Hindi nagsisinungaling ang mga padron.
Sabi nila, madalas ay tama ang hinala ng isang dilag.
Ngunit anong karapatan kong itanong ito sa 'yo
kung sa una pa lang ay hindi naman tayo malinaw.
Ano nga ba tayo?
May iba ka bang pinadadalhan ng mga liham?
Dahil ba ito sa aking mapait na nakaraan
kaya ganito ang aking pag-iisip?
Hindi ko hiling ang aking nararamdaman.
Bakit hindi mo na lang sabihin
na madali kang nagsawa,
na may nakita kang iba?
Masasaktan ako, ngunit unti-unti akong babangon.
O hindi kaya'y gusto mong ako ang unang bumitaw
sa relasyong pareho nating hindi maintindihan
para sabihing malinis ka?
Ang layo na ng aking iniisip.
Ang lalim na ng aking iniisip.
Puro hinalang walang katuturan.
O wala nga ba?
Pagod na nga ba akong magtiwala?
Isara ko na kaya muli ang aking puso?
Ang minsa'y kaligayahan
ngayo'y dahilan na ng aking pagkabalisa.
Muli, hindi ko hiling ang aking nararamdaman.
Ngunit sa isang tawag mo lamang,
kahit papaano'y lumuwag ang paghinga.
O siguro'y tinago ko na lamang ang pagkabalisa
dahil alam ko namang hindi ka sigurado sa akin
kaya't hindi ko rinmagawang maging sigurado sa iyo.
YOU ARE READING
Mga Lihim na Liham ni Maria Kina Juan at Juana
PoetryKatulad ng pamagat, nakikiusap ang manunulat na panatilihin munang lihim ang tipon ng mga tula na ito. Nais muna niyang magulumihanan, sumaya't masaktan habang unti-unting hinuhulma ang hindi tiyak na hinaharap ng kanyang pag-ibig. Kasing gulo ng...