غزل: كلمنِّي.
"قُلت كده وأنا حاطّه إيديا في جيب الچاكيت اللِ أخدتُه منُّه، وإحنا بنتمشىٰ."
آدم: مين؟
"بصلِي وسأل، فَ تنهّدت وقعدت على الرَصيف اللِ جمبي المُقابِل لِـ الكُورنيش.
ثانية ونزل قعد جمبِي."
- عاملة إيه وإزيِّك، فينِك، مبتسأليش ليه!
= جاب رقمِك منين؟
- أنا مَغيرتهُوش!
= شيلتيلُه البلُوك؟
- مَشيلتهُوش، كلمنِي من رَقم تاني.
= وأنتِ رَديتِ؟
- أكيد.
= ليه؟
- إضطريت أرُد.
= عشان؟
- عشان دخلِتُه مكانتش بتوحِي بِـحاجة، رغم إني كُنت عارفة ومُتأكدة إنُه حوار وراه مَغزى.
= ودَخل من أنهي دَاخله بقىٰ؟
- من ناحية عِلميَّة، عِرف إني قسِّمت مواد أخر تِرم على التِرمين الباقيين من نُص تالتة وأوِّل رابعة، معرفش لحِق يعرف إمتى ..بس أخدهَا حِجّه ودخل يسأل عملت كده إزاي.
= وأنتِ عملتِ كده فعلًا؟
"بصيتلُه وقلت.."
- أيوه.
= إمتى ده! مُقولتيليش.
- انتَ مكُنتش هِنا.
= في تليفون!
- أنا ملحقتِش! خلصت الوَّرق 10 الصُبح، 7 بليل كان داخِل يكلمنِي.
"كملت وقولتلُه.."
- وبعدين مَ أنا حكيَّالَك قبل كده على الحوار ده وقلت إني بفكَّر أعمِلُه!
= قلتِ بتفكري، بس مأكدتيش وقلتِ هَتنفذي!
- عرفت معاد التقدِّيم بِـالصُدفة أصلًا، فَ اللِ هو يدُوب جمَّعت الورق والطلَب وقدِمتُه ..اللِ حصل بقىٰ.
= ماشي، كمِّلي.
- قولتلُه على الخطوَّات والتفاصِيل بِـ إختصار، ورشحتلُه حد يساعدُه ويفيدُه أكتر منِّي ..عشان أقفِّل الموضُوع وأخلص كلام معاه بسرعة دون الخوض في أي جوانِب تانية.
= وبعدين؟
"رفعت راسي وبَصيت لِـ السمَا وأنا بكمِّل.."
- قال لي وَحشتيني، قال لي آسف وندِمت وتعِبت وعرفت وإتعلِمت، قال لي خِسرت وحنِّيت ..وأنتِ كسبتِ.
"سكتت كام ثانية، وكمِّلت وأنا ببُص قدامي.."
- قال لِي بحبِك ومش عارف أحِب بعدِك ولا أكمِل من غيرِك، قال لي غِلطت وأنتِ عاقبتينِي وبعدتِ ..حقِك عليا وعلى قلبِي، عُمري مَ هعمل حاجة تزعلِك تاني، قال لي كفايَّه وإرجّعيلي، قال إن السِنين والشهُور اللِ فاتُوا على اللِ كان بينَّا كانت كل يوم بتعرفُه قيمتِي وتأكِّدلُه حبُّه، وإنُّه مُستعِد يعمل أي حاجة ويضحِي بِـكُل حاجة في سبيل إني أرجَّعلُه يوم من الأيام اللِ مَ بينَّا.
"فِضل ساكِت كام دقيقة، وقبل مَ الدمعة اللِ بتحارِب عيني عشان تنزل ..تنزل، قال لي.."
= جعانة؟
"فَ بصيتلُه كده بِـإبتسامة ومتكلمتِش، راح ابتسم هو كمان وسألنِي.."
= تيجي نقوم نجيب حاجة ناكُلها؟
"هَزيت راسي بِـمعنى أه وأنا ببتسِم ابتسامة هادية، فَ قام وقف ومَدلِي إيدُه عشان أقوم أنا كمان."
- الساعة لسَّه مجتش 10، هنلاقي مطاعِم أو كافيهات فين فاتحه دلوقتِ؟
= خليكِ ماشيَّه بس وهتعرفي.
- مكُنتش أتخيِّل انُه ممكن يكُون فاتِح في الوقت ده!
"قلت كده بعد مَ قعدنا وإحنا بناكُل ساندويتشات الكِبدة من عربية الكِبدة المُعتادة اللِ بنجِيب منهَا."
= لأ أنا كنت عارف انُه مش بيقفِل.
- إيه ده يعني بيبَات هِنا؟
= لأ، في واحد أو اتنين معاه كمان ..بيتناوبُوا زي ورديَّات كده.
- أها.
