Unicode
Ch- 37
"Jame"
"ဟုတ်ကဲ့ Sean"
နာမည်ခေါ်လိုက်သည် နှင့် အလိုက်သိသည့် Jame က ကားထဲမှ ထွက်ကာ နောက်လိုက် ၇ ယောက် နှင့် ခပ်လှမ်းလှမ်းမှ ရန်ပွဲဆီဦးတည်လိုက်၏ ရှောင်းကျန့်....ကားထဲမှ ထိုင်ကြည့် ရင်း မျက်ခုံးများတွန့်ချိုးမိသည်။ ငယ်ငယ်တုန်းကလို ထိန်းရ မလွယ်ကူတော့သည့် ၀မ်ရိပေါ်တစ်ယောက် လည်သာဂျာကင်နှင့် ဂျင်းအပြဲနှင့် ၀တ်ကာ ၅ ယောက်တစ်ယောက် ရန်ပွဲကို အကြိတ်အနယ်ဆင်နွှဲနေ၏
ဒေါသတကြီး တက်ခွထိုးနေသည့်ကောင်လေးသည် သူကိုယ်တိုင်လည်းဒဏ်ရာဒဏ်ချက်များနှင့် ဖြစ်၏ ၅ ယောက် ၁ ယောက်ဖြစ်သည်ကြောင့်အခြေအနေသည် ရုန်းရင်းဆန်ခတ်နှင့်။ ဒီအခြေအနေအတိုင်းဆက်သွားလျှင် ခံရသည့်ဘက်ပိုအလေးသာလာနိုင်သည်ကြောင့် Jame ကိုရှောင်းကျန့်လွှတ်လိုက်ရခြင်းဖြစ်သည်။
ရှောင်းကျန့် ကူမင်ရောက်နေသည့် ၂ ပတ်အတွင်း ပေကျင်းလမ်းမထက် ရိပေါ် ဖြစ်သည့် ရန်ပွဲသည် ၁၀ ပွဲထက်မနည်း။ တစ်ခါတစ်ရံ Jack, Zhan နှင့် ယူဘင်း ပါ ၀င်ပါခဲ့သည်ကြောင့် တိုက်ပွဲအသေးစားလေးပင်ဖြစ်သွားကြသေးသည်ဆို၏ ပေကျင်းကိုပြောင်းပြန်လှန်ဖို့ကြိုးစားနေသည့်ရိပေါ်ကြောင့် ရှောင်းကျန့် ခရီးရောက်ရောက်ချင်း ဒီကောင်လေးဆီတန်းလာရခြင်းဖြစ်သည်။
၃ မိနစ်လောက်အကြာ Jame ရှေ့ ဒူးထောက်လိုက်ရသည့် ၅ကောင်သည် မျက်နှာထက် ဖူးယောင်ပေါက်ပြဲမှုများနှင့်ဖြစ်သည်။ Jame ကိုမြင်ကတည်းက နေရာမှာပင်မရွေ့ ပဲရပ်ကာ ပတ်၀န်းကျင်ကို ကျီးကန်းတောင်းမှောက်လိုက်ကြည့်နေသည်က ကောင်လေးရှောင်းကျန့်ကိုရှာနေလေပြီ။ ကားထဲ မျက်လုံးများမှိတ်ကာခဏနေပြီးမှ ရှောင်းကျန့်အပြင်ထွက်ခဲ့လိုက်သည်။
"Da....Daddy"
ပိုနီးကပ်လာလေ မျက်ခုံးတန်းထင်းထင်းများတွန့်ချိုးလာလေဖြစ်သည့် Daddy ကို မြင်သည်နှင့် ရိပေါ် လက်နှစ်ဖက်အနောက်ယှက်ကာ ခပ်မတ်မတ်ရပ်မိသည်။ စူးရဲရဲမျက်၀န်းတစ်စုံကိုတော့ ရိပေါ် အကြည့်မလွှဲမိ။
