The Love Sleeping Under The Moonlight

Part 1

[Unicode]
___________________________

‌လှပစွာလှမ်းလာသောခြေလှမ်းတွေနဲ့အတူ ထွက်ပေါ်လာတဲ့ ခြူသံလွင်လွင်။‌ရွှေမှုန့်များလူးကျံထားသည့်မျက်ဝန်းတစ်ဝိုက်အောက် က ခပ်ပါးပါးရွှေရောင်ကြိုးမျှင်တန်းသည်သူ၏ မျက်နှာလှလှအား ပဝါပါးခြား၍ကာရံစေသည်။

တင်ပါးအောက်အထိခပ်ပြေပြေကျဆင်းနေသည့်ဆံသားနက်နက်တွေ။ထုံးဖွဲ့မှုမရှိဘဲလွတ်လပ်စွာချထားသည့်မဟူရာဆံနွယ်များက သူ့ရဲ့ လှုပ်ရှားမှုတိုင်းယိမ်းနွဲ့လျက်။

အပြာရောင်ဖြစ်သည့် ပုံမှန်အမျိုးသားဝတ်ရုံကိုဝတ်ဆင်ထားသော်လည်း မတူညီသည်ကတော့ ဖောက်ထွင်းမြင်ရသည့် ဇာအပါးဖြစ်နေခြင်း။

စီးချက်ညီညီချိုးသည့်လက်ချောင်းသွယ်သွယ်များရှိရာအောက်၌ ဝတ်ဆင်ထားသည့်ရွှေကြိုးမျှင်များ။နားနှစ်ဖက်အပေါ်မှဆံပင်များထံ ကုပ်တွယ်တက်ကာ ဆံစကိုထိန်းသိမ်းထားသည့် ကျောက်စိမ်းပါသောရွှေရောင်ကနုတ်ခက်ကထူးခြားလှပစွာတော်ဝင်ဆန်လျက်။

ထိုရွှေကနုတ်ခက်များမှတဆင့် သူ၏တစ်မူထူးခြားသောဖြစ်တည်မှုကိုလှစ်ဟဖော်ပြသည်။

"စုန့်ပြည်ကပါလာတဲ့ တော်ဝင်အမျိုးသားကချေသည်ပါ အိမ်ရှေ့မင်းသား"

"အမျိုးသားကချေသည်"

ကိုယ်ရံတော်လီထိုက်၏စကားအားသံယောင်လိုက်ကာရေရွတ်ရင်း သူ့နှုတ်ခမ်းထောင့်များအပေါ်သို့ကော့တက်သွားခဲ့သည်။

"မင်ဘုရင်မှာကြင်ယာတော်မရှိတဲ့အကြောင်းပြချက်က အရှေ့ကကချေသည်နဲ့ဆက်စပ်မယ်ထင်တယ်"

တစ်ဆက်တည်းပင်သူ့မျက်ဝန်းများက မျက်စောင်းထိုးနေရာ၌ထိုင်နေသည့် မင်ဘုရင်ထံသို့ရောက်သွားလေသည်။ သို့သော်သူထင်သလိုအနေအထားမဟုတ်ဘဲ ထိုကချေသည်အား မနှစ်မြို့သကဲ့သို့ကြည့်နေသည့်မင်ဘုရင်အား‌တွေ့လိုက်ရသည်။

တစ်ချက်သာပြုံးလိုက်ပြီးကပြနေသည့်ကချေသည်အားအာရုံစိုက်မိသည်။ ကဗျာတို့ ဂီတတို့လို အနုအယွတွေကိုမခံစားဖူးပဲ ဓားလက်နက်နဲ့စစ်ပွဲတွေကြားမှာကြီးပြင်းလာသည့်သူ့အဖို့တော့ ထိုအရှေ့မှကချေသည်ကနေသည်က စိတ်ဝင်စားဖို့ လုံးလုံးမှကောင်းမနေဘဲ ခြေချိုးလိုက်၊ လက်ချိုးလိုက်၊ဝတ်ထားတဲ့ဝတ်ရုံစကိုကစားပြလိုက်သာ လုပ်နေသည်ဟုမြင်နေမိသည်။ ကပွဲသာပြီးသွားပေမယ့် အနုပညာဆိုတဲ့အရာကိုဘာမှသေချာမသိလိုက်သည့် ချီနိုင်ငံ၏ အိမ်ရှေ့မင်းသား။