"سكتت كام ثانية أفتكِر حاجة، وبعدين قولتلُه.."
- طعمهَا حِلو؟
= هي إيه؟
- الكِبدة!
= آه بس ...
- فتَّح في مواضيع قديمة إنتهَت من زمان.
"استغرب لما قاطعتُه بِـالكلام الغير المفهُوم ده، فَ قال.."
= هو إيه ده؟
- نبِّش في ذكريات فات عليهَا سِنين، وأيَّام من بُعدهَا ناسيَّه ملامِحهَا.
= ....
- حاوِّل يفكرنِي بِـ اللِ فات واللِ عدىٰ واللِ ضاع واللِ مش هيتعوَّض، جاي يقول عايز فُرصة أخيرة بعد المليُون فُرصة أخيرة اللِ أخدهُم، فِضل يقنعنِي إنُّه إتغيَّر وإني أكيد أنا كمان حَنيت وإستنيت وإتمَنيت، وكفاية مُكابرة وبُعد لِحد هِنا.
= كِفاية.
"بصيتلُه بِـصدمة وأنا بقول لُه.."
- كفاية إيه؟ بُعد!!
= كفاية كلام عنُّه وعن اللِ قالُه، أنتِ بتعيَّطي.
- عنُه ايه! أنا بعيَّط عشان الكِبدة حراءة!
"قلت كده وعيَّطت أكتر، فَ ضحك وقال لي.."
= مش أنتِ اللِ قولتيلُه يحُط فِلفِل غير الشَّطة!
- بس مكُنتش أعرف إنُه هيطلَع حَراء أوي كده.
= هو قال لِك مش هتقدري تستحمليهَا وأنتِ اللِ صممتِ.
- مكُنتش أعرف انُه لِـ الدرجة دي ..كُنت فاكراه بيأڤور، فَ قلت أجرب عشان أتأكِد.
"مَدلِي إيدُه بِـمنديل وقال لي.."
= وجربتِ؟
"أخدت مِنُه وقلت.."
- جرَبت، عشان كده مش هقول لُه اللِ قولتُه تاني.
= قولتيلُه إيه؟
- إنسىٰ، وإبعِد وكمِّل من مكان مَ جيت، قولتلُه إن إمبارح مش فاكراه ..وبُكرة راسمَاه وإنتَ مش فِيه، وإن الدُنيا ودِّت وجابِت وغيَّرت وعدِّلت مفاهِيم ووَضحِت حقايق.
"أكلت جزرة من المِخلل اللِ قدامي وكمِّلت.."
- قولتلُه إن أنا كمان إتعلِمت، وندِمت ..عشان أخدت كل الوقت ده لِـحد مَ إستوعِبت إني لازم أمشي، قولتلُه إن الأيَّام اللِ كانت بتعدِّي بِـبُطء عندُه مكُنتش باخُد بالي إنها بتمشي ..من سُرعتهَا، بعد مَ كانت واقفة مَبتعدِّيش، وقولتلُه إني إتعوِّدت على عدم وجودُه وتقبّلتُه وتعايَّشت معاه، وإني مادام إتعوِّدت على عدم وجودُه مش هيفرق معايَّا غيابُه ..ولو مَفرقش معايا غيابُه يبقىٰ هوَّ شخصيًا مش فارِق ولا مُهم في حياتي.
"بصيتلُه وكمِّلت.."
- قولتلُّه يرضيك تبقىٰ موجُود زي مش موجُود، مُختفي زي مش مُختفي، عملت زي مَعملتِش ؟!
مَردش ..فَ قولتلُه أنا مرضهَاش ليك.
= وقال لِك إيه؟
- كلام مَيختلفش كتير عن اللِ إتقال فوق، فَ سيبتُه يخلَص كل اللِ عندُه ..وفي الأخر قولتلُه حوار لطيف ياريت مَيتكررش تاني، وعملت بلوك وقفلت التليفون خالص وأنا بغني وبقول .. لَو جاي في رجُوع إنسَانِي!
= شُوفلَك موضُوع تاني.
- أرجع ليه للِ آذانِي وعليا بِـ إيه!
= متقلِّبليش في موَاجِّع.
- وقتَّك ده خلاص بقىٰ ضايِّع.
"فِضلنا نضحك شويَّة، وبعدين قال لي.."
= ده إنتَ لما حكيتيلي في الأول إفتكرت كلامِك هيخلَص على إنِّك رجعتِ، وزعلانة أوي كل ده عشان مش عارفة تقوليلي إزاي!
- أرجع إيه أكيد لأ، وبعدين حتَّى لو ..كُنت هَرجع بِـالبساطة والسهُولة دي، ومن من غير ما أتناقِش معاك كمان؟
= أومال ليه كنتِ زعلانة ومتضايقة وبتعيَّطي الأيام اللِ فاتت وناقِص تنتحري ..لسَّه بتحبِيه مثلًا؟
"حطيت إيدي على خدي وأنا بقو لُه.."
