ရှိနေပြီဖြစ်သည်။ နန်းဆောင်အရှင်သခင်၏ အငွေ့အသက်တို့ကိန်းအောင်းနေသည့်နေရာဖြစ်သည့်အားလျော်စွာ ကံ့ကော်သင်းနံတို့ထုံသင်းနေသည်မို့ သူ့အနေနှင့် နေရာစိမ်းတစ်ခုလိုမခံစားရဘဲ ရင်းနှီးနေ၏။

သူ့အားပုခုံးမှဖက်ကာခေါ်လာသည့်လူသားသည် နန်းဆောင်တွင်းသို့ရောက်သည်အထိ မလွှတ်သေးသည်မို့ သူလည်း အခွင့်အရေးကိုလက်လွတ်မခံဘဲငြိမ်နေလိုက်မိသည်။

အနွေးထည်အထပ်ထပ်ဝတ်ထားသည်ဆိုသော်ငြား ချစ်ရသူ၏ ကိုယ်ငွေ့လောက်တော့နွေးထွေးမှုကိုမပေးနိုင်။

သူငြိမ်နေမိရင်း အခန်းတွင်းကိုမျက်လုံးကစားကာကြည့်ရင်း အံ့ဩနေမိသည်။

မသိရင် ရှေးဟောင်းပြတိုက်ထဲကိုရောက်နေသလိုပဲ...ဒီခေတ်ကြီးထဲမှာတောင် ဒီလိုမျိုးပုံစံတွေရှိနေသေးတာလား...

ထိုအတွေးမျိုးတွေးမိစေသည်အထိ ရှေးရိုးဆန်လွန်းသည်။

နန်းဆောင်ဖွဲ့စည်းပုံ၊အခန်းတွင်းအပြင်အဆင်များနှင့်၊ပရိဘောဂများသည် ရှေ့ခေတ်ဇာတ်ကားများထဲကလိုပင်။ ယနေ့ခေတ်လူနေမှုပုံစံ၊အသုံးအဆောင်များနှင့်ကွဲပြားနေသည်မို့ သူစိတ်ဝင်တစားလိုက်ကြည့်နေမိသည်။ စာအုပ်စင်၏ အထပ်များတွင်တော့ စာအုပ်များစီစီရီရီရှိနေပြီး အထပ်တိုင်းတွင် လက်တစ်ထွာခန့်အရွယ်အစားရှိကြသော ပန်းပုရုပ်ထုလေးတစ်ရုပ်စီရှိသည်။ ပုံစံကြည့်ရသလောက်တော့ အလှဆင်ရုံသက်သက်ဖြစ်ပုံရ၏။

ဧည့်ဆောင်ဖြစ်သည်မို့ ဧည့်တွေ့သည့်နေရာသီးသန့်ရှိသည်။ အခန်းတစ်ခုလုံးတွင် ကျွန်းနှင့်ယွန်းထည်များကိုသာ အဓိကထား၍သုံးထားသည်။

"အေးနေသေးလား"

သူ ဟိုဟိုသည်သည်လိုက်ကြည့်နေတုန်း ထွက်ပေါ်လာသည့်အသံကြည်ကြည်ကြောင့် ပြုံးလိုက်မိပြီး...

"အင်း အေးနေသေးတယ်ဆိုဘာလုပ်ပေးမှာလဲ"

"....."