- سألتنِي سؤال بحاوِّل مسألهُوش لِـنفسي بقالي كام يوم.
= بتهربِي مِن إجابتُه ليه!
- عشان مش عارفاهَا، بجد مش عارفة اللِ حسيتُه وقت مَ رجع دي كانت بواقِي مشاعِر حُب، ولا عِشرة ولا حنين ولا تعوُّد ولا إيه! بس أنا هبقى كمِلت وعِشت ورُوحت وجيت إزاي من غيرُه لو أنا لسَّه بحبُه فعلًا؟ هو مش إحنا بنبقىٰ بنحِب ناس ولما بنبعِد عنهُم بنتعافىٰ منهُم ونتخطَّاهُم ونتجاوِّزهُم ونكمِل عادي؟
= بس مش شرط نبطّل نحبهُم!
- ومش كُل اللِ بنحبهُم ينفع نعيش معاهُم، صح؟
= صح.
- وبعدين يَـ سيدي خلينَا نفترض إني لسّه بحبُه، هل كُنت هرجعلُه ؟! الإجابة لأ، يبقى مفيش موضُوع أصلًا، بنتناقِش في إيه بقىٰ!
= بحاوِّل أخليكِ تتعرفِي على المشاعِر اللِ حسيتِ بيها وقتهَا وتفهميهَا، عشان متقوليش إنِّك تايهه بعدين.
"فِضلت ساكتة 5 دقايق وبعدين تنهدت وقولتلُه.."
- يمكِن إتضايقت عشان فكّرنِي بِـحاجات كُنت فاكرة إني نسيتهَا وطلِعت فاكراهَا، يمكِن إتعصّبت عشان رَديت عليه وسَمحتلُه يكلمنِي بعد مَ قررت بيني وبين نفسي إن ده هَيبقىٰ أبعد شيء عنُه وهَيفضل يتمنّاه طول عمرُه، أو يمكِن زعلت تاني ..عليّا وعلى اللِ ضاع منِي معاه واللِ قدمتُه ليه، لكن إللِ مُتأكدة منُه إني مندمتِش ولا صِعب عليا اللِ كان بينَّا ولا حسيت لِـ لحظة إني عايزة أرجع، وده معناه إني كنت صَح وقتهَا ..ودي أهم حاجة عندي بجد.
= أسافِر اسبُوع يَـ غزل أرجع ألاقي اللغبطة والكركبة دي؟ ده أنا مكملتِش إسبُوع كمان!
"ضحكت وقولتلُه.."
- قولتلَك من الأول متسافِرش، إنتَ اللِ مسمعتِش الكلام.
= مَ أنا لو مكُننش سافرت بردو مكُنتش هعرف إنك بقيتِ جامدة وبتعرفي تاخدي قرارات لوحدِك وتشقلبِي حياتِك وترجعيهَا تاني.
- عيب بعد كل الوقت ده معاك وأبقىٰ لسَّه متعلمتِش، ده انتَ ماشي تدينِي كُورسات في كيفية حل المشاكِل والتعامُل مع الأمور وإنتَ بتحللي مشاكلي.
= مش عارف من غيري كنتِ هَتعيشي إزاي واللهِ!
- آه بجد مش عارفة لو مكُنتش موجُود مين اللِ كان هَيقوم يجيبلِي بيبسي دلوقتِ بعد الكِبدة دي.
= أيـ ..أنتِ قلتِ إيه!
"هو إفتكرنِي هأكِّد على كلامُه في الأول، لِحد ما إستوعِب باقي الجُملة."
- عايزة بيبسي.
= المشوَّار ده جه عليّا بِـخسارة.
- مش إنتَ اللِ مصحينِي من النُوم بدري، ومصربعنِّي وموَّترنِي ومحسسنِي إن العالَم بينتهي وعامِل إزعاج وضوضاء على الصُبح!
= يعني مش مُهم إنك خوفتينِي وقلقتيني عليكِ وجبتينِي من هِناك لِـ هِنا في ساعات معدُودة، لكن المُهم إني صحيتِك من النُوم بدري.
- ونزلتنِي في البَرد.
= ولا مُهم بردو إنِّك واخده الچاكيت بتاعي وسايباني أنا سقعَان.
- مجبتِش چاكيت كمان معاك ليه!
= وأنتِ مَجبتش معاكِ أنتِ ليه، ولا لبستِ حاجة تقيلة قبل مَ تنزلي ليه؟
"رَديت بِـعصبيّة مُصطنعة.."
- عشان إنتَ فضِلت تزِّن وترِّن، فَ خضتنِي وإستعجلتنِي وكنت ناسيّه نَفسي أصلًا!
= يعني أنا اللِ طلعت غلطان في الأخِر! ده خيرًا تعمِل شُكر متلاقيش بجد.
- لو ملقتش بيبسي هات كوكاكولا يَـ آدم.
